Xorꞹ 14

Kʼo joji na joo ko e Mizhokjimi dya kjaji kʼo na sʼoo

E Satanás nee kʼe ra kjaji kʼo na sʼoo. E Jehová dya nee kʼe ra kjaji kʼo na sʼoo, ma ri nee ra joji na joo ko angeze ra jiezi kʼo na sʼoo (Romanos 12:9). Ra nuji pje nge kʼo na sʼoo kʼe dya ra kjaji yo ntee kʼo joji na joo ko e Mizhokjimi:

Bʼꞹbʼꞹ bʼɇzo kʼꞹ obʼꞹji ko yo dya ngeje nu suu, ñe nrrinxu kʼꞹ obʼꞹji ko yo dya ngeje nu xira. «Pero kʼꞹ ya chjꞹntꞹ, ni jyodʼꞹ kʼꞹ dya kjo xe ra ñeje.» (Hebreos 13:4.) Dya ga joo kʼe da bʼɇzo ñe da nrrinxu ra obʼꞹji ma dya be chjꞹntꞹbi (1 Corintios 6:18).

Yo ti̱ʼi̱. Ne Biblia mama: «Kʼo ti̱ʼi̱ [...] dya xo soo ra zⱥtʼⱥji nuja manda Mizhokjimi» (1 Corintios 6:10).

Yo potrʼꞹnte ñe yo nrrinxu kʼꞹ dya nee ra musꞹ in chʼii ga yoxkꞹ. Ne Biblia mama «dya ri potrʼꞹnteji.» (Mateo 5:21.)

Yo mbe̱ʼe̱. Ne Biblia mama. «Dya pje ri ponꞹji.» (Marcos 10:19.)

Yo mbʼechjine. E Jehová «dya xo nee kʼꞹ ra mamagoji mbʼechjine» (Proverbios 6:17).

Kʼo kjaji chu̱u̱ ñe kʼo na santeji. E Jehová me unbꞹ «kʼo jyodʼꞹ chu̱u̱» (Salmo 11:5). «Ixi ñetsʼetrjo na ntee, ma kjaa kʼua jaga netsje kʼo na sʼoo [...] ka̱ra̱ kʼo me tsʼi ni ꞹdʼꞹ» (Gálatas 5:19, 20).

Bʼꞹbʼꞹ ntee kʼe puesta ga eñeji me nee ra nrronji. «Dya ri dyokʼeji ko [...] o ma nepeji kʼo pɇsʼi nu minteji.» (1 Corintios 5:11.)

Bʼꞹbʼꞹ ntee kʼꞹ unbꞹ kʼo nʼaño ga ñaji ñe yo nrre nʼaño ntee yo ka̱ra̱ kja ne xoñijomꞹ. Ne Biblia mama: «ri sʼiyageji kʼo ra nukʼꞹji na ꞹꞹ, ri matpʼꞹji Mizhokjimi kʼo ra zankʼeji.» (Mateo 5:43, 44.)

Mizhokjimi xitsʼkʼoji pje nge kʼo ra kjaji ngekʼua ra mimi na joo. Na sezhi kʼꞹ ri jiezi kʼo dya ga joo, e Jehová ñe in nrrestigo soo ra mboxkʼꞹ, akjaba soo ri jiezi kʼo na sʼoo kʼꞹ dya nee Mizhokjimi (Isaías 48:17; 2 Corintios 4:7; Hebreos 10:24, 25).