Isaya
57 Munu wa kusungama nanyongo,
Oloni naumo wahi nakako mbunge.
Banu ba kulongwa banatsi,
Oloni naumo wahi nananguka ngwendi munu wa kusungama natsi
Mwafwa ya bukalu.
2 Akala mu kwoloka.
Boshe baje bakende mu kusungama, balala ha myela* yabo.
3 “Oloni yeni, shweneni muyehi,
Eni bana ba munakazi wa manseno,
Eni bana ba muka-bukoi na lihule:
4 Iya imuli na kujola?
Iya imuli na kwashamena tunwa tweni na kutuhwila bindaka byeni mangana mumushendumune?
Kuma keti mu bana ba kupokola mashiko,
Bana ba makuli,
5 Baje bali manene na lishungu mukati ka miti yakama,
Mwisi ya muti woshe waubwa,
Baje bakatsii banike mu binema,
Mu myanzi ya mu mamanya ndi?
6 Mamanya a kuseneta a mu cinema akewo mutamba wobe.
Eyo, akewo buswana bwobe.
Nawo ukawana bwana bwa byakunwa na bwana bweka.
Kuma njinapande kujauka* nebi byuma ndi?
7 Wabwahesele mwela wobe ha munkinda waulaha, wa kulunduka,
Co wakandukileho na kukana mulambu.
8 Wakele canukiso cobe kunima ya lipito na ngunzi ya cikolo.
Wanjisezele na kulishulula.
Wakandukile na kukamesa mwela wobe.
Co walingile cikumiiyo na baje bawazema.
Wazemene kulala nabo ha mwela wabo,
Co wakengele bunalume bwabo.*
9 Wasikumukile kuli Meleki* na mazi
Hamolika na mazi amangi a lwengo lwalubwa.
Watumine tutumwa bobe kulako,
Co wasikumukile mu Cihilo.*
10 Unalisini kukaba bingila byobe byabingi,
Oloni kuwendekele ngwobe, “Byangoco!’
Unawana lalo nzili.
Mukemwo kuwazeyele.*
11 Iya iwajajele na kutewa,
Uje nakulingisa ushangumuke kukwisa?
Kuwanjanukile.
Nabimo byahi biwakele mbunge.
Kuma kunjolokele kulu na kulitumamena ngoco?*
Unamwesa ngwobe kuwesi na kunjizibila lyoba.
12 Njijombolola ‘kusungama’ kwobe na bipangi byobe,
Co kubikukwasa.
13 Muutambeka kulomba bukwasi,
Tumponya baunalikungulwila kubakwamena.
Lihunzi libapekumuna boshe,
Muku ubapekumuna.
Oloni uje atewela kuli yange akaswana lifuti
Na kukala ha munkinda wange wa kujela.
14 Bakendeka ngwabo, ‘Pangeni, pangeni tapalo! Bwaheseni ngila!
Tundiseni citanwiso coshe mu ngila ya banu bange.’”
15 Mwafwa uje wapwa Wahakamwa, Wahelu,
Uje wakalako myaka yoshe, wa lizina lya kujela ngwendi:
“Njakala mu mwela wa helu, wa kujela,
Oloni njakala lalo na baje banapokoka bimbunge na kuzeya,
Mangana njikanyamese baje banazeye
Na kukanyamesa baje banapokoka bimbunge.
16 Mwafwa kunjitwalelelaho kubalwisa
Nambe kutwalelelaho kubalubalela.
Munu azeya mwafwa yange.
Byuma byoshe bya kuhwima binjinatanga bizeya.
17 Njalubalele mwafwa ya bubi bwendi bwa kushaka kuwana byuma mu linyanyamena,
Ngeci, njamupupile na kushweka cihanga cange, co njalubalele.
Oloni anga watwaleleleleho kupwa muka-kutengulukila na kukabangeya mbunge yendi.
18 Njamono bingila byendi,
Oloni njimukangwisa na kumutwamenena,
Co njimuzembeleka na kuzembeleka banu bendi baje bali mu busiwa.”
19 “Njaka majwi a kushangazala mu tunwa twa banu.
Munu uje ali kulako na uje ali muyehi, boshe batwalelelaho kukala mu kwoloka,” ngwendi Yehova.
“Co njibakangwisa.”
20 “Oloni banu bababi banapu ngwe kalunga-ndonga wa kutenuka uje kasa kwoloka,
Co mankimba endi angwanjanga mwila na kubundula mandoba.”
21 Njambi yange ngwendi, “Banu bababi kubakala mu kwoloka.”