Samu
MUKANDA WAMUCITATU
(Bisamu 73–89)
Mwaso wa Asafu
73 Cili bene Njambi wapwa wamubwa kuli Isalele, kuli baje banajele mu mbunge.
2 Ngeci mwangeni, mendi ange ashakele kupyansuka.
Bilyato byange hahandende lika ngwe byasenutukile.
3 Mwafwa njazibilile cipululu banu ba kulijundula*
Munjamwene banu bababi byuma bibendela bwino.
4 Mwafwa kubesi kuziba kubabala mubakatsi.
Mibila yabo yapwa ya kulikangula.*
5 Kubesi kuliwana na bukalu bubakaliwana nabwo bakwabo banu
Nambe kuyanda ngwe mwa bakwabo banu.
6 Ngeci kulyalesa kunapu lilyenge* lyabo lya mu singo.
Banazala bukenya ngwe cizalo.
7 Kuyoya bwino* kunalingisa na mu mesho abo mupwe mwamundondo.
Banawana byuma byabingi kutubakana bibinashungwiiye bimbunge byabo.
8 Bakashendumuna bakwabo na kwendeka byuma byabibi.
Bakajujwisa banu mu kulijundula ngwabo babalyatelela.
9 Bakalijundula mwafwa bakasinganyeka ngwabo bali helu ngwe lilu.
Bakendangana ha lifuti-libu hoshe na kwendeka mwoshe mubashakela.
10 Ngeci, banu ba Njambi bakatengulukila kuli bakebo,
Na kunwa mu mema abo amangi.
11 Bakendeka ngwabo: “Njambi azibuka bati?
Kuma Wahakamwa Manene azibuka byuma byoshe ndi?”
12 Eyo aba bakebo banu bababi babikendela mwamubwa byuma byoshe.
Bali na kutwalelelaho kubwezelela ku bufuko bwabo.
13 Cili bene njinalisini ngoco kutwalelelaho kujelesa mbunge yange
Na kujelesa maboko ange mangana keti njikale na mulonga.
14 Co njakele mu bukalu litangwa lyoshe lya mutunu.
Mutondo na mutondo Njambi wakele na kunjolola.
15 Oloni ngwe njendekele ebi byuma,
Ngwe njendele bungungu banu bobe.
16 Munjakele na kusinganyekesesa ha ñanda ei,
Njazibile kubabala ku mbunge.
17 Kubanga munjakobelele mu mwela wakama wa kujela wa Njambi,
Na kunanguka byuma bikalingiwa kuli bakebo kulutwe.
18 Cili bene unabaka ha mwela wa kuseneta.
Ubalingisa bawe mangana banyonge.
19 Banyonga bwasi-bwasi!
Kuhwa kwabo kupwa kwa kukasumuna, co lalo kwakubi manene!
20 Ngwe bilota bibakebala banu mubenduka, obe Yehova,
Nobe ubabyana* muwimana.
21 Oloni mbunge yange yalubalele,
Co bilyo byange bya mukati* byazibile manene kubabala.
22 Kunjakele na kusinganyeka mwamubwa, co njajenekele kuzibisisa.
Njafwile ngwe kasitu wa kujeneka mana mu mesho obe.
23 Oloni hano njili nobe simbu yoshe.
Unanjikwata ku liboko lyange lya cilyo.
24 Unjitwamenena muunjinangula,
Co kutundaho unjitwamenena ku bumpau.
25 Iya wa seho manene kuli yange mwilu kutubakana yobe?
Kukwesi cuma ceka cinjishungwiya hano hasi, kubanga yobe.
26 Mubila wange na mbunge yange byasa kuzeya,
Oloni Njambi ikeye limanya lya mbunge yange na mutamba wange myaka yoshe.
27 Cili bene, baje batwalelelaho kukala kulako nobe bakanyonga.
Ukanyongesa* munu woshe uje akuseza mwafwa ya kujeneka kupwa wa kulongwa kuli yobe.*
28 Oloni yange, kushwena kuyehi na Njambi cikeco cuma cacibwa kuli yange.
Njinapwisa Yehova, Mwata Wahakamwa ya Byoshe, butewelo bwange.
Mangana njambulule bipangi byendi byoshe.