Samu
Kuli muka-kutwamenena. Mwaso wa Devidi.
41 Nabwahelela munu uje aka mbunge munu wa kwisi.
Yehova akamwamena ha litangwa lya bukalu.
2 Yehova amunyunga na kumulingisa atwaleleleho kuyoya.
Banu boshe mu lifuti bakamwendeka ngwabo wapwa wa kubwahelela.
Kuukamwaka mu maboko a bitozi bendi.
3 Yehova akamukwasa ha mwela wendi hali na kubinjila.
Ha simbu yabinja ukamunyunga.
4 Mwafwa njendekele ngwange: “Obe Yehova, njizibileko ngozi.
Njikangwise* mwafwa njinalingi bubi ku mesho obe.”
5 Oloni bitozi bange bali na kwendeka byabibi hali yange ngwabo:
“Atsa tangwa lika mangana lizina lyendi lizimangane?”
6 Nga umo wabo aija na kunjimona, endeka majwi a kunjikwata-kwata lika ha mesho.
Akungulula biñanda bya makuli,
Co mwaya, aya na kubishandola.
7 Boshe baje banjizinda baliyebetela umo na mukwabo.
Batumba butumbe bwa kunjilinga mwamubi ngwabo:
8 “Cuma cacibi manene cinalingiwa kuli ikeye,
Co mwanau ngacije kemana lalo.”
9 Nameme munu uje injakele nendi mu kwoloka, injakulahelele,
Uje wakele na kulya byakulya byange nanjitengulukila.
10 Oloni yobe, obe Yehova, njizibile ngozi, njikatule
Mangana njibane kashitiko mwafwa ya byuma bibanalingi.
11 Nga bitozi bange kubanjihyana,
Co njizibuka ngwange njakuzibisa kubwaha.
12 Oloni yange unanjikwasa mwafwa ya kulongwa kwange.
Unjishaka myaka yoshe.
13 Yehova Njambi ya Isalele bamushangazale
Myaka yoshe.*
Ameni, Ameni.