Tupana Ehay piat iwesat hap koꞌi uimowepīt kahato

UIKOSAP HAP ETIAT

Aremoherep tawa Székesfehérvár Hungria piat mekewat tawa toig̃neꞌen miu anu sio poꞌog̃ raꞌyn. Arewanentup kahato aikotā̃ me Wuꞌuka Iwato Hap Typuatꞌi Rakat hoꞌomosoꞌopot kahato itotiaria.

Karāmpe uihire turān areig̃neꞌen uhehary hawyi uheaseꞌi wȳwo. Uhehatꞌat kahato iꞌatukyewi. Uhehary Elisabeth e hap het rakat uipowȳro atimoesaika uiwemohey Tupana ete hap. 3 anu areig̃neꞌen turān tohentup tuereto uiwȳwo areket eꞌyj̃an mete. Maꞌato 27 anu koꞌi hawyi yn atikuap poꞌog̃ mekewat mientup uimihuꞌat.

Uheaseꞌi hawyi uhehary uheropat kahato kat pote uity hawyi uiꞌȳwot ipotpap kahato hune pyi wantȳmꞌi kape netap kyiꞌat hamo. Uiwyriaꞌīn teꞌeruwaꞌatunug̃ wentūp eꞌāt semana upi enuk hamo. Atikyꞌe kahato uruwaꞌatunug̃ hap.

Anu 1958 pe uiꞌȳwot hawyi uity taꞌatukyiꞌat netap. Uiwepīt kahato kat pote areig̃neꞌen kuap iꞌatuwȳwo. Maꞌato 6 meses hawyi uiꞌȳwot ikuꞌuro câncer kaipyi.

Haty kahato uipyꞌa pe miꞌi pote ahentup Tupana kape — Tupana ahentup kahato etihakyeraꞌat uiꞌȳwot hamo. Kat pote asom ȳt etiwesatꞌi uimientup are. Atikuap terān kahato aikope uiꞌȳwot toig̃neꞌen sio atipy pe sio tuweityk neꞌi pote. Areig̃neꞌen nerān iraniaꞌīn hirokaria iꞌȳwotꞌīn rakaria ewy.

Uitag̃ turān areto tuereto uiꞌȳwot asȳp hap kape. Arepỹꞌãtutuk hawyi ahentup — Pyno Tupana aikope asom uiꞌȳwot toig̃neꞌen are. Ahentup Tupana kape kat pote atikuap terān kat hamo areig̃neꞌen hap.

Karāmpe areig̃neꞌen 13 anu aremūꞌe Alemão pusu. Alemão pusu toig̃ kahato popera koꞌi miꞌi tupono arewanentup atipuenti kuap iwesat hap koꞌi miꞌi koꞌi pe. Anu 1967 pe aremūꞌe tawa Iena tote Alemanha pe. Atimowempāp sēse popera Alemanha piat iwan haria minug̃ iwesat hap puenti hamo maꞌato ȳt atipuentiꞌi miꞌi pote ahentup kahato te.

AIKOTĀ̃ MEIG̃ TUPANA EHAY UIPOWȲRO.

Anu 1970 pe araꞌaipok Hungria kape miꞌi hawyi atikuap Rose miꞌi hawyi urutemenaru. Mekewat tempu turān morekuaria urumosoꞌopot miꞌi tupono uruteꞌywyk Áustria kape. Urupotpap terān itote uruteꞌywyk Austrália kape uhetitio kape hamo.

Uipotpap Áustria pe turān uiwyꞌok kotā̃ e — Etipuenti kuap iwesat hap koꞌi Tupana Ehay pe e. Tutum iraniaꞌīn popera koꞌi uhepe hawyi atimowempāp yne. Atikuap terān poꞌog̃ miꞌi pote atiwan popera koꞌi nug̃ haria kape ahentup poꞌog̃ popera koꞌi hamo.

Urutemenaru hawyi 1 anu kosap hawyi Ieuwa Ehay Enoi Hat urupiok. Toterut popera koꞌi miꞌi hawyi — Eremūꞌe terān Tupana Ehay etiat e. Aremūꞌe terān kahato miꞌi pote urutemūꞌe typȳ wo semana upi quatro horas turān.

Kat kat Ieuwa Ehay Enoi Haria uimūꞌe hap uimowepīt kahato. Tupana Ehay piat iwesat hampȳk kahato. Kotā̃ e hap. Aremūꞌe ikuꞌuro rakaria aikotā̃ teꞌeroket hap ewy. (Ekeresiasi 9:5, 10; Iuwãu 11:11-15) Aremūꞌe Nusuken etiat. Itote mītꞌīn ikuꞌuro hamoꞌi poꞌog̃. (Iesui Aru e Hap 21:3, 4) Arehaꞌat terān uiꞌȳwot kape tuwehymūt g̃uꞌuro pyi hawyi.—Iesui Potmueria 24:15.

Rose temūꞌe Tupana Ehay ete topyꞌa pyi. Urutemūꞌe popera meremo neꞌi hawyi urutuwat torānia waꞌatunug̃ hap koꞌi kape. Urumuehaꞌat kahato aikotā̃ Ieuwa. Ehay Enoi Haria tukupteꞌen toꞌowȳwo hap.—Iuwãu 13:34, 35.

Anu 1976 pe urutuwat Austrália kape. Meremo neꞌi urupuenti Ieuwa Ehay Enoi Haria. Miꞌiria uruikuap kahatoꞌi te pykai uruikyꞌe kahato. Anu 1978 pe urutuwesetꞌok.

AIKOTĀ̃ MIꞌI HAP WAKU KAHATO UHEPE:

Atipuenti raꞌyn apo e hap koꞌi etiat iwesat hap. Ieuwa ti ȳwot poꞌog̃ wakuat torānia kawiat rakat. (Tiaku 4:8) Uiwepīt kahato atipuenti kuap hamo uiꞌȳwot sēse Nusuken note hap upi.—Iuwãu 5:28, 29.

Anu 1989 pe urutaꞌaipok Hungria kape Tupana Ehay etiat enoi uiwyriaꞌīn pe hamo. Uruiꞌatumūꞌe typyꞌi kahato mītꞌīn hawyi 70 ok takaria teꞌeresetꞌok Ieuwa montypot hamo. Uity tuwesetꞌok wy.

17 anu turān ahentup Ieuwa kape iwesat hap koꞌi puenti hamo. Ieuwa uiwesat hawyi 39 anu koꞌi kosap raꞌyn. Korā̃ ahentup te — Waku sese Ieuwa uiwesat hap upi are.