Humanu

Yne Miitꞌin Mesuwat Mytyyp Tote Yt Naku I Nug Haria Wo

2 Pyno yt naku i watoꞌe -Uito waku yn nug hat paĩ an maꞌato iraniaꞌin mesuwarotiaria yt naku i nug kahato haria tukupteꞌen watoꞌe aipyꞌa pe pote yt iweꞌeg hin i rakaria wo watoineꞌen Tupana wanetup hawe e. Katupono Tupana ti aikuap kahato. Tupana tikuap yne aiminug saꞌag koꞌi yt heremo i rakaria koꞌi e. Iꞌewyte aiwanetup hap koꞌi yt ikahu rakat i toikuap. Miꞌi pote -Miitꞌin iraniaꞌin ni saꞌag nug haria sese maꞌato uito waku nug hat areineꞌen yne uiminug hap ete watoꞌe pote aiwemaꞌat haria wo watopyhuꞌat. Katupono aitoria torannia yt naku i nug haria Tupana wanetup hawe. Miꞌi pote karãpe -Uito poꞌog iraniaꞌin kai aiꞌe pote yt iweꞌeg i rakaria wo watoineꞌen. Katupono -Yt kat i uimiꞌaparap hap Mehin Mimi yt watoꞌe kuap i Tupana kape. Taꞌi Tupana tikuap yne aiwepywiat aiminug koꞌi. Iraniaꞌin yt tikuap i yt hehamo i watunug yt naku i pykai Tupana tikuap toikuap yne pote. Pywo ti rat toineꞌen kahato aiꞌaparap hap. Miꞌi pote yt naku i watikat iraniaꞌin miat iꞌaparap hap. Katupono aito wy yt naku i nug haria wo watopyhuꞌat Tupana wanetup hawe. 2 Taꞌi Tupana tikuap yne aiminug koꞌi sio waku sio yt toikuap. Tupana yn waku e ahepiat hanuat uwe waku uwe yt naku i e hamo uwe toiꞌapiheg uwe yt e hamuat. 3 -Meimuẽwaria yt naku i nug haria watoꞌe maꞌato woꞌokupitu kahato iꞌaparap hap iraniaꞌin minug saꞌag aiꞌaparap hap koꞌi toꞌoꞌewyꞌewy. -Waĩ ne watoꞌe iraniaꞌin me iꞌatuꞌaparap hap ete iꞌatuminug saꞌag hap tokupitu watunug pykai -Atunug yt naku i pykai yt karãpe i aru Tupana uiꞌapiheg watoꞌe. Mio tã watoꞌe pote aiwemoeso haria watoineꞌen katupono Tupana tikuap yne yt nakuap i koꞌi uimimuꞌeria. 4 -Tupana iwese kahato ahete pote waku watunug yt nakuap i motꞌi uimikyꞌesat oktan katupono iwese te ahete yt naku i watunug motꞌi pykai aiꞌe hap watoꞌe pote yt aiweꞌeg hin i aito. -Yt karãpe i aru aiꞌapiheg aiminug yt naku i hap upi yt naku i watoꞌe aiwoꞌope are. Pywo ti rat Tupana iwese kahato te ahete aikyꞌe kahato haype. Yt meremo i aiꞌapiheg teran aiminug yt nakuap i ete. Eweikuap kat pote yt aiꞌapiheg meremo i katupono iwese kahato te toikyꞌesat kahato watuwemorem aiminug saꞌag kaipyi aiꞌapiheg hap yian mete haype. Miꞌi haype ti iwese motꞌi te ahete. Toikyꞌesat watiꞌatuꞌatoiat yne aiminug saꞌag koꞌi. Mesup te yt aiꞌapiheg i te maꞌato -Atikyꞌesat eweiꞌatoiat yne eiminug saꞌag koꞌi e ahepe. Eweiꞌaipok to uhowowi uimepytꞌin e yn Tupana ahepe. 5 Yt naku i ti watunug aiwepyi Tupana yt mikyꞌesat i. Yt naku i aipyꞌa pyi watunug saꞌag nakat yn aiwepyi uiwyriaꞌin are. Miꞌi hap watunug teꞌen teꞌen hawyi aiminug saꞌag tuweꞌakytka miꞌi hawyi aiꞌapiheg iꞌewyte tuweꞌakytka. Putꞌok e aru aiminug saꞌag hap koꞌi moherep hap eꞌat hawyi aru Tupana timoherep yne aiminug saꞌag koꞌi aiminug yt Tupana mikyꞌesat ewy hap koꞌi e. Mekewat eꞌat pe ti yt iwese hin i raꞌyn aiminug saꞌag hap koꞌi ete e. Marakꞌa ewy aru Tupana topyhuꞌat aiminug saꞌag hap koꞌi ete mekewat eꞌat pe e. Mekewat eꞌat pe yne heremo aiminug wuatꞌi ehamo sio waku sio yt toimoherep. 6 Mekewat eꞌat pe aru Tupana tum naꞌyn tomotypot haria pe tomikyꞌesat nug haria pe saꞌup wakuat kahato. Maꞌato iraniaꞌin me yt naku i nug haria pe tutum naꞌyn saꞌup yt naku i iꞌatuminug saꞌag hap oktan naꞌyn e miwan me. 7 Taꞌi Tupana tum aru tomohey haria pe tomotypot haria pe tomikyꞌesat nug hanuaria pe wuatꞌi eꞌat piat iꞌatuieineꞌen hap sese tomepytꞌin saꞌup e. Miꞌiria yt iꞌatupohep hin i Tupana motypot hap ete. Taꞌatuminug wakuap koꞌi wo taꞌatumotypot aat kaꞌap. Yt karãpe i iꞌatukuꞌuro miꞌiria ete e. Katupono tomotypot saꞌup Tupana tum miꞌiria pe wuatꞌi eꞌat piat iꞌatuieineꞌen waku hap. 8 Maꞌato iraniaꞌin yt tomohey i haria pe aru tutum iꞌatuꞌapiheg wuatꞌi eꞌat piat katupono taꞌatumikyꞌesat yt naku i hap ewy yn taꞌatuꞌatunug aat kaꞌap. Yt taꞌatunug hin i Tupana mikyꞌesat ewywuat koꞌi pote Tupana miꞌapiheg koꞌi teꞌeropyhuꞌat wuatꞌi eꞌat pe e. Tupana mopyꞌahak teran hap yn taꞌatunug mote Tupana miꞌapiheg koꞌi wo teꞌeropyhuꞌat wuatꞌi eꞌat pe e. Yt naku i nug haria toran toiꞌatuꞌapiheg sio Iuteuria sio iraniaꞌin ywania toiꞌatumoehakyꞌeꞌi kahato wuatꞌi eꞌat pe. 9 Taꞌi yt naku i ti yt nakuap i nug haria ete sio aito Iuteu ywania sio wẽtup ywania e. Yt nakuap i nug haria iꞌatuwanetup hap moꞌarot kahato tukupteꞌen wuatꞌi eꞌat pe e. Iuteu ywania poꞌog hoꞌopot rakaria tukupteꞌen aru iraniaꞌin kai katupono miꞌiria ikuap Tupana ehay poꞌog torannia ywania kai haꞌawytepyi wen maꞌato yt taꞌatunug i. 10 Maꞌato ti tukupteꞌen Tupana mohey haria yne ywania kawiat. Miꞌiria tukupteꞌen toꞌywania pyꞌasetpe Tupana mikyꞌesat nug haria wakuat nug haria Iuteu ywania iꞌewyte yt Iuteuria i are. Miꞌiria Tupana mimotypot koꞌi tukupteꞌen. Miꞌiria pe -Worohoꞌonug eipe wuatꞌi miitꞌin mimotypot no wuatꞌi eꞌat pe e Tupana. Worohoꞌonug eipe uimimowepiit haria sese aat kaꞌap wuatꞌi eꞌat pe aru e Tupana wakuap nug haria pe Iuteu ywania kawiaria pe iꞌewyte wakuap nug haria iraniaꞌin ywania kawiaria pe. 11 Tupana tiꞌatukyꞌe sakpoꞌe torannia miitꞌin e. Taꞌi aito yne ywania aiwoꞌoꞌewy ewy toꞌokupitu Tupana piat aikyꞌe hap e. Yt karãpe i Tupana toꞌe wẽtup ok ywania kawiat pe yn -Worohoꞌokyꞌe eipe poꞌog uimikyꞌe iraniaꞌin kai.

12 Aparãu emiariru emiariruꞌin koꞌi Iuteu ywania kawiaria ti tukupteꞌen Tupana mienoi koꞌi Muisei miwan upi. Toiꞌatunapin Iuteu ywania tomikyꞌesat koꞌi torannia ywania eꞌyian mete. Nimo te kat som waku watunug kat som yt naku i watunug hap Tupana tiwan puretig nu kawiat rote hawyi tutum Muisei ywania Iuteu ywania pe. Maꞌato taꞌatukuap yne Tupana mikyꞌesat nu kawiat puretig miwan pykai yt taꞌatunug hin i. Miꞌi pote -Hoꞌowasat rakaria ewywuat eweikupteꞌen e Tupana Iuteu ywania pe mesup. Katupono eweikuap sakpoꞌe uimikyꞌesat koꞌi uimiwan koꞌi maꞌato miꞌi pykai yt ewetunug hin i uhepiat einapin hap e. Maꞌato mesuwarotiaria iraniaꞌin ywania yt kat i uimiwan woꞌonapin hap Muisei kaipywiat kuap haria tukupteꞌen maꞌato yt taꞌatukuap i uimiwan Muisei piat hap pykai taꞌatunug yt naku i taꞌatumikuap oktan. Miꞌi pote mio tã areꞌe yt uimiwan kuap i haria pe iꞌewyte Iuteu ywania uimiwan kuap haria pe -Yt ewetunug i wakuap eimikuap hap oktan ewy pote hoꞌowasat rakaria eweikupteꞌen e. 13 Miꞌi pote areꞌe yne miitꞌin me e Tupana -Wakuap nug haria uimikyꞌesat nug haria eipe pote waku pe eweikupteꞌen uipyꞌa pe e ahepe. Uiwyriaꞌin waku watikuap yne Tupana piat ainapin hap koꞌi. Waku watiwẽpap i imiwan maꞌato watikuap Tupana miwan Muisei mimoherep koꞌi yne pykai yt watunug i yne pote yt naku i nug haria wo watopyhuꞌat Tupana wanetup hawe are katupono mio tã e Tupana -Uimikyꞌesat miwan miat ewywuat nug haria pe yn areꞌe aru -Eipe wakuaria are uimikyꞌesat miwan miat ewywuat nug haria pe yn e.

14 Iraniaꞌin ywania yt Iuteu ywania i yt ikuap i kahato Tupana waĩꞌe hap Muisei mienoi koꞌi wen maꞌato yt ikuap i pykai taꞌatunug kahato Tupana mikyꞌesat koꞌi teꞌeruwepyi wakuat nug haria tukupteꞌen mote. Tupana miwan miat puretig nu kawiat ewywuat taꞌatunug yt ikuap i pykai. Katupono iꞌatuwanetup hawe Tupana woꞌonapin hap ewywuat toineꞌen aikotã Tupana miwan miat ewywuat toineꞌen iꞌatupyꞌa pe. Taꞌatukuap kahato kat som waku kat som yt naku i hap taꞌatukuap. Katupono miꞌi e hap topyhuꞌat yne miitꞌin me Tupana piat ainapin hap ewywuat aiwewanetup hawe. Miꞌi tupono wemoti haria wo teꞌeropyhuꞌat raꞌyn yt taꞌatunug Tupana piat iꞌatuwanetup napin hap ewy i pote. 15 Yt nakuat i nug hap tuꞌirãpe teꞌeruwemoti. Yt naku i taꞌatunug neran hawyi -Are paĩ are an meketã sig atunug hawyi yt naku i nug hat areineꞌen uipyꞌa pe iꞌatuꞌe teꞌeruwanetup hawe. Yne eꞌat pe teꞌeruwewaĩ yt naku i nug hap pupi wuatꞌi ywania yt taꞌatukuap i te Tupana woꞌonapin hap miwan miat pykai. -Atunug waku hawyi waku pe areineꞌen iꞌatuꞌe teꞌeruwekaipyi. Atunug yt naku i pote yt naku i nug hat areineꞌen iꞌatuꞌe aat kaꞌap teꞌeruwewanetup hawe. Saꞌawyꞌi pyi te ainug hap eꞌat pe turan Tupana tiwan miitꞌin pya pe wanetup hawe tomikyꞌesat koꞌi kat som waku kat som yt naku i wanetup hap. Miꞌi hap kaipyi watikuap Tupana woꞌonapin hap toineꞌen miitꞌin pya pe hap yt taꞌatukuap i te taꞌatuewaure kaꞌa puo Tupana ehay wen maꞌato taꞌatukuap kahato taꞌatupyꞌa pe teꞌeruwewaĩ hap koꞌi kat som waku kat som yt naku i watunug hap koꞌi taꞌatukuap kahato.

16 Uito ti Pauru Tupana ehay wakuat sese Iesui etiat moherep hat. Mio tã areꞌe wuatꞌi ywania pe -Uhytꞌiꞌin manaꞌin Tupana tipoꞌoro raꞌyn ahowawi Ahehakyeraꞌat hat are. Toipoꞌoro raꞌyn Tosaꞌyru Iesui Aiporekuat nuat. Eweimohey ro Iesui eipyꞌa pe eiwanetup hawe. Ewetunug no Iesui Eiporekuat no. Tupana tikuap kahato eiwanetup hap eipyꞌa piat. Putꞌok e aru uwe waku uwe yt e hap eꞌat. Miꞌi e hap eꞌat pe Iesui tiꞌatumoherep Toꞌywot Tupana pe uwe temiitꞌin sese uwe yt hap are. Toikuap kahato wuatꞌi miitꞌin wanetup hawiat koꞌi migꞌi wuat. Toikuap sese sio wẽtup ok tomohey hat sese toineꞌen sio yt hap toikuap sakpo are. Miꞌi pote Iesui ehay pyi aru Tupana ahehakyeraꞌat wuatꞌi eꞌat pe sio aiꞌapiheg wuatꞌi eꞌat pe. Uito Pauru miꞌi tã areꞌe wuatꞌi ywania pe.

17 Mesuwe uimiwan me uhehay teran Ahaꞌaseꞌi Aparãu emiariru emiariruꞌin me. Uiꞌywania Iuteu ywania -Uruto ti Iuteu ywania sese watoꞌe iraniaꞌin ywania pe. Nimo te Tupana sese mohey haria uruto watoꞌe iraniaꞌin me. Haꞌawytepyi Tupana uruꞌairo toꞌywania sese wo watoꞌe iraniaꞌin ywania pe aito Iuteu ywania Tupana sese motypot haria sese uruto watoꞌe. Nimo pyi te wuatꞌi ywania eꞌyian me uruimohey Tupana Koro watoꞌe iraniaꞌin me. Taꞌi uruepe yn saꞌawyꞌi Tupana tuwemoherep watoꞌe. Uruepe yn tutum topo wuat miwan uruwoꞌonapin hap miwan miat watoꞌe iraniaꞌin ywania pe. 18 Urumikuap yne kat som Tupana tikyꞌesat miitꞌin tunug hap watoꞌe wuatꞌi ywania pe. Uruikuap kahato Tupana miwan kaipyi kat som waku kat som yt naku i hap watoꞌe. Uruikuap kahato urupyꞌa pe kat e hap yt pywuat i hap katupono Tupana e hap miwan miat tutum uruepe watoꞌe iraniaꞌin me. 19 Taꞌi uruto ti iraniaꞌin yt ikuap i te hanuaria muꞌe sese haria watoꞌe iraniaꞌin ywania pe. Eiperia muap upiaria yt ihapytig i rakaria ewywuaria eipe watoꞌe. Eiperia aikotã muap iꞌypyryp wiat yt kat i ariãty ipo piaria rakaria ewywuaria watoꞌe iraniaꞌin me. Uruto eimuꞌe sese hanuaria urutukupteꞌen watoꞌe torannia ywaniaꞌin me. 20 Iraniaꞌin ywania yt weꞌeg i te haria moweꞌeg haria uruto watoꞌe yne Tupana woꞌonapin hawe. Tupana miwan yianmiat kuap haria uruto watoꞌe. Taꞌi Tupana mikyꞌesat koꞌi yne kuap haria uruto watoꞌe kat som waku kat som yt nakuat i hap kuap haria uruto watoꞌe yne iraniaꞌin ywania pe aikope aikope ahewyry hap tote.

21 Uito Pauru uiꞌywot uity Iuteu ywania sese miꞌi pote uito iꞌewyte areineꞌen Iuteu. Miꞌi pote atikuap pywo yne aiꞌe hap uiꞌywania maꞌato waku watuwemuꞌe wy uiꞌywania karãpe watiꞌatumuꞌe iraniaꞌin waku ahewaure kaꞌa kahato iꞌatumuꞌe ahepiat hap kape. Kat pote yt watunug i aipotmuꞌe hap ewywuat pote yt iweꞌeg hin i rakaria ewywuaria watopyhuꞌat aimimuꞌeria wanetup hawe. Pywo ti rat waku watunug aimienoi oktan. -Yt seroꞌok eweiꞌe teiꞌo watoꞌe iraniaꞌin me pote waku iꞌewyte yt seroꞌok e hat wo i watopyhuꞌat aipotminapin hap ewy. 22 Yt ewary wary teiꞌo yt eꞌaito aito teiꞌo watoꞌe aimimuꞌeria pe pote waku wy watopyhuꞌat iꞌewy iweꞌeg kahato rakaria wo. Waku yt kat i aiwary wary hap iꞌewyte yt kat i aheꞌaito eꞌaito hap are. Waku aiwenapin hawe aimimuꞌe ewywuat. Maꞌato yt watunug i ahepiat miitꞌin napin hap ewy pote aiꞌe hap yt kan hamo i iꞌatuwanetup hawe. -Yt naku i kahato iãꞌãkap koꞌi ahetupana wo watoꞌe torannia ywania pe. Yt naku i aikai mo wat aiminug tupanaria watoꞌe iraniaꞌin me. Maꞌato miꞌi tã watiꞌatumuꞌe pote waku wy watimoma torannia tupanaria aikaipyi. Haꞌawyte aiꞌywania timoma iraniaꞌin ywania tupanaria imotypot yat piat koꞌi maꞌato miꞌi koꞌi taꞌatuweneru yne tupanaria itotiaria saꞌup kyewi -Eweiꞌatumoma ro tupanaria yne e Tupana pykai. Miꞌi pote iꞌatumimuꞌeria wekyryꞌi wuatnuaria teꞌeropyhuꞌat itote te. Yt naku i miꞌi tã watiꞌatumuꞌe iraniaꞌin turan. 23 -Urunapin Tupana piat hap wakuat kahato watoꞌe maꞌato waĩ watoꞌe pykai yt watunug hin i ahepiat miitꞌin muꞌe hap ewy miꞌi pote iraniaꞌin toꞌokyryꞌi kahato Tupana sese ete aiminug saꞌag upi. 24 Aikotã nimo te Tupana toꞌe aiꞌywaniaꞌin me hap ewy mio tã e miwan me -Uimiꞌairoria eimimuꞌeria iraniaꞌin ywaniaria toꞌokyryꞌi kahato uhehay ete katupono eiperia typy sehay nug haria ewywuaria eweikupteꞌen. Yt ewetunug Tupana piat einapin hap ewy hawyi eimimuꞌeria mikyryꞌi koꞌi eweikupteꞌen. -Ewetunug no yne Tupana piat ainapin hamuat eweiꞌe iraniaꞌin me yt ewetunug hin i uhepiat einapin hap pykai e Tupana ahaꞌaseꞌiꞌin me nimo te.

Isareu Ywania Eko Etiat

25 Uruto ti Iuteu ywania sese watoꞌe iraniaꞌin me. Miꞌi hap moherep hamo uruesaꞌyruꞌin emusin ãpy sokpe uruitek teꞌeruwemoherep 8 eꞌat tokosap hawyi -Tupana urutum neran uruesaꞌyru epe emikyꞌesat nug hamo watoꞌe itote Tupana motypot yat pe. Miꞌi hawyi Tupana watno topyhuꞌat uruesaꞌyruꞌin watoꞌe iraniaꞌin me. Uiꞌywania pywo pe ti areꞌe ehepe yt watunug i Tupana piat ainapin hap pote yt kan hamo i aheko ahaꞌyruꞌin emusin ãpy sokpe tek hap. Miꞌi hamo imoherep Tupana pe watunug neran torannia ainapin ewywuat hap e. Maꞌato yt watunug i Tupana e hap pote yt kan hamo i aheko aiwemusin ãpy sokpe tek hap -Uito Tupana ywania hap moherep hap are. Taꞌi aikotã iraniaꞌin ywania ewywuaria watopyhuꞌat yt watunug i Tupana mikyꞌesat yne ewywuat hawyi. 26 Maꞌato iraniaꞌin yt Iuteuria i yt teꞌeremusin ãpy sokpe tek hin i aheko ewy pykai Tupana mikyꞌesat nug haria tukupteꞌen tuereto yt kat i iꞌatuemusin ãpy sokpe tek hat i pykai. Miꞌiria ti Tupana mikyꞌesat ewy nug haria pote teꞌeropyhuꞌat poꞌog aiꞌywania Iuteuria kai Tupana wanetup hawe -Uiꞌywania sese torannia uimikyꞌesat nug haria tukupteꞌen e sio Iuteu sio yt e Tupana mesup e. 27 -Karãpe iraniaꞌin ywania tunug uimikyꞌesat ewywuat miꞌiria ti uhemiitꞌin sese tukupteꞌen e Tupana sio Iuteu ywania sio wẽtup ywania sio iꞌatuemusin ãpy sokpe tek hap toineꞌen Iuteu ywania ewywuat sio yt e. Eiperia ti uiꞌywania Iuteuria ywania ewywuaria e Tupana iꞌatuepe. Yt eweikuap i te uimikyꞌesat koꞌi miwan miat pykai uimikyꞌesat nug haria eweikupteꞌen mote e Tupana iraniaꞌin ywania pe yt taꞌatuꞌatukuap i te ahaꞌaseꞌi Muisei piat ainapin hap pykai are. Uiwyriaꞌin Iuteu ywania watikuap kahato ahaꞌaseꞌi Muisei e hap koꞌi maꞌato tukupteꞌen kahato aitoria yt inug hin i rakaria. Miꞌiria pe wyti aru Tupana toꞌe -Iraniaꞌin ywania poꞌog eikai katupono uimikyꞌesat koꞌi taꞌatuꞌatunug yne taꞌatumikuap oktan maꞌato eiperia yt ewetunug hin i eweikuap yne uimikyꞌesat koꞌi pykai e. Miꞌi pote iraniaꞌin ywania poꞌog waku eikai e Tupana aru aiꞌywania iraniaꞌin me yt imikyꞌesat ewy nug haria pe. 28 Uiꞌywania watikuap mesup aikotã Tupana tikuap temiitꞌin sese hap. Toikuap kahato tomikyꞌesat nug haria sio Iuteu ywania sio yt sio iꞌatuemusin ãpy sokpe tek hat toineꞌen sio yt e. Taꞌi yt aipiit kaipyi i Tupana tikuap toꞌywania wo watoineꞌen hap. 29 Taꞌi Tupana ikuap kahato toꞌywania sese koꞌi katupono sio toineꞌen taꞌatupyꞌa pe Topaꞌãu Wakuat sio yt hap. Toikuap kahato sio waku pe tukupteꞌen sio yt hap. Yt tehaꞌat hin i wemusin ãpy sokpe tek hap toineꞌen sio yt hap kape maꞌato aiwanetup hap kape tehaꞌat kahato hawyi aipyꞌa piat kape tehaꞌat kahato hawyi toikuap yne raꞌyn aipyꞌa piat sio waku sio yt. Miꞌi hawyi toꞌe Topaꞌãu mikyꞌesat nug haria pe -Eipe uiꞌywania sese e katupono Uipaꞌãu miat einapin hap ewy kahato ewetunug e. Miꞌi pote eipe uiꞌywania sese eweikupteꞌen e Tupana tomikyꞌesat nug haria pe sio Iuteu ywania sio wẽtup ywania pe. -Waku kahato eipe e Tupana ahepe pote waku pe watoineꞌen. Karãpe iraniaꞌin -Yt naku i kahato eipe iꞌatuꞌe ahepe wen maꞌato watikuap yt pywo pe i raꞌyn iꞌatuꞌe hap katupono Tupana wanetup hawe waku pe watoineꞌen mote.