Iuwãu
Iesui Timoherep Topotmuꞌeria Pe
21 Miꞌi hawyi Iesui tuwemoherep iraꞌyn topotmuꞌeria kape ihyemyiꞌa wato ẽpe tote. Mekewat ihyemyiꞌa wato yi Karireia pyꞌasetpiat yẽpe ete mekewat hyemyiꞌa Tiperiati e hap het rakat yi kyt upi tuwemoherep i topotmuꞌeria ewowi. Aikotã hap ewy ahenoi raꞌyn e. 2 Tukupteꞌen itote Simau Nu e hap hawyi ipotmuꞌe Tume wẽtup set Titimu ipat rakat. Miꞌi rẽ ipotmuꞌe Natanaeu tawa Kana tama Karireia kaipywiat. Miꞌi hawyi Sepeteu saꞌyruꞌin hawyi typy ok poꞌog Iesui potmuꞌeria tukupteꞌen itote. 3 Miꞌi turan Simau Peteru toꞌe iꞌatuepe -Ahoꞌopytyk taꞌyn pira e hawyi -Urupap eupi uhyt iꞌatuꞌe. Miꞌi hawyi teꞌeruwehytꞌok taꞌyn yara pe. Miꞌi hawyi pira taꞌatuhoꞌokat kaꞌap taꞌatuesuki wato wo wen maꞌato yt kat i pira taꞌatupuẽti kaꞌap taꞌatuhoꞌokat pykai. 4 Miꞌi hawyi hunete wẽtup ok miit kape teꞌerehaꞌat yi kyt rote maꞌato yt taꞌatukuap i hap Iesui itote. 5 Miꞌi hawyi tehay pirik wo tuwẽpowat iꞌatuewowi -Uiwyriaꞌin ehepira raꞌyn apo e. -Yt rat iꞌatuꞌe yt wẽtup i pira uruipuẽti iꞌatuꞌe. 6 -Pyno eipo sese kai ro eweipag yꞌy pe ehesuki wato e. Miꞌi kai wyti aru ewehoꞌopuẽti raꞌyn pira e tehay pirik wo. Miꞌi hawyi taꞌatumak yꞌy pe taꞌatupo sese kai yara ywyt puo. Miꞌi hawyi howapy kahato pira wo iꞌatuesuki wato. Miꞌi hawyi taꞌatuenotem neran naꞌyn taꞌatuesuki wato maꞌato pira iꞌatu poityꞌi pote yt taꞌatuherep kuap i taꞌatueꞌyara kape. 7 Miꞌi hawyi ipotmuꞌe Iesui mikyꞌe kahato hat toꞌe Peteru pe -Aikaꞌiwat wyti koityꞌi iuẽpe yẽpe tote mehin are. Iꞌe hap toikuap taꞌyn hawyi Peteru tesokpe pag naꞌyn katupono yt tesokpe pe i ipotpap pote hawyi pesoꞌe yara pyi yꞌy pe toto Iesui kapiat hamo. Yt pya i maꞌato yara pyi Iesui kape. 8 Miꞌi hawyi urutekyi uruesuki wato yẽpe kape iꞌatu kahato pira wywuat pote ipotyi kahato. Maꞌato yt pya hin i yẽpe pyi tukupteꞌen yara puo 200 iꞌãꞌãg hap ewy. 9 Miꞌi hawyi teꞌeruwenoꞌẽ yara pywiat hawyi teꞌeraꞌakasa raꞌyn pira sem koꞌi man koꞌi aria sapypen me. 10 Miꞌi hawyi Iesui toꞌe iꞌatuepe -Eweheꞌerut ro eimipytyk pira koꞌi uhepe e. 11 Mio tã e hawyi Simau Peteru toto totekyi suki wato yẽpe kapiat hamo. Maꞌato pira iꞌatu kahato pykai hesuki pira yt tihiot hin i. Miꞌi hawyi toimorania hawyi 153 pira toipuẽti. 12 Miꞌi hawyi Iesui toꞌe uruepe -Aimiꞌu raꞌyn e. Toꞌiro watenuk e iꞌatuepe. -Uweĩ En yt iꞌatuꞌe i Iesui pe katupono taꞌatukuap taꞌatukaꞌiwat Iesui toineꞌen itote pote. 13 Miꞌi hawyi Iesui tat man hawyi toimoꞌẽ iꞌatuepe hawyi iꞌewyte pira totat hawyi toimoꞌẽ. 14 Miꞌi tã Iesui tuwemoherep topotmuꞌeria kape myẽꞌym mo guꞌuro pywiat tuwẽtem hawyi.
Iesui Apo E Peteru Pe
15 Teꞌerenuk kahu rakirẽ toꞌe Iesui Simau me -Simau Iona saꞌyru uikyꞌe poꞌog apo etiꞌatukyꞌe iraniaꞌin hap koꞌi kai e. Uikyꞌe apo poꞌog etikyꞌe mesuwarotiat hap koꞌi kai e. -Taꞌi Uikaꞌiwat etikuap taꞌyn aikotã ewy sese ewy areineꞌen hap e. Miꞌi hawyi Iesui apo e iraꞌyn -Simau uikyꞌe sese pote etiꞌatumuꞌe ro uimohey pakup i haria aikotã aihũ koꞌi apykok haria topoi tohũ mepytꞌin hap ewy e. 16 Miꞌi hawyi apo e iraꞌyn Simau me -Simau Iona saꞌyru uikyꞌe sese apo en e. -Taꞌi Uikaꞌiwat etikuap taꞌyn aikotã ewy sese ewy areineꞌen hap e. -Pyno uikyꞌe sese pote Simau etiꞌatuꞌapykok to uimohey haria aikotã aihũ koꞌi apykok haria topoi tohũria tomierohik koꞌi hap ewy e. 17 Miꞌi hawyi myẽꞌym mo Iesui toꞌe i -Simau Iona saꞌyru uikyꞌe hat apo en e. Uiwy apo en e Iesui pote Peteru hatyꞌu hawyi toiwesat -Sakpoꞌe wyti ewy sese areineꞌen uito Uikaꞌiwat e. Wuatꞌi kuap hat ri En miꞌi tupono ti etikuap taꞌyn epyꞌa pe ekai areineꞌen aikotã ewy koro ekyꞌe kahato hat areineꞌen e. -Pyno pywo pote etiꞌatumuꞌe uimohey haria mehin aikotã etiꞌatupoi aihũria koꞌi hap ewy e Simau me. 18 Ahenoi teran wẽtup pywuat hap epe Peteru e. Saꞌawyꞌi te ti emikyꞌesat ewy yn ereineꞌen e. Taꞌi eweꞌok kytyt hap etopag hawyi ewyry aikowo aikowo emikyꞌesat ewy yn etunug saꞌawyꞌi e maꞌato meiũran ti aru epoꞌoro hawyi epo etitorok hawyi iraniaꞌin neꞌi esokpe pag haria wo teꞌeropyhuꞌat. Iꞌewyte aru ereto raꞌyn aikowo aikowo yt epap i hap kape e Iesui Peteru pe. 19 Tohenoi yian me aikotã aru toimotypot Tupana tokuꞌuro turan wuat hamuat. Miꞌi hawyi toꞌe Iesui -Pyno toꞌiro i uhupi Peteru e. 20 Mio tã e pote Peteru ihaꞌat kahato tesaipepe ipotmuꞌe kape mekewat ipotmuꞌe imikyꞌe kahato hat kape mekewat wepehik Iesui etiat hat kape mekewat uweĩ emaꞌat hat e Iesui piat hat kape tehaꞌat kahato. Miꞌi hawyi apo e Iesui pe. 21 -Kat aru aiꞌokpe kawiat emiit tunug mehin e. 22 Miꞌi hawyi toiwesat -Kat aru aiꞌokpe kawiat tunug yt ereꞌe teiꞌo. Atikyꞌesat ahaipe piat toineꞌen motꞌi teran mesuwarote pote taꞌi toineꞌen motꞌi kuap karamuo uiꞌaipok hap kape hap ewy atikyꞌesat pote atunug kuap i e Iesui Peteru pe uhepiat. 23 Mio tã e Iesui pote iraniaꞌin Iesui mohey haria teꞌeroꞌe toꞌope -Pyno ti sio yt ikuꞌuro rakat nuat i meiẽwat ipotmuꞌe iꞌatuꞌe uhepiat maꞌato Iesui yt mio tã e pykai i mio tã iꞌatuꞌe. Maꞌato kat som hap ete Iesui henoi neꞌi -Atikyꞌesat pote ten toineꞌen uiꞌaipok hap kape atunug kuap e. Maꞌato yt erewanetup teiꞌo aikotã hap atunug kuap hap ete e Simau me.
Iuwãu Henoi Raꞌyn Poꞌog Imiwan Kai Iesui Tunug
24 Pywo pe ti mesuwat uimiwan atunug uito ipotmuꞌe sese. Taꞌi yne mesuwat uimienoi pywo sese rakat yn toineꞌen. Aikotã araꞌakasa hap ewywuat atiwan aikotã atikuap hap ewy ti atiwan. Uruikuap kahato Iesui hãpyk sese hap are yne hap topyhuꞌat aru toꞌe hap ewy katupono yt karãpe i wẽtup e hap ete iꞌaparap. Uruikuap sese ti Miꞌi Miit are. 25 Maꞌato poꞌog poꞌog Iesui tunug mesuwat uimiwan kai are yt ahenoi kuap i yne. Iesui minug wakuat koꞌi Iesui mienoi wakuat koꞌi iꞌatu kahato toineꞌen maꞌato wahenoi henoi teran yne yne iminug hap koꞌi mesuwat uimiwan me pote yt watunug yne kuap i kahato katupono iꞌatu kahato wyti imisepap koꞌi maꞌato yne aitoria wahãꞌãg iwan nug hamo miꞌi pote meiũran howopy kahato mesuwat yi wato hap oktan tukupteꞌen.