Jelemiya
25 Njambi walekele Jelemiya majwi a kutalesa ku banu boshe ba Juda mu mwaka wamuciwana wa ciyulo ca Jehoyakimu muna Josiya, mwene wa Juda. Co ou wapwile mwaka wakulibanga wa ciyulo ca Mwene Nebukadineza* wa Babiloni. 2 Kapolofweto Jelemiya wendekele kutalesa ku banu boshe ba mu Juda na banu boshe ba mu Jelusalema ngwendi:
3 “Kutunda mu mwaka wa bu 13 wa ciyulo ca Josiya muna Amoni, mwene wa Juda, kweta na lelo lino, mu myaka yoshe ei 23, Yehova nakala na kunjileka majwi endi, co njakele na kwilukila-ilukila kumilekawo,* oloni kumwatolililile. 4 Co Yehova watumine bangamba bendi tupolofweto kuli yeni. Welukilile-ilukilile kubatuma, oloni kumwatolililile nameme kujendeka litwi lyeni mangana muzibe. 5 Bakele na kumileka ngwabo, ‘Njilomba umo na umo weni aseze bingila byendi byabibi na bilinga byendi byabibi mangana mukale simbu yailaha mu lifuti lije lyamyanene Yehova na bakukulwila beni kusañulu. 6 Keti mukabangeye binjambi beka na kubapangela na kubatsikamena na kunjilubalesa na byuma bimunapanga na maboko eni, keti ngoconi njiminenela bukalu.’
7 “Oloni Yehova nendeka ngwendi, ‘Kumwanjitolililile, munanjilubalesa na byuma bimunapanga na maboko eni, co munalinenela bukalu yeni babenya.’
8 “Mukemwo Yehova wa maswalale nendeka ngwendi, ‘“Omwo kumwononokele majwi ange, 9 njisana binaanga byoshe bya ku kunto,”* mukemwo mwanendeka Yehova, “njisana na ngamba yange Mwene Nebukadineza* wa Babiloni, co njikabanena bakulwise lino lifuti na boshe baje balimo na kulwisa mafuti oshe aje analizengeleka, co njikabanyongesa na kubapwisa cuma ca kukomokesa na cuma cibakumbila banu milozi na ngundu ya myaka na myaka. 10 Njikamanesa miyoyo ya kulisamba na miyoyo ya kubwahelela. Kubakazibi lalo lijwi lya cambato na lijwi lya shombolwa nambe kuziba cilumo ca limanya lya kulolela bunga nambe kumona ceke. 11 Co eli lifuti lyoshe bakalinyongesa na kulipwisa ngundu, co likapwa cuma ca kukomokesa, co awa mafuti akapangela mwene wa Babiloni ha myaka 70.”’
12 “‘Oloni myaka 70 muikahwa, njikana kashitiko mwene wa Babiloni na uje muyati mwafwa ya bubi bwabo,’ mukemwo mwanendeka Yehova, ‘co njikabiisa lifuti lya baKaudiya na kulipwisa ngundu myaka yoshe. 13 Co majwi oshe anjinendeka kutalesa kuli lije lifuti njikawashulisilila. Njikashulisilila byoshe bibanasoneka omu mu libulu byanapolofweta Jelemiya kutalesa ku miyati yoshe. 14 Mwafwa miyati yaingi na bimyene bakama bakabapwisa bindungo, co njikabelwisila bubi bwabo kwesekesa na bilinga byabo na bipangi bya maboko abo.’”
15 Mwafwa Yehova Njambi ya Isalele nanjileke ngwendi: “Ambata ei nganja ya binyu bya butenu mu liboko lyange, co ya ukainwise miyati yoshe kunjikutuma. 16 Co bakainwa na kutalyangela na kulinga ngwe banu ba kuzaluka mwafwa ya mukwale unjibatumina.”
17 Co njambatele ije nganja mu liboko lya Yehova na kukainwisa miyati yoshe kwanjitumine Yehova, 18 kushangumukila na Jelusalema na binganda bya Juda na bimyene bendi na bamyata bendi, mangana babanyongese na kubapwisa cuma ca kukomokesa, cuma cibakumbila banu milozi na cisingo ngwe mukunapu bene lelo. 19 Co akatako Falo mwene wa Ijipiti na bangamba bendi na bamyata bendi na banu bendi boshe, 20 na mbunga yabo yoshe ya banu ba kuliseza-seza, bimyene boshe ba ku lifuti lya Uzi na bimyene boshe ba ku lifuti lya Filistiya, ku Ashikeloni, ku Gaza, ku Ekroni na baje banasala mu Ashidodi, 21 na baEdomu na baMowabi na baAmoni, 22 na bimyene boshe ba mu Tile na bimyene boshe ba mu Sidoni na bimyene ba ha liñanda lili mu kalunga-ndonga, 23 na baDedani na baTema na baBuza na boshe baje banakamba binkambu bya ha mbakatwi,* 24 na bimyene boshe ba baArabia na bimyene boshe ba mbunga ya banu ba kuliseza-seza baje bakala mu mambo, 25 na bimyene boshe ba baZimulai na bimyene boshe ba baElamu na bimyene boshe ba baMede, 26 na bimyene boshe ba ku kunto* baje bakala hayehi, na baje bakala kulako, bakalikabasana umo na mukwabo, na bumwene bukwabo bwoshe bwa ha lifuti-libu, co mwene wa Sheshaki* ikeye akapwa wamamaneselelo kuinwa.
27 “Co unapande kubaleka ngwobe, ‘Yehova wa maswalale, Njambi ya Isalele nendeka ngwendi: “Nweni mupende na kulishanjangela. Wileni hasi, co keti mwinduke, mwafwa njimitumina mukwale.”’ 28 Co nga babyana kwambata nganja mu liboko lyobe na kunwa, baleke ngwobe, ‘Yehova wa maswalale nendeka ngwendi: “Munapande kuinwa. 29 Mwafwa nga njishangumukila kunena bukalu ha nganda ije imanena lizina lyange, kuma yeni kunjimyana kashitiko ndi?”’
“‘Kunjikamiseze ngoco kwa kujeneka kumyana kashitiko, mwafwa njikatuma mukwale ku banu boshe bakala ha lifuti-libu,’ mukemwo mwanendeka Yehova wa maswalale.
30 “Co unapande kupolofweta awa majwi oshe kuli bakebo na kubaleka ngwobe,
‘Yehova akabuluma kutunda mwilu,
Co akalingisa lijwi lyendi balizibe kutundilila mu mwela wendi wa kujela.
Akabulumina mwela wendi wa hasi mu kutambeka.
Akatambeka ngwe baje bali na kutika binyu mu citikilo ca binyu,
Akemba mu kubwahelela mwafwa ya kufungulula boshe baje bakala ha lifuti-libu.’
31 ‘Miyoyo ikaya na ku mamaneselelo a lifuti-libu,
Mwafwa yange Yehova njili na kusompa na baka-mafuti.
Yange bene njikasompa banu boshe.
Njikatsiya baka-bubi na mukwale,’ mukemwo mwanendeka Yehova.
32 Yehova wa maswalale nendeka ngwendi:
‘Taleni! Bukalu buli na kujalakana kutunda ku muyati ou kuya ku muyati ukwabo,
Co lihunzi lyakama likahuwa kutunda ku mitambela ya kulako ya lifuti-libu.
33 “‘Co baje baakatsiya Yehova ha litangwa lije bakalundama ha lifuti-libu kushangumukila kushongo imo ya lifuti-libu kuketa na kushongo ikwabo ya lifuti-libu. Kubakabalili nambe kubakungulula nambe kubatsinda. Bakapwa ngwe bwilo ha lifuti-libu.’
34 Mbolozokeni na kulila eni tunyungi.
Lyandazekeni eni ba bulemu hakati ka butanga
Mwafwa simbu ya kumitsiya na kumishandola inaija,
Co mukawa ngwe njaba ya buma ya seho.
35 Tunyungi kubesi noku kwa kutewela,
Co baje ba bulemu hakati ka butanga kwahi kubatewela.
36 Tolilileni miteto ya tunyungi,
Zibeni mubali na kumbolozoka baje ba bulemu hakati ka butanga,
Mwafwa Yehova ali na kubiisa bulilo bwabo.
37 Co myela muje mubakele mu kwoloka banaibiisa
Mwafwa ya butenu bwa Yehova buje buli na kushukuma.
38 Naseze mwela wendi ngwe muna ndumba,
Omwo lifuti lyabo linapu cuma ca kukomokesa
Mwafwa ya mukwale ubanapangesa mu kukenyuka,
Co lalo mwafwa ya butenu bwendi buje buli na kushukuma.”