WEMŪꞌE HAP 56
Etipowȳro o congregação piaria wentup ewy yn tukupteꞌen hamo
Karāmpe watoig̃neꞌen aiwyriaꞌīn Ieuwa Ehay Enoi Haria wȳwo turān aiwanentup hap aikotā̃ Morekuat Tawi wanentup hap ewy. Miotā̃ e — Pyno waku kahato ti watoig̃neꞌen woꞌoꞌewaku kahato haria wo. Miꞌitā̃ ti Tupana emītꞌīn tukupteꞌen aikotā̃ towyriaꞌīn sēse wȳwuat tokyꞌe hap ewy e. (Saumu 133:1) Maꞌato wentup ewy yn watoig̃neꞌen hap ȳt iunteꞌenꞌi tuwemoherep. Maꞌato miꞌi hap tuwemoherep watoꞌopowȳro powȳro hap upi.
1. Kat hap asom aimuehaꞌat kahato Ieuwa emītꞌīn minug̃ koꞌi hap etiat.
Erehaꞌat waꞌatunug̃ hap iraniaꞌīn ywania tote pote etikuapꞌi iꞌatupusu pykai maꞌato ereig̃neꞌen ewyriaꞌīn sēseria wȳwo hap ewy hamo raꞌyn. Kat pote asom. Kat pote mesūwat yi oktān wentup ewy yn urutemūꞌe Tupana Ehay ete iꞌewȳte popera piat koꞌi ete. Iꞌewȳte uruiꞌywoporo urutoꞌokyꞌe sēse moherep hap. Aj̃umpe neꞌi watoig̃neꞌen iꞌewȳte kat e neꞌi aipusu pykai maꞌato torānia woromohey En Tupana watoꞌe aipusu puo Tupana pe. Wentup mīt ewy yn hap ewy hap. — Sawunia 3:9.
2. Kat asom waku etunug̃ wentup yat piaria ewy yn watukupteꞌen hamo.
Waku watoꞌokyꞌe sēse aipyꞌa pyi yne ahesaika hap wȳwo. (1 Peteru 1:22) Aikotā̃ me asom miꞌi hap etunug̃ kuap. Ȳt nakuꞌi erehaꞌat yn iꞌatumiꞌaparap koꞌi kape. Maꞌato waku poꞌog̃ erehaꞌat iꞌatuminug̃ wakuat koꞌi kape. Kat hamoꞌi erewyꞌinug̃ eko kuap haria wȳwo yn. Maꞌato waku etiꞌatukuap eko kai tuweupiat rakaria erewyꞌinug̃ hamo. Iꞌewȳte toig̃ aipyꞌa pe aiwanentup uiꞌywania hawyi uheko poꞌog̃ waku irānia kai watoꞌe hap toig̃ pote waku miꞌi hap merep watihep aipyꞌa pyi. — Etimowempāp o 1 Peteru 2:17a
3. Wentup ok wȳwo eiwoꞌomompyꞌahak pote. Kan waku etunug̃.
Aitoria wentup ewy yn pykai maꞌato iꞌaparap haria. Miꞌi pote asuwe watoꞌomoꞌarōt moꞌarōt tuereto. Miꞌi pote Tupana Ehay toꞌe — Waku wāure wo o eweikupteꞌen eiwoꞌope aikotā̃ Ieuwa tiwāure ehepiat iꞌaparap tetiat hap ewy te waku ewetunug̃ wy e. (Etimowempāp o Korosi 3:13, TNM.) Karānia wo neꞌi raꞌyn watimoꞌarōt tuereto Ieuwa. Miꞌi pykai toiwāure tuereto aimiꞌaparap. Miꞌi hap ewy te toikyꞌesat watiwāure aiwyriaꞌīn miꞌaparap koꞌi hap. Etikuap iraniaꞌīn etimoꞌarōt pote ȳt katꞌeꞌi ewyꞌok pykai maꞌato waku ereto woꞌowese hap nug̃ iwȳwuat hamo. — Etimowempāp o Mateu 5:23, 24b
EREWANENTUP O ETIKUAP POꞌOG̃ HAMO
Etikuap hamo kat waku etunug̃ congregação pe wentup ewy yn eweikupteꞌen woꞌowese hap wȳwo hamo hap.
Kat hap koꞌi asom waku etunug̃ woꞌowese hap nug̃ hamo.
4. Eko kai tuweupiat rakaria o etiꞌatukyꞌe
Watiꞌatukyꞌe torānia aiwyriaꞌīn terān. Maꞌato asuwe niatpo aheko koꞌi iꞌatueko kai tuweupi pote. Maꞌato kat asom aipowȳro kuap. Eweimowempāp o Iesui Potmūꞌeria 10:34, 35. Miꞌi hawyi apoꞌe hap koꞌi ete eiwoꞌoꞌehay.
Ieuwa ȳt tiꞌairaꞌi kat ywania tomontypot hamo hap. Maꞌato toikyꞌesat torānia mītꞌīn tuweupiat rakaria tomontypot hanuaria wo hap. Aikotā̃ me asom ehaꞌag̃ kuap Ieuwa karāmpe mītꞌīn eko ȳt eko ewyꞌi tuweupi kahato turān.
Aj̃umpe eweig̃neꞌen hap tote karāmpe mīt eko tuweupi iraniaꞌīn eko koꞌi kai pote aikotā̃ saꞌag̃ hap wȳwo mītꞌīn toꞌokyryꞌi. Kat pote ȳt etunug̃ terānꞌi iꞌatuewy.
Eweimowempāp o 1 Peteru 2:17. Miꞌi hawyi eiwoꞌoꞌehay o apoꞌe hap etiat.
Kat asom waku etunug̃ mīt eko tuweupi eko kai rakat wȳwo erewyꞌinug̃ iwȳwo hamo.
5. Epyꞌa pyi o etiwāure iraniaꞌīn miꞌaparap koꞌi iꞌewȳte woꞌowese hap etunug̃
Karāmpe hamoꞌi watiwāure Ieuwa miꞌaparap upi watuꞌe hamoꞌi katupono miꞌi hampȳk kahato rakat. Maꞌato miꞌi ti iwāure aimiꞌaparap koꞌi tuereto. Eweimowempāp o Isaia 55:7. Miꞌi hawyi apoꞌe hap koꞌi ete eiwoꞌoꞌehay.
Mesūwat puo pyi Ieuwa tiwāure tuereto asom aimiꞌaparap koꞌi sio ȳtꞌi. Kat pote miotā̃ ere.
Ewepīt asom Ieuwa tiwāure emiꞌaparap koꞌi hap upi. Kat pote.
Torānia wȳwo watoꞌokꞌsatꞌi terān maꞌato kat pote asom asuwe miꞌi hap nug̃ hamo niatpo.
Aikotā̃ me asom watunug̃ kuap Ieuwa ewy aiwyriaꞌīn wȳwo wentup ewy yn watukupteꞌen hamo. Eweimowempāp o Porowepiu 19:11. Miꞌi hawyi eiwoꞌoꞌehay o apoꞌe hap etiat.
Karāmpe wentup ok emompyꞌahak sio emoꞌarōt pote. Miꞌi turān kat asom waku etunug̃ woꞌowese hap nug̃ hamo.
Asuwe aitoria watimompyꞌahak aiwyꞌokria sio watiꞌatumoꞌarōt. Miꞌi turān kat waku watunug̃. Ewetehaꞌat pyno VÍDEO kape. Miꞌi hawyi eiwoꞌoꞌehay o apoꞌe hap etiat.
Kan aiwy vídeo piat tunug̃ woꞌowese hap nug̃ hamo.
6. Erehaꞌat poꞌog̃ o ewyriaꞌīn wat wakuat koꞌi hap kape
Karāmpe aiwyꞌokria wȳwo kahato watoig̃neꞌen hawyi watiꞌatukuap poꞌog̃ iꞌatuminug̃ wakuat koꞌi iꞌewȳte iꞌatumiꞌaparap koꞌi. Maꞌato kat asom waku watunug̃ watehaꞌat poꞌog̃ aiwyriaꞌīn minug̃ wakuat koꞌi kape hamo. Ewetehaꞌat pyno VÍDEO kape. Miꞌi hawyi eiwoꞌoꞌehay o apoꞌe hap etiat.
Kan epowȳro kuap erehaꞌat poꞌog̃ ewyriaꞌīn wat wakuat koꞌi kape hamo.
Ieuwa aikuap yne aikotā̃ aipyꞌa piat hap koꞌi maꞌato tehaꞌat poꞌog̃ aiminug̃ wakuat koꞌi kape. Eweimowempāp o 2 Koronika 16:9a. Miꞌi hawyi eiwoꞌoꞌehay o apoꞌe hap etiat.
Ieuwa tehaꞌat ynꞌi wuatꞌi emiꞌaparap koꞌi kape maꞌato tehaꞌat poꞌog̃ ewat wakuat koꞌi kape. Miꞌi hap etikuap hawyi aikotā̃ erepyhuꞌat.
Nu diamante e hap kawiat imehit kahato rakat maꞌato taꞌatunug̃ hampȳkꞌi pykai maꞌato hoꞌowoity kahato. Miꞌi hap ewy torānia aiwyriaꞌīn iꞌaparap haria maꞌato Ieuwa wanentup hawe aikotā̃ nu hoꞌowoity ikahu kahato rakat hap ewy
IRANIAꞌĪN TEꞌEROꞌE Atiwāure kuap mīt miꞌaparap maꞌato miꞌi ti uiwepyiꞌi e pote yn iꞌatuꞌe.
Kat pote asom ȳt nakuꞌi miotā̃ watoꞌe watuwanentup hawe.
WATUWEMŪꞌE RAꞌYN
Etiwāure tuereto congregação piaria miꞌaparap koꞌi iꞌewȳte etimoherep woꞌokyꞌe hap torānia upi pote congregação piaria wentup ewy yn tukupteꞌen hamo.
Hotꞌokꞌe te asom
Uiꞌywania hawyi uheko poꞌog̃ waku e hap erehaꞌat toig̃ epyꞌa pe pote. Kan waku etunug̃.
Wentup ok wywo eiwoꞌomompyꞌahak pote. Kan waku etunug̃.
Ieuwa tiwāure tuereto aimiꞌaparap koꞌi. Kat pote etunug̃ terān aikotā̃ Ieuwa tunug̃ hap ewy.
ETIKUAP TERĀN POꞌOG̃ POTE
Etikuap hamo Iesui mienoi haꞌag̃kap puo pyi. Miꞌi hap aipowȳro kuap kahato ȳt watenentup saꞌag̃ꞌi iraniaꞌīn etiat hamo.
Ȳt watiꞌaparapꞌi pykai maꞌato waku asom ȳt uiwepyiꞌi watoꞌe.
Ȳt uiwepyiꞌi e hap waku kahato woꞌowese hap nug̃ hamo (A Sentinela, 1.º de novembro de 2002)
Etikuap hamo aikotā̃ me iraniaꞌīn imoherep taꞌatuhoꞌokyꞌe aikotā̃ aikotā̃ rakat koꞌi mītꞌīn hap.
Ȳt merep teiꞌo erenentup saꞌag̃ iraniaꞌīn etiat ewehaꞌat yn hap upi neꞌi (5:06)
Etikuap hamo wentup ok congregação piat wȳwo ȳt eiwoꞌoksatꞌiꞌi pote kat hap koꞌi asom waku etunug̃ woꞌowese hap wȳwo te congregação piaria tukupteꞌen hamo.
Woꞌokyꞌe hap wȳwo etunug̃ woꞌowese hap (A Sentinela, maio de 2016)
a Miwan hit 1. Woꞌokyꞌe hap aipowȳro watuwanentup aiwyriaꞌīn ehaig̃te hap kape hamo hap. Miꞌi pote aiꞌahū wesypok hap toig̃ pote waku aimitumo ȳt watiporerokosapꞌi aiwyriaꞌīn kape hamo. Erehaꞌat o wy Etikuap poꞌog̃ hamo 6 e hap kape.
b Miwan hit 2. Etikuap poꞌog̃ hamo 7 e hap tote tohenoi poꞌog̃ hamo kan waku etunug̃ ewyꞌok wo eiwuꞌuka dinheiro puo pyi sio iraniaꞌīn koꞌi ete pote hap kuap hamo.