Samu
Kuli muka-kutwamenena; ha Mutilabeni.* Mwaso wa Devidi.
א [Alefu]
9 Obe Yehova, njikushangazala na mbunge yange yoshe,
Njambulula bipangi byobe byoshe bya kukomokesa.
2 Njibwahelela na kulisamba mwafwa yobe,
Njimba myaso ya kushangazala lizina lyobe, obe Wahakamwa Manene.
ב [Bethi]
3 Bitozi bange mubeluka munima,
Batanuka na kunyongela halutwe lwobe.
4 Mwafwa ukanjamena, mwafwa njashaka kunjakwila mwamubwa.
Ukatumama ha litanda lyobe na kusompa mu kusungama.
ג [Gimeu]
5 Unatenukila baka-mafuti na kunyongesa banu bababi,
Unazimangana lizina lyabo myaka yoshe.
6 Citozi banamunyongesa myaka yoshe.
Unasiula binganda byabo,
Co naumo wahi akabanuka lalo.
ה [He]
7 Oloni Yehova atumama ha litanda lyendi myaka yoshe,
Nakanyamesa litanda lyendi mangana akule mwamubwa.
8 Akasompa banu ba hano hasi hoshe mu kusungama,
Akakula baka-mafuti mu kusungama.
ו [Wau]
9 Yehova apwa butewelo bwa kukola bwa baje babali na kulyatelela,
Butewelo bwa kukola ha simbu ya bukalu.
10 Baje bazibuka lizina lyobe bakukulahela.
Obe Yehova, kuukombila kuti baje bali na kukutonda-tonda.
ז [Zayini]
11 Imbeni myaso ya kushangazala Yehova uje wakala mu Siyone,
Ambululeni bilinga byendi ku miyati ya banu.
12 Mwafwa uje akalingila shambandinga maninga abo, akabanuka.
Kakebala kulila kwa baje bali na kuyanda.
ח [Hethi]
13 Obe Yehova, njizibileko ngozi. Tala mubali na kunjiyandesela baje banjizinda,
Yobe ukanjindula ku bikolo bya butsi,
14 Mangana njambulule bilinga byobe byabibwa ku bikolo bya nganda ya Siyone*
Na kubwahelela mwafwa ya bilinga byobe bya kwobola.
ט [Tethi]
15 Baka-mafuti banawila mu bwina bubanendile,
Bwanda bubanatele bunakwata mendi abo.
16 Yehova bamuzibukila ha kusompa kwendi.
Banu bababi banatsi mu muheto wa bilinga bya maboko abo.
Higayoni.* (Sela)
י [Yodi]
17 Banu bababi baya mu Cihilo,*
Baka-mafuti boshe baje bebala Njambi.
18 Oloni simbu yoshe tuhutu kubakabebala,
Co lalo lilabelelo lya banu bababotsi kulikanyongo.
כ [Kafu]
19 Katuka, obe Yehova! Keti wecelele munu akuhyane.
Baka-mafuti babasompe ku mesho obe.
20 Bajujwise, obe Yehova,
Lingisa baka-mafuti bazibuke ngwabo bapwa banu bangoco. (Sela)