Humanu

Pauru Toikyꞌesat Kahato Toꞌywania Hehakyeraꞌat Hap

9 Uiwyriaꞌin Iuteuria ywania uhehay teran eiwywo uimiwan me mesuwe. Eiperia ti uheinytꞌin koꞌi iꞌewyte uheꞌykeꞌetꞌin koꞌi are. Uito ti Pauru eheywyt eikywyt sese ewy areineꞌen katupono ahaꞌaseꞌi pot Aparãu mote. 2 Pywo pe ti worohoꞌokyꞌe kahato eiperia uiꞌywania Iuteuria. Pywo ti rat worohoꞌoekyi teran eiperia yne Tupana Mipoꞌoro Aipotypot Iesui kape uhepiat eimuꞌe hamo maꞌato yt uimohey i eipe. Haty kahato uipyꞌa piat wywo ahẽtup ehepe -Eweimohey ro Iesui eipyꞌa pe Iesui ti Tupana Mipoꞌoro Aiporekuat nuat hap eweimohey ro are. Haty kahato uipyꞌa pe uiꞌywania katupono yt eweimohey i te Iesui. Pywo pe ti yt uheso hin i Tupana Paꞌãu uipyꞌa piat tikuap kahato yt uheso i hap worohoꞌoekyi teran eipe torannia Iesui kape uhepiat eikyꞌe hap wywo are. Atikuap yt uheso i hap. Karãpe arewanetup uity uiꞌywot ywania Iuteuria kape hawyi arewak kahato uipyꞌa puo katupono haty kahato uhete hap toineꞌen uipyꞌa puo. Haty hap ewywuat toineꞌen aat kaꞌap uiwanetup hawe katupono uiꞌywania uhaꞌaseꞌiꞌin koꞌi uhaꞌyruꞌin koꞌi uhakiꞌytꞌin koꞌi uityꞌin koꞌi uiꞌywotꞌin koꞌi yt Iesui mohey haria hin i wo tukupteꞌen mote. Iuteuria atuehakyeraꞌat teran hap ahatyꞌu kahato uipyꞌa pe are. Yt uheso hin i. Tupana tikuap kahato yt uheso hin i hap. 3 Wẽtup eꞌat pe areꞌe Tupana pe -Pyno waku uiꞌapiheg uiꞌywania ehakyeraꞌat hamo are. Waku areineꞌen ekuasa hatno hawyi waku uipoꞌoro aria wato kape uiꞌapiheg hatno uiꞌywania ehakyeraꞌat hamo are. Atikyꞌesat kahato uiꞌywania tukupteꞌen emiehakyeraꞌat koꞌi Tupana are. Miꞌi hap upi waku uihep Iesui po pyi uiꞌapiheg hamuat uiꞌywania emiehakyeraꞌat wo tukupteꞌen aru areꞌe saꞌawyꞌi Tupana pe yt kat i uheso hap wywo. 4 Meiũpe uhehay teran eiwywo uiꞌywania Iuteuria etiat sehay. Saꞌawyꞌi sese te mesup te uiꞌywania Iuteuria tukupteꞌen kahato Tupana miꞌairo sese koꞌi e. Nimo te pyi raꞌyn Tupana saꞌyruꞌin koꞌi ewywuat Tupana sakiꞌytꞌin koꞌi ewywuat wo tukupteꞌen uruꞌywania. Miꞌiria ti Tupana mimotypot kahato tukupteꞌen. Miꞌiria pe uruꞌywania puo saꞌawyꞌi Tupana timoherep tehay miwan miat yne iꞌewyte tomotypot hap iꞌewyte tẽtyhot hap. Miꞌiria pe saꞌawyꞌi -Worohoꞌopoityro yne eꞌat e uruꞌywania pe urueꞌaseꞌiꞌin me. Saꞌawyꞌi Tupana toꞌe -Worohoꞌopoityro aru yne eꞌat pe aru uiꞌe hap ewy e. Atunug aru uimotypot yat koro eipyꞌasetpe e saꞌawyꞌi uruepe. Taꞌi saꞌawyꞌi Tupana toꞌe -Atunug aru eipiit kawiat Uimipoꞌoro Wuatꞌi Porekuat nuat hat e urueꞌaseꞌiꞌin me. Urueꞌaseꞌiꞌin saꞌawyꞌi Tupana wywo iꞌatuehay kahato rakaria. 5 Urueꞌaseꞌi sese ti mekewat Aparãu e hap het rakat iꞌewyte urueꞌaseꞌiꞌin koꞌi ti mekewat aseꞌi Isaki iꞌewyte mekewat aseꞌi Isareu e hap het rakat. Miꞌiria ti saꞌawyꞌi hewyry kahato Tupana wywuat rakaria. Pywo ti Tupana kuap haria akag koꞌi uruꞌywania saꞌawyꞌi tukupteꞌen. Saꞌawyꞌi iraniaꞌin ywania eiperia Humanu ywania ewywuaria yt tikuap hin i Tupana sese maꞌato miꞌi hap eꞌat pe uruꞌywania tikuap sakpo Tupana sese. Uruꞌywania saipepiat sese Iesui tuwemoherep. Urupiit ewywuat kahato Iesui tuwemoherep. Taꞌi uruꞌywania piit ewywuat kahato Iesui piit toineꞌen. Tupana Mipoꞌoro Aiporekuat nuat ty ti Iuteu kawiat. Miꞌi pote waku watuwehum kahato Tupana ete -Tupana watuwehum kahato ewowi katupono erepuꞌi nug hawyi ereineꞌen kahato aipyꞌasetpe Aiꞌakag wo. Watomotypot En ni wuatꞌi eꞌat pe. Waku raꞌyn waku raꞌyn waku watoꞌe Tupana pe.

Isareu Ywania Totoiat Raꞌyn Tupana E Hap

6 Saꞌawyꞌi Tupana toꞌe urueꞌaseꞌi Aparãu eharyꞌi mana Sara pe -9 ewaty putꞌok e hawyi araꞌaipok i ewowi mana hawyi wyti aru emepyt raꞌyn toineꞌen e Tupana tope hawyi hupiꞌa raꞌyn maꞌato mana Sara iporo sese pykai. Yt karãpe i Tupana tiꞌaparap -Atunug aru uiꞌe hap ewy hap ete. Miꞌi hawyi 9 ewaty hawyi taꞌaipok hawyi mana Sara imepyt a raꞌyn. Mekewat Aparãu saꞌyru Isaki tuwemoherep taꞌyn itote imepyt raꞌyn Tupana e hap ewywuat. Miꞌi hawyi Tupana toꞌe -Isaki ti uimiꞌairo sese e. Isaki saipepiaria ti uhemiitꞌin sese tukupteꞌen e. Isaki ywania wyti aru uiꞌywania mesuwat yi tote tukupteꞌen aru wuatꞌi eꞌat pe e Tupana urueꞌaseꞌi pot pe. 7 Maꞌato tukupteꞌen kahato Aparãu saꞌyruꞌin yt Isaki kaipywiat i. Miꞌiria ti wẽtup ok Aparãu eharyꞌi kaipywiat tukupteꞌen wy wẽtup ywania mekewat haryporia Isaki ywania kawiat mana Sara eropat hat mepyt. Miꞌiria ete Tupana toꞌe -Aparãu esaipepiat sese ti Sara mepyt Isaki e hap het rakat are e. Uiwanetup hawe Isaki yn esaꞌyru sese e. Miꞌi emepyt kawiat wyti aru atiꞌatumoherep emiariru sem koꞌi e. Isaki saꞌyru kawiat atiꞌatumoherep eꞌywania sese mesuwe mehin e Tupana saꞌawyꞌi urueꞌaseꞌi Aparãu me. 8 Mekewat ewary wẽtup ok Sara emiit kaipyi emepyt rẽ wen maꞌato Isaki yn ni esaꞌyru sese uimiꞌairo watꞌyp sese yn ni are e Tupana. Eharyꞌi mana Sara iporo rakat kaipywiat yt myhuꞌat hat i raꞌyn kaipywiat yn ni aru ewatꞌyp sese toineꞌen mehin e Tupana urueꞌaseꞌi Aparãu me. 9 Mio tã e ti Tupana uruehary Sara pe -Mukiꞌite mukiꞌite 9 ewaty tokosap hawyi wyti aru toineꞌen emepyt epiit sese kaipywiat tuwemoherep aru uiꞌe hap ewy e Tupana saꞌawyꞌi mana Sara pe. Miꞌi hawyi topyhuꞌat iꞌe hap ewy raꞌyn. Iporo sese pykai yt imepyt i rakat pykai mana Sara tomoherep tomepyt Isaki Tupana e hap ewy raꞌyn. 10 Miꞌi hawyi Isaki totag naꞌyn hawyi totat teharyꞌi Hepeka e hap het rakat. Miꞌi hawyi iharyꞌi hawyi hupiꞌa hawyi imepyt raꞌyn typy ok ipat rakaria haꞌyruꞌin tuwemoherep mana Hepeka pyi. 11 Maꞌato saꞌawyꞌi Isaki saꞌyruꞌin wemoherep hap eꞌyian mete Tupana toꞌe mana Hepeka pe -Emepyt ipat rakat saꞌawyꞌi wuat wẽtem yianmiat hat ti aru topyhuꞌat eropat hanuat e Hepeka pe. Miꞌi hawyi iykeꞌet topyhuꞌat toꞌywyt eropat hatno Tupana e hap ewy imikyꞌesat ewy tutunug. Miꞌi hawyi imepyt Iako topyhuꞌat Isaki saipepiat sese. -Atiꞌairo ipat ok watꞌypꞌi Iako e Tupana iꞌatuꞌywaĩꞌĩ hap eꞌyian mete. 12 Miꞌi hap tohenoi iꞌatuty Hepeka pe yian mete Isaki saꞌyruꞌin ipat rakaria minug etiat Iako yt kat i te wakuap nug kuap sio waku sio yt hap eꞌyian mete Tupana tiꞌairo. Yt hewaku hap upi i toiꞌairo Iako. Koitywy aito tuwepyi te Tupana aiꞌairo aikay kay tuwewawi hap. 13 Katupono iꞌatuꞌywaĩꞌĩ hap eꞌyian mete Tupana toꞌe -Uimikyꞌe kahato Iako uimiꞌairo kahato e maꞌato iykeꞌet Esaꞌu piat -Yt uimikyꞌe i kahato e.

14 -Taꞌi Tupana yt naku i iꞌatuꞌe iraniaꞌin. Yt hãpyk i kahato katupono toiꞌairo Iako hawyi yt toikyꞌesat i Esaꞌu iꞌatuꞌe iraniaꞌin. Yt ahewaku hap upi i aiꞌairo pote yt naku i Tupana toineꞌen iꞌatuꞌe saꞌag iraniaꞌin Iako emiariruꞌin me uruepe. 15 Yt miꞌi tã hin i ti rat uiwyriaꞌin are katupono waku kahato Tupana toineꞌen. Nimo te Tupana toꞌe ahaꞌaseꞌi Muisei pe -Areineꞌen iwese kahato rakat e. Miꞌi pote ti atiꞌatuehakyeraꞌat kahato miitꞌin uipyꞌa pyi uimiꞌairo koꞌi e. Atiꞌatuehakyeraꞌat teran miitꞌin mote atikyꞌe kahato miit uimikyꞌesat oktan e. Atiꞌairo miit uhemiit no uimikyꞌesat upi yt iꞌatuewaku hap upi i atiꞌairo uheropat hanuat e Tupana. 16 Wẽtup ok miit ihakyꞌeꞌi uhepe rakat atekyi uhowowi uiwepyi sio waku rakat sio yt e. Uito ti Tupana pote atunug uimikyꞌesat ewy e. Uito Tupana pote uiwepyi atiꞌatuꞌairo miitꞌin uipyꞌa pyi uimikyꞌesat ewy e Tupana saꞌawyꞌi Muisei pe. Mio tã e hap kaipyi watikuap taꞌyn yt ahewaku hap upi i Tupana aikyꞌe hap maꞌato towese hap kaipyi ahehakyeraꞌat hap watikuap. 17 Saꞌawyꞌi Tupana toꞌe morekuat yi Esitu piat Warãu e hap het rakat pe -Uiwepyi woroꞌairo morekuat no mesuwat yi tote e. Ereineꞌen morekuat yi Esitu pe hawyi eminug yt naku i hap koꞌi kaipyi wuatꞌi miitꞌin mesuwarote uhet kuap haria teꞌeropyhuꞌat. Katupono atimoherep kahato irane uhesaika hap hawyi atiporenotem uhemiitꞌin Iuteu ywania epo pyi e Tupana morekuat Warãu me temiitꞌin ewanikap sese pe. 18 Miꞌi pote mesup te Tupana topyhuꞌat iwese rakatno tomikyꞌesat oktan maꞌato iraniaꞌin ipyꞌahak takaria pe toiꞌatumopyꞌahak poꞌog neꞌi tuwepyi tomikyꞌesat ewy.

19 Mio tã iꞌatuꞌe iraniaꞌin -Tupana ti yt naku i katupono tomikyꞌesat ewy mesuwarote tutunug iꞌatuꞌe saꞌag. -Yt hãpyk hin i etunug Tupana iꞌatuꞌe iraniaꞌin ipyꞌa heg nakaria. Toiꞌatumopyꞌahak kahato poꞌog tehay wo tuweete iꞌatuꞌe. Pyno aikotã aru toiꞌatuꞌapiheg tomimopyꞌahak haria iꞌatuminug saꞌag ete iꞌatuꞌe. Tupana tomikyꞌesat ewy yn inug mote yt watuwewãi kuap i Tupana kape. Yt watinapin kuap i pote Tupana katupono tomikyꞌesat ewywuat yn tutunug iꞌatuꞌe iraniaꞌin. Miꞌiria pe areꞌe -Yt eweiwesat saꞌag neiꞌo Tupana are katupono aito yi ewywuat yi og ahemyyp nug hap ewywuat aito are iꞌatuepe. Miꞌi hawyi Tupana ainug ahemyyp nug hat ewy. 20 Yt naku i watoꞌe Tupana kape -Kat pote uinug miꞌi tã Uhyt Mimi watoꞌe tope. Yt naku i watoꞌe -Yt uimikyꞌesat ewy hin i uinug watoꞌe Tupana pe are. Mio tã watoꞌe pote watopyhuꞌat aikotã yi og yt kan hamo i yt naku i ahemyyp nug hamuat rakat ewy. -Yt uinug neiꞌo emikyꞌesat ewy watoꞌe saꞌag. Uinug no Tupana uimikyꞌesat ewy watoꞌe pote watopyhuꞌat yt ikahu hin i rakat yi og saꞌag myyp nug hat po pe hap ewy. Myyp tutunug hawyi yt kan hamo i topyhuꞌat yi og saꞌag kawiat i pote pokꞌe meremo aria pe tosey hawyi. Miꞌi hap ewy kahato aitoria aiwepyi aimikyꞌesat yn watikyꞌesat hawyi. Tupana po pe watoineꞌen wen maꞌato yt aimokahu kuap i tomikyꞌesat ewywuat. 21 Miꞌi hap ewy kamuti nug hat po pe yi og wakuat hawyi tutunug tomikyꞌesat ewywuat. -Koitywy atunug mesuwat yi og kawiat typy kamuti e tuwepe. Wẽtup kamuti atunug miitꞌin mipun eiam yt ikahu i rakat. Maꞌato wẽtup atunug kamuti ikahu kahato rakat uiꞌyat painug hamuat e tuwepe hawyi tutunug naꞌyn typy kamuti yi og kawiat tomikyꞌesat ewy. Typy kamuti wẽtup yi og kaipyi yn tomikyꞌesat ewy. Miꞌi hap ewy ti Tupana tunug aito tomikyꞌesat ewy. 22 Taꞌi kamuti nug hat ewy Tupana ainug tomikyꞌesat ewy. Yi og saꞌag mote kamuti nug hat ipyꞌahak kahato yt tutunug kuap i kamuti yi og saꞌag mote. Miꞌi hawyi -Yt kat hamo i mesuwat yi og toꞌe hawyi toipun pya toꞌyat pyi. Toiꞌapok taꞌyn tominug kamuti. Miꞌi hap ewy kahato Tupana miitꞌin ete toperupꞌi wywo ipotpap miꞌiria wywo. Meiũran iperupꞌi potꞌi hawyi ipyꞌahak -Pyno worohoꞌoꞌapiheg naꞌyn eipe e iꞌatuepe aikotã kamuti nug hat ewy yt aimohãpyk kuap i hawyi. 23 Maꞌato wẽtup yi og wakuat topyhuꞌat kamuti nug hat po pe hawyi hepama tutunug kamuti topotpap mo waku rakat wuatꞌi eiam mo raꞌyn. Miꞌi hap ewy Tupana ainug tomotypot hamo. Ainug hawyi miitꞌin teꞌerahaꞌat hawyi teꞌeruwehum Tupana ete. -Tupana waku rakat iꞌatuꞌe iwese kahato miꞌiria nug hap ete ihakyꞌeꞌi kahato Tupana miꞌiria ete iꞌatuꞌe. Tupana eiam kahato miꞌiria tukupteꞌen tuwepokuap kahato miꞌiria nug hap ete iꞌatuꞌe.

24 Tupana miꞌairo kahato aito. Tupana aikay kay tuwewawi aito Iuteuria ywania iꞌewyte iraniaꞌin aito wẽtup ywania. 25 Saꞌawyꞌi Tupana ehay moherep hat Useia henoi tomiwan me. Tupana ti toꞌe uhepe -Meiũran aru wẽtup ywania pe yt uhemiitꞌin sese i rakaria pe ahenoi -Eiperia ti mesup uhemiitꞌin sese eweikupteꞌen e. Meiũran aru iraniaꞌin ywania yt uwe mikyꞌeria i kape -Uimikyꞌeria kahato sese eiperia e Tupana e Useia miwan me. 26 Meiũran aru aikope aikope miitꞌin teꞌeroꞌe -Eiperia yt Tupana emiitꞌin hin i iꞌatuꞌe hap tote aru teꞌeroꞌe -Eiperia ti Wuatꞌi Eꞌat Piat Ieineꞌen hat Tupana sese saꞌyruꞌin sakiꞌytꞌin iꞌatuꞌe aru e Useia nimuat Tupana ehay moherep hat tomiwan 1.10 2.23 pe. 27 Miꞌi hawyi Isaia Tupana ehay moherep hat mio tã e haty wo -Aitoria ti Isareu ywania e. Iꞌatu kahato aitoria aikotã yẽpe ete yi kyt iꞌatu hap ewy watoineꞌen e. Typyꞌi kahato aito maꞌato kurin kurin Tupana miehakyeraꞌat wuaria sese aipyꞌasetpe tukupteꞌen e katupono iꞌatuminug saꞌag yt nakuap i kahato tukupteꞌen aikotã tawa Sutuma tawa Kumura yt naku i nug haria ewy e. 28 Pywo ti rat Tupana tunug toꞌe hap ewy aru ahete -Worohoꞌoꞌapiheg kahato aru eiperia yt naku i nug haria merepꞌe hap ewy yn worohoꞌomoma sese aikotã nimo atiꞌatuwuk tawa Sutuma tawa Kumura hap ewy e Isareu ywania pe. 29 Maꞌato mesup yt atunug i te e. Katupono eipyꞌasetpe tukupteꞌen uimiꞌairo koꞌi uimohey hat Aparãu ewywuaria e. Miꞌiria ti yt uiꞌatoiat teran hin i haria e Tupana nimo Isaia tomiwan 10.22 pe uruꞌywania Iuteuria pe.

30 Pyno eweipomeꞌeg no ehewaure uhowowi uhytꞌiꞌin manaꞌin Humanu ywania are. Saꞌawyꞌi uruꞌywania Iuteuria yn Tupana miꞌairoria tukupteꞌen wen maꞌato mesup iraniaꞌin ywania mesuwarotiaria waku pe tukupteꞌen taꞌatumohey Haꞌyru hawyi. Saꞌawyꞌi yt taꞌatukuap hin i muap Tupana kapiat miꞌiria iꞌewyte yt taꞌatukat hin i Tupana maꞌato mesup taꞌatumohey Iesui hawyi waku pe tukupteꞌen Tupana wywo. 31 Maꞌato Iuteuria Tupana miꞌairoria saꞌawyꞌi wuaria Tupana ywania sese tikat kahato mesup wẽtup muap Tupana kapiat yt Iesui upi i. Taꞌatukyꞌesat kahato -Waku kahato eipe e hap Tupana wanetup hawiat hap. Miꞌi hawyi mio tã iꞌatuꞌe -Pyno waku watunug kahato toran Tupana waĩꞌe hap ainapin hap koꞌi Muisei mienoi koꞌi hawyi waku pe watoineꞌen Tupana pya pe iꞌatuꞌe kahato toꞌope. Miꞌi hawyi maꞌato taꞌatuiãꞌãg inug hap ete aat kaꞌap hawyi yt kat i muap taꞌatupuẽti Tupana kape yt taꞌatukat i Iesui mohey hap upi hawyi. 32 Taꞌatuꞌaparap kahato Tupana kapiat muap ete kat pote taꞌatuwẽpyi taꞌatuminug wakuat upi taꞌatukat taꞌatuwemoewaku hap. Yt taꞌatukat hin i Iesui mohey hap kaipywiat upi taꞌatuwemoewaku hap. Miꞌi pote -Watunug toran Tupana piat aiwoꞌonapin hap koꞌi pote ti waku pe watoineꞌen Tupana pe iꞌatuꞌe toꞌope yt Tupana e hap ewy i. Miꞌi hawyi Tupana Mipoꞌoro Ahehakyeraꞌat hat Iesui topyhuꞌat iꞌatupyꞌasetpe pykai yt taꞌatusat i taꞌatumoieineꞌen wuatꞌi eꞌat piat rakat sese. Miꞌi hawyi Iesui topyhuꞌat iꞌatupyꞌasetpe aikotã muap tote nu wo py yitytek hat ewy toineꞌen iꞌatuepe. Taꞌatuꞌaparap Iesui ete aikotã Isaia saꞌawyꞌi toꞌe miwan me hap ewy. Mio tã e Tupana ahepe -Eiweꞌeg wo o Iuteuria tawa wato Ierusarẽi miaria yityꞌok Siãu miaria are e. Waku mekewat Nu wato tote ewehaꞌawynug yn naꞌyn uimotypot yat koro e. 33 Waku uimiꞌairo mekewat Nu Wato ikahu rakat tote ewehaꞌawynug uimotypot yat e. Maꞌato taꞌatupuẽti itote mekewat Nu hawyi -Yt kan hamo i Miꞌi iꞌatuꞌe yt aimikyꞌesat ewywuat hin i iꞌatuꞌe Tupana pe hawyi Tupana Saꞌyru pun haria tukupteꞌen ne Iuteu ywania. Miꞌi hawyi iꞌatumipun topyhuꞌat iꞌatupuꞌap tote nu ewy. Mio karãpe Iuteu ywania ikohyewyry itote hawyi hewo hewo kahato meiẽwat Nu Wato ete e aikotã wataꞌat nu ete aipuꞌap upi wãtym muo turan hap ewy are. Mio tã Tupana toꞌe hap ewy -Uwe uwe mesuwat Nu ikahu kahato rakat ete taꞌat miꞌi haria teꞌeruweꞌauka hanuaria aru tukupteꞌen e maꞌato uwe uwe mekewat Nu Wakuat rote tuweꞌyat nug miꞌi hat wuatꞌi eꞌat piat Tupana mowepiit hat topyhuꞌat aru e Isaia tomiwan 8.14 pe.