Iesui Aru E Hap

Tehaꞌat Raꞌyn Mekewat Miwan Iheg Me Toineꞌen

5 Miꞌi hawyi uito Iuwãu arahaꞌat i atipype hawyi araꞌakasa Aipotypot apyk hap ikahu rakat tote. Miꞌi kape arahaꞌat hawyi araꞌakasa miwan Aipotypot po sese kai toꞌokmoĩ me. Iꞌyhop ipe pewiu rakat ete miwan kokai kokai toineꞌen typy kawiat miwan. Howapy kahato ipytꞌat kahato mekewat miwan ipe ete. Mekewat iwan yt uwe i imowẽpap kuap katupono iheg me toꞌokmoĩ me toineꞌen. Tomosatꞌe hap 7 wo ipyhyp hap iꞌywop hap oktan 7 imosatꞌe hap ete ytyghe ewywuat toineꞌen. 2 Miꞌi hawyi araꞌakasa wẽtup ok atipy piat ieineꞌen hat surara akag hesaika rakat hẽtup tehay pirik wo -Uwe uwe ewaku hap putꞌok e Aipotypot miꞌokpoꞌi miwan porap mowẽpap e hamo e tehay pirik wo ahowawi. 3 Miꞌi hawyi toikat kahato maꞌato yt wẽtup ok i toipuẽti katupono iꞌatuewaku hap yt putꞌok e hin i iꞌokpoꞌi porap mowẽpap e hamo. Yt uwe i toipuẽti atipy pe iꞌewyte yt uwe i yi tote toipuẽti. Iꞌatuewaku hap yt putꞌok e hin i imowẽpap hamo iꞌewyte tehaꞌat mekewat miwan kape hamo. 4 Yt uwe i toipuẽti iꞌokpoꞌi porap hamuat hawyi uito Iuwãu arawak haty wo katupono waku waku sese rakat yt wẽtup i aito toipuẽti pote arawak itote. 5 Maꞌato wẽtup ok 24 rakaria poꞌog Tupana mohey saꞌawyꞌi wuat haria toꞌe uhepe -Yt erewak teiꞌo mehin e uhepe -Erahaꞌat ro toineꞌen aipyꞌasetpe wẽtup ok waku kahato rakat hewaku hap putꞌok e mekewat miwan moherep hamo e. Meiẽ mekewat Morekuat Tawi Eꞌyian miat Wuatꞌi Porekuat nuat yt karãpe iꞌaparap i pote hewaku hap putꞌok e Tupana miwan imoherep hamo e. Erahaꞌat ro hesaika kahato awyato Tig ewy hesaika hap ewy e. Eiꞌywania Akag Miꞌi Ehaꞌaseꞌi Pot Iuta Saipepiat Miꞌi e. Miꞌi ewaku hap putꞌok e mekewat miwan sat hamo mekewat puratig ewywuat moherep hamo e. Katupono miꞌi yn Guꞌuro Sese Hap Moma Hat e. Miꞌi yn ahiag yt tomaꞌat kuap i hat e uhepe mekewat saꞌawyꞌi te wuat poꞌog imohey hat. 6 Miꞌi hawyi arahaꞌat hawyi araꞌakasa wuatꞌi pyꞌasetpe wẽtup ok Miit Aihũ Mepyt Hit Kuteiru Ewywuat. Aipotypot koro eiam note yꞌam me toineꞌen meimuẽwat 24 ok takaria saꞌawyꞌi wuaria poꞌog imohey haria pyꞌasetpe. Iꞌewyte mekewaria 4 ok takaria atipy piaria teꞌeruwepy puo Tupana motypot haria pyꞌasetpe. Miꞌi hawyi uito Iuwãu arahaꞌat kahato mekewat Hũ Hit kape. -Guꞌuro Kaipywiat Wẽtem Hat Miꞌi Miit areꞌe. Miꞌi hawyi araꞌakasa ipiit suk hap koꞌi kape. -Pywo ti rat Miitꞌin Miꞌauka Saꞌawyꞌi wuat Miꞌi Miit areꞌe arahaꞌat isuk hap koꞌi kapiat hawyi. Aikotã watiꞌauka aihũ hit aiminug saꞌag Tupana piat hep hamo aikawiatno aiꞌapiheg hap moma hamo hap ewy areꞌe uiwanetup hawe. Tupana Mipoꞌoro Aihũ hit wuatꞌi pyꞌasetpe hap kape arahaꞌat. Taꞌi 7 iꞌaut rakat iꞌakag note hap kape araꞌakasa. Iꞌewyte 7 iha rakat araꞌakasa 7 iha pyi Tupana Paꞌãu hẽtyhot hap 7 iha Tupana eha piat ewywuat. Teha wo toiꞌatuepiok kuap kahato mesuwarotiat yne miitꞌin sio waku sio yt hap kuap hamo. Yne heremo tope ewywuat. 7 Miꞌi hawyi mekewat Hũ Hit tat mekewat miwan topo sese kai toꞌokmoĩ miat miwan Wuatꞌi Porekuat po sese kai. Miꞌi pote mekewat Hũ Kuteiru taꞌatumotypot meimuẽwat 4 ok takaria atipy piaria poꞌog rakaria. 8 Mekewat miwan totat topo pe hawyi Tupana Hũ Hit Kuteiru itotiaria timotypot kahato mekewat Hũ Kuteiru. Meimuẽwat 4 ok takaria wuatꞌi eꞌat piat ieineꞌen haria. Iꞌewyte meimuẽwat 24 ok takaria poꞌog nakaria teꞌeruwepỹꞌãtutuk yi kape imotypot hamo. Miꞌi hawyi teꞌeruwepy kahato taꞌatupo piat wepy nug hap wywo. Haity koꞌi imehit kahato rakaria wywo ikahu rakaria wywo teꞌeruwepy taꞌatupo piat kawakiu wywo Tupana Hũ Kuteiru Hit motypot hamo. Miꞌi hawyi taꞌatuwuk ikamhig se rakat tyghe mohag hy puat Mekewat Kuteiru motypot hamo. Taꞌatuwuk ikamhig se rakat aria eiam imehit rakat uru kawiat puo. Miꞌi ikamhig se kahato hap ewywuat Tupana wanetup hap ewy. Katupono Ihũ Hit motypot hap ahehay howawiat hap ewy. 9 Miꞌi hawyi araꞌakasa typyꞌi kahato miitꞌin Ihũ Hit motypot haria itote. Miꞌi hawyi teꞌeruwepy kahato iraniaꞌin nywo. Maꞌato iꞌatuwepy hap ipakup takat -Waku kahato En Tupana Hũ iꞌatuꞌe. -Waku kahato En iꞌatuꞌe. Ewaku hap putꞌok e mekewat miwan okpoꞌi porap hamo. Waku etiꞌokpoꞌi porap hawyi etimoherep uruepe Mimi Uhyt iꞌatuꞌe. Ewaku hap yn putꞌok e Tupana mimosatꞌe hap hep hamo iꞌatuꞌe. Ewaku hap yn iwato hap oktan iꞌokman miat miwan moherep hamo eꞌauka urukawiatno pote iꞌatuꞌe Saꞌawyꞌi esuu topyhuꞌat Tupana piat urukyiꞌat towatnuat hawe iꞌatuꞌe. Katupono wuatꞌi mesuwarotiat ywania kaipyi uruhoꞌoekyi Tupana emiit no wuatꞌi miitꞌin wẽtup pusu wẽtup pusu kuap haria iꞌewyte wuatꞌi miitꞌin yt toꞌoꞌewywuat rakaria kaipyi iꞌewyte wuatꞌi miitꞌin wẽtup seko wẽtup seko mohey haria yt toꞌoꞌewy ewywuat i rakaria kaipyi iꞌewyte wuatꞌi yt toꞌoꞌewywuat i iꞌatupiit ete iꞌatueko rakaria kaipyi uruhoꞌokyiꞌat esuu wo iꞌatuꞌe. Iꞌewyte wuatꞌi setama kaipyi uruhoꞌokyiꞌat wuatꞌi ipe hun ipe kytsig ipe hup rakaria kaipyi uruhoꞌoekyi Tupana emiit no Esuu wo iꞌatuꞌe teꞌeruwepy puo wuatꞌi ywania Tupana Mipoꞌoro Aihũ Kuteiru ewywuat aikawiat ikuꞌuro rakat kape. 10 -Waku kahato En Iesui iꞌatuꞌe. Katupono urunug miitꞌin moherep Tupana kapiat hamuat iꞌatuꞌe. Koitywy urunug paꞌi koꞌi wo. Koitywy watopyhuꞌat emiꞌairoria miitꞌin porekuaria wo emikyꞌesat nug hamo iꞌatuꞌe. Waku kahato En Tupana Hũ Kuteiru Waku sakpoꞌe kahato iꞌatuꞌe teꞌeruwepy puo wuatꞌi ywania itotiaria.

11 Miꞌi hawyi atikuap wẽtup wepy hap Tupana Hũ Kuteiru kape. Atipy piaria iꞌatu kahato teꞌeruwepy hap atikuap itote. Atipy piaria sem teꞌeruwaꞌatunug kahato wuatꞌi Morekuat Akag apyk hap kape araꞌakasa. Iꞌewyte meimuẽwat 24 ok takaria poꞌog imohey sese haria wywo teꞌeruwaꞌatunug torannia atipy piaria wywo Tupana Hũ Kuteiru motypot hamo. Typyꞌi kahato miꞌiria ewywuat hap kape araꞌakasa. Iꞌatu kahato 10 miu wo 10 miu rakat watopag itote itote hap ewy typyꞌi hap ewy araꞌakasa atipy piaria sem yt mimorania yne kuap takat i hap ewy araꞌakasa itote. 12 Miꞌi hawyi yne atipy piaria teꞌeruwepy Tupana hũ Kuteiru kape haty wo -Waku kahato En Waku kahato En Miitꞌin Miꞌauka iꞌatuꞌe teꞌeruwepy puo atipy piaria -Ewaku hap putꞌok e miitꞌin airo hamo sio waku yt e hamo iꞌatuꞌe teꞌeruwepy puo. Ewaku hap putꞌok e Wuatꞌi Miitꞌin Porekuat Nuat pote iꞌatuꞌe. Waku wuatꞌi ekat topyhuꞌat epo pe. Taꞌi ewaku hap putꞌok e kahato katupono wuatꞌi weꞌeg hap kuap hat En iꞌewyte wuatꞌi hesaika hap ekai toineꞌen iꞌatuꞌe. Pyno hãpyk kahato En mote waku Wuatꞌi Mimowato wo ereineꞌen iꞌatuꞌe. Waku yne ehay emotypot hap topyhuꞌat teꞌeruwepy haty wo atipy piaria sem mekewat Tupana Mipoꞌoro Aihũ Kuteiru Miitꞌin Miꞌauka Iesui kape. Uito Iuwãu araꞌakasa yne uimuꞌetu.

13 Miꞌi hawyi uito Iuwãu wẽtup i wepy hap atikuap Tupana Hũ Kuteiru motypot kahato hap wepy hap. Wuatꞌi atipy piaria iꞌewyte wuatꞌi yi totiaria wepy hap atikuap wuatꞌi yi ywytꞌok piaria iꞌewyte yꞌy wato piaria wepy hap atikuap. Mio tã iꞌatuꞌe -Uruimotypot kahato En iꞌatuꞌe. Eraꞌapyk to wuatꞌi Morekuat eiam note uruporekuat koro wo Mehin Mimi iꞌatuꞌe. Ereineꞌen no Wuatꞌi Akag Wato wo iꞌatuꞌe. Ereineꞌen no Wuatꞌi Kawiat Poꞌog Nakatno iꞌatuꞌe. Yt uwe i poꞌog hesaika ekai Mimi Mehin iꞌatuꞌe. Taꞌi ewaku hap uruikuap kahato iꞌatuꞌe. Waku kahato En watoꞌe wuatꞌi eꞌat pe katupono wuatꞌi eꞌat pe gaꞌatpo mukiꞌite mesup wuatꞌi eꞌat pe ewaku hap putꞌok e urumimotypot no eminug koꞌi. 14 Miꞌi hawyi mekewat 4 ok takaria -Pywo ti rat pywo ti rat iꞌatuꞌe. Iꞌewyte mekewat 24 ok takaria poꞌog Tupana mohey saꞌawyꞌi wuat haria teꞌeruwepỹꞌãtutuk iꞌatuowa yi kape taꞌatumotypot Tupana Hũ Kuteiru haype -Wuatꞌi eꞌat piat ieineꞌen hat uruhewaku kahato En iꞌatuꞌe.