Jelemiya
14 Yehova walekele Jelemiya bya lilanga ngwendi:
2 “Juda ali na kulila, mapito endi anakwayuluka.
Mapito endi ali mu libu, co anazeye,
Mu Jelusalema muli miteto.
3 Bashukulu batuma bangamba babo ku mema.
Baya ku masima, oloni kubakawana mema.
Beluka na binjaba byabo bya mupulungwa.
Baziba shwamwa, co banapaye,
Co balifwika ku mitwe.
4 Hasi hali na kutabuka myanzi,
Mwafwa mu lifuti kumwesi nyonzi,
Bandimi banazeye, co banalifwiki ku mitwe yabo.
5 Nameme mbambi mu shwata aseza munendi uje nasemuka ololo
Mwafwa kukwesi mwila.
6 Bidonki* ba mu shwata banemana ha malundu ha kujeneka byuma.
Bahekela ngwe bimbanje,
Mesho abo kuwamono mwamubwa mwafwa kukwesi bimena.
7 Nameme milonga yetu ili na kutuhisa,
Twobole obe Yehova mwafwa ya lizina lyobe.
Mwafwa bilinga byetu bya kujeneka kulongwa byabingi,
Co yobe bene itunabiisila.
8 Obe lilabelelo na mwobole wa Isalele mu simbu ya bukalu,
Bika unapwila ngwe muka-kwija mu lifuti,
Ngwe muka-kwenda uje atulilako lika homa hamo mangana alale?
9 Mwafwa bika unapu ngwe munalume uje nalikomokela,
Ngwe munalume wa nzili uje kasa kwobola?
Omwo uli mukati ketu, obe Yehova,
Co unatusanesa lizina lyobe,
Keti utumbile kuti.
10 Yehova nendeka hali aba banu ngwendi: “Bashaka manene kwendangana, kubesi kutumamesa. Ngeci, kubesi na kunjizibisa kubwaha yange Yehova. Hano njanuka milonga yabo, co njikabana kashitiko mwafwa ya bubi bwabo.”
11 Co Yehova wanjilekele ngwendi: “Keti ulombe ngwobe byuma byabibwa bilingiwe kuli aba banu. 12 Mubalibindika kulya, kunjitolilila ku malombelo abo, co bwana bwa mutunu bwa kwenyeka na bwana bwa binona bubali na kunjana kubwesi na kunjizibisa kubwaha, mwafwa njikabanyongesa na mukwale na njala yakama na mushongo wa kulitambwisa.”
13 Co njendekele ngwange: “Kekange, obe Mwata Wahakamwa ya Byoshe Yehova, kuno tupolofweto bali na kuleka banu ngwabo, ‘Wahi mukwale umumona, co kukwesi njala imizila, oloni yange Njambi njimilingisa mukale mu kwoloka kwa busunga muno mu mwela.’”
14 Yehova wanjilekele ngwendi: “Tupolofweto bali na kupolofweta bya makuli mu lizina lyange. Kunjabatumine nambe kubashika nambe kubalekako bimo. Bimona bya makuli na kuumikiya kwa kujeneka seho na makuli a mu bimbunge byabo bikebyo bibali na kupolofweta kuli yeni. 15 Ngeci yange Yehova njinendeka kutalesa kuli obo tupolofweto bali na kupolofweta mu lizina lyange, baje kunjatumine, baje bali na kwendeka ngwabo kutumono mukwale nambe njala muno mu lifuti ngwange: ‘Bakatsa ku mukwale na ku njala. 16 Co banu baje bali na kutolilila ku byuma bibali na kupolofweta bakabombangela mu bitapalo bya mu Jelusalema mwafwa ya njala na mukwale, co naumo wahi akabatsinda. Co lalo wahi akatsinda banakazi babo, bana babo ba banalume na bana babo ba banakazi mwafwa njikabana kashitiko kaje kanabapande.’
17 “Unapande kubaleka awa majwi ngwobe,
‘Misozi ingongomoke mu mesho ange butsiki na mutanya, co keti yecele,
Mwafwa bana ba banu bange banabapokola na kubatika,
Co banabulumuka manene.
18 Munjiya mu shwata,
Njimona banu babanatsii na mukwale.
Co munjija mu nganda,
Njimona mishongo ije inaija mwafwa ya njala yakama.
Tupolofweto na tupilistu banai na kuyebangela mu lifuti lije kubazibuka.’”
19 Kuma unabyanenena Juda? Kuma unazindi Siyone ndi?
Mwafwa bika unatupupu? Hano kutwasa kwola.
Twalabelelele ngwetu kukala kwoloka, oloni nabimo byabibwa binaijako byahi,
Twalabelelele ngwetu kukala kukanguka, oloni kuli lyoba.
20 Twalitabela bubi bwetu, obe Yehova
Na milonga ya bakukulwila betu,
Mwafwa tunalingi bubi kuli yobe.
21 Mwafwa ya lizina lyobe, keti utubyane,
Keti uzibile bunyengwe litanda lyobe lya bumpau.
Anuka cikumiiyo ciwalikumiiye netu, co keti ucipokole.
22 Kuma binjambi ba kujeneka seho ba baka-mafuti basa kunyokesa nyonzi ndi?
Kuma melu asa kunyokesa nyonzi akewo abenya ndi?
Yobe lika, obe Yehova Njambi yetu wasa kulinga ebi byuma?
Twakulahela lika yobe,
Mwafwa yobe lika unalingi ebi byuma.