KJOAʼMIYA 37
Jótso Biblia xi tʼatsʼe xá kao tʼatsʼe tao̱n
A sakʼoa nʼio nikjáojin kʼianga matsínli xá kʼoa tsa tao̱n. Sakʼoa ñʼai maná nga kʼoakji bijnyiʼa kaoñá yaoná kʼoa kʼoakji nixá kaonilee je Jeobá. Ya Biblia tsjoáná kjoafaʼaitsjen xi koasenkaoná jokoa̱n sʼiaan.
1. Jótso Biblia xi tʼatsʼe xá
Je Niná kui xi mele nga tsjoa sʼe̱ tokoán nga si̱xá. Je Biblia kʼoatso nga “tsínsa jmeni xi ngisa nda tikʼoajinni [...] nga katabe [je chjota] kjoanda xi tjenkao jokji nʼio síxá” (Eclesiastés 2:24). Je Jeobá nʼio síxá. Kʼoa kʼianga kʼoati nʼia josʼín nda sʼe tokoán nga̱ jé tichjenngilee kʼoa chjotanixá kjimaa.
Nʼio chjíle nga nixá, tonga alikui koa̱n nga kui títjon xáná si̱kʼéjnaa tikʼoajinni je Jeobá (Juan 6:27). Je Jeobá kʼoatso nga je tsjoáná jmeni xi machjénná kʼiatsa kui títjon si̱kʼéjnaa xi tʼatsʼe.
2. Jókji kjoandosin tjínnele kʼoailee je tao̱n
Ningalani kʼoatso je Biblia nga basenkaoná je tao̱n, tonga kʼoati tso nga likui kui xi tsjoa báya tokoán (Eclesiastés 7:12). Je Biblia kʼoatso nga likui koa̱n nga kjoanyiná kjuintʼalee kʼoa itso kjoafaʼaitsjen xi tsjoáná: “Tʼejngo takon kao xi jetjínno” (tʼexkiai Hebreos 13:5). Kʼianga tomajngoni tokoán jmeni xi tjínná, alikui kui nimetokoán nga ngisa tse tao̱n sʼe̱ná kʼoa kʼoati tsín tao̱n mjetʼén yaoná (Proverbios 22:7). Alikui kjoa biyojiaan tojo ma je chjota xi tao̱n sískáni kʼoa alikui kui nikjaʼaitsjeen josʼiaan nga ngisa ngotjo koa̱nnyináñá.
3. Jósʼin si̱chjén je tao̱nná
Je Jeobá tjotʼaa jmeni xi tjínle, kʼoa je chjenngilee kʼianga tjotʼaa kʼoa nga bʼailee xíngiaa jmeni xi tjínná (1 Timoteo 6:18). Jngo koya josʼin koa̱n si̱chjén je tao̱nná, kuinga kʼoainganʼioá ya jinjtín nga̱ tao̱n feya kʼoa nga kuinyakoaa je ndsʼee xi nganʼio machjénle. Je Jeobá ali tsakuijin kuenta sʼín jotjín tao̱n batioá, xi kuenta sʼín kui jotjín je ni̱ma̱ná. Tsa ñaki ni̱ma̱ná kjuinroajinni nga tjótʼaa jmeni xi tjínná, tsjoa sa̱tío tokoán kʼoa tsjoa sʼe̱ kon je Jeobá (tʼexkiai Hechos 20:35).
KATAʼYASAI JME XI TÍNCHJA̱NI
Kataʼyala jme kjoanda xi tjenkao kʼianga chosonnilee jokji nixá kʼoa nga tomajngoni tokoán jmeni xi tjínná.
4. Chʼa̱sjengʼaní Jeobá tsa chjotanixá mai
Kʼoasʼin bakoñá jokji tsjoachaa je Jeobá josʼin ʼyatokoán je xáná. Chótsenlao VIDEO kʼoa cho̱bayaño jebi.
Jméni xi ngisa sasénli josʼin síkjaʼaitsjen je Jason kʼoa josʼín ya tʼaxále.
Jósʼín je Jason nga tsínkui ngisa nʼio tsjoále kjoandosin je xále.
Tʼexkiao Colosenses 3:23, 24 kʼoa cho̱bayaño jebi:
Ánni ndatjínsíni nga ñaki kao kjoatsjoa si̱xá.
Ndatjín nga nixá. Tonga alikui koa̱n nga kui xáná ngisa kʼoailee kjoandosin tikʼoajinni je xále Niná
5. Jósʼin basenkaoná nga tomaniná jmeni xi tjínná
Nkjín chjota xi kui mele nga sa tse sa tse tao̱n katasʼele. Tonga je Biblia ali tsakuijin kjoafaʼaitsjen tsjoáná. Tʼexkiao 1 Timoteo 6:6-8 kʼoa cho̱bayaño jebi:
Jmé kjoafaʼaitsjen xi tsjoáná je Biblia.
Koaan tsjoa sʼe̱ tokoán ninga tochoa tao̱n tjínná. Chótsenlao VIDEO kʼoa cho̱bayaño jebi:
Ánni tsjoa tjíoni kon je familia jebi ninga tochoa tao̱n tjínle.
Jósʼin kuichomani tsa jetjínná tao̱n tonga tsa ngisasa tse mená. Je Jesús jngo choa̱ tsakʼéjna kʼianga kitsoya josʼin kuichomani. Tʼexkiao Lucas 12:15-21 kʼoa cho̱bayaño jebi:
Jméni xi bakóyali je choa̱ xi kisichjén je Jesús (chótsenlao versículo 15).
Tʼexkiao Proverbios 10:22 Kʼoa tingósonkao 1 Timoteo 6:10. Kʼoa cho̱bayaño jebi:
Jósingái ji, jméni xi ngisa nʼio chjíle, a kuinga miyoná katama je Jeobá axo kuinga nʼio tse tao̱n katasʼená. Ánni.
Jósʼin kuichomani kʼiatsa nʼio si̱metokoán je tao̱n.
6. Je Jeobá tsjoáná jmeni xi machjénná
Kʼianga matsínná xá kʼoa kʼianga ñʼai maná tao̱n, basenkaoná nga ʼyaa a jé Jeobá ninʼiotʼaa yaoná. Chótsenlao VIDEO jósʼiaan nga je Jeobá si̱nʼiotʼaa yaoná kʼianga kui kjoa bitjatojiaan, kʼoa xijekoa̱n, cho̱bayaño jebi:
Tojosʼin kaʼyaa je video, jmé kjoa xi jaʼatojin je ndsʼee.
Jméni xi kisʼin nga kichokjoajinle je kjoa xi jaʼatojin.
Tʼexkiao Mateo 6:25-34 kʼoa cho̱bayaño jebi:
Jótso je Jeobá, jósʼin sichikontʼain je xi kui ngisa tsjoále kjoandosin xi tʼatsʼe.
TJÍNKʼA XI I̱ TSO: “Tjínnele nʼio sixá ánni nga so̱koʼanina je familiana. Alikui kʼoakoa̱nna nga kjitʼa kjuía je kjoajtín xi satíoná”.
Jñánile je texto xi basenkaoli nga ʼyai nga ngisa nda nga kui xále Jeobá títjon nikʼéjnaa.
XI KACHOTʼAYÁ
Ndatjín nga nixá kʼoa je tao̱n basenkaoná, tonga alikui koa̱n nga kui kʼoechjoaná nga si̱xálee je Jeobá.
Jmé xi kamajinli
Jméni xi koasenkaoli nga tsín si̱kʼatonai choa̱le jokji kjoandosin kʼoailai je xá.
Jósʼin basenkaoná nga tomaniná jmeni xi tjínná.
Tsa kʼoatso je Jeobá nga tsjoále je choʼndale jmeni xi machjénle, jósʼin koakui nga je ninʼiotʼai.
XI KOASENKAOSALI
Kataʼyai tsa kʼoatso je Biblia tsa chʼaotjín nga tao̱n sʼená.
“Jótso je Biblia xi tʼatsʼe tao̱n” (Yaa faʼaitʼa ya Internet ya jw.org)
Kataʼyai kʼiáni nga sasénle je Jeobá nga tjín xi bʼé.
“Jótso je Biblia tʼatsʼe kʼianga tjín xi bʼé” (Yaa faʼaitʼa ya Internet ya jw.org)
A chʼaotjín nga tao̱n niskánilee.
“Jótso Biblia: Nga tao̱n niskánilee” (¡Despertad!, marzo de 2015)
Kataʼyai jméni xi tsakasenkao jngo chjota nga tsín titao̱n kisiskánile kʼoa nga tsín tikisichéni.
“Nʼio tsjoake̱ koan nga tao̱n kinile jña tokanacha je naxín” (La Atalaya, 1 de noviembre de 2011)