Jelemiya
13 Yehova wanjilekele ngwendi: “Ya ukalande mwiba wa lineni na kulikutawo mu mbunda, oloni keti uumbwateke mu mema.” 2 Ngeci njalandele mwiba ngwe mwanjilekelele Yehova na kulikutawo mu mbunda. 3 Co Yehova wendekele nange lwamucibali ngwendi: 4 “Ambata mwiba uje uunalandele uje uunakutu mu mbunda yobe, co katuka uye ku Ndonga ya Yufreti ukaushweke mu limanya.” 5 Ngeci njakaushwekele ku Ndonga ya Yufreti ngwe mwanjishikilile Yehova.
6 Oloni munima ya matangwa amangi, Yehova wanjilekele ngwendi: “Katuka, ya ku Ndonga ya Yufreti ukambate uje mwiba unjakulekele ngwange ukaushwekeko.” 7 Ngeci njaile ku Ndonga ya Yufreti na kutundisa uje mwiba mu mwela munjaushwekele, co njamwene ngwange uje mwiba wabihile, co wapwile wangoco.
8 Co Yehova wanjilekele ngwendi: 9 “Yange Yehova njinendeka ngwange, ‘Njikamanesa kulijundula kwa Juda na kulijundula kwakama kwa Jelusalema ngwe muunabihila ou mwiba. 10 Aba banu bababi baje bali na kubyana kwononoka majwi ange, baje banatindibala na kukabangeya bimbunge byabo, co lalo bali na kukabangeya binjambi beka na kubapangela na kubatsikamena, bakapwa ngwe ou mwiba wangoco.’ 11 Yehova nendeka ngwendi: ‘Banu bakunjibo ya Isalele na banu bakunjibo ya Juda njabalingisile banjikwate ngwe mwiba muukakwata mu mbunda mangana bapwe banu bange, na lutsimo lwange, na kupwa banu baje banjishangazala, na kupwa cuma cacibwa. Oloni kubanjononokele.’
12 “Co unapande kukabaleka lalo ngwobe, ‘Yehova Njambi ya Isalele nendeka ngwendi: “Shuliseni njaba yoshe yakama na binyu.”’ Co bakakukumbulula ngwabo, ‘Kuma kutuzibuka ngwetu tunapande kushulisa njaba yoshe yakama na binyu ndi?’ 13 Co ukabaleke ngwobe, ‘Yehova nendeka ngwendi: “Njipendesa boshe bali muno mu lifuti na bimyene baje bali ha litanda lya Devidi na tupilistu na tupolofweto na boshe baje bali mu Jelusalema. 14 Co njikabalingisa balitike umo na mukwabo, bisemi ba banalume na bana babo ba banalume. Kunjikabazibila mema ku mbunge nambe kuziba busiwa nambe kubazibila ngozi. Nacimo cahi cikanjonowesa kubanyongesa,”’ mukemwo mwanendeka Yehova.
15 Tolilileni mwamubwa.
Keti mulijundule, mwafwa Yehova ikeye nendekamo.
16 Aneni Yehova Njambi yeni bumpau
Simbu kanda anene lisusulungu
Simbu kanda mendi eni atanuke ha minkinda mangwezi.
Mukashungwiya kumona ceke,
Oloni akanena lisusulungu lya lyakama.
Akalingisa ceke cipwe lisusulungu lyakama.
17 Nga mubyana kutolilila,
Njikalilila ku bushweke mwafwa ya kulijundula kweni.
Njikalila manene, co mesho ange akatuhula misozi yaingi
Mwafwa butanga bwa Yehova banabwambata na kubutwala mu bufunge.
18 Leka mwene na ina ngwobe, ‘Tundeni mu bitwamo byeni bya bulemu,
Mwafwa bilongo byeni byabibwa bikawa ku mitwe yeni.’
19 Bikolo bya binganda bya ku mbwela* banabishoko, co naumo wahi abishokolola.
Banu boshe mu Juda banabatwala mu bufunge, boshe banai mu bufunge.
20 Anduleni mesho eni, co taleni baje bali na kutunda ku kunto.*
Butanga bweni bwa bimanga bababwa baje babamyanene buli kuli?
21 Ukendeka bika kashitiko mukakaija
Kutunda ku banu baje bawamwene ngwobe babusamba bobe ba ha mbunge?
Kuma kuukazibi kubabala ngwe kubabala kwakazibi munakazi uje ali na kupapa ndi?
22 Co muulihula mu mbunge yobe ngwobe, ‘Mwafwa bika ebi byuma binanjizila?’
Milonga yobe yakama ikeyo inalingisa bakushulule bifunga byobe
Co mansinsinye obe ali na kuziba manene kubabala.
23 Kuma kaKushi* asa kutengulula mubala wa cikanda cendi ndi? Kuma ingwe asa kutundisa mapwata-mapwata endi ndi?
Nga mukemwo, co neni mwasa kulinga byabibwa,
Yeni babanalongesa kulinga byabibi.
24 Ngeci njikamishandola ngwe bishati bije bipekumuka na lihunzi lya mu mambo.
25 Yehova nendeka ngwendi: “Ebi bikebyo bikalingiwa kuli yobe. Ou ukewo mutamba unjinakwana,
Mwafwa unanjibala, co unakulahela makuli.
26 Njikakukambula bifunga byobe na kukufwikabyo ku mesho,
Co bushwamwa bwobe bukasholoka ku banu,
27 Bukoi bwobe na lishungu lyobe lyakama lya kushaka kulilala,
Na buhule bwobe buje buzibisa bunyengwe, nabyo bikasholoka.
Njinamono bilinga byobe bya bunyengwe,
Ha malundu na mu shwata.
Unabindama obe Jelusalema!
Wambata simbu ya kupwa hali oku unapu wa kujwala?”