Kat hap koꞌi asom Tupana miꞌaira Morekuat tunug̃ hamuat.

KAT KOꞌI ASOM TUPANA MIꞌAIRA MOREKUAT TUNUG̃ NAꞌYN.

Watuwemūꞌe raꞌyn Iesui mienoi koꞌi ete. Miꞌi hap puo pyi watikuap taꞌyn Iesui morekuat no raꞌyn atipy pe hap.

Tupana Ehay henoi Iesui morekuat no raꞌyn atipy pe hawyi toiꞌatuꞌokhytpug̃ha ahiag̃ hawyi teꞌahiag̃niaria wȳwo. Korā̃ miꞌiria tukupteꞌen mesūwat yi tote. Miꞌi pote anu 1914 pyi sēse raꞌyn niatpo mesūwat yi tote. —  Iesui Aru E Hap 12:7, 9.

Mesūwat yi tote niatpo kahato pykai maꞌato Iesui morekuat no raꞌyn atipy pe hap upi mītꞌīn sēse raꞌyn toiꞌatupowȳro mesūwat yi oktān. Iesui henoi uimohey sēse haria wyti aru mītꞌīn taꞌatuhoꞌomūꞌe mesūwat yi oktān e. Miꞌi hap puo pyi pyno taꞌatukuap hawyi taꞌatumontypot Tupana Ehay piat woꞌonãpin hap koꞌi hamo e. (Isaia 2:2-4) Typyꞌi kahato raꞌyn mītꞌīn tikuap Tupana Ehay puo pyi aikotā̃ me seꞌaito seharyꞌi mempytꞌīn wȳwo tukupteꞌen wepīt hap wȳwo iꞌewȳte waku puo teꞌerenentup motpap kareꞌen koꞌi etiat hap wȳwo hap. Miꞌiria tikuap korā̃ pyi ti raꞌyn aikotā̃ me tukupteꞌen kuap waku puo hap iꞌewȳte taꞌatukuap aikotā̃ rakat mīt wo tukupteꞌen kuap wuatꞌi eꞌāt pe nusuken note tukupteꞌen hamo hap.

KAT HAP KOꞌI ASOM TUPANA MIꞌAIRA MOREKUAT TUNUG̃ HAMUAT.

Iesui morekuat no raꞌyn atipy pe pykai maꞌato mesūwat yi tote mītꞌīn ne neꞌi morekuaria wo. Maꞌato Tupana toꞌe Iesui pe — Ereig̃neꞌen o morekuat no ewanig̃kaptiaria pyꞌasetpe e. (Saumu 110:2, TNM) Meij̃uran epote Iesui timomã yne hamuat raꞌyn tewanig̃kaptiaria wȳwo. Hawyi Tupana montypot taꞌatupyꞌa piat rakaria piat hoꞌopot hap koꞌi toimomā hamuat raꞌyn.

Karāmpe miꞌi hap eꞌāt putꞌokꞌe raꞌyn hawyi kat aru Tupana miꞌaira Morekuat tunug̃.

• Toiꞌatumomã hamuat religião ȳt pȳwo piatꞌi rakaria. Religião ȳt pȳwo piatꞌi rakaria taꞌatuhoꞌomosoꞌopot mītꞌīn iꞌewȳte iꞌatueso Tupana etiat. Miꞌi haria toiꞌatumomã yne hamuat. Religião ȳt pȳwo piatꞌi rakaria sēse iꞌaparap kahato. Tupana Ehay henoi miꞌiria aikotā̃ haryporia ȳt iweꞌeg̃ꞌi rakat sewaire waire nug̃ hat e. Toiꞌatumomã turān mītꞌīn gytꞌiꞌatuꞌe kahato hamo. —  Iesui Aru E Hap 17:15, 16.

• Toimomā̃ hamuat morekuaria wȳwo. Tupana miꞌaira Morekuat timoweityk yne hamuat morekuaria mesūwat yi totiaria. — Iesui Aru E Hap 19:15, 17, 18.

• Toimomā̃ hamuat ȳt nakuariaꞌi. Kat asom tutunug̃ hamuat Tupana mikyꞌesat nug̃ terānꞌi haria wȳwo. Toipuruk yne aru ȳt nakuꞌi nug̃ haria e.  —  Porowepiu 2:22.

• Toimomā̃ hamuat ahiag̃ hawyi ahiag̃niaria koꞌi wȳwo. Ahiag̃ hawyi ahiag̃niaria ȳt taꞌatuhoꞌomaꞌat kuapꞌi poꞌog̃ hamuat mesuwarotiaria mītꞌīn. —  Iesui Aru E Hap 20:3, 10.

Wakuat koꞌi wyti Tupana miꞌaira Morekuat tunug̃ hamuat tomontypot haria upi. Kat hap koꞌi asom tutunug̃ hamuat.

KAT HAP KOꞌI ASOM TUPANA MIꞌAIRA MOREKUAT TUNUG̃ HAMUAT MĪTꞌĪN UPI.

Atipy tote pyi Iesui aiporekuat no hawyi morekuaria koꞌi kai tutunug̃ poꞌog̃ hamuat wakuat koꞌi aheupi. Tupana tiꞌaira 144 miu rakaria mesūwat yi totiaria tukupteꞌen atipy pe hamo Iesui wȳwo morekuaria wo. (Iesui Aru E Hap 5:9, 10; 14:1, 3) Atunug̃ yne aru mesūwat yi tote uiꞌȳwot mikyꞌesat ewy e Iesui. Erehaꞌat pyno kat tutunug̃ hamuat hap.

• Toimomã hamuat ahū iꞌewȳte g̃uꞌuro hap. Mekewat eꞌāt pe ti aru ȳt uweꞌi poꞌog̃ uiꞌahū e. Iꞌewȳte atimomã wyti aru g̃uꞌuro hap e. —  Isaia 25:8; 33:24.

• Mītꞌīn tukupteꞌen woꞌowese sēse hap wȳwo hamuat iꞌewȳte g̃enꞌẽ hap wȳwoꞌi hamo. Eiwoꞌowese kahato hap aru eweikuap. Hawyi mītꞌīn tukupteꞌen sē kahato taꞌatuꞌyat pe iꞌewȳte uwa ypia ywytꞌokpype ȳt katꞌi mītꞌīn mokenꞌẽ hap topyhuꞌat e. — Isaia 54:13; Mikeia 4:4.

• Torānia pe toig̃ hamuat motpap waku rakat. Eipo wuat eiminug̃ koꞌi eimowepīt hap topyhuꞌat. Miꞌi hawyi ti aru eipotpap koꞌi waku pe yne eiminug̃. —  Isaia 65:22, 23.

• Toimompakup hamuat mesūwat yi. Miꞌi hawyi ti aru yahig̃ iwepīt kahato rakaria wo yne raꞌyn. Katupono ti aru itote mohyt koꞌi tuwenug̃ kahato hẽtyt ikahuria kahato raꞌyn yne. —  Isaia 35:1.

• Tohoꞌomūe hamuat mītꞌīn kat waku taꞌatunug̃ tukupteꞌen kuap wuatꞌi eꞌāt pe hamuat hap ete. En Tupana pȳwuat rakat kuap haria wo iꞌewȳte uito emipoꞌoro kuap haria wo hawyi wuatꞌi eꞌāt piat g̃upteꞌen haria wo teꞌeropyhuꞌat e. —  Iuwãu 17:3.

Tupana tikyꞌesat kahato meig̃muewuat piat epoitȳro hap etāt hap. (Isaia 48:18) Typuatꞌi página koꞌi tote tohenoi hamo kat waku etunug̃ korā̃ etāt meig̃muewuat epoitȳro hap koꞌi hamo hap.