WEMŪꞌE HAP 28
Aikotā̃ me asom etimoherep kuap ehewaku hap Ieuwa hawyi Iesui iꞌatuminug̃ eupiat hap upi.
Karāmpe ewyꞌok tum emiꞌutui ewȳwuat kahato rakat sio imij̃um emikyꞌesat ewȳwuat kahato rakat pote hawyi aikotā̃ aten erepyhuꞌat. Ewepīt kahato hamo hawyi ehewaku terān hamo ewyꞌok imij̃um upi. Ieuwa hawyi Iesui taꞌatuj̃um ahepe waku poꞌog̃ torānia kawiat rakat. Iesui kuꞌuro hap. Aikotā̃ me asom watiꞌatuewaku kuap Ieuwa hawyi Iesui iꞌatumij̃um upi.
1. Aikotā̃ me asom watimoherep kuap wahewaku kahato hap Ieuwa hawyi Iesui iꞌatumij̃um ahepiat hap upi.
Tupana Ehay toꞌe — Uwe uwe imohey Iesui kuꞌuro hap ete miꞌi haria wyti ti aru wuatꞌi eꞌāt pe tukupteꞌen e. (Iuwãu 3:16) Maꞌato aikotā̃ me asom watimoherep watimohey sēse pȳwo pe Iesui kuꞌuro hap ete hap. Atimohey Iesui ete watoꞌe hap puo pyi ynꞌi. Maꞌato miꞌi hap watimoherep aiminug̃ koꞌi puo pyi iꞌewȳte aimiꞌaira koꞌi puo pyi watimoherep pȳwo pe sēse watimohey hap. (Tiaku 2:24) Miꞌi hap watunug̃ mote Ieuwa hawyi Iesui iꞌatuwyꞌok wo poꞌog̃ poꞌog̃ hamo watoig̃neꞌen. — Etimowempāp o Iuwãu 14:21.
2. Watimoherep wahewaku kahato Ieuwa hawyi Iesui iꞌatumij̃um ahepiat hap upi hamo kat waꞌatunug̃ hap kape asom waku wato.
Tokuꞌuro hap eꞌyj̃an mete Iesui tiꞌatumūꞌe topotmūꞌeria aikotā̃ me taꞌatumoherep kuap taꞌatuhewaku tokuꞌuro hap upi hamo hap ete. Iesui henoi waku eiwaꞌatunug̃ tuereto uikuꞌuro hap hotꞌokꞌe tuereto ehetiat hamo e. Waꞌatunug̃ hap set Iesui kuꞌuro hap kuekatup hap e. (1 Kurintiu 11:20) Iesui tikyꞌesat topotmūꞌeria iꞌewȳte torānia tomohey sēse haria toikyꞌesat hotꞌokꞌe tuereto tokuꞌuro hap etiat hap. Miꞌi pote Iesui toꞌe — Waku miꞌitā̃ ewetunug̃ tuereto uiminug̃ mowatetup hamuat e. (Iruka 22:19) Karāmpe ereto Iesui kuꞌuro hap kuekatup hap kape hap puo pyi etimoherep ehewaku kahato Ieuwa hawyi Iesui aikyꞌe kahato hap upi hap.
EREWANENTUP O ETIKUAP POꞌOG̃ HAMO
Etikuap hamo aikotā̃ me etimoherep poꞌog̃ kuap ehewakup kahato Ieuwa hawyi Iesui iꞌatumij̃um ahepiat hap upi hap. Iꞌewȳte etikuap hamo kat pote waku ereto tuereto Iesui kuꞌuro hap kuekatu hap kape.
3. Aikotā̃ hap koꞌi puo pyi asom watimoherep wahewaku kahato hap.
Erewanentup o kotā̃ e hap. Ereꞌãpyhyka yꞌy pe pote hawyi wentup ok tūt esāt hamo miꞌi pote neig̃ ekuꞌuro. Etiwāure merep aten iminug̃ eupiat hap sio etimoherep hamo ehewaku kahato iminug̃ upi hap.
Watoig̃neꞌen wuatꞌi eꞌāt pe kuap hamo kat pote Ieuwa tipoꞌoro tosaꞌyru pote yn. Eweimowempāp o 1 Iuwãu 4:8-10. Miꞌi hawyi apoꞌe hap koꞌi ete eiwoꞌoꞌehay.
Kat pote asom Iesui kuꞌuro hap poꞌog̃ waku torānia kai watoꞌe kuap.
Karāmpe etikuap Ieuwa hawyi Iesui iꞌatuminug̃ eupiat hap hawyi aikotā̃ erepyhuꞌat.
Aikotā̃ hap koꞌi puo pyi asom watimoherep poꞌog̃ kuap watiꞌatuewaku kahato Ieuwa hawyi Iesui ahepiat iꞌatuminug̃ hap upi. Eweimowempāp o 2 Kurintiu 5:15 hawyi 1 Iuwãu 4:11; 5:3. Wentup tewoꞌi eweimowempāp kahu hawyi eiwoꞌoꞌehay o apoꞌe hap etiat.
Mesūwat emimowempāp puo pyi aikotā̃ hap puo pyi asom watimoherep poꞌog̃ kuap watiꞌatuewaku kahato Ieuwa hawyi Iesui ahepiat iꞌatuminug̃ hap upi.
4. Etunug̃ o aikotā̃ Iesui ewy
Watimoherep kuap poꞌog̃ watiꞌatuewaku kahato hap watunug̃ aikotā̃ Iesui minug̃ ewy hap upi. Eweimowempāp o 1 Peteru 2:21. Miꞌi hawyi eiwoꞌoꞌehay o apoꞌe hap etiat.
Aikotā̃ hap koꞌi puo pyi asom etunug̃ kuap aikotā̃ Iesui minug̃ koꞌi ewy.
Iesui tikyꞌe kahato tuwemūꞌe Tupana Ehay etiat hap iꞌewȳte tohenoi Tupana Ehay piat sehay wakuat koꞌi hap etiat iꞌewȳte tohoꞌopowȳro mītꞌīn hap
5. Waku ereto Iesui kuꞌuro hap kuekatup hap kape
Iruka 22:14, 19, 20, TNM toꞌe — Miꞌi hawyi man teneg̃ totāt hawyi toipik hawyi waku e Tupana pe hawyi tutum topotmūꞌeria pe hawyi toꞌe — Mesūwat man uipīt iaꞌag̃kap ewy katupono atum hamuat ri uipīt eheupi e. Waku miꞌitā̃ ewetunug̃ tuereto uiminug̃ mowatetup hamuat e hawyi totāt vinho hawyi toꞌe — Meikowat vinho uhū iaꞌag̃kap ewy katupono uhū āt hap puo pyi mītꞌīn iꞌatu rakaria Tupana tiꞌatuꞌaira kuap tukupteꞌen atipy pe hamo e. Korā̃ eiwoꞌoꞌehay o apoꞌe hap koꞌi etiat.
Iesui topotmūꞌeria wȳwo tutunug̃ tokuꞌuro hap kuekatup nug̃ hap. Miꞌi turān kat hap eig̃ taꞌatunug̃.
Kat hap ewy eig̃ man teneg̃ hawyi vinho. — Ewetehaꞌat o pakupꞌi hag̃a hit 19 hawyi 20.
Iesui tikyꞌesat topotmūꞌeria piat tokuꞌuro hap eꞌāt turān teꞌeruwaꞌatunug̃ hap hotꞌokꞌe tuereto iꞌatuepiat hamo. Miꞌi hap toikyꞌesat taꞌatunug̃ anu upi anu upi hap. Miꞌi pote Ieuwa Ehay Enoi Haria tunug̃ wuatꞌi anu upi Iesui kuꞌuro hap kuekatup hap aikotā̃ Iesui e hap ewy. Miꞌi hap etiat etikuap poꞌog̃ hamo ewetehaꞌat pyno VÍDEO kape. Miꞌi hawyi eiwoꞌoꞌehay o apoꞌe hap etiat.
Mesūwat vídeo puo pyi aikotā̃ eig̃ Iesui kuꞌuro hap kuekatu hap tote.
Iesui kuꞌuro hap kuekatup hap tote man teneg̃ aikotā̃ Iesui pīt iaꞌag̃kap ewy ȳt iꞌaparapꞌi hap. Vinho aikotā̃ Iesui sū iaꞌag̃kap ewy.
IRANIAꞌĪN TEꞌEROꞌE Watimohey Iesui ete hawyi waku raꞌyn ahehakyeraꞌat kuap taꞌyn iꞌatuꞌe.
Miotā̃ e haria pe aikotā̃ me asom etimoherep kuap Iuwãu 3:16 hawyi Tiaku 2:24 ehenoi iꞌatuepe imohey hap kai poꞌog̃ waku watunug̃ iraniaꞌīn koꞌi hap wy.
WATUWEMŪꞌE RAꞌYN
Wahewaku Iesui minug̃ aheupi hap upi watimoherep karāmpe watimohey hete hap upi aiminug̃ koꞌi puo pyi aimiꞌaira koꞌi puo pyi iꞌewȳte wato ikuꞌuro hap kuekatup hap kape hap puo pyi.
Hotꞌokꞌe te asom
Aikotā̃ me asom watimoherep watimohey sēse pȳwo pe Iesui kuꞌuro hap ete hap.
Aikotā̃ hap puo pyi etimoherep terān etiꞌatuewaku kahato Ieuwa hawyi Iesui iꞌatuminug̃ eupiat hap upi.
Kat pote asom waku ereto waꞌatunug̃ poꞌog̃ waku torānia kawiat rakat Iesui kuꞌuro hap kuekatup hap kape.
ETIKUAP TERĀN POꞌOG̃ POTE
Karāmpe watuwanentup kahato Iesui kuꞌuro hap kape hawyi kat hag̃ watunug̃ hawyi watimoherep terān.
Iesui timowato kahato Ieuwa hap toimoherep topīt j̃um hap puo pyi (9:28)
Etikuap hamo aikotā̃ me watimoherep kuap poꞌog̃ watimohey pȳwo pe sēse hap.
Etimoherep o etimohey Ieuwa piat aru e hap koꞌi ete hap (A Sentinela, outubro de 2016)
Haryporia tikuap poꞌog̃ Iesui kuꞌuro hap etiat hawyi tuwanentup saꞌag̃ꞌi poꞌog̃ tuwetiat. Etimowempāp o popera Korā̃ uiwanentup hap ȳt ipit pitꞌi poꞌog̃ e hap.
Etimowempāp o popera Kat pote asom Iesui kuꞌuro hap kuekatup hap turān ȳt torāniaꞌi iꞌu man teneg̃ hawyi vinho e hap etiat.