Wemoherep hap 6. Tupana ehay sytpok hap mesūwat yi oktān
— Mekewat eꞌāt pe owokai uhehay wakuat aikotā̃ Tupana topyhuꞌat morekuatno wuatꞌi mītꞌīn muo yi wato hap oktān hap tuwemoherep e Iesui. — MATEU 24:14
● Haryporia Vaiatea e hap het rakat toig̃neꞌen tawa hit oceano Pacífico tote. Itote 16 mil mītꞌīn tukupteꞌen. Miꞌi tawa topyhuꞌat pya kahato pykai wen maꞌato Ieuwa Ehay Enoi Haria taꞌatuepiok raꞌyn Vaiatea hawyi mītꞌīn itotiaria. Kat pote asom. Kat pote Ieuwa Ehay Enoi Haria taꞌatukyꞌesat kahato torānia mītꞌīn ikuap Tupana Porekuat etiat aj̃umpiat neꞌi mītꞌīn tukupteꞌen.
KAT ASOM WEMOHEREP HARIA PUO PYI WATEHAꞌAT KUAP. Ieuwa Ehay Enoi Haria taꞌatuhytpok Tupana Ehay etiat mesūwat yi oktān wuatꞌi ywania puo raꞌyn. Ano 2010 pe miꞌiria ipotpap kahato Tupana Ehay sytpok hap ete hamo. Kotā̃ e hap. Taꞌatuhoꞌomūꞌe Tupana Ehay ete karānia hora wo neꞌi. Kotā̃ e hap. 1,6 bilhão wo neꞌi. Iꞌewȳte 236 ywaniaria puo raꞌyn taꞌatuhenoi Tupana Ehay. Hawyi taꞌatunug̃ sese popera koꞌi Tupana Ehay puo pywiat mītꞌīn j̃um hamo. 20 bilhões popera koꞌi taꞌatunug̃ naꞌyn.
KAN IRANIAꞌĪN TEꞌERUWANENTUP. — Nimo pyi te mītꞌīn taꞌatuhytpok raꞌyn Tupana Ehay etiat iꞌatuꞌe.
IꞌATUWANENTUP HAP PȲWO ASOM. Iraniaꞌīn taꞌatuhytpok raꞌyn Tupana Ehay etiat. Maꞌato ȳt mōtꞌiꞌi miꞌi hap taꞌatunug̃ neig̃ taꞌatuhytpok mesūwat yi oktān. Maꞌato Ieuwa Ehay Enoi Haria tuweupi iꞌatukai. Miꞌiria taꞌatuhoꞌomūꞌe Tupana Ehay hampȳk popuo mesūwat yi oktān torānia mītꞌīn me. Asuwe morekuaria taꞌatupyhyp terān iꞌatupotpap hap maꞌato iꞌatupohepꞌi Tupana Ehay sytpok hap ete.a (Maku 13:13) Mesūwat yi oktān Ieuwa Ehay Enoi Haria taꞌatuhoꞌomūꞌe Tupana Ehay ete ȳt kat saꞌup upiꞌi. Iꞌewȳte Tupana Ehay etiat wemūꞌe hap popera koꞌi ȳt kat saꞌupꞌi. Miꞌiria ȳt hentupꞌi dinheiro mītꞌīn me maꞌato iraniaꞌīn mītꞌīn heg̃yiꞌat rakaria iꞌatupowȳro.
AIKOTĀ̃ ETIPUENTI. Mītꞌīn taꞌatuhytpok asom Tupana Ehay wakuat koꞌi etiat mesūwat yi oktān. Ieuwa Ehay Enoi Haria taꞌatuhoꞌomūꞌe mītꞌīn Tupana Ehay etiat. Miꞌi hap timoherep asom wakuat koꞌi tuwemoherep hamuat.
[Miwan hit yi kawiat]
a Etikuap poꞌog̃ terān erehaꞌat video koꞌi kape — Fiéis sob Provas e hap. Triângulos Roxos e hap hawyi As Testemunhas de Jeová Resistem ao Ataque Nazista e hap. Meig̃muewat koꞌi Ieuwa Ehay Enoi Haria piat minug̃.
[Miwan ko’i]
— Ieuwa tiꞌaro turān watikāt tuereto hamo mītꞌīn Tupana Ehay kuap terān haria hawyi watiꞌatumūꞌe hamo pywuat e hap etiat. — POPERA ANUÁRIO DAS TESTEMUNHAS DE JEOVÁ E HAP 2010 PIAT.