Tupana Ehay piat woꞌonãpin hap koꞌi korā̃ te aipowȳro kuap hap
KOTĀ̃ E HAP. Ereig̃neꞌen porto tote turān erehaꞌat mutūt koꞌi kape. Iraniaꞌīn mutūt koꞌi nimuaria kahato ikahuꞌi hawyi pik pik iꞌatuꞌe raꞌyn maꞌato wentup ok hampȳk kahato ti rat. Miꞌi pote — Meij̃e waku kahato ipakup poꞌog̃ iraniaꞌīn kai ere. Maꞌato mutūt kaꞌiwat kotā̃ e — Ȳt pykaiꞌi mekewat mutūt nimuat kahato poꞌog̃ iraniaꞌīn kai iꞌewȳte ȳt uweꞌi imopakup e. Miꞌi hawyi apo ere — Maꞌato mītꞌīn tiꞌog̃ka asom mekewat mutūt ikahu toig̃neꞌen hamo ere. Mutūt kaꞌiwat tiwesat — Neig̃. Miꞌi toig̃neꞌen iꞌaman popuo hawyi sese mītꞌīn imomã terān maꞌato miꞌi iheg̃ me e. Erenentup ihay kape hawyi erewanentup hawe — Kat pote asom miꞌi tuweupi kahato iraniaꞌīn mutūt koꞌi kai ere.
Miꞌi hap ewy Tupana Ehay. Popera Tupana Ehay nimuat kahato poꞌog̃ iraniaꞌīn miwan koꞌi kai. Maꞌato toig̃ iraniaꞌīn popera koꞌi nimuaria kahato aikotā̃ Tupana Ehay ewy maꞌato meimuewaria teꞌeruweityk taꞌyn sio hampȳkꞌi poꞌog̃. Kotā̃ e hap. Iraniaꞌīn taꞌatuhenoi hampȳkꞌi ciências etiat koꞌi sio iꞌatumienoi koꞌi mohag̃ hap etiat timoꞌahū kuap mītꞌīn sio iraniaꞌīn meimuewaria popera piat koꞌi teꞌeruweityk.
Maꞌato Tupana Ehay tuweupi kahato. Miꞌi toig̃neꞌen 3.500 anu wo wen maꞌato tepiat popera ahyt teꞌeruweitykꞌi. Sese mītꞌīn timomã terān hawyi tiwuk terān Tupana Ehay maꞌato aikotā̃ me kuapꞌi iꞌewȳte tepiat woꞌonãpin hap koꞌi korā̃ te aipowȳro kuap hap. (Erehaꞌat o quadro “Desatualizada ou à frente do seu tempo?” e hap kape.)
WATIKYꞌESAT KAHATO WOꞌONÃPIN HAP KOꞌI
Asuwe erewanentup hawe — Tupana Ehay piat woꞌonãpin hap koꞌi uipowȳro kuap asom korā̃ ere. Erenentup o apo e hap kape. Aikowan niatpo hap ipoityi rakat upi watokosap korā̃. Asuwe hotꞌokꞌe wuꞌuka hap etiat sio mesūwat yi mopit pit hap etiat sio woꞌomaꞌat hap etiat. Maꞌato erehaꞌat korā̃ kan Tupana Ehay aimūꞌe hawyi apo ere ro ewepe — Mītꞌīn taꞌatumontypot Tupana piat woꞌonãpin hap koꞌi pote waku pe tukupteꞌen kuap asom.
WOꞌOWESE NUG̃ HAP ETIAT
Pyno uwe uwe ipotpap woꞌowese hap wȳwo yn miꞌiria ti Tupana iꞌatueropat kahato aikotā̃ tomempytꞌīn sese eropat hap ewy. (Mateu 5:9) Waku aito iwese rakatno. Ȳt nakuꞌi watuꞌuka iraniaꞌīn wȳwo sehay wo maꞌato woꞌokyꞌe hap yn waku watikāt. — Humanu 12:18.
HEG̃YIꞌAT HAP HAWYI WĀURE WO WATOIG̃NEꞌEN HAP ETIAT
Uwe uwe ihakyꞌeꞌi rakaria piat heg̃yiꞌat rakaria pe ti aru Tupana eg̃yiꞌat hap tūt iꞌatuewowi. (Mateu 5:7) Aikotā̃ Ieuwaa tiwāure ahepiat iꞌaparap tetiat hap ewy te waku watiwaure iraniaꞌīn piat hap aiꞌaparap hap. — Korosi 3:13.
WATIꞌATUKYꞌE TORĀNIA MĪTꞌĪN HAP ETIAT
Wentup ok mīt kaipywiat yn ni yne ywania tohytpok mesūwat yi totiaria tukupteꞌen e. (Iesui Potmūꞌeria 17:26) Taꞌi Tupana tuwehum kahato yne tama kaipywiaria tomohey haria ete. Wakuap nug̃ haria ete tuwehum. — Iesui Potmūꞌeria 10:34, 35.
WATEROHIK MESŪWAT YI HAWYI ITOTIARIA HAP ETIAT
Tupana tioto raꞌyn ihaig̃nia tomikoi ypia kape hawyi toiporokpun naꞌyn tomikoi ypia Eteĩ tote meipewat yi koi hamo iꞌewȳte iꞌapykok hamo. (Ienesi 2:15) Tupana tiꞌatuꞌapiheg̃ hamuat yi kahu hap momã haria. — Iesui Aru E Hap 11:18.
WATUWEUKAꞌI SAꞌAG̃ KOꞌI HAP ETIAT
Eiweꞌeg̃ wo meig̃muewat ehekareꞌen iwato kahato kyꞌe kahato hap upi e. Uhekat kahato terān eweikyꞌesat maꞌato eheig̃neꞌen hap sese ȳt eweikat hinꞌi hawyi ȳt eweipuentiꞌi wyti aru eweikat wuatꞌi eꞌāt piat hap e. (Iruka 12:15) Waku iharyꞌi rakaria wo watoig̃neꞌen iꞌewȳte heꞌaito kahato wo waku watoig̃neꞌen. Miꞌi pote waku hampȳk kahato watoig̃neꞌen haryporia wȳwo ihaig̃nia wȳwo iweꞌeg̃ nakat ewywuat. — Ewesu 5:3.
AIPOTPAP HAP ETIAT
Watoig̃neꞌen nerān hampȳk kahato mītꞌīn pyꞌasetpe ȳt uwe pupiatꞌi aiwemonti hap wȳwo. (Epereu 13:18) Ȳt nakuꞌi Iesui mohey hat seroꞌok e hatno topyhuꞌat. Waku aheꞌāt hakup wȳwo aipotpap āt. Miꞌi hawyi aipotpap hap saꞌup wȳwo waku ahekat. — Ewesu 4:28.
WATIPOWȲRO MĪTꞌĪN HAP ETIAT
Waku watikyꞌesat imohey hap etiat ȳt hesaikaꞌi rakat. Iꞌewȳte waku aiperupꞌi yn wuatꞌi mītꞌīn ete. (1 Tesaronika 5:14) Waku watipowȳro ȳt ityꞌi ȳt iꞌȳwotꞌi rakaria hawyi hiwuria. — Tiaku 1:27.
Pyno Tupana Ehay aimūꞌe aikotā̃ watoig̃neꞌen kuap waku pe hap. Iꞌewȳte aimūꞌe aikotā̃ watimontypot tepiat woꞌonãpin hap koꞌi hawyi aikotā̃ watunug̃ kuap aimūꞌe hap ewy. Torānia mītꞌīn taꞌatumontypot Tupana piat woꞌonãpin hap koꞌi pote waku pe watoig̃neꞌen raꞌyn hanti. Tupana piat woꞌonãpin hap koꞌi waku kahato rakaria miꞌitā̃. Maꞌato aikotā̃ meig̃ Tupana Ehay epowȳro kuap korā̃.
AIKOTĀ̃ MEIG̃ TUPANA EHAY EPOWȲRO KUAP KORĀ̃.
Wentup ihaig̃nia iweꞌeg̃ poꞌog̃ torānia ekuekawiat henoi — Mītꞌīn iꞌatuweꞌeg̃ hap kaipyi tuwemoherep iꞌatuminug̃ wakuat kaipyi e. (Mateu 11:19) Etikuap hamo Tupana Ehay piat woꞌonãpin hap koꞌi epowȳro kuap hap etimontypot mote yn. Maꞌato asuwe erenentup kuap — Tupana Ehay waku kahato pote timowaku hamo uheig̃neꞌen hap e. Maꞌato aikotā̃ meig̃ uipowȳro korā̃ atiꞌakit niatpo koꞌi hamo ere. Erehaꞌat kotā̃ e hap.
Haryporia Cláudiab e hap het rakat iwepīt kahato maꞌato iũteꞌen toweig̃neꞌen hap tuweupi kahato. Tomempyt ipakut takat ikuꞌuro heꞌaito iꞌatoiat hawyi toig̃ kahato tuweteveru hap. Miꞌi toꞌe — Uiꞌarōt kahato uipyꞌa pe katꞌi poꞌog̃ uimempyt hawyi uheꞌaito hawyi uiꞌyat e. Areineꞌen terānꞌi poꞌog̃ e.
Cláudia hotꞌokꞌe kahato Saumu 90:10 e hap etiat. Miotā̃ e mesūwat texto tote — Iraniaꞌīn toig̃neꞌen 70 anu kape. Miꞌi hawyi iraniaꞌīn 80 anu kape tukupteꞌen poꞌog̃ hesaika rakaria. Maꞌato ti ipōro tohoꞌopot wȳwo raꞌyn ipīt sero wȳwo raꞌyn. Miꞌi hawyi heig̃neꞌen hap toiꞌaipok taꞌyn aikope saꞌawyꞌi toig̃neꞌen hap kape tuweityk raꞌyn e.
Cláudia tikāt Tupana Ehay piat woꞌonãpin hap koꞌi miꞌi hawyi Tupana Ehay ipowȳro kahato. Watuwemūꞌe poꞌog̃ hamo aikotā̃ me Tupana Ehay tipowȳro wuatꞌi mītꞌīn hap etiat. Korā̃ wuatꞌi mītꞌīn ikuap Tupana Ehay tuweupi kahato iraniaꞌīn popera koꞌi kai. Iraniaꞌīn popera koꞌi ipotꞌi kahato kat hamoꞌi iꞌatumienoi koꞌi maꞌato Tupana Ehay aipowȳro kuap te. Maꞌato kat pote asom Tupana Ehay tuweupi kahato iraniaꞌīn popera koꞌi kai. Miꞌi popera Tupana kaipyi asom. — 1 Tesaronika 2:13.
Watoig̃neꞌen kurin hawyi niatpo kahato popuo. Ehoꞌopot kahato turān kat asom epowȳro hawyi emoesaika hawyi enãpin kuap.
Watuwemūꞌe hamo myẽꞌym muat etiat aikotā̃ Tupana Ehay epowȳro kuap hamo. Tupana Ehay epowȳro aikotā̃ me.
erekawiano kuap niatpo hap koꞌi pupi.
etiꞌakit kuap niatpo hap koꞌi.
waku pe ereig̃neꞌen hamo niatpo hap epyhyp kuapꞌi turān.
Miꞌi hap etiat watuwemūꞌe poꞌog̃ hamo.