12 Waku Etunug̃ Eminug̃ Terān Wuat Koꞌi

AIKOTĀ̃ MEIG̃.

Saꞌawyꞌi waku erenentup kahato kat asom etunug̃ terān hamuat hap hawyi waku etunug̃ maꞌato etunug̃ hawyi etikuap ȳt nakuꞌi eminug̃ hap pote etiꞌywyk kuap eminug̃ wuat. Miꞌi hawyi waku erenentup aikotā̃ etiꞌywyk hamo hap.

Asuwe etunug̃ kuap eminug̃ terān wuat koꞌi meremo neꞌi iraniaꞌīn eꞌāt koꞌi turān sio semana koꞌi turān. Maꞌato asuwe mōtꞌi poꞌog̃ hamo iraniaꞌīn mês koꞌi turān sio anu koꞌi turān.

KAT POTE ASOM MIꞌITĀ̃ WAKU.

Etunug̃ eminug̃ terān wuat koꞌi pote ewyꞌokria teꞌerehik terān poꞌog̃ ēte hamo hawyi eremohey poꞌog̃ iꞌewȳte ewepīt poꞌog̃ hamo.

Eremohey hap. Etunug̃ eminug̃ terān wuat koꞌi niatpoꞌi rakaria pote epowȳro etunug̃ niatpo rakaria hamo iꞌewȳte eremohey poꞌog̃ niatpo hap koꞌi etiꞌakit kuap hamo. Kotā̃ e hap. Karāmpe iraniaꞌīn emoꞌakag̃ꞌia terān wakuꞌi nug̃ hamo.

Ewyꞌokria. Torānia mītꞌīn teꞌerewyꞌinug̃ terān waku rakat nug̃ terān haria ete. Kotā̃ e hap. Ewyꞌok tunug̃ terān eminug̃ terān wuat ewy pote eiwoꞌopowȳro kuap hawyi eiwoꞌowyꞌok poꞌog̃ hamo.

Ewepīt hap. Etunug̃ eminug̃ terān wuat koꞌi pote ewepīt sēse hamo.

Chistopher e hap het rakat toꞌe — Uhepe waku kahato atunug̃ uiminug̃ terān wuat koꞌi. Miꞌi hap uipowȳro kahato kat pote atunug̃ uminug̃ terān wuat koꞌi hawyi — Waku kahato. Pȳwo rasig̃ atunug̃ ni raꞌyn are e.

TUPANA EHAY HENOI — Ȳt arepotpap terānꞌi mesup ȳt nakuꞌi watoꞌe maꞌato āt kahu kahato turān yn waku atunug̃ miꞌi ere. Miꞌitā̃ ere pote ȳt katꞌi aru etunug̃ mesuwat yi tote. — Ekeresiasi 11:4

KAT ASOM WAKU ETUNUG̃.

Erehaꞌat o mowȳro hap koꞌi kape.

Etiꞌaira o. Popera pe waku etiwan eminug̃ terān wuat koꞌi. Miꞌi hawyi etiꞌaira kat ri etunug̃ hamo hap.

Erenentup o. Popera pe waku etiwan kat kat etunug̃ terān hap koꞌi. Miꞌi hawyi etiꞌaira kat ri etunug̃ saꞌawyꞌi hap.

• Waku etiꞌaira kat eꞌāt pe sio kat mês sio anu pe etunug̃ hamo eminug̃ terān wuat.

• Waku erewanentup aikotā̃ aikotā̃ etunug̃ hamo hap.

• Waku erewanentup aikotā̃ rakat niatpo hap koꞌi putꞌokꞌe kuap ēte hap iꞌewȳte aikotā̃ etiꞌatuꞌakit kuap hamo hap.

Etunug̃ o. Ȳt nakuꞌi erenentup mōtꞌi kahato aikotā̃ me aru etunug̃ eminug̃ terān wuat koꞌi hap kape. Maꞌato apoꞌere ro ewepe — Aikotā̃ me atunug̃ kuap ti raꞌyn uiminug̃ terān wuat koꞌi ere miꞌi hawyi waku etunug̃.

TUPANA EHAY HENOI — Uwe inug̃ terān tuweꞌeg̃ wo kahato miꞌi hap wyti ipuenti iwato kahato tomiꞌu. Miꞌi hap ete wyti meremo tokosap saꞌawyꞌi wuat hesyꞌat hap niatpo hap. — Porowepiu 21:5.