Jelemiya

32 Yehova wendekele na Jelemiya mu mwaka wa bu 10 wa ciyulo ca Mwene Zedekiya wa Juda. Ou wapwile mwaka wa bu 18 wa ciyulo ca Nebukadineza. 2 Ha simbu ei, maswalale ba mwene wa Babiloni bazengelekele Jelusalema, co kapolofweto Jelemiya bamushokelele mu Lilapa lya Baka-kunyunga Mapanditi lije lyakele ku njibo ya mwene wa Juda. 3 Mwene Zedekiya wa Juda washokelele Jelemiya. Zedekiya wendekele ngwendi, “Bika biuli na kupolofwetela byuma bya cifwa eci? Uli na kwendeka ngwobe, ‘Yehova nendeka ngwendi: “Njana ei nganda mu maboko a mwene wa Babiloni, co aifungulula, 4 Co Mwene Zedekiya wa Juda kakasa kutewa baKaudiya mwafwa bakamwana mu maboko a mwene wa Babiloni, co akalimona nendi na kusimutwiya nendi mesho na mesho.”’ 5 ‘Akatwala Zedekiya ku Babiloni, co akakala kuje kweta noho hanjikamwena mwakumulingila,’ mukemwo mwanendeka Yehova. ‘Nameme mutwalelelaho kulwisa baKaudiya, kumwasa kubahyana.’”

6 Jelemiya wendekele ngwendi; “Yehova nanjileke ngwendi, 7 ‘Hanameu muna ndolome ya isho Shalamu aija kuli yobe na kukuleka ngwendi: “Landa lihya lyange lya ku Anatoti mwafwa yobe munu wakulibanga uli na lisesa lya kulilanda.”’”

8 Hanameu muna ndolome ya tate wezile kuli yange ngwe muje bene mwanjilekele Yehova mu lilapa lya baka-kunyunga mapanditi na kunjileka ngwendi: “Shukulu-kambu landa lihya lyange lya ku Anatoti mu lifuti lya Benjamini mwafwa yobe uli na lisesa lya kuliswana na kulilanda, lilande.” Munjazibile ngoco, njazibukile ngwange lyapwile lijwi lya Yehova.

9 Ngeci, njalandele lihya lya ku Anatoti kuli Hanameu muna ndolome ya tate. Njamuweitilile bimbongo, njamuweitilile mashekele* 7 na bimbongo bya siuva 10. 10 Co njasonekele mukanda wa lizibasano, co njawetekele na kwakaho cizibukiso na kusana bakaleho, co njaweitile bimbongo mu bipeseleso. 11 Njambatele mukanda wa lizibasano lya kulanda lihya uje unjetekele na kwakaho cizibukiso kwesekesa na mashiko. Njambatele na uje kunjetekele, uje kunjakele cizibukiso, 12 co njanene Baluki mukanda wa lizibasano lya kulanda lihya. Ou Baluki wapwile muna Nelaya, Nelaya muna Mahaseya. Njamwanenenewo ha mesho a Hanameu muna ndolome ya tate, na ha mesho a bakaleho baje basainile mukanda wa kulanda lihya, na ha mesho a baJuda baje batumamene mu Lilapa lya Baka-kunyunga Mapanditi.

13 Njashikile Baluki ha mesho abo ngwange: 14 “Yehova wa maswalale, Njambi ya Isalele nendeka ngwendi, ‘Ambata ei mikanda. Ambata mukanda wa lizibasano lya kulanda lihya uje unjineteka na kwaka cizibukiso na uje kunjetekele, uje kunjakele cizibukiso. Ya ukayake mu ndeho ya buma mangana baitulikilemo simbu yailaha.’ 15 Mwafwa Yehova wa maswalale, Njambi ya Isalele nendeka ngwendi. ‘Bakalanda lalo binjibo na libu na mahya a binyu muno mu lifuti.’”

16 Munima ya kwana mukanda wa lizibasano lya kulanda lihya kuli Baluki muna Nelaya, njalombelele kuli Yehova ngwange: 17 “Obe Mwata Wahakamwa ya Byoshe Yehova, Tala! Yobe watangele melu na lifuti-libu na liboko lyobe lya nzili lya kwolola. Kukwesi cuma cacikalu kuli yobe, 18 ukamwesa cizemo cije kucesi kutenguluka ku banu babangi, oloni ukana kashitiko ku bana mwafwa ya milonga ya baishabo, yobe Njambi wa busunga, wapwa uwakama, co lalo wakala na nzili. Lizina lyobe yobe Yehova wa maswalale. 19 Kunangula kwobe kwapwa kwakubwa manene,* co ukalingi byuma bya nzili. Mesho obe akamono bingila bya banu boshe mangana wane umo na umo kwesekesa na bingila byendi na bilinga byendi. 20 Walingile bizibukiso na bikomokeso mu lifuti lya Ijipiti bije binatwalelelaho kutsimana kweta na lelo lino, co unalingisa banu ba Isalele na banu beka bazibuke lizina lyobe ngwe mubanalizibukila lelo. 21 Watundisile banu bobe baIsalele mu lifuti lya Ijipiti na bizibukiso na bikomokeso na liboko lyobe lya nzili lya kwolola na bilinga byobe bya kuzibisa lyoba.

22 “Mu kwita kwa simbu, wabanene eli lifuti liwalisingile kwana bakukulwila babo, mu lifuti muje mwalisala mabele na buki. 23 Co bezile na kuswana eli lifuti, oloni kubononokele lijwi lyobe nambe kukabangeya mashiko obe. Kubalingile cuma coshe-coshe ciwabashikile mukemwo wabanenelele bukalu bwoshe obu. 24 Taleni! Banu baneja, co banalundula malundu akulwisila ei nganda mangana baifungulule, co baKaudiya batsiya banu ba muno mu nganda na kubafungulula. Batsa ku mukwale na ku njala yakama na ku mushongo wa kulitambwisa. Byuma byoshe biunendeka binalingiwa ngwe muuli na kumwena. 25 Oloni yobe, Mwata Wahakamwa ya Byoshe Yehova unanjileke ngwobe, ‘Ya ukalilandele lihya na bimbongo, co ya ukasane bakaleho,’ nameme ei nganda bakayana mu maboko a baKaudiya.”

26 Co Yehova walekele Jelemiya ngwendi: 27 “Yange Yehova Njambi ya banu boshe. Kuma kuli cuma cije kunjasa kulinga ndi? 28 Ngeci yange Yehova njendeka ngwange, ‘Njana ei nganda ku baKaudiya na mu liboko lya Mwene Nebukadineza wa Babiloni, co akaifungulula. 29 Co baKaudiya baje bakalwisa ei nganda, bakakobela omu mu nganda na kuishwameka tuhya na kuyenyeka. Bakenyeka na binjibo bije bili na biluli haje habakele na kwanena milambu kuli Bale na kwitila bwana bwa byakunwa ku binjambi beka mangana banjilubalese.’

30 “‘Mwafwa banu ba Isalele na banu ba Juda banalingi byuma byabibi mu mesho ange kushwa lika ku bwanike bwabo. Banu ba Isalele banatwalelelaho kunjilubalesa na byuma bibanapanga na maboko abo,’ mukemwo mwanendeka Yehova. 31 Mwafwa kutunda lika ha litangwa libatungile ei nganda kweta na lelo lino, ei nganda inanjilubalesa lika, ngeci inapande kutunda kulutwe lwange, 32 mwafwa ya byuma byabibi bibanalingi banu ba Isalele na banu ba Juda mangana banjilubalese. Bakebo na bimyene babo na bamyata babo na tupilistu babo na tupolofweto babo na banu ba mu Juda na baje bali mu Jelusalema. 33 Kubakele na kunjitala, bakele na kunjitalesa nima. Nameme njelukilile-ilukilile kubalongesa, oloni na umo wahi kuli bakebo wanjitolililile na kutambula cinangulo cange. 34 Co bakele na kwaka tumponya ba bunyengwe mu njibo ije imanena lizina lyange mangana baijwalese. 35 Co lalo batungilile Bale myela ya kulunduka mu Cingulunga ca Muna Hinomu mangana benyeke bana babo ba banalume na bana babo ba banakazi mu tuhya kupwa mulambu kuli Moleki, cuma cije kunjabashikile, cuma ca bunyengwe ngoco, cije kanda njisinganyekeho* kulinga, co balingisile Juda alinge bubi.’

36 “Ngeci Yehova Njambi ya Isalele nendeka kutalesa kuli ei nganda iuli na kwendeka ngwobe bakayana mu maboko a mwene wa Babiloni mangana ainyongese na mukwale na njala yakama na mushongo wa kulitambwisa, ngwendi, 37 ‘Co njikabakongweya kutunda mu mafuti mwoshe munjabashandwelele na butenu bwange na kulubala kwange na matoto ange akama, co njikabanena muno mu mwela na kubatabesa ngwange bakalemo mu kwoloka kwa kujeneka bushonde. 38 Bakapwa banu bange, co yange njikapwa Njambi yabo. 39 Co njikabana mbunge na ngila imo mangana simbu yoshe banjizibile lyoba mangana byuma bibendele mwamubwa hamolika na bana babo baje bakaija munima yabo. 40 Co njikalinga nabo cikumiiyo ca myaka yoshe ngwange kunjikecela kubalingila byuma byabibwa, co njikabalingisa banjizibile lyoba mu bimbunge byabo mangana keti batunde kuli yange. 41 Njikalisamba hali bakebo mangana njibalingile byuma byabibwa, co njikabalingisa batunge muno mu lifuti, njikalinga ngoco na mbunge yange yoshe na mwonyo wange woshe.’”

42 “Mwafwa Yehova nendeka ngwendi, ‘Ngecilika munjanenele bukalu bwakama hali aba banu, njikabanenela byuma byoshe byabibwa binjili na kubakulahesa. 43 Co banu bakalanda lalo mahya muno mu lifuti nameme muli na kwendeka ngweni: “Eli lifuti linabihya. Kumwesi munu nambe kasitu, co banalyana ku baKaudiya.”’

44 “‘Mahya bakawalanda na bimbongo, co mikanda ya lizibasano bakaisoneka na kuyeteka na kuyaka cizibukiso, co bakaleho bakabasana mu lifuti lya Benjamini, mu mafuti aje anazengeleka Jelusalema, mu binganda bya Juda, mu binganda bya ku minkinda, mu binganda bya ku malundu na mu binganda bya ku mbwela mwafwa njikelwisa baje banai mu bufunge baje bakele omu mu myela,’ mukemwo mwanendeka Yehova.”