Iesui Aru E Hap

Mekewat Haryporia Iꞌewyte Moiꞌok Saꞌag Etiat

12 Miꞌi hawyi uito Iuwãu araꞌakasa wẽtup uimuꞌetu uimowanetup hap sese kat som Tupana aimuꞌe hap sese areꞌe uiwepe. Katupono araꞌakasa waikiru pyꞌasetpe wẽtup ok haryporia ewywuat yꞌam me waty tote. Hesokpe aat ewywuat. Iꞌakag ete toineꞌen amãtap iwepainug hap waikiru koꞌi 12 waikiru koꞌi. 2 Miꞌi ti tuwak popuo toꞌe -Uimepyt irane e kyn kyn toꞌe popuo. Uimepyt hap eꞌat raꞌyn e tuwak popuo. Haty kahato e. 3 Miꞌi hawyi uimuꞌetu wẽtup kape araꞌakasa uimowanetup hap sese katupono mekewat haryporia yatype toineꞌen mekewat moiꞌok saꞌag iwatoꞌin nakat. Uimoꞌakagꞌaia kahato mekewat moiꞌok koro 7 iꞌakag nakat ipe ihup kahato rakat huwaipo waikiru koꞌi ete hewyry. Ipainug hap amãtap morekuat ewywuat 7 amãtap. Iꞌaut piit kahato rakat 10 iꞌaut rakat iꞌakag koꞌi ete. 4 Miꞌi ti tosuwaipo wo toiꞌatupugha kahato waikiru koꞌi tosuwaipo wo. Myẽꞌym kaipyi toipatꞌok wẽtup waikiru hap ewy. Waikiru sem toipugha kahato yi kape. Miꞌi hawyi itote tohekatup haryporia imepyt ywãꞌĩ hap tutuꞌu teran imepyt haype. 5 Miꞌi hawyi imepyt ihainia raꞌyn. Tuwẽtem hawyi Tupana tioto meremo atipy kape aikope toineꞌen Morekuat no hap tote. Miꞌi hawyi toꞌe Haryporia Mepyt pe -Meiũran aru etiꞌatumoperupꞌi haty wo yne miitꞌin e Tupana. Aikotã Morekuat tepuretig wywo hap toimoperupꞌi temiit nuat hap ewy ereineꞌen aru e. Miꞌi hap ewy etunug irane e Tomieraꞌam Hirokat pe. 6 Miꞌi hawyi mekewat haryporia topopy raꞌyn moiꞌok pupi aikope yt uwe i miitꞌin hap kape. Miꞌi hawyi Tupana minug yahig yt uwe i mikuap hap tote haryporia tuwemig. Miꞌi kape toipoꞌoro temiitꞌin ipoi hamo 1260 eꞌat turan 42 ewaty hap ewy.

Atipy Piaria Tuuka Raꞌyn Miat Saꞌag Nakat Wywo

7 Miꞌi hawyi uito Iuwãu arahaꞌat wuꞌuka hap kape waikiru pyꞌasetpe. Mekewat atipy piat akag Mikeu temiitꞌin atipy piaria tesuraraꞌin wywo taꞌatuꞌuka kahato moiꞌok koro ete. 8 Miꞌi hawyi moiꞌok tiꞌatuꞌakit teran surara akag Mikeuꞌin maꞌato Mikeu tiꞌatuꞌakit neꞌi moiꞌok hawyi toꞌe -Motoro emiitꞌin wywo e. Yt naku i raꞌyn ereineꞌen poꞌog mesuwe atipype e. Motoro esuraraꞌin wywo e Mikeu moiꞌok koro pe. 9 Miꞌi hawyi toiꞌatuꞌokhytpugha moiꞌok hesuraraꞌin nywo waikiru kaipyi yi kape. Moiꞌok koro wẽtup het ahiag e wẽtup het miitꞌin moꞌakagꞌaia hat. Wẽtup het Satanai e. 10 Miꞌi hawyi wẽtup ok atipy piat tuwẽpowat tehay pirik wo -Tupana Mipoꞌoro Iesui tiꞌakit neꞌi ahiag e. Temiitꞌin mohit hat toimohit neꞌi raꞌyn e. Saꞌawyꞌi ihay saꞌag Tupana emiitꞌin ete aat kaꞌap ahiag -Emiit yt kat hamo i e. Yt nakuaria kahato emiit e yn saꞌawyꞌi Tupana pe e. Maꞌato mesup toiꞌatupugha raꞌyn e. Waku kahato e. Tupana timoherep taꞌyn ahiag akit hamuat e. Koitywy watikuap Tupana Miꞌairo Iesui poꞌog poꞌog hesaika ahiag kai e hap watikuap e. Ahehakyeraꞌat hap topyhuꞌat raꞌyn e. Katupono Iesui aihep sese ahiag po pyi e wẽtup ok atipy kaipyi haty wo. 11 Mesup aheywytꞌin aheinytꞌin Iesui mohey haria tiꞌatuꞌakit neꞌi ahiag e. Mekewat aikotã taꞌatuhũ ewywuat ikuꞌuro rakat suu mohey hap kaipyi taꞌatuꞌatuiãꞌãg hap koꞌi yne taꞌatuꞌakit neꞌi e. Ikuꞌuro rakat huu aat hap iꞌatukawiatno taꞌatumohey hawyi esaika hap wywo taꞌatuꞌakit neꞌi ahiag e. Iꞌewyte iꞌatumienoi Iesui piat taꞌatuehakyeraꞌat hap moherep hap wo taꞌatuꞌakit neꞌi ahiag e. Taꞌatukuꞌuro hap kape taꞌatumohey hamo taꞌatuꞌakit ahiag e tehay pirik wo atipy piat e. 12 Pyno koitywy atipy piaria iꞌatuwepiit raꞌyn e. Yt kat i ahiag mio itote waku pe raꞌyn e. Miꞌi pote -Eiwehum no Tupana kape yne eipyꞌa pyi e. Maꞌato eweiwak to yi totiaria e. Katupono mesup ahiag haiwot raꞌyn taꞌatupugha atipy pyi hawyi. Yt naku i pe eweikupteꞌen mesup aru yi totiaria. Eiweꞌeg wo o yꞌy upiaria yi totiaria katupono toineꞌen eipyꞌasetpe ahiag toꞌokhytpun atipy kaipyi yi kape hawyi e. Koitywy haiwot rakatno toineꞌen katupono toikuap taꞌyn mesup yt wuatꞌi porekuat no i toineꞌen ne hap. Miꞌi pote aikotã aikotã toikat tuwanetup miitꞌin atuekyi tuwewawiat hamuat hap teropat haria wo hap e tehay pirik wo -Yt iꞌatu i raꞌyn uheꞌat uipotpap hamo e ahiag.

Moiꞌok Haryporia Mohan Hat Toineꞌen

13 Ahiag toineꞌen yi tote hawyi -Uipun atipy kaipyi e. Miꞌi hawyi tohatyꞌi hatyꞌi mekewat Ihainia hit ty. 14 Maꞌato Tupana tum naꞌyn haryporia pe hywi wato kahato rakat popesap ewywuat tutum hawyi toꞌe mana pe -Mana e waku erepopy yahig wato kape e. Waku eremig itote uiminug eiam me e. Itote moiꞌok yt epuẽti hin i e. Ereineꞌen no myẽꞌym iꞌaman motpe itote e. Miꞌi hawyi waku aat pe erẽtem epyhyp hap wyi e. 15 Miꞌi hawyi mekewat moiꞌok wato wẽ pyi tuwẽtem yꞌy ihy koro ewy Mekewat Hirokat ty ãpymin teran hamo. Toikyꞌesat totioto pya teran haype. Miꞌi pote yꞌy tuwẽtem kahato moiꞌok wẽ pyi aikotã yꞌy mutꞌe hap ewy. 16 Maꞌato mesuwat yi tipowyro kahato haryporia. Maꞌato yi topyhuꞌat ikaꞌa wato kahato yꞌy wato hy sym hamo. Miꞌi pote moiꞌok wẽ pywiat maꞌato mekewat yꞌy mutꞌe rakat yt tiꞌapymin kuap i mekewat haryporia. 17 ^(17-18) Miꞌi pote poꞌog haiwot ahiag mekewat haryporia yt miꞌãpymin i ete. Miꞌi hawyi toto wuꞌuka hamo imepyt saipepiaria moma hamo. Tupana piat ainapin hap nug haria ete Iesui yn urukaꞌiwat e haria motꞌi haria moma hamo ete. Miꞌiria moma hamo moiꞌok toto tosaiwot wywo. ¹⁸ Toto hawyi toineꞌen yikyt upi hyemyiꞌa wato yẽpeke mekewat iꞌakare wasu ewywuat ahiag toineꞌen iꞌam me Iesui emiitꞌin u hamuat.