WEMŪꞌE HAP 49
Aikotā̃ me asom eiwoꞌomowepīt kuap eꞌaito eharyꞌi wȳwo. — Parte 1
Karāmpe ihaig̃nia haryporia wȳwo teꞌeremenaru hawyi taꞌatukyꞌesat taꞌatuwepīt hap teꞌeremenaru hap eꞌāt pe ynꞌi maꞌato wuatꞌi eꞌāt pe hap. Miꞌi hap tuwemoherep kuap. Karāmpe Iesui mohey sēse haria teꞌeremenaru hawyi taꞌatumontypot Tupana Ehay piat woꞌonãpin hap koꞌi pote mōtꞌi kahato teꞌeremenaru hamo hap.
1. Kat e eig̃ Tupana Ehay hoꞌonãpin seꞌaitoꞌīn me.
Ieuwa tiꞌaira ihaig̃nia netap piat akag̃ wo toig̃neꞌen hamo. (Etimowempāp o Ewesu 5:23.) Toikyꞌesat seꞌaito tipowȳro kahato teharyꞌi tomempytꞌīn tomiꞌaira iꞌewȳte tominug̃ koꞌi puo pyi hap. Tupana Ehay toꞌe ihaig̃niaꞌīn pe — Etikyꞌe kahato eharyꞌi e. (Ewesu 5:25) Maꞌato kat e terān haype asom miotā̃ e. Seꞌaito woꞌopotkyꞌe sēse hat toimoherep teharyꞌi kyꞌe hap teꞌeruweran turān iꞌewȳte iraniaꞌīn wȳwo turān wy. Toikawiano toipowȳro iꞌewȳte toteropat kahato teharyꞌi yne hap ete. (1 Timoteu 5:8) Maꞌato poꞌog̃ waku torānia kai toteropat teharyꞌi Tupana montypot hap ete. (Mateu 4:4) Kotā̃ e hap. Tohentup kuap Ieuwa kape teharyꞌi wȳwo toimowempāp kuap Tupana Ehay toꞌowȳwo. Miꞌi hap koꞌi tutunug̃ teharyꞌi upi pote Ieuwa wyꞌok wo poꞌog̃ poꞌog̃ toig̃neꞌen hamo. — Etimowempāp o 1 Peteru 3:7.
2. Kat e eig̃ Tupana Ehay hoꞌonãpin seharyꞌīn me.
Tupana Ehay ti toꞌe haryporiaꞌīn me — Etimontypot kahato o eꞌaito e. (Ewesu 5:33) Aikotā̃ me asom toimoherep kuap teꞌaito montypot hap. Tomienoi koꞌi puo pyi iꞌewȳte tominug̃ koꞌi puo pyi toimoherep kuap tohewaku teꞌaito minug̃ wakuat koꞌi upi hap iꞌewȳte tohewaku kuap teꞌaito teropat hap upi iꞌewȳte iꞌatumempytꞌīn eropat hap upi wy. Toimoherep kuap teꞌaito montypot hap toipowȳro teꞌaito miꞌaira nug̃ hap ete hap upi iꞌewȳte heꞌaito ȳt Ieuwa Ehay Enoi Hatꞌi pykai maꞌato ihay iwȳwo perupꞌi popuo. Seharyꞌi timontypot teꞌaito pote ȳt karāmpe hamoꞌi ihay saꞌag̃ teꞌaito etiat iraniaꞌīn me.
3. Aikotā̃ me asom seꞌaito seharyꞌi taꞌatumoesaika kuap toꞌokyꞌe hap.
Tupana Ehay toꞌe — Ihaig̃nia toig̃neꞌen teharyꞌi wȳwo toꞌotypyꞌok pykai tukupteꞌen wentup yn naꞌyn e. (Mateu 19:5) Miꞌi pote waku seꞌaito hawyi seharyꞌi taꞌatunug̃ yne taꞌatupo putꞌokꞌe hap oktān toꞌokyꞌe hap ȳt karāmpeꞌi ikahuro hamo. Miꞌi pote waku seꞌaito seharyꞌi wuatꞌi eꞌāt pe taꞌatumoesaika toꞌokyꞌe hap ȳt karāmpeꞌi ikahuro hamo. Miꞌi hap taꞌatunug̃ karāmpe toꞌowȳwo kahato tukupteꞌen hawyi toꞌoꞌehay tuereto woꞌokyꞌe hap wȳwo taꞌatuwanentup taꞌatupyꞌa piat hap koꞌi etiat. Ȳt uweꞌi seꞌaito tikyꞌe poꞌog̃ Ieuwa kai iꞌewȳte teharyꞌi kai hawyi ȳt uweꞌi seharyꞌi tikyꞌe poꞌog̃ Ieuwa kai iꞌewȳte teꞌaito kai. Ȳt nakuꞌi seꞌaito seharyꞌi teꞌerehaꞌat iraniaꞌīn kape taꞌatukyꞌesat saꞌag̃ hap wȳwo.
EREWANENTUP O ETIKUAP POꞌOG̃ HAMO
Etikuap hamo aikotā̃ me Tupana Ehay piat woꞌonãpin hap koꞌi eiwoꞌomenaru hap powȳro kuap hap.
4. Waku seꞌaito teharyꞌi kyꞌe iꞌewȳte toteropat
Tupana Ehay ti toꞌe ihaig̃niaꞌīn me — Etikyꞌe ro eharyꞌi erekyꞌe hap ewy e. (Ewesu 5:28, 29) Maꞌato kat e terān haype asom miotā̃ e. Ewetehaꞌat pyno VÍDEO kape. Miꞌi hawyi eiwoꞌoꞌehay o apoꞌe hap etiat.
Aikotā̃ hap koꞌi puo pyi asom seꞌaito timoherep teharyꞌi kyꞌe kahato hap iꞌewȳte toteropat kahato hap.
Eweimowempāp o Korosi 3:12. Miꞌi hawyi eiwoꞌoꞌehay o apoꞌe hap etiat.
Aikotā̃ rakatno wakuap koꞌi asom seꞌaito tuwepainug̃ kuap. Iꞌewȳte aikotā̃ me asom miꞌi hap koꞌi toimoherep kuap.
5. Waku seharyꞌi teꞌaito kyꞌe iꞌewȳte toimontypot
Tupana Ehay ti toꞌe haryporiaꞌīn me — Waku etimontypot kahato eꞌaito. Maꞌato eꞌaito ȳt Iesui mohey hatꞌi pote iꞌewȳte waku etimontypot e. Eweimowempāp o 1 Peteru 3:1, 2. Miꞌi hawyi eiwoꞌoꞌehay o apoꞌe hap etiat.
Etikyꞌesat kahato eꞌaito timontypot Ieuwa hap. Maꞌato eꞌaito timontypot ite Ieuwa. Miꞌi pote kat asom waku poꞌog̃ etunug̃ etekyi eꞌaito Ieuwa montypot hap kape hamo. Ehenoi hupi teꞌi hupi teꞌi Tupana Ehay etiat sio waku poꞌog̃ perupꞌi popuo ehay iwȳwo woꞌokyꞌe hap wȳwo tuereto iꞌewȳte etimontypot miꞌi. Kat pote miotā̃ ere.
Seꞌaito seharyꞌi toꞌowȳwo taꞌatuꞌaira kuap poꞌog̃ waku rakat koꞌi hap. Maꞌato asuwe seharyꞌi wanentup hap tuweupi teꞌaito wanentup hap koꞌi kai. Miꞌitā̃ pote seharyꞌi henoi kuap tuwanentup hap koꞌi etiat teꞌaito pe maꞌato perupꞌi popuo iꞌewȳte woꞌomontypot hap wȳwo tohenoi kat pote toikuap Ieuwa tiꞌaira ihaig̃nia netap piat akag̃ wo toig̃neꞌen hamo hap hawyi waku seharyꞌi tipowȳro teꞌaito miꞌaira koꞌi hap ete. Miꞌitā̃ pote toꞌomowepīt kahato hamo taꞌatuwyriaꞌīn wȳwo. Eweimowempāp o 1 Peteru 3:3-5. Miꞌi hawyi eiwoꞌoꞌehay o apoꞌe hap etiat.
Karāmpe haryporia timontypot kahato teꞌaito pote aikotā̃ asom Ieuwa topyhuꞌat.
6. Woꞌomenaru haria tiꞌakit kuap niatpo hap koꞌi
Aj̃uwatꞌi woꞌomeraru haria hampȳk takaria. Miꞌi pote woꞌomenaru haria waku toꞌopowȳro powȳro niatpo hap koꞌi akit hamo. Ewetehaꞌat pyno VÍDEO kape. Miꞌi hawyi apoꞌe hap ete eiwoꞌoꞌehay.
Video puo pyi aikotā̃ hap puo pyi asom seꞌaito hawyi seharyꞌi taꞌatumoherep ȳt toꞌokyꞌe kahatoꞌi poꞌog̃ hap.
Maꞌato kat hap asom taꞌatunug̃ toꞌokyꞌe pakupꞌi poꞌog̃ hamo.
Eweimowempāp o 1 Kurintiu 10:24 hawyi Korosi 3:13. Wentup tewoꞌi eweimowempāp kahu hawyi eiwoꞌoꞌehay o apoꞌe hap etiat.
Aikotā̃ me asom mesūwat woꞌonãpin hap woꞌomenaru haria powȳro kuap toꞌokyꞌe hap moesaika poꞌog̃ hamo.
Tupana Ehay ti toꞌe — Waku watoꞌomontypot e. Miꞌi hap watunug̃ karāmpe watimoherep woꞌokyꞌe hap mīt upi iꞌewȳte woꞌomontypot hap. Eweimowempāp o Humanu 12:10. Miꞌi hawyi eiwoꞌoꞌehay o apoꞌe hap etiat.
Uheꞌaito ti sio uheharyꞌi ti imoherep woꞌomontypot hap ti pote yn atimoherep hamo woꞌomontypot hap iꞌatuꞌe sio waku poꞌog̃ taꞌatukat aikotā̃ me waku toꞌomontypot hamuat hap. Kat pote miotā̃ ere.
IRANIAꞌĪN TEꞌEROꞌE Saꞌawyꞌi uruimoherep kahato urutoꞌokyꞌe hap maꞌato mōtꞌi hawyi uheꞌaito uheharyꞌi wȳwo saꞌawyꞌi te wuat ewyꞌi poꞌog̃ urutukupteꞌen iꞌatuꞌe.
Aikotā̃ me asom ehenoi kuap Tupana Ehay iꞌatupowȳro kuap toꞌope tukupteꞌen waku puo pakupꞌi hamo hap etiat.
WATUWEMŪꞌE RAꞌYN
Seꞌaito hawyi seharyꞌi iꞌatuwepīt sēse kuap karāmpe taꞌatumoherep woꞌokyꞌe sēse hap toꞌomontypot hap iꞌewȳte taꞌatunug̃ aikotā̃ Tupana Ehay piat woꞌonãpin hap koꞌi ewy pote.
Hotꞌokꞌe te asom
Kat asom waku seꞌaito tunug̃ toꞌomowepīt teharyꞌi wȳwo hamo.
Kat asom waku seharyꞌi tunug̃ toꞌomowepīt teꞌaito wȳwo hamo.
Eꞌaito sio eharyꞌi raꞌyn pote kat asom epowȳro kuap Tupana Ehay piat woꞌonãpin hap eiwoꞌokyꞌe poꞌog̃ hamo.
ETIKUAP TERĀN POꞌOG̃ POTE
Etikuap hamo mowȳro hap ewepīt kuap ewyriaꞌīn wȳwo hamo hap etiat.
Erehaꞌat pyno wepȳ hap vídeo kape hawyi etikuap hamo Tupana woꞌonãpin hap woꞌomenaru haria tunug̃ mote taꞌatupoitȳro hap taꞌatusāt hamo.
Etikuap hamo kat e terān haype etimontypot o eꞌaito e hap.
Haryporiaꞌīn kat pote asom waku eweimontypot eheꞌaito eiꞌakag̃ wo. (A Sentinela, 15 de maio de 2010)
Etikuap hamo aikotā̃ me wentuk ok seꞌaito teharyꞌi wywo toꞌoꞌatoiat pykai raꞌyn taꞌatuꞌakit niatpo hap koꞌi hawyi toꞌowȳwo iraꞌyn.