Ninga soana ngasʼa misionera sʼin tisixá

Kʼiaa kitsian nga nó 1951 ya Viena (Austria). Ninga soana alikui ñʼai koanna nga tsakʼetsʼoale Niná. Católico koan xijchána, tonga kʼianga ñajan nóna kʼiaa kiskotʼaya Biblia je pana kao testigole Jeobá. Kʼoa xijekoan, kʼoati kiskotʼaya je mana.

Tokjoan tsangínnijin kjoajtín ya jtín xi Döbling ʼmi, xi tíjna ya Viena. Ñatjen kichotʼayaníjin Biblia jotjín manijin xi tiyuijin ya yaniʼya, ñatjen tsangínníjin kjoajtín kʼoa tsakʼainganʼioníjin jme xá xi sʼe nga satío kjoajtíntse. Nga kui nichxin, tsakakóyana je pana josʼian nga tsjoake̱ koa̱n Jeobá kʼoa kʼoakitsole Jeobá nga tsakʼétsʼoale nga precursora sʼin si̱xáijin kao tsoti tichja. Tonga nga kui nichxin alikui kʼoatjín tokoan nga precursora sʼin sixá.

KʼIANGA TO XÁLE NINÁ KISʼIAN

Kʼiaa kisʼe̱nngindá nga nó 1965 nga 14 nóna. Tonga ñʼai koanna nga tsakjakaonajmía je chjota nga kixinyasoan. Kʼoasʼin kisikjaʼaitsjen nga ngisa nkjín koya jmeni xi male sʼín xti xi kjaʼaí kʼoa kʼoati koanmena kʼoakisʼian tsanda an. Kʼianga tosʼa choatse jaʼato nga kisʼe̱nngindá, jé tsakajta xti xi tsín je Jeobá síxále. Ningalani kʼoakisʼian, alikui nda kisʼe tokoan nga̱ ʼbeña nga tsín kixi tíjna nga ya fajtaa je xi tsín je Jeobá síxále. Ñʼai koanna nga tsín tiya tsakajtaña. Kʼoeyanajmílano jmeni xi tsakasenkaona nga tsín tije kisimiyoña.

Nga kui nichxin jngo tsoti xi 16 nóle xi Dorothée ʼmi, publicadora koan. Kui kisikjaʼaitsjenjian ánni nga nʼio tsjoakeni nga xki̱ ndʼia tsoyason. Ninga ngisa nkjín nóna tikʼoajinni je, alikui nanda bitjoxinyasoan. Itso xi kisikjaʼaitsjen: “Testigole Jeobá xijchána, tonga je Dorothée tojé xi je Jeobá tísíxále. Jé síkuinda na̱le nga tímʼe, ninga kʼoalani, ntsjaintsjai bitjotsoyason”. Nga kuenta kisʼian jokisʼin Dorothée, tsakasenkaona nga ngisa nda kisixále Jeobá. Tochoatsee jaʼato nga precursora sʼin kinixáijin. Títjon precursora auxiliar sʼin kinixáijin kʼoa skan nga precursora regular koainjin. Kʼoati tsjoa kisʼe tokoan tsanda an nga tsjoa tjínle je Dorothée. Jé tsakasenkaona nga kiskajian jngo chjota xi kixinyale Biblia. Kʼoa alikui tinanda kitsokjonña nga tsakjakaonajmíña chjota je Énle Niná nga xki̱ ndʼia xki̱ ndʼia, ya yandiaa kʼoa tojñani.

Kʼianga tosʼa jngo nó nga precursora regular sʼin tisixá, yaa kinikasén jngo precursor especial xi Heinz ʼmi ya jtín jñani tijna. Je ndsʼee jebi yaa Canadá kiskotʼaya Énle Niná kʼianga kikonle je ndsʼe̱ xi testigole Jeobá ma. Nga tosʼa tsaʼbexkoan tokjoan koantsjoakeña. Kui xi koanmele Heinz nga misionero koa̱n, tonga an alikui kui xi koanmena. Kuinga tsín tsen kisʼinña nga tosʼa títjon tsa je matsjoake, tonga nga koanskanni tsakitsomakaoníjin xíngijin kʼoa chixanníjin. Kʼoa tojo precursor sʼin kinixáijin ya Austria.

KʼIANGA KOANMENA MISIONERA KOA̱N

Je xʼinna sakʼoa kui tsakjákaonajmínina nga mele misionero koa̱n, tonga alikuikʼia kjoanʼio tsakʼénena nga kʼoatisʼin sikjaʼaitsjen tsanda an. Tonga kʼoati i̱ kitso sakʼoana: “Nga tsínná xti koa̱njin ngisasa tse si̱xálee Jeobá”. Ningalani ñʼai mana, precursora sʼin jetisixá nga kʼia kʼoa kʼoasʼin kisikjaʼaitsjen nga tsín kuitjosonna tsa misionera koa̱n. Tsejta koan je xʼinna kʼoa tosi tonda kui tsakjákaonajmínina nga mele misionero koa̱n. Kʼoati kitsona nga tsín to yaona kjuíña, nga tosa kui sikjaʼaitsjen josʼin koasenkoa xi kjaʼaí. Nga kʼoakitsona nʼio nda tsakasenkaona.

Chaan koanmena nga misionera sʼin sixá kʼoa tsakʼendaníjin solicitud nga Skuela xi tsʼe Galaad koanngínjin. Tonga je ndsʼee xi tíjna ya sucursal kʼoakitsona nga títjonkjoanla nda katamana kuinchja inglés. Kʼoakisʼian jotsakʼinna, tonga nga jejan nó jaʼato tokʼoakoannajin nga kʼoatsakʼinnajin nga ya si̱kasénnajin jngo jtín jñani én serbocroata nokjoa ya Salzburgo (Austria). Ñato nó nga ya tsakʼainganʼiuijin ʼnde jebi, jngo nó nga superintendente xi tsʼe circuito sʼin kinixáijin. Ninga ñʼai koannajin je én xi nokjoa, nkjín chjota tsakʼinyalaijin Biblia.

Kʼianga nó 1979, kʼoatsakʼinnajin nga vacación koanngínjin ya Bulgaria. Nga kui nichxin tíchjoale xále Niná ya Bulgaria, kuinga tsín koan tsakʼinyasonnijin. Totsangínkaochélaijin xo̱n xi Énle Niná yʼangini je tichjaa xi aon mani xi tjío ya jñani Sofía ʼmi. Ninga nʼio titsokjoan, jé Jeobá tsakasenkaona nga kitjosonna xá jebi. Tsa jchale tichjaa jebi nga je Jeobá tjíosíxále ndoyájin koai, tonga nʼiojin kjima kʼoa tsjoa tjío kon nga je Jeobá tjíosíxále. Nga kʼoatjíosʼín tichjaa jebi, kʼoasʼin kisikjaʼaitsjen nga kuitjosonna tsanda an tojme xá xi koanena naxinandále Niná.

Tikinikasénngánijin solicitud nga menajin koanngínjin Skuela xi tsʼe Galaad, nga kʼia kʼoatsakʼinnajin nga koa̱n koanngínjin. Kʼoasʼin kinikjaʼaitsjainjin nga ya Estados Unidos koanngínjin kʼoa nga én inglés sʼe̱jna skuela. Tonga yaani Wiesbaden (Alemania) kisʼejna skuela jebi nga sá noviembre nó 1981. Nga én alemán kisʼejna skuela ngisaa choa ñʼai koanna. Kʼoalaxínno jñani kinikasénnajin nga jejetʼanajin skuela.

YAA KINIKASÉNNAJIN JNGO NAXINANDÁ JÑANI KJOAJCHÁN TJÍN

Yaa Kenia kinikasénnajin. Kʼoakitsonajin je ndsʼee xi tjío ya sucursal tsa tiyondaijin nga ya Uganda koanngínjin, jngo naxinandá xi tiya chrian Kenia tíjnani. Te nó tongini kjoajchán kisʼe ya Uganda kʼianga je chjota xi Idi Amin ʼmi tsakatéxoma. Jmi chjota kʼien kʼoa millón koanni xi kjoañʼai tsakjaʼá kʼianga tsakatéxoma chjota jebi. Kʼianga nó 1979, tikjaʼaí chjota tsakatéxomangáni. Kʼianga kisʼejinnajin nga kjoajchán tjín ʼnde jebi, to jao kisʼe tokuinjin tsa koanngínjin, tonga nga tsangínjin Skuela xi tsʼe Galaad kʼoatsakʼinnajin nga je Jeobá si̱nʼiotʼaijin, kuinga tsangínnijin ya Uganda.

Ñʼai koanchon ya Uganda. Yaa Anuario 2010 jaʼaitʼa jmeni xi kitso je Heinz xi tʼatsʼe Uganda. I kitso: “Ñʼai chon nandá kʼoa alikui nda teléfono. [ . . . ] toxijña tsin chʼinsá kʼoa nʼio kisʼe ché, ngisaa kʼianga nitje̱n. Totsakatioʼya je chjota kʼoa tsakʼétsʼoale Niná nga kʼoakitsole nga tsín jme xi katamale”. Ninga kʼoalani koan, je ndsʼee xi ya tsʼe tosi tonda nda kisixále Niná.

Kʼianga nó 1982 yaa Kampala, Uganda kichuijin. Aon sá nga ya tsakiyonijin ya ndʼiale ndsʼee Sam kao Christina Waiswa, aon mani xtile kʼoa ño mani xínkjín xi kʼoati ya tjíokao. Ninga me tokjitʼa nga tojngo kʼa kjien nga jngo nichxin ndsʼee jebi, nda kiskoéyanajin. Jokjitse nga ya tsakiyokoaijin familia jebi, koanjinnajin jmeni xi koa̱n sʼiainjin nga misionero sʼin tinixáijin. Tobʼelañá, tochoaa nandá kinichjainjin nga tsakindoyaijin kʼoa tikui nandá jebi kinichjénnijin nga tsakʼejtenyaijin baño. Kʼianga nó 1983, xin tsangínkiyuijin xi tiyani Kampala, tonga ngisaa nda chon.

Nʼio tsjoa kisatio tokuinjin nga tsakʼinyasuinjin. Ñandia nga tsʼato 4,000 revista tsakjayolaijin chjota kʼianga jngo sá, tonga xi ngisa kisasennajin kuinga bexkón Niná je chjota kʼoa nda nchja̱najmíni xi tʼatsʼe Biblia. An kao xʼinna, sakʼoa 10 kʼoa tsa 15 chjota tsakʼinyalaijin Biblia, kʼoa kʼoati tse xi koanjinnajin nga tsakʼinyalaijin chjota. Ninga nʼio kjin fini ndso̱ko̱, tsjoa tjíole ngantsjai nga bichó kjoajtín, alikuikʼia nga jokitso, tonda tjío kon ngantsjai.

Nga nó 1985 kao nó 1986, ngi jao kjoajchán kisʼengáni ya Uganda. Nkjín kʼa tsaʼyaijin nga tosʼa xtiʼndí xi tjo̱ yʼa nga tsakatiochjoa ya yandiaa. Kjitʼaa kʼoatsakʼinlaijin Jeobá kʼianga tsakʼetsʼoalaijin nga katabasenkaonajin nga jchaijin jmeni xi sʼiainjin ánni nga tosi tonda kʼuínyasonnijin. Kinrʼoénajin Jeobá kʼianga tsakʼetsʼoalaijin. Ninga tinokjuinjin nga kʼia, tsjoa kisatio tokuinjin nga kitsaojinjin chjota xi koanmele tsabesa xi tʼatsʼe Biblia.

Kʼoati tsjoa kisatio tokuinjin nga tsakʼinyalaijin Biblia chjota xi xin naxinandá jaʼaini. Tobʼelañá, jin tsakʼinyalaijin Biblia je xi Murat kao xi Dilbar Ibatullin ʼmi, xi Tartaristán (Rusia central) tsʼe. Je Murat chjinexki kʼoa kiskotʼaya Biblia kao chjoónle, kʼoa ndʼaibi tosi tonda je Jeobá tjíosíxále. Nga koanskanni, kʼiaa kiskajian Tatjana Vileyska, jngo chjoón xi Ucrania tsʼe. Nʼio ba tjín kon kʼoa koanmele kisikʼien yaole. Tonga nga jekoanni, je Tatjana kisʼenngindá kʼoa ki ijngokʼani ʼndele. Xijekoan, yaa kisixá jñani faʼatoya xo̱n xi Énle Niná yʼangini.a

XIN ʼNDE KINIKASÉN IJNGOKʼANAJIN

Vacación tiyuijin ya Austria nga nó 1991 nga kʼoakitsonajin sucursal nga ya Bulgaria sikasénnajin. Alikui tjoʼndele tsakai nga tsoyason je ndsʼee xi Bulgaria tsʼe, tonga kʼianga kichuijin jema tsoyason. Tojonásʼin jekabʼeyanajmíno, je Heinz kao an, totsangínkaoʼmalaijin je xo̱n xi Énle Niná yʼangini je ndsʼee xi ya tjío, tonga nga nó 1991 kui xá kinikasénninajin nga koanngínkʼinyasuinjin.

Kʼoatsakʼinnajin nga tsín tikoa̱n ya Uganda koanngínnijin kʼoa tsín tikoan tsangínchʼanijin tsojminajin kʼoa alikui titsaʼyanijin je ndsʼee xi ya tsʼe. Toyaa tsangínndiaijin ya Betel xi tíjna Alemania. Jngo carro tsakʼainajin xi tsangínkoaijin saʼnda Bulgaria. Yaa kinikasénnajin jngo grupo xi tíjna ya ʼnde jña Sofía ʼmi, jñani kanla mani publicador.

Kʼoati tjín jmeni xi ñʼai koannajin ya Bulgaria. Jolani nga tsín manajin je én xi nokjoa, kʼoa to jao xo̱n xi Énle Niná tjín kʼianga én búlgaro, je libro La verdad que lleva a vida eterna kao je libro Je xo̱nna xi bʼéyanajmí jotso Biblia. Ñʼai koannajin nga kitsaojinjin chjota xi koanmele kiskotʼaya Biblia. Ninga kʼoalani, nʼio tsjoa tjíole je ndsʼee kʼianga kitsoyason, tonga alikui kisasenle je xi nyatítjonle yo̱ngo̱ nga tsakʼinyasuinjin kʼoa kʼiaa kinroatsʼiani nga kjoa kisʼe.

Kʼianga nó 1994, je chjotaxá kʼoakitso nga tsínti religiónni je testigole Jeobá, kʼoa je chjota kʼoasʼin kisikjaʼaitsjen nga tsín ndatjín jmeni xi tiʼmiyaijin. Nkjín ndsʼee xi ndoyá kichani kʼoa ya periódico kao televisión énndiso tsakánenajin. Kʼoakitso nga tosíkʼien ʼndíxtile je testigole Jeobá kʼoa nga kʼoatsole xi kjaʼaí nga katasíkʼien yaole. Ñʼai koanchon nga tsakʼinyasuinjin, sakʼoa tsʼen chjota xi kisatejinjin. Kinchjale policía kʼoa tjín xi tsakasén sakʼoanajin, ñʼai koannajin nga kisokonajin ʼnde jña tsakiyojtínjin. Ñandia kʼianga tíjna kjoajtíntse, kicho policía kʼoa tsínti kitsjoaʼndeni nga tosi tonda kisʼejna. Je Heinz kao an, kjesa kui kjoa bitjatojinjinjin nga kʼia, nga̱ je xi Uganda tsʼe nda chjota kʼoa nrʼoé Énle Niná. Kʼoalaxínno jmé xi tsakinyakaonajin nga tosi tonda nda kisatio tokuinjin.

Tsjoa kisationajin nga ñatjen tsakiyuijin kao ndsʼee, nga̱ tsjoa tjíole nga tsabe xi tʼatsʼe Niná kʼoa nʼio chjí tsabe nga ya kichochonlaijin. Jtín sʼin tsakiyuijin kʼoa kinikuindangañáníjin xíngijin. Tsaʼyaníjin nga kui xi tsjoa bʼé tokoán nga je chjota kuenta nʼia kʼoa nga tsín tokui kuenta nʼia je kjoa xi bitjatojiaan. Tsa kʼoasʼiaan, tsjoa sa̱tío tokoán tojme xá xi sʼe̱nená jinnaxinandále Niná.

Tochoaa nó jaʼato nga nda koanchon ijngokʼa. Kʼianga nó 1998 religión sʼin tsaʼya ijngokʼale ngixko̱n kjoatéxoma je testigole Jeobá kʼoa nkjín xo̱n xi Énle Niná yʼangini jaʼatoya kʼianga én búlgaro. Kʼianga nó 2004 kʼiaa kisʼetsʼiakao nga koanxá ya sucursal xi tíjna ya Bulgaria. Ndʼaibi 57 jtín tjío ya Bulgaria kʼoa 2,953 mani ndsʼee xi tsoyason. Kʼianga nó 2024 je xi kicho nga jaʼaitsjenya Kjoabiyale Cristo 6,475 koanni. Ndʼaibi, ya ʼnde jñani Sofía ʼmi, jñani to aon mani tichjaa tsakai, jeñajan mani jtín tjío. Tiʼyaníjin josʼin tíbitjoson én jebi: “Je xi tochoa mani jmi koa̱n” (Is. 60:22).

KJOA XI KITJATOJINJIN

Jokjitse jetijna toxá chʼin bʼetʼanina. Nkjín tumor kisʼena, jngo xi ya jkoa kisʼele. Radioterapia kinikaona kʼoa 12 hora tsʼachxinle kʼianga kitiya. Kitjoxin choa je tumor xi tjínna. Yaa tsakatejna choatse ya sucursal xi tíjna ya India kʼoa skan tsangín ijngokʼaijin ya Bulgaria.

Je Heinz kui chʼin tsʼatsenle xi tojeyʼani xínkjín. Je chʼin xi huntington ʼmi. Bijbi ñʼai koanle nga tsakʼamje. Alikui tikoan kinchja̱ni kʼoa alikui tikoan kisikjanni yaole. Nga sa táo sa táo koan an kisisinle. Kicho nichxin nga tsín titsaʼbeña jokisʼian kʼoa nʼio kisikjáojian. Me tokjitʼa nga je kikao jngo ndsʼee xi Bobi ʼmi kʼianga kikakóyason. Ninga ñʼai koanle nga kinchja̱ kʼoa ninga tsín tikoan kisikjanni yaole je Heinz, alikui soa koanle Bobi nga tsakʼamjekao. Kʼianga tsín koanʼana nga kisikuinda Heinz jé Bobi kisikuinda. Ninga tsínlani kisʼenajin xti, jo tinajin sʼin tsaʼyatokuinjin je Bobi (Mar. 10:​29, 30).

Je Heinz cáncer kisʼele kʼoa kʼiaa kʼien nga nó 2015. Nʼio ba kisʼe tokoan kʼoa alikui titsaʼbeña jokisʼian nga toʼan. Tojo nʼio faʼaitsjenna xi tʼatsʼe (Luc. 20:38). Faʼaitsjenna jokitso nga kinchja̱. Nga nda tso én tsakjákaona kʼoa nga nda kjoafaʼaitsjen kitsjoana. Nʼio chjí ʼbe jokji tse kinixálaijin Jeobá nga joaijin.

TSJOALE KJOANDA JEOBÁ NGA TÍBASENKAONA

Ninga nʼio tse kjoa tifaʼatojian jé Jeobá tíbasenkaona. Tíbasenkaona nga misionera sʼin tisixá, nga tsjoake̱ kjima chjota ninga sakʼoa tsokjoan (2 Tim. 1:7). Tsjoale kjoanda Jeobá nga ñaki to xále tinʼiaijin an kao tichja xi maʼndí. Superintendente sʼin tjíosíxá kao xʼinle kʼoa yaa fisíxatʼa je jtín xi tjío ya Europa jña én serbio nokjoa. Tíbitjoson jmeni xi kitsole pana je Jeobá nga sʼa ʼndí kjoainjin.

Nda sʼe tokoan kʼianga kotʼaya jotso Biblia. Kʼianga kjoa faʼatojian ngisaa tinʼio bʼetsʼoangánile Niná tojo kisʼin Jesús (Luc. 22:44). Kʼoasʼin bakónina Jeobá nga nrʼoé kʼianga bʼetsʼoale nga tjao bena je ndsʼee xi tjío ya jinjtín ya Nadezhda (Sofía). Fákaonajmína, kʼoatsona nga chjí bena. Nga kʼoatsona nda sʼe tokoan.

Kui sikjaʼaitsjen jokoa̱n kʼianga jekjoaʼáyale xíngiaa xi jekʼien. Sikjaʼaitsjenña nga ya tiyokoaijin xíngijin ngatsʼijin. Nga ya tjío je xijchána kʼoa nga kʼoakjoan jokjoan kʼianga sʼa chixankao xínkjín. Nga kui tíbʼénda tsoti tichja xi kuichinijin kʼoa nga jngo naxín sénjnatʼale je xʼinna. Nga kui sikjaʼaitsjen jebi nda sʼe tokoan kʼoa tsjoale kjoanda Jeobá.

Kʼianga kui sikjaʼaitsjen josʼin tijna kʼoa josʼin koatejna nichxin xi nroaján, kʼoasʼe tokoan jokisʼe kon David kʼianga i̱ kitso: “Jñáni tijna ndʼai tsa tsínlani kisʼena kjoamakjain nga skoe kjoandale Jeobá i̱ sonʼnde jñani tjío je chjota. Je Jeobá chóyalai; nʼiojin katamai, kʼoa nʼiojin katama ni̱ma̱li. Je Jeobá chóyalai” (Sal. 27:​13, 14).