Samu
96 Imbileni Yehova mwaso wauha.
Imbileni Yehova yeni boshe mwatunga ha lifuti-libu.
2 Imbileni Yehova. Shangazaleni lizina lyendi.
Ambululeni muzimbu waubwa wa kwobola kwendi, litangwa na litangwa.
3 Ambululeni bumpau bwendi mukati ka baka-mafuti.
Ambululeni bipangi byendi bya kukomokesa mukati ka miyati ya banu boshe.
4 Yehova wapwa wakama, co ikeye ibanapande kushangazala manene.
Wapwa wa kutewesa manene kutubakana binjambi boshe.
5 Binjambi boshe ba miyati ya banu bapwa bangoco.
Oloni Yehova ikeye watangele melu.
6 Bukama* na bulemu bili ku mesho endi.
Nzili na bubwa bili mu mwela wendi wa kujela.
7 Aneni Yehova binamupande, eni binaanga bya miyati ya banu.
Aneni Yehova binamupande mwafwa ya bumpau bwendi na nzili yendi.
8 Aneni Yehova bumpau bunapande lizina lyendi.
Neneni bwana na kukobela mu malapa endi.
9 Tsikameneni* Yehova na bizalo bya kujela.*
Jajeni kulutwe lwendi yeni boshe mwatunga ha lifuti-libu.
10 Ambululeni mukati ka baka-mafuti ngweni: “Yehova napu Mwene!
Lifuti-libu nalizameka, kulyasa kushwena.
Akasompa* miyati yoshe ya banu mwamubwa.”
11 Melu abwahelele na lifuti-libu lilisambe.
Kalunga-ndonga atambeke mu kubwahelela na byoshe byakalamo.
12 Mahya na byoshe byakalamo bibwahelele.
Co lalo miti ya mu shwata yoshe itambeke mu kubwahelela
13 Ku mesho a Yehova, mwafwa ali na kwija,*
Ali na kwija na kusompa lifuti-libu.
Akasompa banu ba ha lifuti-libu mu kusungama
Na miyati ya banu mu kulongwa kwendi.