Ánni nga nikjaʼaitsjenyasíñá je Cenale Nainá

1, 2. Jméni xi kisʼin Jesús nga jekoannjio nga 14 sá nisán nga nó 33. (Chótsenlai sén xi faʼaitʼa ibi.)

YA Jerusalén, kʼianga jekoannjio nga 14 sá nisán nó 33 kʼianga kjijngo je sá, je Jesús kao pastrole kʼiaa tsakʼéjna je sʼuí Paxko, je xi síkjaʼaitsjenjinle je chjota israelita nga kitjo ya Egipto. Nga kui nichxin, jejngo jmi basen nó tjínle nga kitjo ya Egipto. Tonga je Jesús kao xi tejngo pastrole xi kixi kitʼale jngo kjoabichi tsakʼéjna chjotse. Je kjoabichi jebi xki̱ nó kʼoejna je chjotale nga sikjaʼaitsjenya kjoabiyale Cristo (Mateo 26:1, 2).

² Kʼianga jetsakʼétsʼoa je Jesús, kisikʼatole nioxtila xi tsínle naʼyo̱san je pastrole kʼoa kitsole: “Chjóao, ticho”. Kʼoa jngo cho̱tsín bino kiskoé, ijngo kjoabʼetsʼoa tsakʼéjna kʼoa i kitso: “Tʼio ngatsʼio” (Mateo 26:26, 27). Je nioxtila kao bino to kitsoyanile. Nga kui nichxin, je Jesús tsakakóyale je pastrole josʼin tsoyanile kʼoa nkjínsa koya jme xi tsakakóyale.

3. Jméni xi chótʼayá kjoaʼmiya jebi.

³ Je Jesús kui xi koanmele nga xki̱ nó sikjaʼaitsjenya je chjotale xi tʼatsʼe kjoabiyale. Kjoanikjaʼaitsjenya jebi cenale Nainá tsakʼin nga jekoanni (1 Corintios 11:20). Kjoaʼmiya jebi kui kuitsoyaná ánni nga nikjaʼaitsjenyasíñá kjoabiyale Jesús. Jmé xi tsoyanile je nioxtila kao je bino. Jósʼin tongini kuiyondalee nga kjoaʼaítsjenya kjoabiyale Cristo. ʼYáni xi ma kjien je nioxtila kʼoa ma ʼbi je bino. Kʼoa jósʼin bakó je chjotale Cristo nga tsjoá kjoanda tʼatsʼe kjoachoya xi tjínle.

ÁNNI NGA NIKJAʼAITSJENYASÍÑÁ KJOABIYALE JESÚS

4. Jmé kjoanda xi kʼoainá nga kʼoasʼin kʼienntjainá je Jesús.

⁴ Ngatsʼiaa ntje̱le Adán kitjenñá kʼoa kʼoati jée kichʼá kʼoa biyañá (Romanos 5:12). Nijngojinla chjotasonʼnde xi koa̱nle nga toje kʼoasjentjai yaole kʼoa kʼoasjentjai xi kjaʼaí nga̱ chjotajéení (Salmo 49:6-9). Tonga je Jesús kitsjoantjai yaole xi totʼatsaan kʼoa jé Jeobá kitsjoatʼale kjoabʼechjíntjai jebi. Jmé kjoanda xi tjenkao nga kʼoakisʼin. Kuinga koa̱n ndaí kuiyolee je jée kao kjoabiya kʼoa koaan kuiyoaa ngantsjai nichxin (Romanos 6:23; 1 Corintios 15:21, 22).

5. 1) Jósʼin tsakakó je Jeobá kao Jesús nga tsjoakená. 2) Ánni nga koanngínsíñá nga kjoaʼaítsjenya kjoabiyale Cristo.

⁵ Je Niná tsakakóná kjoatsjoachale nga kʼoasʼin kitsjoa je ʼNdíle kʼoa tsakʼéchjíntjainá (Juan 3:16). Kʼoati tsakakó je Jesús nga tsjoakená nga kʼoasʼin kitsjoantjai yaole xi tʼatsaan. Kʼoa kʼianga kjesa faʼaijin i̱ Sonʼnde nga kisixákao Niná tokʼoa jenʼio tsjoake je “xtile chjota” (Proverbios 8:30, 31). Nʼio bʼailee kjoanda je Jeobá kao Jesús jmeni xi kisʼin xi tʼatsaan kʼoa kuinga mangínsíñá nga faʼaitsjenya kjoabiyale Cristo. Kʼoa kʼoasʼin nitjosonñá kjoatéxoma jebi: “[Tosi tonda] kʼoatʼiaon jebi nga kjoaʼaítsjenno xi tʼatsʼan” (1 Corintios 11:23-25).

JMÉ XI TSOYANILE JE NIOXTILA KAO JE BINO

6. Jósʼin kisichjén Jesús je nioxtila kao je bino.

⁶ Kʼianga tsakʼéjna kjoabichi jebi je Jesús, kʼoakitsole je pastrole josʼin tsoyanile je nioxtila kao bino. I kitso xi tʼatsʼe nioxtila: “Jebi yaona ní”. Kʼoa xi tʼatsʼe bino i kitso: “Jebi njínna ní xi tsʼe kjoachjotse xi kisʼenʼio, xi xíjten xi tʼatsʼe nkjín chjota” (Marcos 14:22-24). Je Jesús alikui ñaki yaole kisikʼóya je nioxtila, kʼoa alikui ñaki njínle kisikʼóya je bino, to kitsoyanile.

7. Jméni xi tsoyanile je nioxtila xi machjén kʼianga faʼaitsjenya kjoabiyale Cristo.

⁷ Kʼianga kui nitje̱n nga nó 33, je Jesús kui kisichjén je nioxtila xi tsínle naʼyo̱san je xi kinjengile kʼianga tsakʼéjna je sʼuí Paxko (Éxodo 12:8). Ya Biblia, je naʼyo̱san sakʼoaa kui síngósonkao xi tsín kixi tíjna kʼoa kao je jée (Mateo 16:6, 11, 12; Lucas 12:1). Kuinga je nioxtila xi tsínle naʼyo̱san kui kitsoyasínile nga tsín jme jée kisʼele yaole je Jesús (Hebreos 7:26). Kʼoa kui nioxtila jebi xi machjén kʼianga faʼaitsjenya kjoabiyale Cristo.

8. Jméni xi tsoyanile je bino xi machjén nga faʼaitsjenya kjoabiyale Cristo.

⁸ Je bino xi kisichjén Jesús kui kitsoyanile je njínle. Kʼoati kui tsoyanile bino xi machjén ndʼaibi nga faʼaitsjenya kjoabiyale. Ya nditsinle naxinandá Jerusalén jñani Gólgota tsakʼin, je Jesús yaa tsakʼéjten je njínle ánni “nga cha̱tʼanile jéele” chjota (Mateo 26:28; 27:33). Tsa ʼyachjiá je kjoabʼechjíntjaile, tongijinni kuiyondalee nga xki̱ nó kʼianga faʼaitsjenya kjoabiyale.

JÓSʼIN TONGINI KUIYONDAA

9. 1) Jósʼin basenkaoná nga mangíntjenngiaa jmeni xi maxkia Biblia kʼianga faʼaitsjenya kjoabiyale Cristo. 2) Jósʼe tokuin ji tʼatsʼe kjoabʼechjíntjai xi kitsjoa Cristo.

⁹ Jngo koya josʼin koa̱n kuiyondaa kuinga kʼoéxkiaa jotjín testole Biblia maxkia nga kui xomana je xi faʼaitʼa je foyeto Examinando las Escrituras diariamente. Koaan cha̱niyaa jkoaa jmeni xi kisʼin je Jesús tongini jngo jao nichxin nga kjesa nikʼienjin. Jngo tichjaa xi i̱ kitso: “Ñaki jetongini tichoyalaijin nga faʼaitsjenya kjoabiyale Cristo. Nga xki̱ nó sa nʼio sa nʼio ʼyachjíjin. Tojo faʼaitsjenna nichxin nga kʼien je nʼaina nga kijna je yaole, kʼiaa nʼio tsaʼbechjía je kjoabʼechjíntjai. [...] ʼBeña ngayeje je testo xi kui tínchja̱ni kʼoa mana nga nʼio nda xinya. Tonga kʼianga jekui kjoa jaʼatojian nga tjín xi kʼienna, kʼiaa koanjinna jokji chjíle je kjoabʼechjíntjai xi kao ñá. Nʼio kitsjoanganʼiona”. Kʼianga kuiyondalee nga kjoaʼaítsjenya kjoabiyale Cristo, si̱kjaʼaitsjenjiaan jokji koasenkaoná nga jngó jngoá je kjoabiyale Cristo.

10. Jmésani xi koa̱n sʼiaan nga tongini kuiyondalee nga faʼaitsjenya kjoabiyale Cristo.

¹⁰ Ijngosa koya xi koasenkaoná nga tongini kuiyondalee nga faʼaitsjenya kjoabiyale Cristo kuinga nʼiosa kʼuínyasoán. Tsakui nichxin saʼnda precursor auxiliar sʼin si̱xá tsa jngo kʼoa tsa jao sá. Kʼoasʼin ngisa nkjín chjota kʼoakʼuínlee nga katafi nga sʼe̱jna Kjoabichile Nainá. Kʼianga nokjoañá xi tʼatsʼe Jeobá, xi tʼatsʼe ʼNdíle kao tʼatsʼe kjoanichikontʼain xi sʼe̱ nʼio tsjoa sʼe tokoán (Salmo 148:12, 13).

11. Ánni nga kʼoakitsosíni Pablo nga tsakatio kʼa chjota xi Corinto tsʼe xi tsín nda kisʼin nga kui tsakjen je nioxtila kʼoa tsakʼi je bino.

¹¹ Xi ijngosani, si̱kjaʼaitsjenjiaan jmeni xi kitso je pastro Pablo kʼianga kiskile je jtín xi tsakʼejna ya Corinto (tʼexkiai 1 Corintios 11:27-34). Kʼoakitso nga toʼyani xi tsín kao kjoaxkóntokon kjenni je nioxtila kʼoa ʼbi je bino, “jée sʼe̱le tʼatsʼe yaole kʼoa tʼatsʼe njínle Nainá”. Kʼianga kjesa kui kjoejin, je chjotale Cristo xi ya tjínle kjoachoya ya ngʼajmi, machjénní nga katasíkjaʼaitsjenjin tsa tísasénle Niná josʼin tífikao yaole, kʼiatsa likui nda tísʼín tijé tíbásjainile “kjoañʼai yaole”. Nichxinle Pablo, nʼio nkjín chjota xi Corinto tsʼe xi tsín nda tjíosʼín. Tsakui nichxin nʼio tse tsakjen kʼoa toxkia tsakʼi tongileni kʼoa kʼianga jetífaʼaitsjenya kjoabiyale Cristo kʼoa kuinga me totjíofayofeni. Nga kʼoakisʼin alikui kisʼele kjoaxkóntokon. Kuinga tsín kisasensínile Jeobá nga kui tsakjen je nioxtila kʼoa nga tsakʼi je bino je chjota xi kʼoakisʼin.

12. 1) Jméni xi kisingósonkao Pablo je Cenale Nainá. 2) Jméni xi kitsole Pablo xi ya koai ngʼajmi. 3) Jméni xi sʼin tsa jngo xi ya koai ya ngʼajmi xi nʼio ai jée kabajngi.

¹² Je Pablo kui kisingósonkao je Cenale Nainá kʼianga nokjoale xíngiaa nga bichaa. Je Pablo i kitsole je chjotale Cristo xi ya koai ngʼajmi: “Likui koa̱n sʼioyao cho̱tsín xi tsʼe Nainá kao cho̱tsín xi tsʼe na̱i xi ndajin. Likui koa̱n kuiyotʼao yámixa̱ xi tsʼe Nainá kao yámixa̱ xi tsʼe na̱i xi ndajin” (1 Corintios 10:16-21). Kʼiatsa jngo xi ya koai ya ngʼajmi xi nʼio ai jée kabajngi, machjénní nga sijéle nganʼio je xi chjotajchínga sʼin tjío ya jinjtín (tʼexkiai Santiago 5:14-16). Kʼiatsa ñaki kʼoakoa̱nnile jmeni xi kasʼín, tíbexkónní je kjoabʼechjíntjai xi kitsjoa Jesús kʼianga koakjen je nioxtila kʼoa skʼuí je bino (Lucas 3:8).

13. Ánni nga machjénsíni nga kʼoétsʼoaa tʼatsʼe kjoachoya xi títsjoáná Niná.

¹³ Kʼianga biyondalee nga faʼaitsjenya kjoabiyale Cristo, machjénní nga si̱kjaʼaitsjenjiaan kʼoa nga kʼoétsʼoaa ánni nga ñaki jchasíñá jmé kjoachoya xi títsjoáná je Jeobá. Alikui koa̱n ʼya xi koakjen je nioxtila kʼoa skʼuí je bino kʼiatsa tsín ñaki be nga ya ngʼajmi koai. Kʼiatsa ʼya xi kʼoasʼin alikui tíbexkón je kjoabʼechjíntjai xi kitsjoa Jesús. Jósʼin jchañá tsa koa̱n kuichaa je nioxtila kʼoa sʼioaa je bino nga faʼaitsjenya kjoabiyale Cristo.

ʼYÁNI XI MA KJIEN JE NIOXTILA KʼOA MA ʼBI JE BINO

14. Kʼianga faʼaitsjenya kjoabiyale Cristo, jméni xi sʼín je xi ya tjíojin je kjoa xi kisʼendajin chjotse.

¹⁴ Je xi kjen je nioxtila kʼoa ʼbi je bino nga faʼaitsjenya kjoabiyale Cristo ñaki tjíojngo kon nga ya maxki̱kao je kjoa xi kisʼendajin chjotse. Kʼianga kinchja̱ni Jesús xi tʼatsʼe bino i kitso: “Je cho̱tsínbi jé kjoachjotse xi sʼenʼio kao njínna” (1 Corintios 11:25). Je Niná kʼoakitso nga je Kjoa xi kisʼendajin kao Kjoatéxoma kao je chjota israelita kui sʼe̱jnayangajaonile je kjoa xi kisʼendajin chjotse (tʼexkiai Jeremías 31:31-34).a Je Jeobá kao je xi ya koai ngʼajmi tsakʼéndajin kjoa jebi (Gálatas 6:15, 16). Kʼianga koa̱n sʼe̱jna je kjoa xi kisʼendajin chjotse, je Jesús kitsjoa kjoabijnachonle (Lucas 22:20). Jé Jesús koanchjén kʼianga kisʼejnabasen je kjoa xi kisʼendajin chjotse kʼoa je chjota xi ya koai ngʼajmi, xi kixi tjíofitʼale, yaa koatiokao Jesús ya ngʼajmi (Hebreos 8:6; 9:15).

15. 1) ʼYáni xi ya tjíojin je kjoa xi kisʼendajin xi tʼatsʼe Chjotaxále Niná. 2) Jmé kjoanda xi sʼe̱le kʼiatsa kixi koaitʼale Niná.

¹⁵ Je chjotale Cristo kʼoati be nga ya tjíojin je kjoa xi kisʼendajin xi tʼatsʼe Chjotaxále Niná (tʼexkiai Lucas 12:32). Kjoa jebi jé Jesús kao chjotale tsakʼéndajin. Chjotale xi kixi kitʼale kʼoa xi ya tsakatiokao nga tsakjaʼá “kjoañʼai” (Filipenses 3:10). Je chjotale Cristo xi ya koai ya ngʼajmi yaa tjíojin kjoa xi kisʼendajin kʼoa sʼeele kjoanda nga ya koatexomakao Jesús ya ngʼajmi tokʼia saʼndani (Apocalipsis 22:5). Chjota jebi koaan koakjen je nioxtila kʼoa skʼuí bino kʼianga faʼaitsjenya kjoabiyale Cristo.

16. Kʼoalasi choai josʼin tsoyanile je Romanos 8:15-17.

¹⁶ Toje xi koa̱n koakjen nioxtila kʼoa skʼuí je bino je xi ñaki be nga xtile Niná ma (tʼexkiai Romanos 8:15-17). Je Pablo kʼoakitso nga “Abba” tsole Niná je xi ya koai ya ngʼajmi. Je én jebi én arameo jaʼaini kʼoa kui xi kisichjén je xtiʼndí nga “pa” kʼoa nga “nʼai” kitsole je xijchále. Kui bakó josʼin tjíokao xínkjín je Jeobá kao je xi ya koai ngʼajmi. Kʼianga bʼaile je nganʼiotsje “xtile” Niná ma. Je nganʼiotsjele Niná “tsjoá kjoakixi” kʼoa síjinle nga ya koai ngʼajmi. Ali tsakuijin xi tsonile tsa jeya ngʼajmi bʼakaole jngo chjota kʼiatsa tsín mele nga i̱ kʼoéjna sonʼnde. Ñaki kʼoatjío kon nga ya koatexomakao Cristo tsa je xi kixi koa̱n saʼnda nga kuiyá. Kʼoati be nga je Jeobá kiskoejin. Je xi jngo siento kao ñachanño jmi mani xi ya koai ngʼajmi, tochoasa mani xi tjío i̱ Sonʼnde (1 Juan 2:20; Apocalipsis 14:1). Ñaki nʼio jtín tjío kao Jeobá kʼoa “Abba” tsole.

JCHACHJÍA JE KJOACHOYA XI TJÍNNÁ

17. 1) Jméni xi koyale xi ya koai ya ngʼajmi. 2) Jósʼin beni xi ya koai ya ngʼajmi nga Niná kiskoejin.

¹⁷ Kʼiatsa ya tjínli kjoachoya ya ngʼajmi, kʼoajin ʼmi kjitʼalai je Jeobá nga bʼetsʼoalai kʼianga ya kʼuín ya ngʼajmi. Kʼoajin titsen mali nga tʼatsi tínchja̱ kʼani je testo xi faʼaitʼa Biblia. Tobʼelañá, kʼianga kui nchja̱ni Biblia tʼatsʼe kjoabixanle je Jesús kao chjoón xi kuixankao, ʼyaní nga ji xotíʼmili kʼoa ñaki tichoyalai nga kjoaʼaí nichxin jebi (Juan 3:27-29; 2 Corintios 11:2; Apocalipsis 21:2, 9-14). Kʼianga kʼoatso Niná jokji tsjoake je xtile xi ya koai ngʼajmi ʼyaní nga ji xotíʼmili. Kʼoa nga kui masjaijinli ya Biblia jmeni xi ʼmile xi ya koai ngʼajmi, je nganʼiotsjele Niná basenkaojinli nga nitjosuin. Kʼoasʼin tsjoá kjoakixi je nganʼiotsje nga ya bʼakaoli ya ngʼajmi.

18. 1) Jmé kjoachoya tsjoále Niná je “xi kjaʼaí barré”. 2) Jósʼe tokuin kʼianga nikjaʼaitsjenjin je kjoachoya xi tjínli.

¹⁸ Kʼoa tsa ya tijnajinlai je chjotankjín “xi kjaʼaí barré” ʼmile, kui kjoachoya títsjoáli Niná nga i̱ kuijnai i̱ Sonʼnde (Juan 10:16; Apocalipsis 7:9). Mejinli nga ya kuijnai tokʼia saʼndani ya Sonʼndenaxó kʼoa nʼiojin tsjoa mali nga nikjaʼaitsjenjin jokoa̱nchon. Ñaki choyajinlai nga kjoaʼaí nichxin nga sʼe̱ kjoanyʼán nga nda kuiyo kao familiali kʼoa kao miyoli. Kʼoa mejinli nga tjóxin je kjinrá, kjoañʼai, chʼin, kjoabiya kʼoa nga ma̱ nijchá je yaoná (Salmo 37:10, 11, 29; 67:6; 72:7, 16; Isaías 33:24). Kʼoa ñaki mejinli nga chjoéyai je xíngi xi jekʼien kʼianga kjoaʼáyanile (Juan 5:28, 29). Nʼiojin bʼailai kjoanda Jeobá nga kʼoanaskánatjín kjoanda tsjoáli nichxin xi nroaján. Ningalani tsín bichi je nioxtila kʼoa ʼyui je bino nga faʼaitsjenya kjoabiyale Cristo, tonga ʼminí nga̱ kʼoasʼin bakoni nga ʼyachjí je kjoabʼechjíntjaile Jesús.

A KʼUÍNNI NGA KJOAʼAÍTSJENYA KJOABIYALE CRISTO

19, 20. 1) Jméni xi sʼiaan kʼiatsa mená kuijnaa ngantsjai nichxin. 2) Jósʼin koasenkaoli tsa kʼuín nga kjoaʼaítsjenya kjoabiyale Cristo.

¹⁹ Ni ya ngʼajmi bʼakaoli kʼoa ni i̱ Sonʼnde bʼakaoli, kʼiatsa meli nga kuijnai ngantsjai nichxin, machjénní nga katasʼeli kjoamakjain xi tʼatsʼe Jeobá, tʼatsʼe Jesús kao tʼatsʼe kjoabʼechjíntjai. Kʼianga kjoaʼaítsjenya kjoabiyale Cristo koaan si̱kjaʼaitsjenjin je kjoachoya xi tjínli kʼoa jokji chjíle nga kʼoasʼin kʼien je Jesús. Kʼianga jeska̱ntjai je Tsʼuí nga bixine nga 3 sá abril nó 2015, miyón chjota sikjaʼaitsjenya kjoabiyale Cristo jngo tjíjtsa Sonʼnde. Yaa sikjaʼaitsjenya ya Ndʼia jña kotʼaya je Testigole Jeobá kʼoa jñasani xin ʼnde.

²⁰ Tongini si̱kjaʼaitsjenjiaan jokji chjíle kjoabʼechjíntjai xi kitsjoa Jesús kʼianga kjesa mangínjián nga kjoaʼaítsjenya kjoabiyale. Tsa kʼoasʼiaan, ngisa kʼoailee kjoanda je Jesús nga kʼoasʼin kitsjoantjainá yaole. Kʼiatsa ñaki nda kuinóʼyá je kjoanokjoaya xi kjoaʼa koasenkaojinná nga tsjoacha koaan je chjota kʼoa nga kʼoakʼuínlee jokji tsjoakená je Jeobá kʼoa jme kjoanda xi tsjoáná nichxin xi nroaján (Mateo 22:34-40). Tʼin nga kjoaʼaítsjenya kjoabiyale Cristo.