Xorꞹ 1

Mizhokjimi nee kʼe ri jobi na joo ko angeze

Mizhokjimi nee kʼe ri jobi ko angeze. ¿Gi pa̱ra̱ kʼꞹ soo ri jobi ko e Mizhokjimi kʼꞹ o dyⱥtrʼⱥ yo jensʼe ñe ne xoñijomꞹ? E Abrahán kʼꞹ o mimi mi jingua mi jobi na joo ko e Mizhokjimi, akjanu go opjꞹji kja nu jñaa e Mizhokjimi (Santiago 2:23). Ne Biblia mama kʼꞹ o nga̱ra̱ bʼɇzo ñe ndinxu kʼꞹ o joji na joo ko e Mizhokjimi, angeze o unꞹ kʼo me ma joo. Yo paa kʼe ri ka̱ra̱ji dya, na punkjꞹ ntee kʼꞹ mimi kja ne xoñijomꞹ joji ko e Mizhokjimi. Xo akjatrjozge soo ri jobi ko e Mizhokjimi.

Ma ri jobi na joo ko e Mizhokjimi nu kʼo me na joo, kʼe ma ri jonkʼe na ntee kʼꞹ ri jobi. E Mizhokjimi dya ra jiezi nu kʼo joji na joo ko angeze (Hebreos 13:5, 6). Ma ri jobi na joo ko e Mizhokjimi me na joo, kʼꞹ ma ri pɇsʼi na punkjꞹ merio. Ma nrru̱ji yo ntee kʼꞹ pɇsʼi na punkjꞹ merio, nʼaño ntee nge kʼo ra ngeme ko in merio. Dya kjogꞹ akjanu yo ntee kʼꞹ joji na joo ko e Mizhokjimi, angezeji pɇsʼi da tesoro kʼe dya kjo soo ra jñumbꞹji (Mateo 6:19).

Mbuma bʼꞹbʼꞹ ntee kʼꞹ dya neji kʼꞹ ri sido ri pjechi kʼo mama Mizhokjimi. Mbuma kʼo ra xitsʼi akjanu nge in bʼedyi ñe yo ntee kʼo i̱ joji na joo (Mateo 10:36, 37). Ma kjo kʼo ra trjeñe o ra xitsʼi kʼꞹ ra tsjapkʼꞹ kʼo na sʼoo, nuʼma ri tsjatsje na trʼønꞹ: «¿Kjo nge kʼꞹ ra ⱥtⱥgo ngekʼua ra mⱥjⱥ, yo ntee o e Mizhokjimi?». Mbeñe dya na tsʼinrrame: ma na ntee ra xitsʼi ¡dya ri ñonꞹ! ¿Kjo ri tsjaa? Iyo, dya ri tsjaa yo, ma dya ri ñonꞹ ri nrru̱u̱. Xi ga kjatrjokʼua ma da ntee ra xitsʼi ¡dya ri xorꞹ ne Biblia¡ ¿Pje ri tsjaa? Ma gi nee ri mimi texe yo paa, dya ri jiezi ri xorꞹ. E Mizhokjimi soo ra tsjaa kʼꞹ ri mimi texe yo paa. Ngekʼua sido ri pjechi pje nge kʼo ri tsjaa, ngekʼua ri jobi na joo ko e Mizhokjimi (Juan 17:3).