Ezekiele
31 Mu mwaka wa bu 11, mu ngonde yamucitatu, ha litangwa lyakulibanga omu mu ngonde, Yehova wanjilekele lalo ngwendi: 2 “Muna munu, leka Falo mwene wa Ijipiti na mbunga yendi ngwobe,
‘Iya napu ngwe yobe ku bukama?
3 Unapu ngwe muka-Asiria, ngwe muti wa sida mu Lebanoni
Uje uli na minango yaibwa ngwe ciputa ca kuzika, co lalo waulaha,
Shongo yawo inaketa na ku mashelwa.
4 Mema amangi aulingisile ukole, tubwelubwelu twa mema twaulingisile upwe waulaha.
Bana ba bindonga bauzengelekele kuje kubaukunine,
Co tupila twabo twashangelelele miti yoshe ya mu shwata.
5 Mukemwo wapwile waulaha kutubakana miti ikwabo yoshe ya mu shwata.
Minango yawo yakama yatumine, co tuminango twayo twatundondo twakolele
Mwafwa ya mema amangi a mu bana bayo ba bindonga.
6 Tuzila boshe batungilile mashwa abo ha minango yawo yakama,
Co tusitu boshe ba mu shwata basemenene mwisi ya minango yawo,
Co mbunga yoshe ya baka-mafuti yakele mu munzinze wawo.
7 Wakupwile muti waubwa manene wa minango yailaha,
Mwafwa mizi yawo yashalabelele ku mema amangi.
8 Kukwakele muti wa sida weka wa mu lihya lya Njambi walifwile nawo.
Kukwakele muti wa junipa wakele na minango yakama ngwe yawo,
Co kukwakele muti wa puleni wakele na minango ngwe yawo.
Kukwakele muti weka wa mu lihya lya Njambi wapwile waubwa ngwe ukewo.
9 Njaupwisile waubwa, co wakele na maputa amangi,
Co miti ikwabo yoshe ya mu Edeni, mu lihya lya Njambi wa busunga yauzibilile cipululu.’
10 “Ngeci, Mwata Wahakamwa ya Byoshe Yehova nendeka ngwendi: ‘Omwo wapwile waulaha manene, co shongo yawo yaketele na ku mashelwa, co mbunge yawo yalyalesele mwafwa ya bulaha bwawo, 11 ngeci njikawana mu maboko a muka-kuyula wa nzili wa baka-mafuti. Akalimona nawo, co njikaubyana mwafwa ya bubi bwawo. 12 Co baka-kwija, kulumbununa muyati wa kukenyuka manene hakati ka baka-mafuti, bakateta uje muti, co bakauseza ha minkinda, co maputa awo akawila mu bingulunga byoshe, co minango yawo ikapokozoka na kuwila mu bana ba bindonga boshe ba muje mu lifuti. Banu ba miyati yoshe ba ha lifuti-libu bakatunda mu munzinze wawo na kuuseza. 13 Tuzila boshe bakakala ha mungowa wawo uje unau, co tusitu boshe ba mu shwata bakakala ha minango yawo ije inau. 14 Eci cinafu ngacije mangana miti yoshe ije ili kuyehi na mema keti ikole na kupwa yailaha manene nambe kukola manene kuketa na ku mashelwa, co lalo mangana miti yoshe ije ili na kutambula mema amangi keti ipwe yailaha manene na kweta ku mashelwa. Mwafwa yoshe bakainyongesa, co ikashitama mu libu hamolika na bana ba banu baje bali na kuya mu bwina.’*
15 “Mwata Wahakamwa ya Byoshe Yehova nendeka ngwendi: ‘Ha litangwa liukaya mu Cihilo,* njikalingisa banu bakale mu busiwa. Ngeci, njikazika bindonga bya kuloba na kwimika bana babyo ba bindonga mangana mema amangi ecele kwita. Njikazibalesa Lebanoni mwafwa yawo, co miti ya mu shwata yoshe ikajujwama. 16 Miyoyo ya kuwa kwa uje muti ikalingisa miyati ijaje munjikautwala mu Cihilo* hamolika na boshe baje bali na kuya mu bwina, co miti yoshe ya mu Edeni, miti ya kulitila na miti yaibwa manene ya mu Lebanoni, miti yoshe ya kushangelela mwamubwa bakaizembeleka mu libu. 17 Banai mu Cihilo* hamolika nendi, kuli baje babanatsii na mukwale hamolika na baka-kumukundwiya baje bali mukati ka baka-mafuti baje bayoyele mu munzinze wendi.’
18 “‘Miti muka ya mu Edeni yalifwile nobe ku bumpau na bukama? Oloni cili bene bakakusikumwisa mu libu hamolika na miti ya mu Edeni. Ukalala hamolika na banu ba kujeneka kuya ku mukanda, baje babanatsii na mukwale. Ebi bikalingiwa kuli Falo na mbunga yendi yoshe,’ ngwendi Mwata Wahakamwa ya Byoshe Yehova.”