Jméni xi koa̱n sʼiaan nga kao kjoatsjoa chótʼayá je Biblia

Je Josué kui rollo xi tsʼe Kjoatéxoma tíbʼéxkia; bixojen je xjáo xi kjindai Jericó, tonga je niʼyale Rahab alikui jme xi male; Je Josué kjomingʼa je ntsja nga tíbʼétsʼoa

JÉ Josué tsakándiaale naxinandá Israel nga kjoaʼasʼen ya ʼNde jña tsakʼinle nga kʼoaile. Kʼianga kuicho ʼnde jebi tsee kjoa kjoaʼatojin. Tonga je Jeobá kʼoakitsole nga nda kuitjo ngayeje jmeni xi sʼin, nga nʼiojin kʼoa tajajin katama. Kʼoakitsole nga tjínnele sitjoson je kjoatéxomale kʼoa nga nichxin kao nitje̱n katabʼéxkia ánni nga nda sitjosonni ngayeje xi ya tjítʼa. Tsa kʼoasʼin jebi nda kuitjo tojmeni xi sʼin (Jos. 1:7, 8).

Nichxin xi tiyoaa ndʼaibi nʼio ñʼai chon kʼoa nʼio tse kjoa bitjatojiaan (2 Tim. 3:1). Tsa kjuintjenngiaa jmeni xi kitsole Jeobá je Josué kʼoati nda kuitjo ngayeje jmeni xi sʼiaan. Kʼiatsa nyaon nyaon kʼoéxkiaa je Biblia koasenkaoná je kjoafaʼaitsjen xi ya faʼaitʼa kʼianga kjoa kuitjátojiaan.

Me ñʼai ma kjoaixiná nga chotʼayá je Biblia, kʼoa tjínkʼa xi tsín tsjoachaa nga chotʼayá. Tonga nʼio tjínle kjoandosin nga kʼoasʼiaan, kuinga ndatjínni nga kʼoéxkiaa jñani “Koaan i̱ sʼiain nga chótʼayai” tso. Yaa tsoyaná jmeni xi koa̱n sʼiaan nga ngisa nda chótʼayá je Biblia kʼoa nga kao kjoatsjoa kʼoasʼiaan.

Jngo salmista xi i̱ kitso nga kisele je Jeobá: “Ya tikasényanái je ndiaa xi tsʼe kjoatéxomali, nga̱ kui xi tsjoa fáya tokoan” (Sal. 119:35). Kʼoati nʼio tsjoa sʼe̱ tokuin tsanda ji kʼiatsa chótʼayai je Énle Niná. Nʼio chjíle jmeni xi koanjinli.

Ningalani tsín jngo naxinandá kjoándiaalee tojo kisʼin je Josué, nʼio tse kjoa bitjatojiaan nga jngó jngoá. Kuinga ndatjínni nga chótʼayá je Énle Niná. Tsa kjuintjenngiaa je kjoafaʼaitsjen xi ya faʼaitʼa, nda kuiyoaa kʼoa tsee kjoanichikontʼain sʼe̱ná.

KOAAN I̱ SʼIAIN NGA CHÓTʼAYAI

Títjonkjoanla tʼetsʼoai. Je Biblia kjoafaʼaitsjenle Niná nya, kʼoa jé xi kʼoasʼin koanmele nga kisʼetʼaxo̱n nga ñá koasenkaoná. Kʼianga kʼoéxkiai je Biblia, tijélai Niná nga katabasenkaoli nga koa̱njinli, nga kjoaʼaítsjenli kʼoa nga kʼoasʼiain jotso jmeni xi kʼoéxkiai (Esd. 7:10).
Chjónangilai yaoli. Kʼianga tibʼexkiai je Biblia kʼoa tsakui je xo̱n xi ya yʼangini, chjónangilai yaoli jebi: “Jméni xi tsoyana tʼatsʼe Jeobá. Jósʼin mangóson kao jmeni xi tínchja̱ni ngayeje Biblia. Jósʼin koa̱n sichjén je bersíkulo jebi nga koasenkoa xi kjaʼaí”.
Tikjaʼaitsjenjin jmeni xi chótʼayai. Kʼianga tibʼexkiai, tikjaʼaitsjenjin jebi: “Jósʼe tokoan kʼianga kui jebi bʼexkia. Ánni kʼoasʼeni tokoan. Jósʼin mangóson kao jmeni xi jaʼatojian, jmeni xi kjima ndʼaibi kʼoa kao tʼatsʼe nichxin xi nroaján. Jósʼin koa̱n kjuítjenngia je kjoafaʼaitsjen jebi” (Job 23:5; Sal. 49:3). Tikjaʼaitsjain tsa koa̱nli kʼuínyai ánni nga bʼéchjoanile Jeobá je naxinandále tsa jmeni kʼoa jósʼin kuichomani tsa tsín kjuintjenngiaa je kjoafaʼaitsjenle (Deut. 32:28, 29).
Cha̱niyai jkui jmeni xi kʼoéxkiai. Tobʼelañá, a fiya jkui jokisʼin je xtindsʼe̱ José kʼianga tsakaténale je chjota ismaelita (Gén. 37:18-28). Cha̱niyai jkui jmeni xi koan, joni tsa ji xi ya tijnai nga kʼoakoan. Chjónangilai yaoli jebi: “Jméni xi tjíosíkjaʼaitsjen. Jótjío kon”. Tsa cha̱niyai jkui jmeni xi kʼoéxkiai ñaki yaa tijnai koaanli, kʼoa ngisaa nda koa̱njinli jmeni xi chótʼayai.
Tichjain jmeni xi tsjoáná naxinandále Niná xi basenkaoná nga chotʼayá. Tjasjai jmeni xi jetjío xi kao énli, xi faʼaitʼa ya Internet kʼoa kao xi bitjo nga xo̱n. Kʼoatʼinlai xi kjaʼaí nga katabasenkaoli nga koa̱nli si̱chjain. Tobʼelañá, ya Índice de las publicaciones Watch Tower kao Xo̱n xi síchjén je testigole Jeobá nga jme xi básjaiya nkjín tema faʼaitʼa kʼoa nkjín testole Biblia tsoya josʼin tínchja̱ni. Kʼoati je foyeto Xo̱n xi basenkaoná nga chotʼayajiaan Énle Niná faʼaitʼa mapa, kʼiáni kʼoakoan jmeni xi tsoya Biblia, josʼin kisʼechoya tsojmi, kao xi kjaʼaísanile.
Tikjaʼaitsjenjin ijngokʼai jmeni xi jekachotʼayai. Kui xi koasenkaoli nga kjoaʼaítsjenli jmeni xi chotʼayai. Xi ngisa nda koasenkaoli kuinga chja̱kaonajmíni xi kjaʼaí jmeni xi koa̱njinli. Tikjaʼaitsjain jebi: “A koaan sichjén jebi kʼianga xínyasoan”. Je kjoafaʼaitsjen xi jekaʼyaa koasenkaoli nga kʼoéjintokuin jmeni xi ngisa chjíle, kʼoa kʼoati koa̱n kuisenkoai xi kjaʼaí nga kʼoéyanajmílai xi tʼatsʼe jebi.