Jelemiya
3 Banu bakehula ngwabo: “Nga munalume asheka munakazi wendi, co uje munakazi akashomboka kuli munalume weka, kuma uje munalume napande kwiluka lalo kuli uje munakazi ndi?”
Kuma kubajwalesele lije lifuti ndi?
“Unalingi buhule na banalume babangi,
Co hano ushaka kwilukoni kuli yange ndi?” mukemwo mwanendeka Yehova.
2 “Andula mesho obe utale ku malundu.
Kuli nawa kwasha kubakupikilile?
Wakele na kutumama ku bitapalo na kubandamena banalume,
Ngwe muka-kujalozoka* mu mambo.
Uli na kutwalelelaho kujwalesa lifuti
Na buhule bwobe na bubi bwobe.
3 Mukemwo kukukala nyonzi ya busuku mbundu,
Co lalo kukukala nyonzi ya mamaneselelo.
Kuwesi na shwamwa ngwe munakazi wa kushomboka uje ali na kulinga buhule,
Kuwesi na shwamwa.
4 Oloni hano uli na kutambeka kuli yange ngwobe,
‘Tate, yobe kabusamba kange kutunda ku bwanike bwange!
5 Kuma unapande kulubala myaka yoshe
Nambe kutwalelelaho kukala na nkulundundu ndi?’
Ebi bikebyo biukendeka,
Oloni uli na kutwalelelaho kulinga byuma byoshe byabibi mwoshe muwasela.”
6 Mu matangwa a mwene Josiya, Yehova wanjilekele ngwendi: “Kuma unamono kujeneka kulongwa kwa Isalele ndi? Nai ku minkinda yoshe na mwisi ya miti yoshe, kukalingilako buhule. 7 Nameme munima ya kulinga ebi byuma byoshe njatwaleleleleho kumuleka ngwange eluke kuli yange, oloni kelukile, co Juda wakele na kulimwena ndokazi yendi wa kuka. 8 Munjamwene ebi, njashekele Isalele wa kujeneka kulongwa na kumwana mukanda wa kutsiya bulo mwafwa ya bukoi bwendi. Oloni ndokazi yendi Juda wa kuka kazibile lyoba, nendi waile na kulinga buhule. 9 Kamwene buhule bwendi kupwa cuma cacibi, co watwaleleleleho kujwalesa lifuti na kulinga bukoi ha kulemesa mamanya na biti. 10 Nameme ebi byuma byoshe byalingiwile, ndokazi yendi Juda wa kuka kelukile kuli yange na mbunge yendi yoshe. Walikwisile lika ngoco,’ mukemwo mwanendeka Yehova.”
11 Co Yehova wanjilekele ngwendi: “Isalele wa kujeneka kulongwa, napuko wa kusungama kutubakana Juda wa kuka. 12 Ya ukendeke awa majwi ku kunto* ngwobe:
“‘“Iluka obe Isalele muka-kutengulukila,” mukemwo mwanendeka Yehova.’ “Kunjakukulubalela mwafwa nji wa kulongwa,” mukemwo mwanendeka Yehova.’ “Kunjilubala myaka yoshe. 13 Litabele lika mulonga wobe mwafwa unatengulukila Yehova Njambi yobe. Watwaleleleleho kukabangeya banu beka* mwisi ya miti yoshe yaibwa, oloni kuwakele na kwononoka lijwi lyange,” mukemwo mwanendeka Yehova.’”
14 “Ilukeni eni bana baka-kutengulukila,” mukemwo mwanendeka Yehova. “Mwafwa yange shukulu* yeni wa busunga. Mu nganda na nganda njikambatamo umo, mu naanga na naanga njikambatamo babali, co njikamyambata na kumitwala ku Siyone. 15 Co njikamyana tunyungi baje bakalingi byuma mwaya mbunge yange, co bakamilisa kuzibisisa na mangana. 16 Mu matangwa owo, mukapwa mubabangi na kutuma mu lifuti,” mukemwo mwanendeka Yehova. “Naumo wahi akendeka bya cikasha ca cikumiiyo ca Yehova. Kubakacisinganyeka mu bimbunge byabo nambe kucanuka nambe kucitonda, co kubakacipanga lalo. 17 Ha simbu oyo, bakasana Jelusalema ngwabo litanda lya Yehova, co miyati yoshe bakaikungulwila hamo mangana ikashangazale lizina lya Yehova ku Jelusalema, co kubakatindibala lalo na kukabangeya bimbunge byabo byabibi.”
18 “Mu matangwa owo, bakenda hamolika, bakunjibo ya Juda hamolika na bakunjibo ya Isalele, co bakaija hamo kutunda ku lifuti lya ku kunto* na kwija mu lifuti lije linjanene bakukulwila babo kupwa buswana. 19 Njakele na kusinganyeka ngwange njikamyaka hakati ka bana ba banu na kumyana lifuti lyalibwa, buswana bwabubwa manene hakati ka mafuti. Njakele na kusinganyeka lalo ngwange mukanjisana ngweni, ‘Tate!’ co lalo ngwange kumukanjiseze. 20 ‘Cili bene ngwe munakazi wa kujeneka kulongwa mwakaseze munalume wendi, neni nawa bakunjibo ya Isalele mukemwo mumunanjilingi. Kumwapwile ba kulongwa kuli yange,’ mukemwo mwanendeka Yehova.”
21 Ha malundu hali na kuzibika majwi
A kulila na kulambelela kwa banu ba Isalele
Mwafwa banahengesa ngila yabo,
Banebala Yehova Njambi yabo.
22 “Ilukeni eni bana baka-kutengulukila.
Njakukangwisa bimbunge byeni bya kutengulukila.”
Cili bene tukendeka ngwetu: “Yetu bano! Tunaija kuli yobe
Mwafwa yobe Yehova yobe Njambi yetu.
23 Cili bene twalikwisile yetu babenya mutwakele na kulinga bilika bya kalwa bya kulemesa binjambi beka ha malundu na ha minkinda.
Cili bene Yehova Njambi yetu yobe mwobole wa Isalele.
24 Oloni cuma ca shwamwa* cinali bibanondangana bakukulwila betu kushwa ku bwanike bwetu,
Cinali matanga abo a bimanga na bimembe na matanga abo a bingombe
Na bana babo ba banalume na bana babo ba banakazi.
25 Tuyeni tulale mwafwa ya shwamwa,
Co shwamwa yetu itulye,
Mwafwa tunalingi bubi kuli Yehova Njambi yetu,
Yetu na bakukulwila betu kushwa ku bwanike bwetu kweta na lelo lino,
Co kutwononokele lijwi lya Yehova Njambi yetu.