“Tsjoacha katamai je xíngi josʼin nga tsjoachai je yaoli”

“Je xi majaoni [kjoatéxoma] kui jebi: Tsjoacha katamai je xíngi josʼin nga tsjoachai je yaoli.” (MAT. 22:39, TNM)

JMÉ XI KAMAJINLI

ʼYáni xi xíngiaa.

Ánni tjínnesínile koakolee kjoatsjoacha je xíngiaa, kʼoa jósʼin koakolee nga tsjoachaa.

Jósʼin tíjna xi ñaki kjoatsjoacha ʼmi tojo tso ya 1 Corintios 13:4-8.

1, 2. 1) Jókitso je Jesús, jñánile xi majaoni kjoatéxoma xi ngisa nʼio chjíle. 2) Jméni xi koakoyaná kjoaʼmiya jebi.

KʼIANGA jngo chjota fariseo kiskonangile je Jesús jñánile kjoatéxoma xi ngisa chjíle, je Jesús i kitsole: “Tsjoacha katamai Jeobá Nináli kao ngayeje ni̱ma̱li, kao ngayeje kjoabijnachonli kʼoa kao ngayeje kjoafaʼaitsjenli”. Je kjoaʼmiya xi jaʼato jetsakakóyaná josʼin tsoyanile jebi. Tonga xijekoan je Jesús kui kisikʼaxki̱ xi mani jao kjoatéxoma xi kʼoati nʼio chjíle, i kitso: “Tsjoacha katamai je xíngi josʼin nga tsjoachai je yaoli” (Mat. 22:34-39, TNM).

² Je Jesús kʼoakitso nga tjínnená nga tsjoacha koaan xíngiaa josʼin nga tsjoachaa yaoná. Tonga ʼyáni xi xíngiaa mani. Kʼoa jósʼin koakoá nga tsjoachaa. Nga jao kjoachjonangi jebi, i koakoyaná kjoaʼmiya jebi.

ʼYÁNI XI XÍNGIAA MANI

3, 4. 1) Jmé choa̱ xi kisichjén Jesús kʼianga tsakakóyale je chjota xi kiskonangile ʼyáni xi xínkjín mani. 2) Jósʼin tsakasenkao je chjota samaritano je chjota judío xi kinikiʼaon. (Chótsenlai sén xi faʼaitʼa ibi.)

³ Jngo chjota xi i̱ kitsole Jesús: “ʼYáni xi xíngiaa”. Kʼoa je Jesús jngo choa̱ tsakʼéjnale xi tʼatsʼe jngo chjota samaritano xi nda chjota koan kʼoa tsakakóyale josʼin tíjna nga tsjoacha maa xíngiaa (tʼexkiai Lucas 10:29-37). Kʼoakitsole nga jngo chjota judío koanchéle, kisatele kʼoa ñaki me kinikʼien ya yandiaa. Kʼoa jngo naʼmi jaʼa kʼoa xijekoan kʼoati jaʼa jngo chjota levita. A tsakinyakao chjota jebi. Mai. Kʼianga tsabe tojaʼatʼale. Je xi koanle kjoanda nga tsakasenkao jngo chjota samaritano. Kʼianga kui nichxin je chjota judío kao chjota samaritano likui tsjoake xínkjín (Juan 4:9).

⁴ Kʼianga koa̱nnda jña kitsiʼaon je chjota judío, je chjota samaritano siti̱ kʼoa bino kisikajon. Xijekoan, yaa kikao jngo niʼya jñani ma nikjáya kʼoa jao denario kitsjoale je naile niʼya kʼianga katamasinle je chjota judío. Tao̱n xi kitsjoale jao nichxin njenile chjota nga síxá (Mat. 20:2). Sasa machoyaniná nga je chjota samaritano xi tsakakó nga tsjoake xínkjín. Je choa̱ xi tsakʼéjna Jesús kui bakóyaná nga koakolee kjoatsjoacha kao kjoamatokon ngatsʼi je chjota kʼoa nga tsínkui koanngínñá jñani tsʼe kʼoa jme kostumbre xi tjínle.

5. Jósʼin tsakakó je testigole Jeobá nga tsjoake xínkjín kʼianga jaʼa huracán xi Sandy ʼmi.

⁵ Je nichxin xi totífikjetʼa tiyoaa ndʼaibi, alikui tinanda ʼya tjínni chjota xi tjínle kjoamatokon; nʼio nkjín xi tsʼen kʼoa xi tsín tsjoake je xínkjín (2 Tim. 3:1-3). Tobʼelañá, kʼianga jaʼa je huracán xi Sandy ʼmi ya naxinandá Nueva York kʼianga tífe sá octubre nó 2012, ya ʼnde jñani nʼio tsakʼetʼale tjínkʼa chjota xi kisiché ngayeje tsojmile ʼndíchjota xi jetsínle lʼí kʼoa xi jetsínle tsojmi xi tjíosíchjén. Xi tiyani ʼnde jebi, je testigole Jeobá kʼoasʼin tsakʼéndajin nga tsakinyakao xínkjín kʼoa kao xi kjaʼaí chjota. Kuinga kʼoanʼiañá xi chjotale Cristo maa nga tsjoachaa xíngiaa. Tonga jósasʼin koakoá nga tsjoachaa xíngiaa.

JÓSʼIN KOAKOÁ NGA TSJOACHAA XÍNGIAA

6. Ánni nga kjoatsjoacha bakosínilee xíngiaa kʼianga ʼmiyalee je énnda chjotse.

⁶ Kʼuínyalee je Énle Niná xíngiaa. Kʼianga ʼmiyasoán, bʼailee chjota je “kjoanijetakon xi tjínle xo̱n Escrituras” (Rom. 15:4). Kʼianga ʼmiyalee je énnda chjotse xi tʼatsʼe Chjotaxále Niná bakolee nga tsjoachaa (Mat. 24:14). Nʼio tse kjoanda tjínná nga ʼmiyalee je Énle “Niná xi tsjoá kjoachoyakaokjoa” (Rom. 15:13).

7. 1) Jmé kjoafaʼaitsjen xi kitsjoa Jesús. 2) Jósʼin basenkaoná nga nitjosoán jmeni xi kitso je Jesús.

⁷ Kʼoasʼin jchatokoán je chjota josʼin mená nga katabekonná. Je Jesús kʼoakitso josʼin tsoyanile kjoafaʼaitsjen jebi kʼianga kitsoya ya jngo jko̱nindo. Kitso: “Kʼoasʼin ngayije kjoa xi meno nga síkaono chjota, kʼoatisʼin tikaonio nga je. Kui kjoa jebi xi tso kjoatéxoma kao chjota xi kinchja̱ya tʼatsʼe Niná” (Mat. 7:12). Kʼianga kʼoasʼin ʼyatokoán je xíngiaa jokitso je Jesús nitjosonñá jotso je “kjoatéxoma” (libro xi tsʼe Génesis saʼnda Deuteronomio) kʼoa kao jmeni xi kitso je “chjota xi kinchja̱ya tʼatsʼe Niná” (libro xi profecía tínchja̱ni xi faʼaitʼa ya Escrituras Hebreas). Je libro jebi kʼoatso nga síchikontʼain je Niná je xi bakóle kjoatsjoacha je xi ngikʼa. Tobʼelañá, ya libro xi tsʼe Isaías, je Jeobá i kitso: “Titoánntjao kjoatéxoma xi kixi, kʼoa kui kʼoatʼiaon xi kixi tíjna. [...] Tsjoa tjínle je chjota xi kʼoasʼín” (Is. 56:1, 2). Kʼiatsa tsjoachaa je xíngiaa kʼoa kixi jme xi sʼiaan je Jeobá sichikontʼainná.

8. 1) Ánni nga tsjoacha katamasíñá je chjota kontraná. 2) Jméni xi koa̱n tsa koakolee kjoatsjoacha je chjota kontraná.

⁸ Tsjoacha katamaa je chjota kontraná. Je Jesús i kitso: “Kinoʼyanío nga kʼoakitso [én]: Katamatsjoachai xíngi, kʼoa katamajtichai xi jtikeli. Tonga an xinno: Katamatsjoachao xi jtikeno, tichikontʼaon xi nchja̱ʼaonno, nda tikao xi chʼao bekonno, tʼetsʼoantjao xi chʼao síkaono, kʼoa xi fitje̱nngi kontrano, jméni nga koa̱nsínio ʼndíle Nʼaino xi tíjna ngʼajmi” (Mat. 5:43-45). Kʼoati mangóson je kjoafaʼaitsjen xi kitsjoa je pastro Pablo kʼianga kitso: “Tsa kontrali xi baole, tikjain. Kʼia tsa fatile, tʼailai xi skʼuí” (Rom. 12:20; Prov. 25:21). Je kjoatéxoma xi tsakʼaile je Moisés kʼoatso nga tsa jngo chjota israelita skoe̱ nga jngo búrróle chjota kontrale kijnatsʼatje̱nkao chʼále tjínnele koasenkao (Éx. 23:5). Kʼianga kʼoasʼin tsakinyakao xínkjín tsakui nichxin saʼnda miyoni sʼin tsakjáo. Kʼoati ma tsanda ndʼaibi. Kʼiatsa koakolee kjoatsjoacha je kontraná, kʼoa saʼnda je xi nʼio fitjenngikená, koaan si̱ʼindajiaan ni̱ma̱le kʼoa koaan kʼoantjaiya jokjoan. Tsakuini nichxin saʼnda choʼndale Jeobá koa̱n kʼa.

9. Jókitso je Jesús tʼatsʼe nga kʼoéndajiaan tsa jme kjoa kasʼená kao ndsʼee.

⁹ “Kao ngatsʼi chjota tinyatjenngilao kjoa xi nyʼán tjín.” (Heb. 12:14.) Tsa nyʼán sʼin kuiyokoaa ngatsʼi chjota kʼoati tjínnele nga nyʼán sʼin kuiyokoaa je ndsʼee. Nga̱ je Jesús i kitso: “Tsa kjoaʼaikoai kjoatjaoli ya sonxta, kʼoa tsa ya kjoaʼaítsjenli nga ndsʼai tjínʼi̱tséle kjoakontra tʼatsi, tʼejnai kjoatjaoli yatʼa sonxta, kʼoa tʼin títjonkjoanla timiyo ngijngokʼai ndsʼai, kʼoa kʼia nroai, kʼoa tʼaitʼai kjoatjaoliʼni” (Mat. 5:23, 24). Je Jeobá sichikontʼainná tsa kjitʼanangi kʼoéndajiaan tsa jme kjoa kasʼená kao ndsʼee kʼoa tsa koakolee kjoatsjoacha.

10. Ánni nga tsínkui chótsensínilee jñani tsín nda tjíosʼín xi ngikʼa.

¹⁰ Likui xíngiaa si̱kʼaxkiaa. Je Jesús i kitso: “Ali jéejin fanao, jméni nga tsín jée koanenino. Josʼin nga jée fanao, kʼoatisʼin jée koanenino. Kʼoa josʼin nga bʼechoyao, kʼoatisʼin kʼoechoyanino. Ánni nga chótsensínilai je tjé xi tíjnangi xko̱n ndsʼai, tonga je yáki̱cho̱ xi tíjnangi ya xkuin likui chótsain. Axo jókʼuínlai ndsʼai: Tijyola i̱tsénái, kʼoasjengia je tjébe xi tíjnangi xkuin, kʼoa ji, tojo tíjnangi yáki̱cho̱ xkuin. Chjota jao nkjaín ní nga ji, chʼa̱sjengi títjonkjoanlai je yáki̱cho̱be xi kijnangi xkuin, kʼia nda jcha̱ni nga chʼa̱sjengi tjébe xi kijnangi xko̱n ndsʼai” (Mat. 7:1-5). Jebi kui bakóyaná nga tsín koa̱n xíngiaa si̱kʼaxkiaa tsa jñani tsín nda tjíosʼín nga̱ sakʼoani ngisa tonʼia ñá.

JNGO KOYA JOSʼIN NGA NGISA KOAKOLEE KJOATSJOACHA JE XÍNGIAA

11, 12. Jósʼin koakoá nga tsjoachaa xíngiaa.

¹¹ Je Jesús kʼoasʼin kitsoyaná nga kʼia ngisa bakolee kjoatsjoacha xíngiaa nga ʼmiyalee je énnda chjotse xi tsʼe Chjotaxále Niná (Luc. 8:1). Je Jesús i kitsole chjota tje̱nngile: “Tinyaʼao ngatsʼi naxinandá, tikinjao chjota tʼatsʼan” (Mat. 28:19, 20). Kʼianga kʼoanʼia, binyakaoñá je chjota nga tsín tosi tonda ya katafiya je ndiaa xi teya, jñani nga tojchajin kʼoa nga kui katafiya je ndiaa xi nrʼoeya kji jñani so̱kole kjoabijnachon (Mat. 7:13, 14). Je Jeobá nda sʼele nga kʼoanʼia kʼoa síchikontʼainná.

¹² Tojo kisʼin je Jesús, binyakaoñá je chjota nga katabe nga machjénle xi tʼatsʼe Jeobá (Mat. 5:3, TNM). Kʼiatsa jngo chjota xi koa̱nndosinle nga skoe̱sa xi tʼatsʼe Niná bisenkaoñá nga ʼmiyasalee “xi tʼatsʼe je énndale Niná” (Rom. 1:1). Je xi makjainle je énnda chjotse fáondani xi kao Niná, xi totʼatsʼe nga kʼoasʼin tsakʼéchjíntjainá Jesucristo (2 Cor. 5:18, 19). Nga ʼmiyasoán kʼoasʼin bakoñá nga tsjoachaa xíngiaa.

13. Jósʼin ʼyatokuin ji, je xá xi nʼia nga ʼmiyasoán je énnda chjotse.

¹³ Kʼianga nda biyondaa nga mangínchon ijngokʼalee je chjota kʼoa nga mangínkʼailee estudio, nda sʼe tokoán nga̱ binyakaoñá kʼianga kʼoakatasʼín jotso je kjoatéxomale Niná. Tjínkʼa chjota xi nʼio nkjín koya jmeni xi síkatío (1 Cor. 6:9-11). Nʼio tsjoa sʼená kʼianga kʼoasʼin nchja̱ndʼéle Niná chjota jebi, xi tjíonda nga kʼoaile “kjoabijnachon ngantsjai” kʼoa nga binyakao nga síkʼantjaiya yaole ánni nga miyole koa̱nsíni (Hech. 13:48). Kʼianga kotʼaya Biblia, je chjota xi tsín jme kjoachoya tjínle tsakai tsjoani satío kon. Je kjoanikjaojin xi tjínle tsakai tobijbi tjoxinle nga sa nʼio sa nʼio sínʼiotʼa je Nʼaile xi tíjna ngʼajmi. Nʼio tsjoa maná nga ʼyaa jokji bʼénele yaole chjota jebi nga sítjoson je Énle Niná. Nʼio tse kjoanda kitjenkao nga kʼoasʼin bakolee kjoatsjoacha je xíngiaa.

KJOATSJOACHA XI KINCHJA̱NI JE PABLO

14. Jósʼin tíjna je kjoatsjoacha xi kinchja̱ni je Pablo ya 1 Corintios 13:4-8.

¹⁴ Je pastro Pablo kʼoakitso josʼin tíjna je kjoatsjoacha. Kʼiatsa kui kjoatsjoacha jebi koakolee xíngiaa, ndajin sʼe̱le Jeobá xi tʼatsaan, alikuijin nanda kjoa sʼe̱ná kʼoa ndajin satío tokoán (tʼexkiai 1 Corintios 13:4-8). Kataʼyala choaa jokitso je Pablo kʼoa josʼin si̱chjén kjoafaʼaitsjen jebi kao xíngiaa.

15. 1) Ánni nga tjínnesíniná koakoá kjoanda kʼoa nga tsejta katamaa. 2) Ánni nga tsín kjoaxintokon kʼoa nga tsín kjoangʼakon katasʼesíniná.

¹⁵ “Je kjoatjaocha tsejtaní, kʼoa tjínle kjoanda.” Je Jeobá tíbakóná kjoatsejta kʼoa tíbakóná kjoanda ningalani chjotajée maa ngatsʼiaa. A tsí kʼoati ngisa machjén nga tsejta katamaa kʼoa koakolee kjoanda je xi ngikʼa tsa jñani tsín nda sʼín kʼoa ninga tsín bakó kjoanda. “Je kjoatjaocha tsínle kjoaxintakonjin.” Kʼiatsa tsjoacha kjoaixiaa je ndsʼee alikuijin koa̱nxinkonchaa tsa jme tsojmi tjínle, kʼoa tsa jme xá xi kʼoaile ya jinjtín. Kʼiatsa ñaki tsjoachaa, alikuijin ngʼatokon koaan kʼoa alikuijin to yaoná chʼa̱sjengʼaa. Ya Biblia kʼoatso nga je Jeobá jtike je “xi ngʼakon kotsen kʼoa xi ngʼakon ni̱ma̱le” (Prov. 21:4).

16, 17. Jósʼin koakoá kjoatsjoacha tojo tso ya 1 Corintios 13:5, 6.

¹⁶ Je kjoatsjoacha koasenkaoná nga chjotakixi koaan, nga tsín kʼoéndisolee xíngiaa, nga tsín si̱chélee kʼoa nga tsínkui kʼoasi̱koaa jmeni xi kontra tíjnale je kjoatéxomale Jeobá. Je kjoatsjoacha kʼoati koasenkaoná nga koa̱nndosinná xíngiaa nga tsín to yaoná kjuinñá (Filip. 2:4).

¹⁷ Je xi ñaki kjoatsjoacha ʼmi “likui matijta, likui bʼéjinkon xi chʼao tjín”. Kʼiatsa ʼya xi chʼao sikaoná alikui tokjoan majtiná. Kʼoa alikui kui bʼejintokoán jotjín kʼa nga chʼao kasíkaoná (1 Tes. 5:15). Alikuijin nda sʼe̱le Niná tsa kʼoéngijtiaa tokoán. Kʼiatsa kʼoasʼiaan, koa̱ntsejin joni tsa lʼí ya jinni̱ma̱ná, tiñájin si̱kiʼaonñá yaoná kʼoa kʼoajinti si̱kiʼoaan xi ngikʼa (Lev. 19:18). Tosa nda tsa si̱chatʼalee xíngiaa kʼoa si̱chajiaan tsa jme kjoa kasʼená. Xi ijngosani, je kjoatsjoacha “likui sítsjoanile yaole xi tʼatsʼe xi tsín kjoakixi”, kui xi tsonile nga tsín matsjoaná tsa totaon tíʼya kʼoa tsa tsín kixi jme xi kjimatʼain jngo xi jtikená (tʼexkiai Proverbios 24:17, 18).a

18. Jméni xi bakóyaná ya 1 Corintios 13:7, 8 xi tʼatsʼe kjoatsjoacha.

¹⁸ Je Pablo kʼoakitso nga je kjoatsjoacha “síkjaínle ngayije”. Kuinga tsa ʼya xi síjtiná tonga síjéná kjoanichatʼa, jé kjoatsjoacha basenkaoná nga nichatʼalee. Je kjoatsjoacha kʼoati “makjainle ngayije”. Makjainná ngayeje jmeni xi tso je Biblia kʼoa bʼaiñá kjoanda nga títsjoáná je naxinandále Niná je kjoankjíntokon xi tsʼe Niná. Xi ijngosani, je kjoatsjoacha “koyale ngayije”. Ñaki tjínjngo tokoán nga tichoyalee jmeni xi kitso je Jeobá. Kʼoa nga tsjoachaa je chjota chja̱kaonajmíñá xi tʼatsʼe kjoachoya jebi (1 Ped. 3:15). Kʼoa kʼianga jme kjoa xi nʼio ñʼai tjín tibitjatojiaan jé Jeobá bʼetsʼoalee nga katasʼendajin. Ijngosa koya josʼin tíjna je xi kjoatsjoacha ʼmi kuinga “jchókjoakaole” ngayeje. Tsa ʼyani xi jokasíkaoná kʼoa tsa ʼyani xi tífitjenngikená, chókjoakaoná. Kʼoa xijekoan, je Pablo i kitso: “Je kjoatjaocha nikʼiajin fetʼa”. Kʼoatjín jokitso, je choʼndale Niná tosi tonda koako kjoatsjoacha tokʼia saʼndani.

TOSI TONDA TSJOACHA KATAMAA JE XÍNGIAA JOSʼIN TSJOACHAA YAONÁ

19, 20. Jñánile je testo xi kʼoatso nga nʼio chjíle nga tsjoacha katamaa je xíngiaa.

¹⁹ Tsa kʼoasʼiaan jotso je Biblia, tsjoachajin koaan ngantsjai je xíngia josʼin nga tsjoachaa yaoná (Mat. 22:39). Je Jeobá kʼoa kao je Jesús kui xi mele nga kʼoasʼiaan. Kʼoa kʼoati mele nga tsjoacha katamaa ngatsʼi je chjota, nga tsínkui kjuinñá jñani tsʼe kʼoa jmeni kostumbre xi tjínle. A sakʼoaa ñʼai maná nga bakolee kjoatsjoacha tsa ʼyani. Kʼiatsa kʼoamaa, si̱jélee nganʼiotsjele je Jeobá. Kʼiatsa kʼoasʼiaan nda sʼe̱le, kʼoa jé koasenkaoná nga koakoá kjoatsjoacha (Rom. 8:26, 27).

²⁰ Kʼianga tsjoachaa koaan je xíngiaa josʼin nga tsjoachaa yaoná nʼio chjíle kʼoa saʼnda “kjoatéxoma xi ngʼa” sʼin ʼyale (Sant. 2:8). Je kjoatéxoma xi kitsjoale Moisés je Jeobá, nʼio nkjín kʼa kʼoatso nga tsjoake katama xínkjín je chjota israelita. Xi koanskanni, je pastro Pablo i kitso: “Kʼia tsa tjínsa ngijngo xi kjaʼaí kjoatéxoma, i̱ tínchja̱yije kjoatéxoma jebi: Tsjoacha katamai xíngi joni tsa tijini. Je kjoatjaocha ali chʼaojin síkao xínkjín. Kʼoasʼin, je xi síjngo kjoatéxoma, jé xi kjoatjaocha” (Rom. 13:8-10). Kuinga tosi tonda tsjoacha katamasíñá je xíngiaa.

21, 22. Ánni nga tsjoacha koansíñá je Niná kʼoa kao je xíngiaa.

²¹ Nga nikjaʼaitsjenjiaan anni nga tsjoacha koa̱nsíñá xíngiaa, si̱kjaʼatsjenjiaan jokitso je Jesús xi tʼatsʼe je Nʼaile kʼianga kitso: “Nga̱ jé xi síkjitjoson tsʼuíle xi tʼatsʼe xi tsʼen kʼoa xi tʼatsʼe xi nda. Bʼanele jtsí jasonle je xi kixi kʼoa xi tsín kixi tjíoma” (Mat. 5:43-45). Jméni xi bakóyaná jebi. Kui bakóyaná nga tsjoacha katamaa xíngiaa, ni kixi kʼoa ni tsín kixi je chjota. Kʼoa tojosʼin jekaʼyaa, jngo koya josʼin nga ngisa koakolee kjoatsjoacha je xíngiaa kuinga kjuinkʼinyalee énnda chjotse xi tʼatsʼe Chjotaxále Niná. Tsa je chjota xi kʼoasʼin jotso je Énle Niná, sʼeele kjoanda nga miyole Niná koa̱n. Kʼoa jebi jngo kjoanichikontʼain xi nʼio tse tíjna.

²² Nʼio nkjín koya tjínni anni nga tsjoacha koa̱nsíñá je Jeobá. Kʼoa tojosʼin jekaʼyaa, nʼio nkjín koya josʼin koa̱n koakolee kjoatsjoacha je xíngiaa. Tsa tsjoachaa je Niná kʼoa tsjoachaa je xíngiaa koakoñá nga tinitjosoán nga jao kjoatéxoma xi ngisasa ngʼa tjío. Tonga je xi ngisa chjíle kuinga nda sʼe̱le je Jeobá, je Nʼainá xi tíjna ngʼajmi.

[Nota xi faʼaitʼa]

[Sén xi faʼaitʼa ya pájina 14]

Japón

Canadá

Je choʼndale Niná kjitʼanangi bakóle kjoatsjoacha xínkjín (Chótsenlai párrafo 5)