A kʼoasʼin ʼyatokoán je xi tsínle nganʼio josʼin bekon Jeobá
Je “yaoná xi matsen nga tsínle nganʼio [kʼoati] machjén.” (1 COR. 12:22)
A KOAAN KʼOASÍ
Jósʼin bekon je Jeobá je xi kʼoasʼin matsen nga tsínle nganʼio.
Jméni xi koasenkaoná nga kʼoasʼin jchatokoán je xi tsínle nganʼio josʼin bekon je Jeobá.
ʼYáni xi kʼoati nda satíole kʼianga binyakoaa je xi tsínle nganʼio.
1, 2. Ánni nga koanchoyasínile je Pablo jomale je xi tsínle nganʼio.
NGATSʼIÑÁ nga sakʼoa nroajen nganʼioná. Tsakui nichxin chʼinjtsé koa̱nná kʼoa tsa jmesani xi sikinroajen je nganʼioná kʼoa tsín titsjoáʼndeniná nga kʼoasʼiaan je xáná. Tonga tikjaʼaitsjenlai, tsa jilani xi nganʼioli kjuinroajen kʼoa tsa tsín to jngo jao xomana nga kʼoakoa̱nli, tsa nkjín sá nga kʼoakoai̱n, a tsí tsjoa koa̱nli kʼiatsa koa̱nchoyale je xi ngikʼa jomali.
2 Je pastro Pablo tsabe joma kʼianga nroajen nganʼioná kʼianga jme xi matʼeen yaa nditsián kʼoa kao ya jinjtín. Nkjín kʼa nga kʼoakisʼe kon, nga tsín tikisʼenile nganʼio (2 Cor. 1:8; 7:5). Kʼianga kisikjaʼaitsjenjin Pablo jotjín koya kjoa jaʼatojin i kitso: “ʼYáni xi maʼaonle, [a tsí] kʼoati maʼaonna [tsanda an]” (2 Cor. 11:29). Kʼoa nga kui kisingósonkao je chjotale Cristo xi tjío ya jinjtín je yao xi tjínná, kʼoakitso nga je xi “tsínle nganʼio, [kʼoati] machjén” (1 Cor. 12:22). Ánni nga kʼoakitsosíni. Jósʼin bekon je Jeobá je xi kʼoasʼin matsen nga tsínle nganʼio. Ánni nga kʼoatisʼin jchatokonsíñá tsanda ñá josʼin bekon je Jeobá. Kʼoa jósʼin koasenkaoná tsa kʼoasʼiaan.
JÓSʼIN BEKON JEOBÁ JE XI TSÍNLE NGANʼIO
3. Jñá kjuinroani nga tsín nda jchatokoán je ndsʼee xi machjénntsjaile nganʼio ya jinjtín.
3 Nichxin xi tiyoaa ndʼaibi, je chjota kʼoasʼin síkjaʼaitsjen nga toje xi ngʼa kʼoéjna ʼyani xi tjínle nganʼio kʼoa xi sʼa xti. Totaon be je xi tsínle nganʼio kʼoa kʼoasʼín tojmeni tojoni nga totsʼe kuitjoson. Tonga ñá, xi chjotale Cristo maa, alikui kʼoanʼia. Tonga tsakui nichxin, chan likui tinda jchatokonñá je ndsʼee xi machjénntsjaile nganʼio ya jinjtín. Jméni xi sʼiaan nga kʼoasʼin jchatokoán ndsʼee jebi josʼin bekon Jeobá.
4, 5. 1) Jméni xi bakóyaná ya 1 Corintios 12:21-23 josʼin bekon Jeobá je xi tsínle nganʼio. 2) Jmé kjoanda xi sʼená nga binyakoaa je xi tsínle nganʼio.
4 Je choa̱ xi koasenkaoná nga jchaa josʼin bekon Jeobá je xi tsínle nganʼio kui xi kisichjén je Pablo kʼianga kiskile karta xi títjon je jtín xi kisʼejna ya Corinto. Ya kapítulo 12, je pastro Pablo kui síkjaʼaitsjenjinná nga nʼio machjén je xi tjínle yaoná ninga je xi tsín ndasʼin matsen kʼoa kao xi tsínle nganʼio (tʼexkiai 1 Corintios 12:12, 18, 21-23). Je chjota xi evolución makjainle kʼoatso nga tjíojin kʼa ya yaoná jmeni xi tsínni machjén.a Tobʼelañá, ngasʼa kʼoakitso chjota nga tsín machjén je najmándso̱koaa xi ʼndíkji. Tonga ndʼaibi, je chjota científico kʼoatso nga je najmándso̱koaa xi ʼndíkji kui basenkao ngakjijngo yaoná nga ma binyandoaa.
5 Je choa̱ xi tsakʼéjna je Pablo kui bakóyaná nga nʼio chjíle ngatsʼi je xi tjío ya jinjtín. Je Na̱i kui xi mele nga kʼoasʼin si̱kjaʼaitsjeen nga tsín jme chjíná kʼoa nga tsín mandosinle Jeobá xi tʼatsaan (Job 4:18, 19). Tonga je Jeobá nʼio bechjí nga jngó jngó je choʼndale, saʼnda je xi kʼoasʼin matsen nga tsínle je nganʼio. Kʼianga ʼyaa xi tʼatsʼe jebi, kui xi basenkaoná nga tsjoa sʼená jmeni xi kjinená ya jinjtín kʼoa nga tsjoa tjínná nga ya tiyojinlee je choʼndale Jeobá xi tjío jngo tjíjtsa Sonʼnde. Tikjaʼaitsjenlai tsa ñandia kindoatʼai jngo chjotajchínga xi ñʼai male nga fi, tobijbijin kʼinkoai nga̱ tsín ma nʼio fi. Kʼianga kʼoakinʼiai tsakisenkaoní, tonga kʼoajin tinda kisʼe tokuin. Kʼianga binyakoaa je xíngiaa jmeni xi machjénle, tsjoa sʼe tokoán kʼoa sʼená kjoatsejta, kjoatsjoacha kʼoa bakoñá nga jetísʼená kjoafaʼaitsjen (Efes. 4:15, 16). Je Jeobá kui xi mele nga chjí jchatokoán ngatsʼi je ndsʼee. Kʼiatsa kʼoasʼiaan, sʼe kjoatsjoacha ya jinjtín.
6. Jósʼin kisichjén je Pablo je én xi inda kʼoa xi tjínná nganʼio tso.
6 Kʼianga kiskile Pablo je chjotale Cristo xi tjío ya Corinto kui én kisichjén xi inda tso nga kʼoakitso josʼin síkjaʼaitsjen je chjota xi kjaʼaí tʼatsʼe chjotale Cristo xi tsakatio nga siglo I kʼoa jokisʼeje̱ kon tsanda je Pablo (1 Cor. 1:26, 27; 2:3). Kʼianga kisichjén je én xi tjínná nganʼio tso kʼianga kinchja̱ kʼani je chjotale Cristo, ali tsakuijin xi kitsole tsa ngisa ngʼa tjío ndsʼee jebi tikʼoajinni xi ngikʼa (Rom. 15:1). Kui xi kitsole, nga tjínnele sʼe̱le kjoatsejta ndsʼee jebi kao je xi kje matajajin kjoamakjainle.
MACHJÉN NGA SI̱KʼANTJAIYAA JOSʼIN NIKJAʼAITSJEEN
7. Ánni nga sakʼoa ñʼai masíniná nga binyakoaa je xi nganʼio machjénle.
7 Kʼianga binyakoaa je xi ma̱ tjío, ali tsa tojejin Jeobá chjenngilee, kʼoati nda sasénle xi tʼatsaan (Sal. 41:1; Efes. 5:1). Tsakui nichxin sakʼoa ñʼai koa̱nná nga kuisenkoaa jngo ndsʼee. Ánni. Tsakui nichxin, kʼoasʼin si̱kjaʼaitsjeen nga tsín koaindatsaan jmeni xi kjimatʼain. Kʼoa tsakui nichxin likui ʼyaaje̱ jokʼuínlee, kʼoa tosa kuinga tonikjinñá. Je Rosario,b jngo tichjaa xi ki xʼinle itso: “Nʼio aon maná nga tokjin síkaoná je ndsʼee kʼoa nga tsín kʼoasʼín jmeni xi tjínnele sʼin jngo xi ñaki miyoná mani. Kʼianga jme xi ñʼai maná, ñaki mená nga katasíchriantʼaná je miyoná”. Je rey David kʼoati tsabe yaole jomaná nga kjin bijnaa (Sal. 31:12).
8. Jméni xi koasenkaoná nga ngisa koa̱njinná jomale xíngiaa.
8 Tochale ngisa koa̱njinná jomale xíngiaa kʼianga kuenta sʼiaan nga nʼio nkjín je ndsʼee xi tjíonroajen kon xi totʼatsʼe tsa chʼin tjínle, tsa depresión tjínle kʼoa tsa tsín tjíokotʼayatsʼi je xínkjín. Tsakui nichxin kʼoati kui kjoa kuijnajiaan tsanda ñá. Si̱kjaʼaitsjenla je chjota israelita nga ma̱ tsakatio ya Egipto kʼoa nga tsín kisʼele nganʼio. Kʼianga kjesa faʼasʼenjin ya ʼNde jña tsakʼinle nga kʼoaile, je Jeobá kʼoakitsole nga tsín taja katasʼín je ni̱ma̱le kʼiatsa jngo ndsʼe̱ xi kjoañʼai kjoaʼa. Kui xi koanmele nga tsjoánganʼiole xi ma̱ tjío kao xi tsínle nganʼio (Deut. 15:7, 11; Lev. 25:35-38).
9. Jngola choa̱ tʼejnai, jméni xi nʼio machjén nga sʼiaan kʼiatsa jngo ndsʼee jetísíkinroajen kon.
9 ʼNdele nga jme jée kjoáne je xi kjoa tjíofaʼatojin kʼoa tokjoan kjaʼaísʼin si̱kjaʼaitsjeen xi tʼatsʼe, tosa kao Énle Niná kʼoainganʼionilee (Job 33:6, 7; Mat. 7:1). Tobʼelañá, kʼiatsa tjín xi kamale jngo chjota xi moto síxákao kʼoa tsa ya kuicho ya hospital, je chjinexki kjitʼanangi síxkile, ali tsakuijinla kjonangi a jé kasʼele jée axo mai. Tikʼoasʼinni, kʼiatsa jngo ndsʼee xi jetínroajen kon xi totʼatsʼe kjoa xi tjínle, je xi nʼio machjén kuinga kuinyakoaa nga kʼoakʼuínlee jmeni xi tso je Énle Niná (tʼexkiai 1 Tesalonicenses 5:14).
10. Ánni kʼoabixónsíñá nga nʼioni tjínle kjoamakjain je ndsʼee xi tsínle nganʼio maná.
10 Kʼiatsa si̱kjaʼaitsjenjiaan jme xi tjíofaʼatojin je ndsʼee, tochale kʼoantjaiya josʼin nikjaʼaitsjeen xi tʼatsʼe. Tobʼelañá, tjíokʼa je tichjaa xi joxi tsínle nganʼio sʼin matsen tonga jenkjín nó tjíokale nga nʼio batiochjoa je familiale. A tsíkui xi tjíobakó nga tjínle kjoamakjain kʼoa nga tjínle nganʼio. Kʼoa kʼianga ʼyaa jngo na̱ xi toje fikao ntsjaintsjai ʼndíxtile ya kjoajtínná, a tsí tokʼoamaná jokji kjoamakjain bakó nga kʼoasʼín. Kʼoa kuilakjoan je xti, xi tsín tjíosíkatío je Énle Niná ninga nʼio tse kjoa tjíofaʼatojin ya ndʼiaskuelale, a tsí tse kjoamakjain tjíobakó. Kʼiatsa si̱kjaʼaitsjenjiaan jmeni xi tjíosʼín je ndsʼee nga tjíosíxále je Jeobá, ninga tsínle nganʼio sʼin matsen, jcha̱jinñá nga nʼioni tjínle kjoamakjain (Sant. 2:5).
KʼOASʼIN SI̱KJAʼAITSJEEN JOSʼIN SÍKJAʼAITSJEN JE JEOBÁ
11, 12. 1) Jméni xi koasenkaoná nga kʼoasʼin jchatokoán je xi tsínle nganʼio josʼin bekon je Jeobá. 2) Jméni xi bakóyaná josʼin tsabekon Jeobá je Aarón.
11 Kʼianga chotʼayajiaan josʼin tsabekon kʼa Jeobá je choʼndale kui koasenkaoná nga kʼoasʼin jchatokoán je xi tsínle nganʼio josʼin bekon je (tʼexkiai Salmo 130:3).c Tobʼelañá, kʼiatsa yalani tiyoaa kao Moisés kʼianga tsakʼétsʼoale chjota israelita je nra̱ja̱ʼndí tao̱nsine xi kisinda, jméni xi kinʼia kʼiatsa kinoʼyalañá jokitso je Aarón nga tsakasenngi yaole (Éx. 32:21-24). Kʼoa jósʼin kinikjaʼaitsjeen, kʼianga je Aarón ya kisijngokao yaole je Míriam nga chʼaosʼin kisikʼaxki̱ je Moisés nga tsín chjoón israelita chixankao (Núm. 12:1, 2). Kʼoa jókinʼia kʼiatsa tsaʼyalañá kʼianga je Aarón kao Moisés alikui je Jeobá tsakʼasjengʼa kʼianga nandá kisikitjo jngo na̱xi̱ xi tíjna ya Meribá (Núm. 20:10-13).
12 Kʼianga kʼoakisʼin je Aarón, je Jeobá koaan kjoañʼai kjitʼanangi kitsjoale. Tonga bení nga tsín chʼaotjín kon ninga kʼoasʼin kisatengi. Tsakui nichxin, kui kʼoakisʼinni nga tokisitjoson jmeni xi tsakʼinle kʼoa nga nʼio tsakʼénele xi ngikʼa. Tonga kʼianga jekʼoatsakʼinle jmeni xi chʼao kisʼin alikui yaole tsakasenngi kʼoa kisitjoson jmeni xi kitso je Niná (Éx. 32:26; Núm. 12:11; 20:23-27). Je Jeobá kui ngisa kuenta kisʼin je kjoamakjain xi kisʼele Aarón kʼoa nga kʼoakoannile jéele. Nga koanskanni, nga jenkjín siento nó jaʼato, kʼoakitso je chjota nga nda tsabexkón Jeobá, je Aarón kao ntje̱le (Sal. 115:10-12; 135:19, 20).
13. Jméni xi si̱kjaʼaitsjenjiaan kʼianga chjénngilee je Jeobá.
13 Kʼianga koa̱n chjénngilee Jeobá jokjoan, machjén nga títjon kjoanla si̱kjaʼaitsjenjiaan jósʼin ʼyatokoán je xi kʼoasʼin matsen nga tsínle nganʼio. A machjén nga si̱kʼantjaiyaa josʼin nikjaʼaitsjeen tʼatsʼe xíngiaa (1 Sam. 16:7). Tobʼelañá, jósʼin nikjaʼaitsjeen kʼiatsa tsín kixi tíjna josʼin bʼétsaojin je xi sʼa xti kʼoa tsa tokjoa male jmeni xi sʼín. ʼNdele nga tosi̱kʼaxkiaa ánni tsín tosa bisenkaosíñá nga katamataja kjoamakjainle. Kʼianga binyakoaa xíngiaa xi machjénle nganʼio ninga tsín ʼya xotítsoná, ngisa nda chjota maa kʼoa ngisa sʼená kjoatsjoacha.
14, 15. 1) Jókisʼin je Jeobá kʼianga tsabe nga tsín tikisʼenile nganʼio je Elías. 2) Jméni xi bakóyaná je choa̱le Elías.
14 Jósʼin síkjaʼaitsjen Jeobá tʼatsʼe jngo chjota xi depresión tjínle. Kataʼyala jósʼin tsakasenkao je profeta Elías, jngo choʼndale xi nʼio ba kisʼele. Ninga tsín kitsokjonle je xi ño siento basen mani profeta xi tsʼe Baal, tonga kitokachjingaa kʼianga kisʼejinle nga je reina Jezabel koanmele sikʼien. Kʼianga jngo siento basen kilómetro kjin jeki kʼoa kicho ya saʼnda jña Beer-seba ʼmi, yaa ki ya ʼndekixí. Kʼoa nga nʼio jekijtale ya jinndóa, je profeta Elías jngo yáxka̱ tsakʼejnangi kʼoa kʼoakitsole Niná nga katafaʼáxinle kjoabijnachonle (1 Rey. 18:19; 19:1-4).
15 Jókisʼin je Jeobá kʼianga tsabeni saʼnda ngʼajmi nga kʼoakisʼe kon je choʼndale. A tsakʼasjengi nga tsín tinʼiojin koanni kʼoa nga kʼoasʼin ba kisʼele. Mai. Je Jeobá kuenta kisʼin jokji tje̱n kicho nganʼiole kʼoa jngo ánkje kisikasénle. Ánkje jebi jao kʼa kʼoakitsole Elías nga katakjen ánni nga chókjoasínile jñani saʼnda nga tífi (tʼexkiai 1 Reyes 19:5-8).d Tojosʼin tiʼyaa, títjon kjoanla kinrʼoéle kʼoa kitsjoale jmeni xi machjénle kʼoa kʼiaa tsakándiaale jmeni xi sʼin.
16, 17. Jósʼin koakolee je ndsʼee kʼianga tsjoachaa tojo kisikao Jeobá je profeta Elías.
16 Jósʼin koa̱n chjénngilee je Nináná. Alikui koa̱n tokjoan kjoafaʼaitsjen kʼoailee je ndsʼee (Prov. 18:13). Machjénní nga títjon kjoanla kataʼyaa jomale je xi kʼoasʼin síkjaʼaitsjen nga “ngisa choa” chjíle, xi totʼatsʼe kjoa xi tjíojin (1 Cor. 12:23). Kʼiatsa kʼoasʼiaan, kʼoasʼin jchañá jmékjoánni xi machjénle kʼoa koaan kuisenkoaa.
17 Si̱kjaʼaitsjenla je Rosario, xi tojé tísíjchá nga jao ʼndíxtiyánchjínle nga kʼoasʼin ki xʼinle. Jméni xi kisʼin kʼa ndsʼee. Itso je Rosario: “Kʼianga jekinchjale teléfono kʼoa kʼoakixinle jmeni xi kjima, to ñachan aonla minuto kisʼin nga jaʼai i̱ niʼyana. Ñaki tje̱n ndáxko̱n. Xi koannyaon koanjngini alikui kitsjionkonnajin. Kʼoa nga tsín nda tibichijin kʼoa nga nʼio ba tjíonajin yaa kikaonajin ya niʼyale”. Tsakui nichxin kui síkjaʼaitsjenná choa̱ jebi jmeni xi kitso je Santiago: “Tsa jngo ndsʼee tsa jngo tichjaa xi kixijndajon kji, tsa kjaínga machjénle xi kjine nyaonnyaon, kʼoa tsa jngo xi jon kʼuikuitsole: Tangínlanandao, tiso yaono, ticho, tonga tsín tsa bʼainilaoʼni je tsojmi xi machjénle yaole, jmé chjíle. Kʼoatisʼin xi makjainná tokʼoasʼin cha̱jin, tsa toxkia makjainná, kʼoa tsa tsín nda tjín xáná” (Sant. 2:15-17). Kʼianga kʼoasʼin tsakinyakao Rosario, je ndsʼee kʼoa kao tichjaa xi tjío ya jtín jña fi, je kʼoa kao xtiyánchjínle saʼnda precursora auxiliar sʼin kisixá nga koanni basen nó ninga kjoa jaʼatojin (2 Cor. 12:10).
NʼIO NKJÍN XI TSJOÁNGANʼIOLE
18, 19. 1) Jósʼin koa̱n kuinyakoaa je xi tsínle nganʼio. 2) ʼYáni xi kʼoati binyakao nga bʼainganʼiolee je xi tsínle nganʼio.
18 Tsakui nichxin jeʼyaa joma kʼianga jngo chʼin katʼaná nga nʼio tse tjoxinniná. Kʼoakjoánti ma je chjotale Cristo xi jekinroajen kjoamakjainle, xi totʼatsʼe tsa jée kiskajin kʼoa tsakuije̱ jngo kjoa xi ñʼai tjín jaʼatojin, tsakui nichxin tse nichxin machjénle nga nda kʼoéjna ijngokʼani. Tonga kʼianga sitaja kjoamakjainle machjénni nga skótʼaya, nga kʼoetsʼoa kʼoa kʼoasʼin je xále Niná. Tonga ñá, a tsejta koaan kao ndsʼee jebi. Kʼoa nga nʼio tíbʼénele yaole, a kʼoainganʼiolee kʼoa a koakolee nga tsjoachaa. Kʼoénelee yaoná nga koakolee nga ʼyachjiá kʼoa nga tsjoachaa xi tsínle nganʼio (2 Cor. 8:8).
19 Alikui si̱chajiaan nga nʼio tsjoa sʼe tokoán nga kʼoasʼin binyakoaa je ndsʼee. Kʼoati basenkaoná nga tsejta maa kʼoa ʼyañá jomale je xíngiaa. Tonga ali tsa toñájián xi basenkaoná, kʼoati sʼe kjoatsjoacha ya jinjtín. Tonga je xi ngisa nʼio chjíle nga kʼoasʼin binyakoaa je xi jngoyale “tjíomʼe” kuinga je Jeobá chjenngilee, nga̱ je Jeobá nʼio bechjí nga jngó jngó je chjota (Hech. 20:35).
[Nota xi faʼaitʼa]
a Je libro xi kiski Charles Darwin xi El origen del hombre ʼmi, kʼoakitso nga tsín machjén kʼa je xi tjínle yaoná. Kʼoa ijngo chjota xi tʼatsʼe evolución makjainle kʼoakitso nga nʼio nkjín koya jme xi tjínle yaoná xi tsín machjén, jolani je apéndice kao xi timo ʼmi xi ya tíjnakjá na̱xa̱jta̱ná.
b Alikui tsa ñaki kʼoaʼmi.
c Salmo 130:3: “Kʼiatsa tokuilani je jée xi kuenta sʼiain, ji Jah, ji Jeobá, ʼyáni xi koa̱n koase̱nkixi”.
d 1 Reyes 19:5-8: “Tochan tsakajna kʼoa yaa kisʼefengi je yá. Tonga toʼikoan jngo ánkje kisikao kʼoa i kitsole: Tisotjain, tichi. Kʼianga kiskotsen, jngo nioxtila tji tsabe xi ya kijnason la̱jao̱ xi toxá kinisjenile kʼoa kao jngo tii xi nandá tjía, xi ya tjíotʼachrianle jko̱. Tsakjen kʼoa tsakʼi kʼoa xijekoan, tsakajnaa ijngokʼa. Xi koanskanni tikichongáni je ánkjele Jeobá, kisikao kʼoa kitsole: Tisotjain, tichi, nga̱ nʼio kuijtali ya yandiaa. Kʼoa je Elías tsakisótjeen, tsakjen kʼoa tsakʼi. Kʼoa ñachan nichxin kʼoa ñachan nitje̱n kitsjoanganʼiole tsojmi xi kiskine nga tsakʼamje saʼnda nga kicho ya Horeb, je nindo xi tsʼe Niná”.
[Sén xi faʼaitʼa ya pájina 20]
Je Jeobá kuenta kisʼin nga tsín tse nganʼio tjínle je Elías kʼoa jngo ánkje kisikasénle nga kitsjoanganʼiole (Chótsenlai párrafo 14 kao 15)