“Jekoansjainajin je Mesías”

Kʼianga jetsʼato ñato siento nó jaʼato nga kichji je libro xi tsʼe Miqueas kitjoson je én xi tongini kitso. Jméni xi koan. Je Jesús, xi tsonile je Mesías, yaa kitsin ya Belén. Kʼoa nga jekichoka kante nó kʼianga nó 29, kʼoati kitjoson jmeni xi tongini kitso je profeta Daniel josʼin nga jchanile ʼyani je Mesías. Nó jebi, kʼiaa kisʼenngindá je Jesús kʼoa je Niná kao nganʼiotsjele kiskoejinni. Je ntje̱ xi tíchoyale, xi tsonile, je Mesías, kʼoakjoán jaʼai jotso én xi tongini kinokjoa.

Kʼoa nga jekisʼenngindá je Jesús, tiʼakʼia tsakʼétsʼiakaoni nga kikakóya “je énnda xi tʼatsʼe kjoatéxomale Niná” (Lucas 8:1). Tojo tso én xi tongini kinokjoa, je Jesús nʼio ndʼé koan kʼoa ñaki koanndosinle xi tʼatsʼe chjota. Jmeni xi tsakakóya nʼio tsakinyakao chjota, kʼoa kisindaya tojokji chjotani xi “chʼin” tjínle. Nga kʼoakisʼin, kui xi tsakakó nga ñaki nda kisʼele Niná xi tʼatsʼe (Mateo 4:23). Je chjota xi kitjenngile, xi sʼa ʼndí kao xi chjotajchínga, kʼoati kitso jokitso jngo chjotale Jesús, kitso: “Jekoansjainajin je Mesías” (Juan 1:41).

Je Jesús tongini kʼoakitso jmeni xi koa̱n kʼianga kjesa batéxomajin i̱ Sonʼnde. Sʼee kjoajchán, cháonnʼio, kʼoa xi kjaʼaísa kjoa. Kʼoa itso kjoafaʼaitsjen xi kitsjoa: “Tje̱nyatokon tiyo” (Marcos 13:37).

Je Jesús alijme jée kisʼele kʼoa kisitjosonle ngantsjai je Niná. Tonga kisʼe je chjota xi kontra tsakatiole kʼoa saʼnda kisikʼien nga jekoanni. Xi totʼatsʼe kjoabiyale Jesús koaan tjoéniná jmeni xi kisicha je Adán kao Eva: je kjoabijnachon xi tsínkʼia fetʼa ya sonʼndenaxó.

Kʼoati kitjoson je én xi tongini kinokjoa nga si̱kʼien je Jesús kʼoa nga koa̱njanni nichxin kjoaʼáyanile nga espíritu koa̱n ijngokʼa kʼoa nga nʼio tse nganʼio sʼe̱le. Kʼianga jejaʼáyanile, ñandia kʼianga tsʼatola aon siento mani chjotale xi tsʼatsenle. Kʼianga kjesa fijin ya ngʼajmi je Jesús, kʼoakitsole je chjotale nga katatsoyasonle “ngatsʼi naxinandá” xi tʼatsʼe kʼoa nga je koatexoma (Mateo 28:19). Jósʼin kisitjoson je chjotale Jesús je xá xi tsakánele.

(Yaa yʼangini Mateo, Marcos, Lucas, Juan kao 1 Corintios.)