A tijnandaní nga ya sonʼndenaxó kuijnai

NGATSʼIÑÁ nga mená katabitjoson nga i̱ kitso Jesús: “Jó tondale je xi indajin [xi ndʼé], nga̱ jé xi skoékjoatjao je sonʼndebi” (Mat. 5:5). Je chjotale Cristo xi ya ngʼajmi koai kʼiaa tjoéle kjoanda jebi nga rey koa̱n ya ngʼajmi kao Jesús (Apoc. 5:10; 20:6). Ngisaa nkjín mani chjotale Cristo xi i̱ Sonʼnde mele koatio ngantsjai nichxin. Chjotatsje koa̱n, tsjoa sa̱tío kon kʼoa nda koatio. Nga koa̱n kʼoasʼin kuiyoaa, tjín jmeni xi machjén nga sʼiaan. Janla koya chótʼayajiaan i̱bi. ʼNdenaxó si̱koaa Sonʼnde, ñá si̱sinlee xi kjoaʼáyanile kʼoa kʼuínyalee je Énle Niná. Kʼoati jchaa jméni xi sʼiaan ndʼaibi nga tongini kuiyondalee nga jeʼndenaxó koa̱n.

A JETIYONDAA NGA ʼNDENAXÓ SI̱KOAA JE SONʼNDE

Kʼianga kʼoakitsole Jeobá je chjota nga sitse sonʼnde kʼoa nga je koanentsja kui kinchja̱ni nga kuicho nichxin nga ʼndenaxó koa̱n Sonʼnde (Gén. 1:28). Je xi koatio ngantsjai nichxin sitjoson kjoatéxoma jebi. Kʼianga jekjoaʼato Armagedón alikui tokjoan ʼndenaxó koa̱n, nga̱ jenʼio kjoatse kicha je ʼndenaxóle Edén. Nʼio tse xá sʼe̱ná nga kʼia, nga̱ ñá sitsjee je Sonʼnde nga nʼio chʼao chon ndʼaibi.

Kʼoakisʼin je chjota israelita nga jekitjoni Babilonia nga kicho ijngokʼani ya ʼndele, nga̱ 70 nó nga tokisʼejnakjitia ʼndele. Tonga jé Jeobá tsakasenkao nga kisindachon ijngokʼa tojo kitso je Isaías, nga kitso: “Ya jñani ʼndekixí chon jé xosʼin nga kʼoakoa̱nchon joni Edén, kʼoa ya konga jñani tokixí chon nga kʼoakoa̱nchon joni ʼndenaxóle Jeobá” (Is. 51:3). Naskánakisichon ijngokʼani je ʼndele chjota israelita. Tikʼoasʼinni, jé Jeobá koasenkaoná nga ʼndenaxó si̱koaa je Sonʼnde. Machjén nga tongini koakoá ndʼaibi nga mená ʼndenaxó si̱koaa Sonʼnde nichxin xi sʼa nroa.

Tobʼelañá, koaan tsje si̱choaan ndʼianá kao ndaindʼianá jokji tjen kʼoakoa̱nná. Koaan tsje si̱choaan ninga tsín kʼoasʼin ngale chjotandaindʼianá nga tsje síchon. Kʼoati koa̱n kʼoainganʼioá nga matsje Ndʼia jña chotʼayá kao jña satío kjoajtíntse. Kʼoa tsa kʼoakoa̱nná koaan kʼoainganʼioá ya jñani kjoaxkón sʼe, kʼoasʼin koakoñá nga mená kuinyakoaa je xi nganʼio machjénle. Koaan i̱ kuixoán: “A koaan kui skotʼaya je xá xi sʼian nichxin xi sʼa nroa tsa tsjoáʼndena Jeobá nga koatejna ngantsjai nichxin”.

Jngojtín mani je ndsʼee kao tichjaa xi tjíosítsje kʼoa tjíosíndachon ya Ndʼia jña chotʼayá.

A JETIYONDAA NGA SI̱SINLEE XI KJOAʼÁYANILE

Kʼianga jekisikjaʼáyale Jesús je tsotiʼndíle Jairo kʼoakitso nga katanikjen je tsotiʼndí (Mar. 5:42, 43). Ngotjojin tsakʼainile jme xi kiskine je tsotiʼndí nga tosʼa 12 nóle. Tonga si̱kjaʼaitsjenla jokji xá sʼe̱ kʼianga jesitjoson Jesús je én jebi: “Kjoaʼaí hora nga kjuinrʼoé jta̱le ngatsʼi xi tjío ya tsjó kʼoa kuitjo” (Juan 5:28, 29, TNM). Ninga tsínkjoan ñaki kʼoatso Biblia, je xi kjoaʼáyanile koa̱nchjénjinle ʼnde jñani koationi, najño kao tsojmi xi ski̱ne. Koaan tongini koakoá ndʼaibi nga mená kʼoainganʼioá nichxin xi sʼa nroa. Si̱kjaʼaitsjenjinla jebi.

Jméni xi sʼiaan ndʼaibi nga koakoá nga jetiyondaa nga mená kuiyoaa kʼianga jeʼndenaxó koa̱n

Jngojtín mani je ndsʼee kao tichjaa xi tsjoa tjío kon nga tjíokjoéya je ndsʼee xi xin naxinandá bichóni nga sʼejna jngo kjoajtíntse ya París.

Kʼianga sʼejinná nga je superintendente xi tsʼe circuito kjoaʼaísíxatʼaná, a kʼoabixoán nga mená ñá si̱kjén. Tsa jngo ndsʼee xi tsín tiya Betel kʼoéjnani kʼoa tsa tsínti superintendente xi tsʼe circuito sʼin kʼoejnani jngo ndsʼee, a koaan kjoásjailee jngo ʼnde jñani koa̱n kʼoéjnani. Tsa kjoajtíntse sʼe̱jna ya jñani tsaan, a koaan kʼoainganʼioá nga tongini kʼoa nga jekjoetʼa kjoajtíntse kʼoa tsa kʼoakoa̱nnáje̱ nga chjoéyaa je xi kuicho kjoajtíntse.

A JETIYONDAA NGA KʼUÍNYALEE XI KJOAʼÁYANILE

Jmeni xi tso Hechos 24:15, kui bakóyaná nga nʼio nkjín millón chjota kjoaʼáyanile. Nʼio nkjín xi tsín tsabexkon Jeobá nga kjesa mʼejin, tonga nga jekjoaʼáyanile kʼiaa sa̱kóyale xi tʼatsʼe Jeobá.a Jé koakoyale chjota jebi xi jekjoatse tjíosíxále Jeobá (Is. 11:9). Je tichjaa Charlotte xi jekitsoyason ya Europa, Sudamérica kao África, jetíkoyale nga kjoaʼaí nichxin jebi. Ñaki tsjoa tjín kon nga i̱ tso: “Kui tikoyale nga xínyale je xi kjoaʼáyanile. Kʼianga kui bʼexkia tʼatsʼe chjota xi tsakʼejna nichxin kjoatse, i xian: Alikuijin i̱ kisʼin chjota jebi tsa tsabelani xi tʼatsʼe Jeobá. Jemena xínyale je xi kjoaʼáyanile nga kʼoaxínle nga nʼio tse kjoanda kisicha nga tsín tsabe xi tʼatsʼe Jeobá”.

Kʼoati tse jmeni xi sʼa sa̱kóyale je choʼndale Niná xi kʼia kʼien nga kjesa faʼaijin Jesús i̱ Sonʼnde. Nʼiojin tsjoa sʼe̱ tokoán nga kʼuínyalee je Daniel josʼin kitjoson je én xi tongini kiski xi tsín koanjinle (Dan. 12:8). Kʼoajin tinʼio tsjoa sa̱tío tokoán nga kʼuínyalee je Rut kao Noemí nga ya ntje̱le kinroani xi Mesías koan. Tsjoa sa̱tío tokoán nga kʼuínyalee je xi kjoaʼáyanile jngo tjíjtsa Sonʼnde. Alikui tisi̱kjáojinñá nga̱ tsín tikʼoakoa̱nchonni jochon ndʼaibi.

Je tichjaa jngo tratado tsjoále jngo chjoón ya jñani sané najño.

Jósʼin koakoá ndʼaibi nga mená kʼuínyalee je chjota xi kjoaʼáyanile. Jngo koya xi koasenkaoná kuinga ngisa nda koa̱nná koakoyaa ndʼaibi kʼoa nga kʼuínyasoán je Énle Niná (Mat. 24:14). Ningalani chʼin bʼetʼaná kʼoa ninga jejchíngaa, tsa kʼoasʼiaan jokji tjen kʼoakoa̱nná kʼoasʼin koakoñá nga jetiyondaa nga kʼuínyalee je xi kjoaʼáyanile.

A me kjoaixiná nga kuiyoaa nga jeʼndenaxó koa̱n. A tsjoa sʼe tokoán nga kui nikjaʼaitsjeen nga ʼndenaxó si̱koaa je Sonʼnde, nga si̱sinlee je xi kjoaʼáyanile kʼoa nga kʼuínyalee Énle Niná. Kʼoasʼin koakoñá nga jetiyondaa nga kʼoasʼiaan nga jeʼndenaxó koa̱n tsa kʼoanʼia ndʼaibi jme xá xi tjín, je xá xi kʼoati sʼe̱ ya ʼndenaxó.

a Chótʼai je kjoaʼmiya xi “Nkjín xi bʼainganʼiole nga katabatiojin je kjoakixi” ʼmi, xi faʼaitʼa Xo̱n xi Bájinkonná xi tsʼe septiembre 2022.