KJOAʼMIYA 40
Tsje sʼiaan kʼoa tsje kjuinkoaa yaoná josʼin sasénle Niná
Cha̱niyalai jkui jngo na̱ xi tísíkánda je tiʼndíle nga tífi skuela. Kuenta sʼín tsa tsje kji, tsa tsje kjoan najñole kʼoa tsa nda kji. Kui xi basenkao nga tsín ngotjo ngosa tjochʼinnile kʼoa kʼoasʼin beni xi ngikʼa nga síkuinda xijchále je tiʼndí jebi. Kʼoatisʼinni je Jeobá, Nʼainá mani kʼoa tsjoakená kʼoa kui xi mele nga tsje sʼiaan kʼoa nga tsje kjuinkoaa yaoná. Tsa tsje sʼiaan, tiñá xi nda kuiyoñá kʼoa nda kʼoaxki̱ je Niná.
1. Jmé xi tjínnele sʼiaan nga tsje sʼiaan
Je Jeobá itsoná: “Tsje katamao nga jon” (1 Pedro 1:16). Tsa mená nga tsje sʼin kuiyoaa ngixko̱n Niná, tjínnele tsje kjuinkoaa yaoná kʼoa tsje sʼiaan. Machjén nga kuindóyaa, nga tsje kjoan najño chʼa̱kjá, nga ni̱tsjee ndʼianá, nga ni̱tsjee tsa carro tjínná kʼoa nga kuinyaxkoá tsojmi xi tjíoná. Kʼoa kʼoati nitsjee ya Ndʼia jña chotʼayá. Tsa tsje sʼiaan, je chjota kʼoati nda sikʼaxki̱ je Jeobá (2 Corintios 6:3, 4).
2. Tsa mená nga tsje koaan, jméni xi tjínnele chja̱ʼaxinlee yaoná
Ya Biblia itso: “Si̱tsjeyalee yaoná ngayije xi chʼao kjoan xi tsʼe yaoná, kʼoa xi tsʼe espírituná” (2 Corintios 7:1). Kuinga chjaʼaxinnilee yaoná je xi síkitsónná kʼoa kao je xi síkitsón kjoafaʼaitsjenná. Kui xi mená nga katasasénle je Jeobá josʼin nikjaʼaitsjeen, kuinga tsínkui chaniyañá jkoaa je xi kjoajndí tjenkao (Salmo 104:34). Xi ijngosani, kʼoati nikuindaa yaoná nga tsín chʼao tso én nokjoaa (tʼexkiai Colosenses 3:8).
Jmésani xi kʼoati síjndí yaoná kʼoa xi chʼaosʼin síkatíoná ngixko̱n Niná. Nkjín koya tjínni xi síkiʼaonná. Tsa na̱jno̱ chjén, tsakui kuijndáyaa je xka̱ xi droga tjínle, tsakui chi̱nee je xki xi kui tjínle kʼoa tsa jmesani xi droga tjínle. Nga tsínkui nikoaa je xi droga tjínle kʼoasʼin nikuindañá yaoná kʼoa kʼoasʼin bakoñá nga chjí ʼyaa je kjoabijnachonná. Xi ijngosani, tsa mená nga tsje sʼin kuiyoaa ngixko̱n Niná machjén nga chja̱ʼaxinlee yaoná ngayeje xi jndí síkatíoná, jolani nga yaoná nitjosjeyalee kʼoa tsa pornografía chotsenlee (Salmo 119:37; Efesios 5:5). Tsakui nichxin ñʼai koa̱nná nga si̱katioá jmeni xi jekoanngakaole yaoná, tonga je Jeobá tíjnandaa nga koasenkaoná (tʼexkiai Isaías 41:13).
KATAʼYASAI JME XI TÍNCHJA̱NI
Kataʼyala jósʼin nda bʼaxki̱ je Jeobá nga tsje nʼia kʼoa jméni xi sʼiaan nga chja̱ʼaxinlee yaoná jmeni xi jekoanngakaoná.
3. Nga tsje nʼia jé Jeobá nda bʼaxki̱
Kʼianga bʼexkiaa je kjoatéxoma xi kitsjoale Jeobá je chjota israelita, ʼyañá nga kui xi mele Jeobá nga tsje sʼiaan. Tʼexkiao Éxodo 19:10 kao 30:17-19 kʼoa cho̱bayaño jebi:
Tojo tso je texto xi kabʼexkiaa, jókji chjí be Jeobá kʼianga tsje nʼia.
Jméni xi tjínnele sʼiaan tsa mená nga tsje sóyoaa.
Nichxin tjenkao kʼoa xá tjenkao nga tsje nʼia. Tonga koaan kʼoasʼiaan ni tjínná kʼoa ni tsínná tao̱n kʼoa tojñani tiyoaa. Chótsenlao VIDEO kʼoa cho̱bayaño jebi:
Tsa skoe̱ je chjota kʼianga tsje nʼia, a kuinyakao nga ngisa skoe̱xkón je Jeobá. Ánni.
4. Chja̱ʼaxinlai yaoli jmeni xi síkiʼaonná
Je Jeobá koasenkaoná nga si̱katioá jmeni xi jekoanngakaoná
Tsa na̱jno̱ chjain kʼoa tsa droga nichjain tochale nʼio ñʼai mali nga nikʼéjnai. Je xi koasenkaoli kuinga si̱kjaʼaitsjenjin josʼin títsjoáchʼinli. Tʼexkiao Mateo 22:37-39 kʼoa cho̱bayaño...
jósʼin bʼejna xi kao Jeobá jngo chjota xi na̱jno̱ kʼoa xi droga síchjén.
jósʼin bʼetʼale familiale kʼoa kao xi kjaʼaí chjota.
Tikjaʼaitsjain, jméni xi koasenkaoli nga si̱katíui jmeni xi jekoanngakaoli.a Chótsenlao VIDEO.
Tʼexkiao 2 Corintios 4:7 kʼoa cho̱bayaño jebi:
Jósingái ji, a koasenkaoná nga si̱katioá jmeni xi jekitsjentʼalee tsa ntsjaintsjai kʼoétsʼoaa, tsa nyaon nyaon chótʼayá je Biblia kʼoa tsa ntsjaintsjai koanngián je kjoajtín. Ánni.
5. Si̱katioá je kjoajndí xi jekoanngakaoná kʼoa kao xi kjoajndí kaníya je jkoaa
Tʼexkiao Colosenses 3:5 kʼoa cho̱bayaño jebi:
Jómani ʼyaa nga nʼio jndí tíjna ngixko̱n Jeobá kʼianga pornografía chotsenlee, tsa foto kʼoa tsa video si̱kasénlee je xi kjaʼaí xi kjoajndí ska̱niya jko̱, kʼoa tsa kʼiaje̱ nga tiñá si̱tjosjeyanilee yaoná.
Jósingái ji, a ndatjín nga kʼoatsoná je Jeobá nga tsje kjuinkoaa yaoná. Ánni.
Kataʼyai jókoa̱n sʼiaan nga si̱katioá je xi kjoajndí kaníya jkoaa. Chótsenlao VIDEO.
Je Jesús jngo choa̱ kisichjén xi basenkaoná jokoa̱n sʼiaan kʼianga tsje kjuinkoaa yaoná. Tʼexkiao Mateo 5:29, 30 kʼoa cho̱bayaño jebi:
Je Jesús ali tsakuijin xi kitso nga yaoná si̱kiʼoaan, kui xi kitso josʼiaan nga tsje kjuinkoaa yaoná. Jméni xi tjínnele sʼiaan nga tsínkui cha̱niyaa jkoaa je xi kjoajndí tjenkao.b
Tsa ñʼai kjimali nga tinikʼéjnai je xi kjoajndí kaníya jkui, je Jeobá chjí be jokji tibʼenelai yaoli. Tʼexkiao Salmo 103:13, 14 kʼoa cho̱bayaño jebi:
A koasenkaoli versículo jebi nga tosi tonda kʼoénelai yaoli kʼiatsa ñʼai kjimali nga tinikʼéjnai je xi kjoajndí tjenkao. Ánni.
Ali nixa̱njinlai tsa tikui kjoa ska̱jinngáni
Tsakui nichxin sakʼoa toʼi̱ kuixoán “Tikʼoakasʼinngáña, likʼiala tjóxinna”. Tonga, tikjaʼaitsjenlai tsa jngo chjota xi títokanacha ska̱tsʼotjen, ali tsakuijin xi tsonile nga jekasícha kʼoa tsa tjínnele ya koai ijngokʼa jña kabʼétsʼiakaoni nga tóka ijngokʼa. Tikʼoasʼinni, tsa tikui kjoa ska̱jinngáni je xi jekoanngakaoli, ali tsakuijin xi tsonile nga tsínkʼia si̱kʼéjnai. Xi ijngosani, ali tsakuijin xi tsonile nga toxitsjoa jokji jetsakʼenelai yaoli, toxá kʼoamani nga tikui kjoa tsaojinngáñá, ali nixa̱njinlai. Jé Jeobá koasenkaoli nga si̱kʼéjnai je kjoajndí xi jekitsjentʼalai.
TJÍNKʼA XI I̱ TSO: “Jenʼio kitsjentʼale, alikʼiajin tisikʼéjnaña”.
Jñánile je texto xi koakolai je chjota nga toje Jeobá xi koa̱nle koasenkao nga sikʼéjna jmeni xi jekitsjentʼale.
XI KACHOTʼAYÁ
Tsjoa sʼe kon je Niná kʼianga tsje nʼia, nga tsje tjío je kjoafaʼaitsjenná kʼoa nga nda mangínkoaa yaoná.
Jmé xi kamajinli
Ánni nga nʼio chjínile nga tsje koaan.
Jméni xi machjén nga sʼiaan kʼianga tsje sóyoaa kʼoa nga tsje si̱choaan.
Jméni xi machjén nga sʼiaan nga nda kjuinkoaa yaoná kʼoa nga tsje katasʼe kjoafaʼaitsjenná.
XI KOASENKAOSALI
Ningalani ma̱ tinijchá yaoná, jméni xi koa̱n sʼiaan nga tsje sʼiaan.
Kjoafaʼaitsjen xi koasenkaoli nga tsín tina̱jno̱ chjénni.
“Xi koasenkaoli nga tsín tina̱jno̱ chjénni” (¡Despertad!, mayo de 2010)
Kataʼyai jósʼin síkiʼaonná nga pornografía chotsenlee.
“Je pornografía, a síkiʼaonná axo tsín josíkaoná” (Xo̱n xi Bájinkonná, 1 sá agosto nó 2013)
Kataʼyai jméni xi tsakasenkao jngo chjota nga tsín tikui pornografía kiskotsennile.
“Nkjín kʼa nga tikui kjoa kiskajinngáña tonga chaan kisikʼéjna” (La Atalaya, núm. 4 2016)
a Ya jñani “Xi koasenkaosali” tso, ya jñani “Xi koasenkaoli nga tsín tina̱jno̱ chjénni” tso, yaa faʼaitʼa jokoa̱n sʼiaan nga si̱katioá jmeni xi jekitsjentʼalee.
b Nga jchai jókoa̱n sʼiain nga tsín tiyaoli si̱tjosjeyanilai, tʼexkiai je libro Lo que los jóvenes preguntan. Respuestas prácticas, volumen 1, ya capítulo 25, jñani tso: “¿Podré vencer el hábito de la masturbación?”.