Saꞌawyꞌi atimoheyꞌi Tupana ete

UIKOSAP HAP ETIAT

Aremoherep República Democrática Alemã pe. Itote mītꞌīn teꞌeruwanentup kahatoꞌi religião kape taꞌatumohey kahato morekuaria ete pote. Aremontag̃ turān uiꞌȳwot uity uikyꞌe kahato miꞌi pote sese uimūꞌe wakuat koꞌi nug̃ hamo. Miꞌi pykai wen taꞌatumoheyꞌi Tupana toig̃neꞌen hap ete pote uito miꞌi hare.

Atipuenti waku kahato uimimohey koꞌi. Uheꞌywania piat morekuaria taꞌatuhoꞌomūꞌe torānia mītꞌīn toꞌoꞌewy ewy iꞌatuꞌe. Atipȳwo kahato iꞌatuehay miꞌi pote atikyꞌesat kahato taꞌatupatꞌok patꞌok hekat kahato koꞌi torānia mītꞌīn me hap. Uipakup te turān atipowȳro iraniaꞌīn ipakuptiaria ipotpap morekuaria piat nug̃ hamo. Ipakup pykai wen atikuap taꞌyn sese morekuaria. Miꞌiria ipuenti waku kahato uiminug̃ miꞌi pote uiwepīt kahato.

Maꞌato niatpo hap koꞌi tuwemoherep hawyi mītꞌīn taꞌatumohey kahatoꞌi poꞌog̃ morekuaria ete. Miꞌi pote morekuaria uimikuap koꞌi morekuat woꞌi poꞌog̃. Iꞌewȳte miꞌi hawyi atikuap morekuaria uimikuap koꞌi inug̃ ȳt nakuatꞌi koꞌi mītꞌīn tomikyꞌesat ewyꞌi haria pe. Miꞌi hawyi uiwanentup kowoꞌi kowoꞌi neꞌi — Morekuaria heso asom. Mītꞌīn toꞌoꞌewyꞌi asom. Kat pote asom miꞌi hap tuwemoherep are uiwepe.

Miꞌi hawyi uiꞌarōt kahato pote arenentup kahato tuweupi rakat kape. Arenentup kahato wepȳ hap koꞌi nug̃ hap ete hawyi areꞌiaꞌag̃kap nug̃ hap ete. Miꞌi hawyi areto faculdade kape aremūꞌe hamo maꞌato itote sese atunug̃ ȳt nakuatꞌi koꞌi. Kotā̃ e hap. Areket kahato haryporiaꞌīn tuweupi rakaria wȳwo. Maꞌato arekenꞌẽ kahato kat kat tuwemoherep aru hap pupi. Miꞌi pote arewanentup kahato aikotā̃ me aru uiweig̃neꞌen hap kape. Kat hamo asom aremoherep are. Iaꞌag̃kap koꞌi uiminug̃ sese heremo uikenꞌẽ hap.

Maꞌato atipuenti apo e hap koꞌi etiat iwesat hap. Wentup eꞌāt pe so uhehay uiꞌwyꞌok koꞌi wȳwo turān Ieuwa Ehay Enoi Hat Mandy e hap het rakat kotā̃ e —Andreas etimowempāp Tupana Ehay pote etipuenti hamo iwesat hap koꞌi e.

Saꞌawyꞌi atimohey kahatoꞌi tehay maꞌato miꞌi pykai wen atimowempāp Tupana Ehay. Mandya timoherep uhepe Tanieu hag̃a 2. Atipuenti waku kahato tohenoi morekuaria etiat pote. Iꞌewȳte Mandy timoherep uhepe iraniaꞌīn Tupana Ehay piat aru e hap koꞌi. Arewanentup kahato Tupana Ehat piat aru e hap koꞌi kape hawyi — Sese waku Tupana Ehay piat aru e hap koꞌi. Iraniaꞌīn tuwemorep yne raꞌyn maꞌato uweꞌi ihay kuap aikotā̃ me aru hap pyno meig̃muewat koꞌi Tupana piat asom. Toig̃neꞌen asom Tupana are uiwepe.

AIKOTĀ̃ MEIG̃ TUPANA EHAY UIPOWȲRO HAP ETIAT

Mandy henoi — J̃um uiwyriaꞌīn Horst hawyi Angelika e. Miꞌiria Ieuwa Ehay Enoi Haria. Meremo neꞌi atikuap Ieuwa Ehay Enoi Haria yn taꞌatuhoꞌomūꞌe mītꞌīn Tupana het sese etiat. Iꞌewȳte wy miꞌiria uimūꞌe Ieuwa timompakup hamuat mesūwat yi nusuken ewy hamo. Saumu 37:9 kotā̃ e — Tupana mohey haria ti mesūwat mytȳp iꞌatupo pe wyti topyhuꞌat e. Uimowepīt kahato atikuap Tupana mohey haria tukupteꞌen kuap wuatꞌi eꞌāt pe hamo hap.

Aremūꞌe Tupana Ehay etiat turān areko saꞌag̃ ywyk kahato terān maꞌato atipuenti niatpo kahato miꞌi hap nug̃ hamo. Saꞌawyꞌi uito poꞌog̃ e hat wo areig̃neꞌen mītꞌīn uikuap kahato pote. Iꞌewȳte niatpo kahato wy atipun sewaire kahato hap. Maꞌato uhewaku kahato Ieuwa iperupꞌi kahato uhete pote iꞌewȳte toikuap atunug̃ kahato terān tomikyꞌesat hap upi pote.

18 anu areig̃neꞌen turān aremūꞌe Tupana Ehay hawyi atimontypot Tupana Ehay piat woꞌonãpin hap koꞌi miꞌi pote anu 1993 pe aresetꞌok Ieuwa Ehay Enoi Hat wo areig̃neꞌen hamo. Saꞌawyꞌi hoꞌowasat rakat ewy areig̃neꞌen maꞌato korā̃ uiwepīt kahato. 7 anu tokosap hawyi aremenaru haryporia Tabitha e hap het rakat wȳwo. Korā̃ uito hawyi uheharyꞌi uruhoꞌomūꞌe kahato mītꞌīn Tupana Ehay etiat kuap hamo. Iraniaꞌīn taꞌatumohey kahato morekuaria ete aikotā̃ uito ewy maꞌato uiwepīt kahato ahoꞌopowȳro kuap hap upi.

UIPOITȲRO HAP KOꞌI ETIAT

Saꞌawyꞌi aremūꞌe Ieuwa Enoi Haria wȳwo turān uiꞌȳwotꞌīn iꞌarōt kahato taꞌatukyꞌesatꞌi pote maꞌato miꞌi hawyi taꞌatukuap aremūꞌe Tupana Ehay etiat pote waku puo areig̃neꞌen hap. Korā̃ taꞌatumowempāp Tupana Ehay hawyi moꞌopuo teꞌeruwat aiwaꞌatunug̃ hap koꞌi kape. Miꞌi pote uiwepīt kahato.

Uito hawyi Tabitha uruwepīt kahato uruimontypot Tupana Ehay piat woꞌonãpin hap koꞌi pote. Kotā̃ e hap. Tupana Ehay tiꞌatunãpin woꞌomenaru haria toꞌatoiatꞌi hamo. Miꞌi woꞌonãpin hap sese urupowȳro. Epereu 13:4.

Korā̃ ȳt arekenꞌẽꞌi poꞌog̃ aikotā̃ aru tuwemoherep hamuat hap pupi. Korā̃ yne mesūwat yi oktān torānia Ieuwa Ehay Enoi Haria uiwyriaꞌīn sese wo tukupteꞌen. Urutoria torānia urutoꞌoꞌewy ewy iꞌewȳte urutukupeꞌen woꞌowese hap wȳwo woꞌokyꞌe sese hap wȳwo wy. Miꞌi hap atikat kahato maꞌato korā̃ atipuenti taꞌyn.