A faʼaitsjenli

A koaanli kʼoasí jme xi kjonangi i̱bi xi ya yʼangini je Xo̱n xi Bájinkonná xi tsʼe nó 2023.

Jmé xi tsoyanile nga nindayaa kjoafaʼaitsjenná (Rom. 12:2).

Ali tsa tokuijin xi machjén nga tosakʼoa kʼoasʼiaan xi ndatjín. Machjén nga si̱kjaʼaitsjenjiaan jokjoan kjoaixiaa kʼoa si̱ndayaa yaoná nga kʼoakoa̱nkjoaan jotso je kjoatéxomale Jeobá (w23.01, página 8, 9).

Jósʼin si̱kjaʼaitsjeen tʼatsʼe jokjimachon ndʼaibi.

Nʼio chjíle nga kuenta sʼiaan josʼin tíbitjoson je én xi tongini kinokjoa. Tonga kʼoati machjén nga chósonnilee jokuixoán nga̱ tsín mená nga xkoa̱ya sʼin kuiyoaa ya jinjtín. Tosa kui kuenta sʼiaan jmeni xi tso naxinandále Niná (1 Cor. 1:10) (w23.02, página 16).

Jméni xi tsín mangóson nga kisʼenngindá je Jesús kao nga fisʼenngindá je chjotatjenngile.

Nga kisʼenngindá je Jesús alikui yaole kitsjoatʼale Niná nga̱ jetsʼe Niná naxinandá xi kitsinjin. Alikui jme jée xi kʼoakoannile nga̱ chjotatsje koan (w23.03, página 5).

Jméni xi koa̱n sʼiaan nga nkjín ndsʼee katatsjoá comentariole.

Tochoakjoan én kuinókjoaa ánni nga ngisa nkjín koa̱nni je ndsʼee xi tsjoá comentariole, kʼoa tsín nkjín koya jmeni xi si̱kʼaxkiaa ánni nga kʼoati tsjoáni comentariole xi ngikʼa (w23.04, página 23).

Jméni je “Ndiaa Tsje” xi bʼaxki̱ ya Isaías 35:8.

Tsoyanile nga kui ndiaa jebi kiya je chjota judío nga kitjoni ya Babilonia kʼianga ki ya Israel. Kʼoati kui “Ndiaa Tsje” jebi titsomayaa ndʼaibi. Siento nó tongini nga nó 1919 kisʼetsʼiakao nga kisʼenda, xi tsonile, tíbitjo je xo̱n xi Énle Niná yʼangini kʼoa nkjín én tífaʼatoya je Biblia. Nga ya titsomayaa ndiaa jebi kʼoasʼin tiʼyaxkoán je Jeobá josʼin mele, kʼoa nichxin xi nroaján tsee kjoanichikontʼain sʼe̱ná nga koatexoma Chjotaxále Niná i̱ Sonʼnde (w23.05, página 15-19).

ʼYáni xi tsoyanile nga jao yánchjín xi bʼaxki̱ ya capítulo 9 xi tsʼe Proverbios.

Ya Proverbios jngo “chjoónchini” síkʼaxki̱. Kʼoatso nga kjoabiya bichómani tsa je kuinóʼyalee. Ijngo chjoón síkʼaxki̱ xi “kjoachjine” tsoyanile, kʼoa kʼoatso nga sʼe̱ná kjoankjíntokon kʼoa koaan kuiyoaa ngantsjai nichxin tsa kuinóʼyalee (Prov. 9:​1, 6, 13, 18) (w23.06, página 22-24).

Jósʼin bakó Jeobá nga nangitokon kʼoa nga nda kosonnile josʼín.

Je Jeobá kʼoakitsole Lot nga ya sonnindo katamanga. Tonga nga kʼoakitso Lot nga tosa ya ʼnde jña Zóar ʼmi koai, je Jeobá kitsjoaʼndele (w23.07, página 21).

Jmé xi koa̱n sʼin jngo chjoón tsa pornografía kotsenle xʼinle.

Alikui je chjoón tjínle jée. Tosa kui kuenta katasʼín nga chjí bekon Niná kʼoa kui katasíkjaʼaitsjenjin jñani kʼoatso Biblia nga kitsjoanganʼiole Jeobá je yánchjín xi kʼoati kisatio kon nichxin kjoatse. Koaan koasenkao je xʼinle nga tsínti pornografía skótsennile (w23.08, página 14-17).

Jósʼin basenkaoná nga ninkjínlee tokoán kʼianga kui kjonanginá chjota josʼin makjainná.

Kui si̱kjaʼaitsjenjiaan ánni nga kui kjonangini. Tsa kʼoasʼiaan, ngasin nganda chja̱kaonajmiá (w23.09, página 17).

Jmé xi bakóyaná jokisʼin María nga tsakásjai nganʼio.

Kʼianga kisʼejinle María nga na̱le koa̱n je Mesías, kisijéle nganʼio xi kjaʼaí nga kuitjosonle je xá xi kisʼenele. Je ánkje Gabriel kao Elisabet kui tsakjákaonajmíni María jotso je Énle Niná kʼianga kitsjoanganʼiole. Kʼoati koa̱n kuinyakaoná je ndsʼee tsanda ñá (w23.10, página 15).

Jósʼin ʼyañá nga nrʼoéná Jeobá kʼianga bʼetsʼoalee.

Kʼoatso nga nrʼoéná kʼoa kui kuenta sʼín jmeni xi tjínndajinle kʼianga tsjoáná jmeni xi nijélee (Jer. 29:12). Alikui jao tjínná nga nrʼoéná, ninga tsín tongóson sʼin tsjoáná jmeni xi machjénná (w23.11, página 21, 22).

Tsa jekui nchja̱ni kjoachoya xi tjínná ya Romanos 5:​2, ánni nga kui síkʼaxki̱ ijngokʼani ya versículo 4.

Kʼianga jemakjainle chjota jotso Énle Niná kui koyale nga ʼndenaxó koa̱n sonʼnde. Tonga nga maskanni, nga kjoa faʼatojin, nga chókjoajinle kʼoa nga majinle nga nda tíjna ngixko̱n Jeobá, ngisaa tisʼejngongáni kon nga kuitjoson jmeni xi koyale (w23.12, página 12, 13).