PARTE 5
Iꞌaman Wato Hap eꞌyj̃an mete uwe seg̃ke tenentup Tupana ehay kape
Nuꞌe tempu poꞌog̃ mītꞌīn saꞌag̃ nug̃ haria. Ienesi (Gênesis) 6:5
Atãu hawyi Ewa iꞌatumempytꞌīn kahato raꞌyn miꞌi pote ti typyꞌi kahato raꞌyn mītꞌīn tukupteꞌen mesūwat yi tote. Iraniaꞌīn anjo koꞌi inug̃ aikotā̃ ahiag̃ ewy hawyi tõꞌẽ raꞌyn mesūwat yi kape.
Anjo koꞌi teꞌeruwemog̃koꞌi raꞌyn ihaig̃nia pīt wo miꞌi hawyi taꞌatuhoꞌosāt raꞌyn haryporiaꞌīn taꞌatueharyꞌi wo. Iꞌatumempytꞌīn ni sese raꞌyn iꞌatupyꞌahak iꞌatuesaika kahato iꞌewȳte iꞌatutypore torānia mītꞌīn kai.
Miꞌi hawyi Tupana tehaꞌat mesūwat yi kape hawyi toꞌe — Tuwemowato kahato mītꞌīn minug̃ saꞌag̃ e. Mītꞌīn mesūwat yi wato tote torānia teꞌeruwepyi ȳt nakuꞌi nug̃ haria wo.
Nuꞌe tenentup Tupana ehay kape miꞌi hawyi tutunug̃ yara wato. Ienesi (Gênesis) 6:13, 14, 18, 19, 22
Nuꞌe ti mīt wakuat kahato. Ieuwa toꞌe Nuꞌe pe — Atiꞌatumomã hamuat raꞌyn wyti mītꞌīn wakuariaꞌi nug̃ haria yꞌy wato wo e.
Tupana toꞌe wy Nuꞌe pe — Etunug̃ no wentup yara wato iꞌywop takat aikotā̃ uimikyꞌesat ewy etunug̃ e. Miꞌi hawyi o ehytmoig̃ yara wato pe ewyriaꞌīn hawyi hũria koꞌi e.
Nuꞌe henoi mītꞌīn me Iꞌaman Wato Hap etiat maꞌato teꞌeruwanentup terān hinꞌi ihay kape. Iraniaꞌīn ni teꞌeruweukaꞌi raꞌyn Nuꞌe ete iꞌewȳte tokyryꞌi iꞌatupyꞌahak Nuꞌe ete.
Karāmpe Nuꞌe timomã raꞌyn yara wato nug̃ hap hawyi ti tohytmoig̃ raꞌyn yara pe hũria koꞌi.