Wentupꞌok kurum tehaꞌat mītꞌī́n putꞌokꞌe raꞌyn Ieuwa montypot yat kape

KURUM IWASURIA MAKUPTIARIA APOꞌIꞌATUꞌE

Kat pote asom waku wato waꞌatunug̃ hap Ieuwa montypot yat kape.

Ieuwa Ehay Enoi haria teꞌeruwaꞌatunug̃ tȳpy eꞌāt semana turān Ieuwa Montypot Yat puo. Moꞌopuo erewanentup — Aikotā̃ asom iꞌatuwaꞌatunug̃ hap koꞌi itote. Kat pote asom waku areto tuereto iꞌatuwaꞌatunug̃ hap koꞌi kape ere kuap.

Moꞌopuo erewanentup — Aikotā̃ asom iꞌatuwaꞌatunug̃ hap koꞌi tote ere.

Waꞌatunug̃ hap tote watuwemūꞌe hamo Tupana Ehay ete hawyi aikotā̃ Tupana Ehay aipowȳro kuap. Mesūwat waꞌatunug̃ hap tote

Eremūꞌe pȳwo e hap Tupana etiat
Etikuap hamo kan tuwemoherep korã
Waku rakatno ereig̃neꞌen hamo
Etiꞌatukuap hamo mītꞌīn woꞌokyꞌe sēse haria

Etikuap taꞌyn apo. Ieuwa montypot yat tote taꞌatuehay kahato Tupana Morekuat etiat. —Mateu 6:9, 10; 24:14; Iruka 4:43.

Kat pote asom waku areto tuereto iꞌatuwaꞌatunug̃ hap koꞌi kape ere.

Eremūꞌe hamo pȳwo e hap waku kahato. Tupana Ehay piat woꞌonãpin hap koꞌi epowȳro etikat weꞌeg̃ hap ipuenti hap kape. (Porowepiu 4:5) Tupana Ehay epowȳro kuap etiꞌaira waku rakat hamo. Toipowȳro kuap wy etikuap iwesat hap koꞌi Tupana Ehay puo pyi. Kotā̃ e hap.

Waꞌatunug̃ hap koꞌi tote watenentup hamo ihag̃niaꞌīn mienoi Tupana Ehay piat koꞌi kape.

Kat pote asom Tupana Ehay aiporereto kuap.
Aikotā̃ etipuenti kuap mowȳro hap niatpo turān.
Kat koꞌi asom Tupana Morekuat tunug̃ ahepe korã.

Wentup eꞌāt pe uiwyꞌok escola piat toto aiwaꞌatunug̃ hap kape. Taꞌapȳk pyaꞌi uiwyriaꞌīn kai hawyi uruipuru urupopera koꞌi Tupana Ehay piat tope. — Uimuehaꞌat kahato waꞌatunug̃ hap turān iꞌatuwesat hap koꞌi ete. Iꞌewȳte ȳt katꞌi popera koꞌi Tupana Ehay piat uiwat igreja pe e uiwyꞌok.—Brenda.

Etikuap taꞌyn apo. Waꞌatunug̃ hap tote Ieuwa Ehay Enoi haria ȳt hentupꞌi dinheiro mītꞌīn me.

Mītꞌīn emoesaika hamo. Tupana Ehay ainãpin watuwaꞌatunug̃ tuereto etiat — Waku watoꞌomoesaika watoꞌomowepīt e. (Epereu 10:24, 25) Ereig̃neꞌen hamo Tupana mikyꞌesat nug̃ haria wȳwo hawyi etiꞌatukuap hamo mītꞌīn woꞌokyꞌe sēse haria. Miꞌi sese waku.

Asuwe ahera kahato. Maꞌato Ieuwa montypot yat tote atipuenti mītꞌīn uimowepīt kahato haria. Miꞌi hap uimoesaika hamo niatpo turān.—Elisa.

Etikuap taꞌyn apo. Toig̃ 120 miu congregação koꞌi hawyi Ieuwa Ehay Enoi haria teꞌeruwaꞌatunug̃ 60 miu Ieuwa Montypot Yat mesūwat yi oktān. Anu upi anu upi 1500 Ieuwa Montypot Yat ipakup taꞌatunug̃.a

Kurum iwasuria makuptiaria teꞌeroꞌe

Wentupꞌok uiwyꞌok escola piat toto raꞌyn aiwaꞌatunug̃ hap kape uiwȳwo. — Torānia mītꞌīn teꞌeremūꞌe Tupana Ehay woꞌowȳwo e. Miꞌi hap ti imuehaꞌat kahato. Wentūp eꞌāt pe uhekaraiwa toto wy aiwaꞌatunug̃ hap kape. Miꞌi imuehaꞌat wy karāmpe tehaꞌat torānia mītꞌīn imowempāp Tupana Ehay. Miꞌi hap koꞌi timoesaika kahato uhepiat aiwaꞌatunug̃ hap kyꞌe hap.—Jessica.

— Waꞌatunug̃ hap uipowȳro kahato niatpo turān hawyi karāmpe uiwanentup hap kowoꞌi kowoꞌi turān. Watuwemūꞌe watoig̃neꞌen wepīt sēse hap wȳwo hawyi poꞌog̃ wakuat uiwat wakuat koꞌi hamo. Karāmpe arẽtem uiwaꞌatunug̃ hap tote pyi turān uiwepīt waku kahato.—Timothy.

— Wentūp eꞌāt pe atiweng̃ka wentūpꞌok ihag̃nia toto aiwaꞌatunug̃ hap kape hamo. Miꞌi toꞌe — Ariot atimoherep ehepe ewemohey hap sēseꞌi hamo maꞌato korā̃ atikuap ti uiwemohey hap sēseꞌi neꞌi e. Imuehaꞌat kahato Ieuwa Ehay Enoi haria wat wakuat koꞌi. — Ȳt atikuapꞌi eiwȳwo hawyi wen maꞌato eweimoherep wakuat koꞌi uiwȳwo e.—Jacob.

— Asuwe arẽtem nerān aiwaꞌatunug̃ hap tote pyi merep merep maꞌato uhehay uiwyriaꞌīn wȳwo hawyi uimikyꞌesat saꞌag̃ ikahuro. Miꞌi pote areig̃neꞌen motꞌi aiwaꞌatunug̃ hap tote hawyi miꞌi hap uipowȳro uiwyꞌokria pakup waku rakaria nug̃ hamo.—Madison.

a Site jw.org pe etipuenti kuap karāmpe hawyi aj̃umpe Ieuwa Ehay Enoi Haria waꞌatunug̃ hap mesūwat yi oktān hap.