Humanu

Pauru Henoi Wepi Etiat

16 Atipoꞌoro ehewowi wẽtup haryporia Iesui mohey hat kahato. Miꞌi ti aheinyt mana Wepi. Iwepiit kahato mana Wepi wakuat kahato Iesui mohey hat sese. Miꞌi ti ipotpap kahato tawa Sẽkeia totiaria Iesui mohey hap tote iꞌatuwaꞌatunug hap howare totiat hat. Miꞌi atipoꞌoro ehewowi meiũwat mana Wepi. 2 Aikotã Iesui kape -Ereke o eiwese hap wywo hap ewy o -Ereke ro eweiꞌe mana Wepi pe aikotã Tupana mepytꞌin ewywuat eweikupteꞌen pote eiwese tuete. Topowyro hap toikyꞌesat eikaipyi miꞌi o ewetunug tope imikyꞌesat oktan. Mana Wepi ti mesuwe uipowyro kahato iꞌewyte uiwy kahato topyhuꞌat iꞌewyte toiꞌatupowyro kahato mesuwiat Iesui mohey haria. Iꞌatu kahato mesuwarotiaria wy ok wo topyhuꞌat mana Wepi. Wakuat kahato uipotpoꞌoro miꞌi.

3 Pyno kuekatu atipoꞌoro mana Pisira heꞌaito Akira kape uipowyro Aipotypot Iesui eropat hap etiat are. 4 Saꞌawyꞌi sese miꞌiria uipowyro kahato. Wẽtup eꞌat pe tõꞌẽ tõꞌẽ kahato miitꞌin uiꞌauka hamuat wen maꞌato uhyt Akira iwary Pisira uhehakyeraꞌat uhewanikaptia po pyi. -Uruꞌauka teran mote waku maꞌato yt naku i eweiꞌauka Pauru iꞌatuꞌe wanikaptia pe arepopy pykai. Miꞌi hap upi uhehakyeraꞌat uhyt Akira mana Pisira. Miꞌi ete yne Iesui mohey haria yne ywania aimepuo aimepuo teꞌeruwaꞌatunug hap oktan teꞌeruwehum Tupana pe mehin Akira mana Pisira ete. Miꞌiria kape atipoꞌoro uhekuekatu. 5 Iꞌewyte atipoꞌoro uhekuekatu Iesui mohey haria mehin Akira mana Pisira yat piaria waꞌatunug haria kape. Iꞌewyte atipoꞌoro uhekuekatu uhewakuap uiwy sese mekewat mehin Epenetu kape. Iꞌatu kahato mio Iesui mohey haria tawa Asia pe yi Asia pe maꞌato uiwy Epenetu torannia miꞌiria eꞌyian mete topyhuꞌat Iesui mohey hatno tawa Asia piaria kai. Miꞌi inug yian mete Iesui Toporekuat no. 6 Uhewaku hap atipoꞌoro mekewat mana Maria pe eheropat hap ete ipotpap kahato rakat kuekatu atipoꞌoro miꞌiria pe miꞌi pe. 7 Saꞌawyꞌi toineꞌen typy ok uiꞌywania Iuteuria woꞌopyhik hawe wẽtup ok Ãtuniku wẽtup ok Iunia. Miꞌiria Iesui mohey haria aheꞌyian miat haria kahato miꞌiria Iesui potpoꞌororia mikuap kahato koꞌi. Miꞌiria kape uhewaku hap kuekatu e hap atipoꞌoro. 8 Iꞌewyte atipoꞌoro kuekatu sese mekewat uiwy sese mekewat mehin Ãpiatu kape. Iesui urumowehik kahato wẽtup miit ewy yn urutopyhuꞌat. Uiwy kahato miꞌi Iesui mohey hat pote. 9 Etum uhekuekatu mehin Upanu pe Aikaꞌiwat Iesui eropat uruwywuat hat kahato miꞌi. Uhekuekatu sese atipoꞌoro uiwy sese Etaki kape. 10 Iꞌewyte atipoꞌoro kuekatu kahato aiwy Apere kape. Miꞌi ti tokuꞌuro hap kapiat Aikaꞌiwat mohey hap -Yt atoiat i e hat. Saꞌawyꞌi taꞌatuhãꞌãg ihep imohey hap kaipywiat hap maꞌato yt taꞌatuhep kuap i. Kuekatu mehin Aritũpuru yat piaria kape atiꞌatuewaku. 11 Arehum kahato uhehay wo iꞌewyte mehin Erotiãu kape miꞌi ti Iuteu ywania uiꞌewy. Iꞌewyte kuekatu atipoꞌoro Nasisu kape iꞌewyte haꞌyruꞌin Iesui mohey haria kape. 12 Atiꞌatuewaku teran mehin Tiwena Iꞌewyte Tiwosa. Miꞌiria aheropat kahato Aipotypot potpap nug hap ete. Yt atiwaure i aiwy mana Pesite Aipotypot potpap ahyt nug hat. Miꞌi ti Aipotypot eropat hat kahato. 13 Miꞌi hawyi haikaꞌat mehin Huwu kape sepap nug hap ewy Aikaꞌiwat potpap nug hap ete ipotpap iꞌewyte ety kape atipoꞌoro uiwy Huwu kuekatu. Waku kahato ety are. Uity ewywuat kahato miꞌi topyhuꞌat uipyꞌa pe are. Taꞌi uipowyro kahato ety aikotã uity sese hap ewy uipowyro are. 14 -Tupana are etipoityro uiwyriaꞌin kuekatu atipoꞌoro mehin Asikitu kape mehin Wẽkũte kape aiwy Hemi kape mehin Patupa kape mehin Hema kape iꞌewyte yne Iesui mohey haria iꞌatuwywuaria kape atipoꞌoro yne kuekatu. 15 Yt atiwaure teran hin i uhekuekatu poꞌoro ewowiat hap mehin Wiroruku are. Iꞌewyte mana Iuria kape iꞌewyte mehin Nereu kape iꞌewyte inyt kape iꞌewyte uhehay atipoꞌoro ewowi uiwy Urĩpa kape iꞌewyte yne iꞌatuwywuat ieineꞌen haria Tupana Saꞌyru emiitꞌin koꞌi kape kuekatu atipoꞌoro.

16 Karãpe putꞌok e wẽtup ok Iesui mohey hat sese ahowawi pote waku iwese kahato rakat howawiat hatno watopyhuꞌat. Waku ahehay wese kahato iwywo waku. Waku watiwesat -Waku aiwyriaꞌin Iesui mohey haria sese. Taꞌi waku watiꞌahiꞌypysat aimepuo aimepuo Iesui mohey haria teꞌeruwaꞌatunug hap kaipyi taꞌatupoꞌoro ehewowi taꞌatuekuekatu eipe Humanu ywania kape mesuwepyi.

Miitꞌin Aimoꞌarotꞌi Hanuaria Etiat

17 Tukupteꞌen Iesui mohey ran haria maꞌato mesuwat yi tote yt naku i rakaria katupono woꞌoehay uuka teran sehay wuat haria tukupteꞌen. Taꞌi miꞌiria taꞌatupatꞌok patꞌok teran kahato aito hap taꞌatukyꞌesat kahato. Miꞌiria aimoꞌakagꞌaia taꞌatuehay wuat hap taꞌatuehay wo. Yt Iesui kyꞌe hap kaipyi i maꞌato wẽtup mohey hap kape wẽtup sehay kape aimoꞌakagꞌaia teran. Typy mohey hap nug hamo yt Aimimohey Iesui ewy i taꞌatumoherep yt aimimohey sehay yt ewy i yt aimuꞌe hap saꞌawyꞌi wuat Iesui potmuꞌeria piat yt aimuꞌe hap ewy i aimuꞌe. Yt naku i. Uiwyriaꞌin karãpe miꞌiria ewywuaria putꞌok iꞌatuꞌe eipyꞌasetpe ehepiat Iesui mohey hap nug kowoꞌi kowoꞌi hanuaria eiweꞌeg wo o miꞌiria pupi. Miꞌiria putꞌok iꞌatuꞌe turan waku eweikuap meremo iꞌatuepiat eimaꞌat reran hap hawyi yt eweiwat i iꞌatuehay upi. -Urumuꞌe ro uhyt mana yt eweiꞌe teiꞌo iꞌatuepe. Iꞌatuehay pupi eweikenꞌẽ o. Uiwyriaꞌin Iesui mohey haria eipe pyno worohoꞌonapin haty puo yt eweipomeꞌeg teiꞌo ehewaure kaꞌa woꞌopatꞌok patꞌok Iesui mohey haria etiat iꞌatumoꞌakagꞌaia hap kaipywiaria kape. 18 Katupono woꞌopatꞌok patꞌok haria yt Aikaꞌiwat Iesui eropat haria i hin i. Taꞌi yt Aikaꞌiwat Iesui upiat hin i aimoꞌakagꞌaia hamo. Taꞌi miꞌiria tõꞌẽ tõꞌẽ ahowawi katupono taꞌatukyꞌesat kahato aito taꞌatuemiitꞌin no haype saꞌag nug hamuat aiꞌu hamo tõꞌẽ. Miꞌi pote eiweꞌeg wo o pyno iꞌatuehay sese kahato miꞌiria wẽtup sehay ete aimaꞌat taꞌatuehay iwese rakat nuat hamo -Yt uwe i poꞌog ikahuria eipe kawiat haria iꞌatuꞌe ahepe maꞌato yt pywo pe i aimaꞌat reran haype. Iꞌatuehay upi mekewat hirokaria wanetup hap ewywuaria meremo tuwat kahato iꞌatuehay upi. Miꞌi pote uipyꞌa pyi areꞌe -Eiweꞌeg wo o eimaꞌat tet pupi eipatꞌok hamuaria neꞌi pote ahekat kyewi aimaꞌat haria miꞌiria. 19 Maꞌato eiperia yt iraniaꞌin ekat kyewi i miitꞌin muꞌe hanuaria miꞌiria ewywuaria hin i. Taꞌi aito sehay wakuat Iesui etiat yn aiwẽ ete. Taꞌi yt kat i wẽtup sehay kowuat kowuat hap upiaria aito. Aito ti wẽtup mohey hap yn aikai Iesui mowepiit hap yn aikai waku. Miꞌi pote uimowepiit kahato eipe. Eipe Iesui ehay upiaria Humanu ywania katupono yt miitꞌin piit kyewi eweimuꞌe Iesui hũria. Waku kahato. Pyno waku watopyhuꞌat waku nug hap sepap nug haria wo. Waku watikuap yn wakuat koꞌi weꞌeg haria ewy. Maꞌato yt naku i watopyhuꞌat yt ikuap i hat ewy sio waku sio yt aikotã aimepytꞌin yt ikuap i te haria ewy aikotã -Waku atunug yt naku i migꞌi wo mesup e haria ewy yt naku i watopyhuꞌat iꞌatuehay upi. Waku watuwewãi yt naku i nug hap koꞌi ete Iesui esuraraꞌin ewy waku. 20 Pyno Tupana aiwanetup kowoꞌi kowoꞌi hap monik kahato hat topyhuꞌat aiwanetup hawe. Waku ahewaure kahato Tupana kape. Miꞌi watunug mote aimowese kahato hap topyhuꞌat aiwoꞌope. Waku aiwoꞌokyꞌe hap upi watuꞌuka te aat kaꞌap ahiag ete. Miꞌi watunug mote meiũran yt pya hin i raꞌyn hap eꞌat pe Tupana tiꞌakit sese raꞌyn ahiag aipy wo toiꞌaporok ahiag. Taꞌi aipy wo aru toiꞌakit ahiag akag aikotã watiꞌakit moĩ akag ewy e.

-Uipotypot Iesui ereineꞌen kahato ro emiitꞌin Humanu ywania wywo. Ereineꞌen hegyiꞌat kahato itotiaria piat hatno. Ereineꞌen egyiꞌat iꞌatukyꞌe hap wywuat wywo hap ahẽtup epe Iesui pe ehepiat.

Kuekatu E Hap Taꞌatupoꞌoro Iraniaꞌin Kape

21 Uhaꞌyru Timoteu ipotpap kahato uiwy wo mesuwe. Kuekatu toipoꞌoro teran ehewowi -Aikotã suraraꞌin timotypot taꞌatuꞌakag hap ewy taꞌatuwehum hap wywo hap ewy arehum ehewowi e Timoteu ehepe. Tupana potpap nug haria mesuwe uiꞌywania Iuteuria kawiat uiꞌewywuaria -Worohoꞌokyꞌe kahato eipe worohoꞌomotypot eipe iꞌatuꞌe ehepiat. Aiwy Irusiu mio tã e miꞌi hawyi mehin Iasãu iꞌewyte mekewat aiwy Sosipatu tipoꞌoro teran miꞌi e hap ehewowi.

22 Mesuwat uipotpoꞌoro iwan nug hat topo wywuat hat uiwẽ pywiat aiwy uhyt Tesiu e hap het rakat iꞌewyte toipoꞌoro teran kuekatu e hap ehewowi. -Pyno uiwyriaꞌin Tupana Mipoꞌoro Eiporekuat nuat Iesui piat eiꞌatupoityro hap atipoꞌoro ehewowi atiwan mesuwe uito Pauru e hap wan nug hat Tesiu uito toran are.

23 Uito Pauru mesup areineꞌen mehin Kaiu yat pe areket mesuwe. Iesui mohey haria teꞌeruwaꞌatunug mesuwe mehin Kaiu yat pe. Pyno uipowyro hat Kaiu iꞌewyte toipoꞌoro teran kuekatu e hap ehewowi. Wẽtup ok mehin Eratu tipoꞌoro kuekatu ehewowi. Aiwy Eratu ti toineꞌen mesuwat tawa pe morekuat ekareꞌen apykok kuap hat miitꞌin miat imoꞌẽ kuap hat.

24 -Uikaꞌiwat Iesui etiꞌatukyꞌe kahato o emiitꞌin yi Humanu totiaria areꞌe mesuwe etiꞌatukyꞌe hap upi etiꞌatupoityro o miꞌiria egyiꞌat hap oktan areꞌe mesuwe Iesui pe.

25 Pyno toꞌiro watimotypot Tupana ahehay wo -Tupana En ni wakuat kahato waku watoꞌe. Ikahu kahato ewakuap urutoꞌe. Urumoehãite kuap kahato Esaꞌyru sese mohey hap ete urutoꞌe. Ehay wakuat Esaꞌyru etiat wo uruporekuat etiat Emimoherep ete urumoehãite kuap kahato urumotag kuap kahato Esaꞌyru mohey hap ete urutoꞌe. Nimo te Esaꞌyru yt putꞌok e i te mesuwat yi tote turan ehay moherep haria urueꞌaseꞌiꞌin timoherep kahato yian mete Esaꞌyru Iesui etiat taꞌatumiwan me waku watoꞌe. Aikotã sehay migꞌi wuat ewy taꞌatumoherep uruepe maꞌato yt heremo kahato i aikotã mesup eꞌat hap ewy urutoꞌe Epe Tupana. Esaꞌyru eꞌyian mete taꞌatumoherep yne Esaꞌyru ete yn urutoꞌe. Putꞌok e hawyi urumoehãite hanuat kahato. Miꞌi miwan kaipyi Esaꞌyru mohey uruepiat hamo urutoꞌe. Urupowyro kahato emohey hap ete urutoꞌe. 26 Mekewat miwan pywuat sehay etiat yianmiat Tupana ehay moherep haria mienoi heremo kahato topyhuꞌat wuatꞌi ywania mikuap mo kahato. Waku kahato En Tupana urutoꞌe. Taꞌi Iesui etiat miwan koꞌi Emipoꞌoro Aiporekuat nuat etiat waku kahato urutoꞌe. Miꞌi pote uruimoherep Esaꞌyru etiat mesuwat sehay pywuat torannia ywania pe mesuwat yi tote hap uruhẽtup ewowi Tupana. Uruikyꞌesat kahato yne ywania Esaꞌyru mohey haria wo tukupteꞌen hap urutoꞌe. Iꞌewyte uruikyꞌesat yne miꞌiria Esaꞌyru ehay upiaria wo tukupteꞌen urutoꞌe ewowi Tupana. 27 En yn ni Tupana miꞌi hawyi yt uwe i Tupana wo toineꞌen urutoꞌe. En yn ni wuatꞌi wuatꞌi kuap hat urutoꞌe. En yn ni yne yne weꞌeg hap eiam sese urutoꞌe. Uruimotypot kahato En katupono etipoꞌoro Esaꞌyru Iesui uruewawi uruꞌakag Sese wo urutoꞌe. Uruimotypot kahato En aat kaꞌap wuatꞌi eꞌat pe urutoꞌe. Waku kahato ti rat En paĩ an urutoꞌe. Miꞌi hap ewy waku watoꞌe Tupana pe. Waku.

Waku raꞌyn uiꞌe hap ehewowi Iesui mohey haria yi Humanu watnuat rotiaria.