Tjínkʼa xi kjonangi

Kʼiá saʼnda tjen kʼuínyaa je énnda

Je Jesús i kitso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa” (Mat. 24:14). Je én xi “kjoetʼa” tso nga én griego kui én xi télos tso machjén. Ya versículo 6 kao 13 kui tínchja̱ni nga kjoetʼa jmeni xi chonle sonʼnde je Na̱i (Apoc. 16:​14, 16). Saʼnda nga kʼia, tosi tonda kʼuínyasoán je Énle Niná. Alikui kʼoasʼin majinná tsakai ngasʼa xi tʼatsʼe jebi.

Ngasʼa kʼoasʼin majinná nga tsínti kʼuínyasonñá kʼianga jesi̱kjeson Babilonia xi nʼioje, nga jekoaitsʼia kjoañʼai xi nʼio tse (Apoc. 17:​3, 5, 15, 16). Kʼoasʼin majinná nga kʼia kjoetʼa “kjoandale Jeobá” nga koaitsʼia kjoañʼai xi nʼio tse (Is. 61:2). Kʼoa nga toje xi kuinje̱ngile yaole je xi kixi kitʼale Jeobá nga kjesa fitsʼiajin kjoañʼai xi nʼio tse. Kʼoatsakixoán nga ya mangóson je chjota judío xi kinjengile yaole kʼianga kichonikjeson Jerusalén nga nó 607, nga̱ jé Jeobá tsabexkón kʼoa jtike koan xi chʼaotjín (Ezeq. 5:11; 9:4). Tonga jebi alikui mangóson jmeni xi kitso Jesús ya Mateo 24:​14, nga̱ kʼoatso nga tjínsale ʼnde nga koa̱nkjainle chjota xi tʼatsʼe Niná nga kjesa faʼaijin Armagedón.

Kʼianga majinndaná jmeni xi tso Mateo 24:14 kʼoati majinndaná jmeni xi tso ya Apocalipsis 16:​21, nga jtsílao̱ nchja̱ni. Jmeni xi tso Mateo 24:14 tomajngokao jmeni xi tso Apocalipsis 16:21. Kui nchja̱ni josʼín je chjota kʼianga ʼmiyalee je Énle Niná. Tojo kitso Pablo, je chjota xi kuitjontjaile yaole kʼoasʼin bekon je énnda joni “jta̱le kjoabijnachon [ . . . ] xi tsjoá kjoabijnachon”. Kʼoa xi jtike Niná, kʼoasʼin bekon je énnda joni “jta̱le kjoabiya [ . . . ] xi tsjoá kjoabiya” (2 Cor. 2:​15, 16). Kuinga jtikeni nga̱ je Énle Niná bʼéjnatseen nga nʼio chʼao chon sonʼnde xi tsjoake, jé Na̱i kjinentsja kʼoa tojeme kjoeson (Juan 7:7; 1 Juan 2:17; 5:19).

Nʼio yʼai kjoan jtsílao̱ xi síkʼaxki̱ ya Apocalipsis 16:21. Kui xi tsonile nga ngisa tinda sa̱kóyasonngáni Énle Niná kʼianga jetíjna kjoañʼai xi nʼio tse. Ngisaa tinʼio kuinókjoangáñá xi tʼatsʼe jaʼaínle Jeobá nga kʼia (Ezeq. 39:7). Nkjín chjota xi sa̱sénle Énle Niná nga jesi̱kjeson Babilonia xi nʼioje. Tjínkʼa xi kʼia kjoaʼaítsjenle nga tongini kʼoakitso je testigole Jeobá nga ni̱kjeson je religión ndiso.

Kʼoakoan ya Egipto kʼianga jejetʼa xi te kjoañʼai kisikasén Jeobá. Kʼianga tsaʼyale nga tsínni jme chjíle je niná xi tjín ya Egipto, nga tojé Jeobá xi nʼio tse nganʼio jtínle, nʼio nkjín chjota xi ya kikao chjota israelita (Éx. 12:​12, 37, 38). Tsakui nichxin kuinga je Jeobá kitʼanile chjota jebi nga tsabe nga kitjoson jmeni xi tongini kitso Moisés nga te kjoañʼai kuichone chjota egipcio.

Toʼya chjotani xi je Jeobá koaitʼale kʼianga jeni̱kjeson Babilonia xi nʼioje, kui kjoanda sʼe̱le nga je tsjoánganʼiole je ndsʼe̱ Cristo xi tjíosa i̱ Sonʼnde nga kʼia kʼoa barré sʼin jchatokon (Mat. 25:​34-36, 40). Tonga tokʼiaa nga tjóʼndele chjota nga kʼoasʼin nga kjesa fitsʼiajin Armagedón, nga tjíosa chjotale Cristo i̱ Sonʼnde xi ya ngʼajmi tjínle kjoachoya.

Nga majinndaná jebi kʼoasʼin ʼyañá jokji kjoatsjoacha tjínle Jeobá kʼoa jokji kjoamatokon bakóná. “Kaile nga jngo xi cha̱. Tomele nga kjuicho síkʼantjaiya kjoafaʼaitsjenle ngatsʼi” (2 Ped. 3:9).