Ánni nga xki̱ nó si̱kjaʼaitsjenyasíñá je kjoabiyale Jesús

“KʼOATʼIAON KUIBI JMÉNI NGA NDA KʼOÉJINTAKONSÍNINÁO”

Linda: ʼNdali Lucía. Nʼio tsjoa mana nga kʼin kʼianga jaʼaitsjenya kjoabiyale Cristo xomana xi jaʼato.a A kisasenli kjoanokjoaya xi jaʼa.

Lucía: Jaon, nʼio kisasenna, tonga alikui koanjinyejena jme xi jaʼa. ʼBeña nga kʼianga Navidad tsin Jesús kʼoa nga kʼia faʼáyale kʼianga Nichxin Xkón. Tonga kjelangá ʼbejian tsa tjínnele kjoaʼaítsjenya kʼianga kʼien.

Linda: Kʼoatjín kjoaixi, kui xi ngisa kʼoasʼín chjota. Tonga jin xi testigole Jeobá maijin kʼoasʼin makjainnajin nga nʼio chjíle kʼianga xki̱ nó si̱kjaʼaitsjenyá je kjoabiyale Jesús. Tsa a ngotjoli koaan kʼoaxínle anni.

Lucía: Ye, a ngotjona.

Linda: Jngo koya anni nga nikjaʼaitsjenyanijin kjoabiyale Jesús kuinga je xokitso nga kʼoasʼiaan. Kataʼyala jmeni xi koan kʼianga kje nikʼienjin. A faʼaitsjenli nga tsakjenkaoná je pastrole.

Lucía: Jaon, faʼaitsjenna.

Linda: Kjoabichi jebi kʼoati Cenale Nainá ʼmi. Kʼianga tjíokjen, je Jesús kʼoakitsokixile je chjotale jmeni xi sʼin. I tjítʼa i̱ Lucas 22:19. A meli kʼoéxkiai.

Lucía: Ye, itso: “Kiskoé nioxtila, kitsjoa kjoanda, kisixkoa̱, kitsjoale chjotale, kitso: Jebi yaona ní xi tsjoa xi tʼatsaon, kʼoatʼiaon kuibi jméni nga nda kʼoéjintakonsínináo”.

Linda: Tojosísʼin kabʼexkiai, chótsenlalai jme xi kitso Jesús ya jña tofetʼani bersíkulo jebi. Kitso: “Kʼoatʼiaon kuibi jméni nga nda kʼoéjintakonsínináo”. Tiʼakʼiani nga kjesa kʼoatsojinle, je Jesús kʼoakitsole jmeni xi tjínnele sikjaʼaitsjenya. Kʼoakitsole nga tsjoántjai kjoabijnachon xi totʼatsʼe chjotale. Ya Mateo 20:28 kʼoati me tso én xi kisichjén Jesús. Kuitsoñá: “Je ʼndíle chjota likui jaʼai nga si̱xále, tonga jé xi sixá, kʼoa tsjoá ni̱ma̱le nga kʼoechjíntjai nkjín chjota”. Jin xi testigole Jeobá maijin kuinga nikjaʼaitsjenyanijin kjoabiyale Jesús nga kʼoasʼin kitsjoantjai yaole xi totʼatsaan. Nga kʼoasʼin kʼien je Jesús koaan kuitjo̱ntjé kʼiatsa si̱tjosonlee Niná.

JMÉ TʼATSʼENI XI BʼASJENTJAINÁ KJOABIYALE CRISTO

Lucía: ʼBeña nga ñá kʼienntjainá Jesús tonga likui majinna jósʼin bʼasjentjainá je kjoabiyale.

Linda: Nkjín chjota xi tsín be josʼin bʼasjentjainá je kjoabiyale Jesús, ñʼai majinniná. Tonga kui xi ngisasa chjíle xi bakóya je Biblia. A koaan cho̱banajmí ingotjoá.

Lucía: Koaanla.

Linda: Ye, chriansʼakjoán nga kui tibʼexkia xi tʼatsʼe kjoabʼechjíntjaile Jesús. Tochoala ñʼai sʼin xínyale josʼin tíjna.

Lucía: Ye.

Linda: Kʼianga koa̱njinná kuikjoanla títjon katamajinná jmeni xi koan kʼianga tsajngijée Adán kao Eva ya ʼndenaxóle Edén. Kʼoéxkiala jotso Romanos 6:23. A koaan kʼoéxkiai.

Lucía: Koa̱njin, itso: “Nga̱ je chjíle jée kjoabiya ní, tonga je kjoatjaole Niná kjoabijnachon ngantsjai ní, xi totʼatsʼe Cristo Jesús Nainá”.

Linda: Chótsenlalai jotso jña fitsʼiani bersíkulo jebi. Kʼoatso nga “je chjíle jée kjoabiya ní”. Je Niná kui kjoatéxoma tsakʼéjna saʼnda ngasʼa. Je kjoañʼai xi tjenkao jée kjoabiyaní. Tonga nga títjon, kjesa ʼya xi jée majngijin. Ñaki chjotatsje je Adán kao Eva nga sʼa kisinda Niná, tsínle jée. Kʼoa je xti xi sʼe̱le tsakai ñaki xtitsjení. Kuinga tsín ʼya xi kuiyásíni tsakai. Je Adán, Eva kʼoa kao xtile koan tsakatio tsakai ngantsjai nichxin. Tonga tjín xi koan xi kisikitsónya ngayeje jebi. A ʼyaní jmeni.

Lucía: Jaon, je Adán kao Eva kui kiskine je to xi kisʼechjoale.

Linda: Kʼoatjín. Kʼoa nga kʼoakisʼin tsakajngijée. Je Adán kao Eva toxá kisʼinni nga tsín kisitjosonle Niná. Kuinga chjotajée koanni. Nga kʼoakisʼin nʼio tse kjoa tsakajngile yaole kao ntje̱le.

Lucía: Kʼoa ánni nga je ntje̱le tsʼakaotʼasínile nga̱ tsín ñá kisʼená jée nga kʼoakisʼin.

Linda: Nga katamajinli jngola choa̱ sikʼéjnale. A jesa kinichjain yánio.

Lucía: Jaon. Kui sindaña nio.

Linda: Tobʼelañá, tsa jngo yánio xi sʼa chjotse kuindái, kʼoa tsa tikje nichjénjinni ska̱jinʼnde kʼoa koakjan yátele. Jókoa̱nkjoan niole, kuijin choa̱le yá kʼoa̱, a tsí jaon.

Lucía: Jaonjin.

Linda: Kʼoakjoán tikoan je Adán kao Eva. Kʼianga tsín kisitjosonle Niná jngoyale chʼao koankjoan xi totʼatsʼe jée. Kʼoa nga kʼia tsakajngijée nga kjesa sʼejinle xti, ngatsʼi xti xi kisʼele toje jée yʼa nga kitsin. Ya Biblia, je én xi jée tso ali tsa tokuijin xotsole jmeni xi chʼaotjín sʼín chjota, kʼoati kui xotsole nga toje jée kichʼá. Ninga tsín ñá tjínná jée nga kʼoakisʼin je Adán kao Eva, toje kui kichʼá ngatsʼiaa je jée xi tsakajngi. Kʼoa tojosʼin kabʼexkiaa ya Romanos 6:23 “je chjíle jée kjoabiya ní”.

Lucía: Tonga ánni nga totʼatsʼe Adán kao Eva nga kjoañʼai chja̱ʼásíñá ngantsjai.

Linda: Tonga je Niná ñaki kixiní. Kuinga kʼoakitsosíni nga kuiyá Adán kao Eva nga kʼoakisʼin. Tonga jebi alikuijin xi tsonile nga tsínle kjoachoya je ntje̱le. Je Niná tsakʼéndajin josʼin kuitjokajinñá kjoa jebi. Kʼoa kui machjén je kjoabʼechjíntjai xi kitsjoa je Cristo. Kʼoéxkiala ijngokʼá Romanos 6:23. Kʼianga jekʼoatso nga “je chjíle jée kjoabiya ní”, kʼoatso nga “je kjoatjaole Niná kjoabijnachon ngantsjai ní, xi totʼatsʼe Cristo Jesús Nainá”. Tojo tso ibi, kui kjoabiyale Cristo xi basenkaoná nga ndaí biyolee je jée kao kjoabiya.b

JE KJOATJAO XI NGISASA CHJÍLE XI KITSJOANÁ NINÁ KUI KJOABʼECHJÍNTJAI

Linda: Ijngosa én faʼaitʼa bersíkulo jebi xi mena xínyale.

Lucía: Jmé tʼatsʼeni.

Linda: Kui xi tso ibi: “Je kjoatjaole Niná kjoabijnachon ngantsjai ní, xi totʼatsʼe Cristo Jesús Nainá”. Nga je Jesús xi kjoañʼai tsakjaʼá kʼoa kʼien kʼianga tsakʼéchjíntjainá, ánni nga tsín “je kjoatjaole Jesús” tsosíni ibi.c

Lucía: Mmm... Likui ʼbe.

Linda: Kʼianga tsakajngijée Adán kao Eva ya ʼndenaxóle Edén jé Niná kine. Nʼiojin aon koanle Niná nga kʼoasʼin yátsʼi̱n tsakinyále. Tonga je Jeobá tokjoan tsakʼéndajin jme xi sʼin. Jngo ánkjele xi tjío ya ngʼajmi sikasén i̱ Sonʼnde, jo chjota sʼin kʼoéjna kʼoa tsjoá kjoabijnachonle nga kʼoechjíntjai chjotasonʼnde.d Kuinga kʼoabixónsíñá nga je Niná kitsjoa kjoatjao jebi xi tsʼe kjoabʼechjíntjai. Ijngosa koya tíjna anni nga kʼoabixónsíñá. A fiya jkui jokoanle Niná kʼianga kinikʼien je Jesús.

Lucía: Majain.

Linda: Tjínlali ʼndíxti, tsí jaon.

Lucía: Jaon, jao mani. Jngo xʼin jngo chjoón mani.

Linda: Nga ʼndíxti tjínli, tsakui nichxin majinli jokoanle Jeobá kʼianga tsabe je ʼndíle nga kinikʼien. Jókisʼe kon nga kindoa Jesús, nga tsaʼyasin kʼoa nga kisʼele. Tikjaʼaitsjenlai jokji aon koanle kʼianga tsabe jokji kjoañʼai tsakjaʼá je ʼNdíle kʼianga kinikʼientʼa yá.

Lucía: Kjelangá sa kui sikjaʼaitsjenjian. Nʼiojin aon koanle.

Linda: Alikuikjoan ʼyaa jokoanle je Niná. Tonga je Biblia kʼoatso jmeni xokisikao Jeobá nga kʼoasʼin kitsjoaʼndeni nga kjoañʼai kinikjaʼá je ʼNdíle. Yaa Juan 3:16 kʼoatso. Tʼexkialaini.

Lucía: Yelai, itso: “Nga̱ Niná kʼoasʼin koantsjoake sonʼnde nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai”.

Linda: Ya jña fitsʼiasíni itso: “Nga̱ Niná kʼoasʼin koantsjoake sonʼnde”. Kui kjoatsjoacha xokisikao Niná nga kisikasénni ʼNdíle i̱ Sonʼnde kʼianga kʼienntjainá. Nʼio tse kjoatsjoacha tsakakóná Niná nga kʼoakisʼin. Kʼoa kui xi nikjaʼaitsjainjin xi testigole Jeobá maijin nga xki̱ nó kʼianga nikjaʼaitsjenyaijin kjoabiyale Jesús. A kamajin choali.

Lucía: Jaon kamajinna, Niná xi katʼéchjíli.