Samu
Mwaso wa Devidi.
א [Alefu]
37 Keti ulubale mwafwa ya banu bababi
Nambe kuzibila cipululu baka-kulinga byuma byabibi.
2 Bajujwama bwasi ngwe mwila.
Balyosa ngwe mwila wa kutonola.
ב [Bethi]
3 Kulahela Yehova na kulinga byuma byabibwa.
Kala ha lifuti-libu na kulinga byuma mu kulongwa.
4 Bwahelela manene* mwafwa ya Yehova,
Co akwana biishungwiya mbunge yobe.
ג [Gimeu]
5 Kundika ngila yobe* kuli Yehova.
Mukulahele, co akukwasa.
6 Alingisa kusungama kwobe kutwe ceke ngwe kutuhuka kwa litangwa,
Na kwakula mwamubwa kwobe kutwe ceke ngwe mutanya-mwelu.
ד [Dalethi]
7 Twalelelaho kwoloka kulu ku mesho a Yehova.
Bandamena kuli ikeye na mbunge imolika.
Keti ulubale mwafwa ya munu
Uje matumbe endi amabi ali na kubwaha.
ה [He]
8 Likele kulubala, co umbila kuti kutenuka.
Keti ulubale na kulinga byuma byabibi.*
9 Mwafwa banu bababi bakabanyongesa,
Oloni baje bakulahela Yehova bakaswana lifuti-libu.
ו [Wau]
10 Kunasala lika kasimbu kakandondo, co banu bababi kubakakalako.
Ukatala haje habakele,
Oloni kuukabawanaho.
11 Oloni banu bababotsi bakaswana lifuti-libu,
Co bakabwahelela manene mwafwa bakalikuwa kwoloka kwakama.
ז [Zayini]
12 Munu wamubi atumba butumbe bwa kulwisa munu wa kusungama.
Alishuma na ku mayo mwafwa yendi.
13 Oloni Yehova amujola
Mwafwa azibuka ngwendi litangwa lya kumunyongesa lija.
ח [Hethi]
14 Banu bababi bashomona mikwale yabo na kunana* mata abo a lusipa
Mangana bandumune banu babanalyatelela, na tuhutu
Na kutsiya baje bali na kulinga byuma mu kusungama.
15 Oloni mikwale yabo itiba bimbunge byabo babenya.
Mata abo a lusipa apokoka.
ט [Tethi]
16 Byuma byabindondo bya munu wa kusungama binapu byabibwa
Kutubakana byuma byabingi bya banu babangi bababi.
17 Mwafwa maboko a banu bababi bakawapokola,
Oloni Yehova akwasa banu ba kusungama.
י [Yodi]
18 Yehova azibuka bibakaliwana nabyo banu ba kujeneka hakubapayela,
Co buswana bwabo bukalako myaka yoshe.
19 Kubakazibi shwamwa ha simbu ya bukalu.
Ha simbu ya njala yakama bakakala na byakulya byabingi.
כ [Kafu]
20 Oloni banu bababi bakanyonga.
Bitozi ba Yehova bakahwa ngwe mwila waubwa wa mu bulilo.*
Bakahwa ngwe bwisi.
ל [Lamedi]
21 Munu wamubi akolota, oloni kafwete.
Oloni munu wa kusungama wakala na ngozi, co wapwa muka-kwana.
22 Baje babanabezikisa kuli Njambi bakaswana lifuti-libu,
Oloni baje banasingi bakanyonga.
מ [Memu]
23 Nga munu ayoya mu ngila ije izibisa Yehova kubwaha,
Co Njambi atwamenena* bilinga byendi.
24 Nameme atanuka, oloni kawila hasi
Mwafwa Yehova amukwata ku liboko.*
נ [Nuni]
25 Njapwile nji mwanike, co hano njinakolo.
Oloni kanda njimoneho munu wa kusungama bamumbila kuti,
Nambe kumona bana bendi baya na kuhelyangela kuya na kutonda byakulya.*
26 Simbu yoshe wakala na ngozi ya kukolotesa bakwabo,
Co bana bendi, Njambi ababezikisa.
ס [Sameki]
27 Tunda ku byuma byabibi, linga byuma byabibwa,
Co ukalako myaka yoshe.
28 Mwafwa Yehova wazema kwakula mwamubwa,
Co kombila kuti banu bendi ba kulongwa.
ע [Ayini]
Abanyungilila simbu yoshe.
Oloni batekulwila ba banu bababi bakahwa.
29 Banu ba kusungama bakaswana lifuti-libu,
Co bakakalamo myaka yoshe.
פ [Pe]
30 Kanwa ka munu wa kusungama kana mana,
Co ndaka yendi yendeka byuma byabibwa.
31 Mashiko a Njambi yendi ali mu mbunge yendi.
Bilyato byendi kubisenutuka.
צ [Sade]
32 Munu wamubi akatalesesa munu wa kusungama
Mangana amutsiye.
33 Oloni Yehova kecelela munu wa kusungama mu liboko lya munu wamubi
Nambe kumuwana na mulonga omwo amusompa.
ק [Kofu]
34 Kulahela Yehova na kukabangeya ngila yendi.
Co akakujundula na kukulingisa uswane lifuti-libu.
Ukalimwena mubakanyongesa banu bababi.
ר [Reshi]
35 Njalimwena munu wamubi wa kukenyuka,
Byuma bimwendela mwamubwa ngwe muti wa kuzibalela uli ha libu lya bwilo.
36 Oloni watsile mu kukasumuna, co kakeleko lalo.
Njatwaleleleleho kumutonda, oloni kunjamuwanene.
ש [Sini]
37 Nanguka munu uje kesi na hakumupayela*
Na kutalesesa munu wa kusungama,
Mwafwa kulutwe akakala mu kwoloka.
38 Oloni baka-kupokola mashiko boshe bakabanyongesa.
Kulutwe, banu bababi kubakakalako.
ת [Tau]
39 Kwoboka kwa banu ba kusungama kutunda kuli Yehova.
Ikeye mwela wabo mubabanda ha simbu ya bukalu.
40 Yehova abakwasa na kubamena.
Abamena ku banu bababi na kubobola.
Mwafwa banatewela kuli ikeye.