Iesui Aru E Hap

Arehaꞌat Hawyi Tupana Hũ Araꞌakasa Raꞌyn Yityꞌok Sitãu Totiat

14 Miꞌi hawyi uito Iuwãu arahaꞌat hawyi araꞌakasa uimuꞌetu wuat ewy. Eiwehaꞌat ro eiwehaꞌat ro Tupana Hũ Kuteiru toineꞌen tawa Ierusarẽi me yityꞌok Sitau tote. Eiwehaꞌat ro. Iꞌatu kahato teropat haria wywo toineꞌen itote 144 miu heropat haria iwywo tukupteꞌen itote. Eiwehaꞌat ro areꞌe ehepe. Iꞌywot set miwan toineꞌen ihũ hit Kuteiru ewatuꞌa ete. 2 Miꞌi hawyi atikuap wepy hap ikahu atipy pe ihay se kahato rakat aikotã ywytu yꞌy ete hap ewy aikotã ipuehay yꞌy hitꞌi soroꞌe hap ewy atikuap uimuꞌetu wuat ewy. Iꞌatu kahato yꞌy soroꞌe hap ewy ipuehay. Miꞌi puehay puo atikuap huru huruꞌe hap iwato rakat haty wo. Miꞌi hawyi atikuap wepy nug hap ewy aikotã moryꞌawat ewywuat haity iꞌatu kahato rakat pyi tuwepy hap ewy tuwepy. Miitꞌin sem teꞌeruwepy iꞌatu kahato kawakiu wywo hap ewy. 3 Miꞌi hawyi Tupana Hũ hit miehakyeraꞌat koꞌi teꞌeruwepy atipy pe. Wepy hap ipakup takat sese. Mekewat apyk piat Morekuat eꞌyian notiat hat motypot hamuat. Miꞌiria mekewat 24 ok poꞌog wuat imohey yne eꞌat piat haria ehamo. Iꞌewyte 4 ok takaria ehamo. Teꞌeruwepy mekewat wepy pakup. Maꞌato itotiaria yt tikuap hin taꞌatupyꞌa pe kat e hap kat e hap teꞌeruwepy hap. Maꞌato mekewat 144 miu rakaria Iuteuria Iesui mohey haria ikuap taꞌatupyꞌa pe. Katupono miꞌiria iꞌewyte Tupana miehakyeraꞌat koꞌi taꞌatukuap. 4 Iꞌatuweꞌeg kahato mekewat 144 miu miit Iesui eropat haria. Yt karãpe i haryporiaꞌin miat taꞌatuwaire hap upi tuwat. Miꞌiria 144 miu ihainia yt karãpe i iharyꞌi rakaria taꞌatunug kahato Tupana Hũ hit Kuteiru emiit sese imiꞌairoria sese koꞌi miꞌiria. Toiꞌatuehakyeraꞌat miꞌiria iraniaꞌin Iuteuria eꞌyian mete. Miꞌi hawyi 144 miu miitꞌin rakaria ehay kaipyi miitꞌin sem toiꞌatuehakyeraꞌat. Tupana kapiat weium hap koꞌi imowepiit hamuat iꞌewyte Tupana Hũ hit Kuteiru kapiat weium hap imowepiit hamuat teꞌeropyhuꞌat miꞌiria 144 miu Iuteuria Iesui mohey haria. 5 Tupana mimoewaku koꞌi kahato miꞌiria katupono wakuaria kahato miꞌiria. Yt karãpe i teꞌeropyhuꞌat Tupana maꞌat haria wo iꞌewyte yt karãpe i heso rakaria wo teꞌeropyhuꞌat.

Ihay Uhewowi

6 Miꞌi hawyi uito Iuwãu wẽtup araꞌakasa topopy rakat ywyhig muo. Miꞌi hawyi toimoherep kahato tehay wo sehay wakuat Tupana etiat mekewat sehay wakuat wuatꞌi eꞌat piat. Yt karãpiat i ikahuro rakat. Miꞌi ti topopy kahato wuatꞌi Setama kape wuatꞌi ywania kape toto wuatꞌi pusu kuap haria kape topopypuo. Wuatꞌi miitꞌin kape toto hun nakaria ihup takaria iꞌewyte ikytsig nakaria kape yt toꞌoꞌewywuat i kape topopy. Miꞌi hawyi ywyhig kaipyi toimoherep sehay wakuap. 7 Miꞌi ti tehay pirik wo tuwẽpowat -Eweimotypot o Tupana yn e. Eiwehum yn no Tupana kape e. Katupono yt pya hin i tuut uwe waku uwe yt naku i rakat moherep hanuat tuut hap eꞌat e. Uwe imiꞌapiheg wuat uwe yt e hamo tuut irane. Miꞌi pote eweimotypot ro Atipy Nug Hat Yi Nug Hat e. Eweikyꞌe ro Yꞌy Wato Nug Hat e tehay pirik wo topopy popuo pyi.

Wẽtup Ok Atipy Piat Ihay Uhewowi

8 Haipepe wẽtup atipy kaipywiat mopy hat araꞌakasa. Miꞌi ihay raꞌyn -Mekewat tawa Papironia ewywuat ikahuro raꞌyn e. Katupono tawa Papironia piaria tiꞌatumuꞌe kahato miitꞌin taꞌatuwaire waire e hap ete -Ewetunug no urueko ewy iꞌatuꞌe yne ywania pe -Waku yne haryporia weweneru haria wo waku ahewaire aikotã mahy wo aimopẽꞌã wywo hap ewy iꞌatuꞌe. Miꞌi pote Tupana haiwot pote toiꞌatumoma miꞌiria tawa Papironia piaria ewywuat gupteꞌen haria e mekewat mopy ywyhig muat hat.

Wẽtup Te Atipy Piat Ihay Uhepe

9 Miꞌi hawyi uito Iuwãu araꞌakasa wẽtup atipy piat mekewat typy rakat saipepiat. Miꞌi hawyi myẽꞌym naꞌyn atipy piat mopy hat. Miꞌi tuwẽpowat tehay pirik wo. -Eiweꞌeg wo o yt eweimotypot reiꞌo mekewat awyato tig koro 7 iꞌakag nakat -Uito Tupana heso rakat e. Yt eweimotypot reiꞌo iminug Tupana iãꞌãkap e. Karãpe toiwan teran toset ewatuꞌa ete epo sese ete pote waku waĩꞌeweiꞌe. 10 Katupono -Uito Tupana heso rakat wywuat wat haria Tupana sese miꞌapiheg wo teꞌeropyhuꞌat. Yt naku i topyhuꞌat iꞌatuꞌapiheg hap aikotã sapo hy watuꞌu mani hy pyre puo hap ewy -Ewetuꞌu yne ro e aru Tupana topyꞌahak hap wywo. Miꞌi hawyi worohoꞌoꞌapiheg aria wo e. Miꞌi hawyi worohoꞌomosoꞌopot wuatꞌi eꞌat pe e Tupana -Uito Tupana sese e heso rakat motypot haria pe. Aria sapuẽ puo iꞌatueiam sese topyhuꞌat iꞌatuepiat hoꞌopot hap. Miꞌi puo hoꞌopot hap sese topyhuꞌat e wuatꞌi atipy piaria ehamo Tupana Hũ hit Kuteiru ehamo. Eweꞌeg wo katupono miꞌi tã neꞌi ti aru ewehoꞌopot ewetunug mekewat set ehowatuꞌa ete pote. Ewetunug mekewat heso rakat ehetupana wo pote. 11 Miꞌi hawyi Tupana mimosoꞌopot koꞌi heꞌyhig am ywaipe wuatꞌi eꞌat pe. Are paĩ hoꞌopot hawe miꞌiria yt teꞌeroket kuap i yt teꞌeremohy kuap i miꞌiria. Haty pote yt teꞌeroket kuap i aat kaꞌap. Katupono mekewat yt naku i nug hat taꞌatunug taꞌatuetupana wo. Iꞌewyte hãꞌãkap kape teꞌeruwepỹꞌãtutuk aikotã imotypot Tupana ewywuat hamo. Iꞌewyte het taꞌatuwan taꞌatueowatuꞌa ete pote taꞌatusatyꞌi satyꞌi hawe tukupteꞌen wuatꞌi eꞌat pe. 12 Uiwyriaꞌin uito Iesui potmuꞌe 12 ok takat Iuwãu. Eiweꞌeg wo o yt eweiwat reiꞌo -Uito Tupana heso rakat upi eimosoꞌopot pykai katupono mesuwe yn eimosoꞌopot kuap. Waku watomohey Iesui aiꞌauka teran pykai areꞌe. Waku Tupana piat ainapin hap aikuꞌuro hap kape watopytyk. Aito Tupana mimoewaku koꞌi pote waku watomohey aiperupꞌi popuo yt kat i waureꞌaiꞌe hap areꞌe.

Wẽtup Te 4 Rakat Ihay Uiwywo

13 Miꞌi hawyi atikuap sehay atipy kaipyi uimuꞌetu -Iuwãu e Etiwan itote uiꞌe hap e. -Waku kahato meimuẽwaria taꞌatukaꞌiwat potpap taꞌatunug taꞌatukuꞌuro hap kape. Waku kahato meimuẽwat teꞌeruwepotpap taꞌatukaꞌiwat potpap ete mesuwat eꞌat pyi taꞌatukuꞌuro hap kape e. Miꞌi hawyi Tupana Paꞌãu iꞌewyte toꞌe -Pywo ti rat waku iꞌatupotpap hoꞌopot hap Tupana potpap taꞌatunug aat kaꞌap e. Miꞌi hawyi waku pe tukupteꞌen wuatꞌi eꞌat pe e Tupana Paꞌãu. Waku pe tukupteꞌen katupono iꞌatuminug koꞌi yt karãpe i miitꞌin tiwaure iꞌatumiekyi koꞌi. Toineꞌen yne itote e Tupana Paꞌãu ahepe.

Arehaꞌat Aheykeꞌet Ewywuat Apyk Pe Toineꞌen

14 Miꞌi hawyi uito Iuwãu arahaꞌat ywaipe hawyi araꞌakasa wẽtup ok apyk pe ywyhig kytsig me Miꞌi ti Aheykeꞌet ewywuat. Morekuat wato painug hap imehit rakat toineꞌen ipiit ete. Ipo pe kyse hãihyk kahato rakat miꞌi kape araꞌakasa. 15 Miꞌi hawyi uito Iuwãu araꞌakasa wẽtup ok tuwẽtem Tupana motypot yat pyi hawyi tuwẽpowat mekewat ywyhig notiat apyk piat kape -Etiterek to mikoi mehin ekyse wo e. Kat pote iterek hamo waku raꞌyn e. 16 Miꞌi hawyi toiterek taꞌyn tekyseꞌyp wo. Mikoi yi etiat toiꞌatunug.

Toineꞌen Wẽtup Ok Tupana Kapiat Ikamhigse Rakat Wuk Hamuat

17 Miꞌi hawyi arahaꞌat wẽtup ok atipy piat ieineꞌen hat tuwẽtem Tupana yat pyi hawyi araꞌakasa ipo pe kyse aporiꞌa hãihyk kahato rakat. 18 Miꞌi hawyi arahaꞌat hawyi araꞌakasa wẽtup atipy piat te. Miꞌi ti ipotpap mekewat aria ikamhig se rakat Tupana kapiat wuk hamuat hap ete. Miꞌi hawyi ihay pirik mekewat wẽtup ok kyseꞌyp hãihyk ipo piat rakat kape -Etipuruk to Uwa ypia sat katupono iꞌatag naꞌyn e. 19 Miꞌi hawyi tekyseꞌyp mo toipuruk yne Uwa sat koꞌi yi totepyi yne Uwa ypia kaipyi. Miꞌi hawyi tohytmoĩ yne itok hap we ihy hep hamo. Mekewat itok hap Tupana saiwot hap ewy. Uwa sat miitꞌin ewy. 20 Miꞌi hawyi tuwẽtem miitꞌin suu ewywuat itok hawyi. Toitok yne mekewat Uwa tawa wato Ierusarẽi miaria hawyi ti Huu kahato itote aikotã ihyemyiꞌa wato sese hap ewy. Miꞌi kape arahaꞌat turan hawyi iꞌatuhũ Kawaru hewyry mekewat miitꞌin suu muap tote hewyry ihyemyiꞌa ewy miitꞌin suu hutꞌypy puo.