Samu
Kuli muka-kutwamenena. Cilumo ca mwaso cibasana ngwabo “Bintemo.” Mwaso wa bana ba Kola. Masikiu.* Mwaso wa cizemo.
45 Mbunge yange inashulu byuma byabibwa.
Njendeka ngwange: “Mwaso wange wendeka bya mwene.”
Ndaka yange ipwe ngwe cisonekeso* ca muka-kusononona* wa mutongwe.
2 Yobe wamubwa manene mukati ka bana ba banu.
Mu kanwa kobe mukatundu majwi amabwa.
Mukemwo Njambi nakubezikisa myaka yoshe.
3 Shwelela mukwale wobe ha mbunda yobe, obe muka-nzili,
Mu bumpau bwobe na bulemu bwobe.
4 Ya na bulemu bwobe, co uhyane.
Londa kabalu kobe mangana ulwile banu ba kulikehesa na kulwila busunga na kusungama,
Co liboko lyobe lya cilyo likalinga byuma bya kukomokesa.
5 Mikili yobe yabambuka, co ikalindumuna banu ha mesho obe.
Ikatubu bimbunge bya bitozi ba mwene.
6 Njambi ikeye litanda lyobe myaka yoshe.
Mulamu wa bumwene bwobe unapu mulamu wa kusungama.*
7 Wazemene kusungama, co wazindile byuma byabibi.
Mukemwo Njambi, Njambi yobe nakubwabesa mazi na kukulingisa ubwahelele manene kutubakana babusamba bobe.
8 Bizalo byobe byoshe bili na lwengo lwa mira na aloi na kashia.
Myaso ya ha bisanzi bya mikole ibali na kwimba ku lipela libanataleka na mambinga a binjamba ili na kukuzibisa kubwaha.
9 Bana ba banakazi ba bimyene bali hakati ka banakazi ba bulemu ba mu lipela lyobe.
Lishano nemana ku liboko lyobe lya cilyo, nazala bizalo bya goldi ya ku Ofiya.
10 Tolilila, Obe munange wa munakazi. Tolilila mwamubwa na kujendeka litwi lyobe.
Ibala banu bobe na njibo ya isho.
11 Co mwene ashungwiya bubwa bwobe
Mwafwa ikeye mwata wobe.
Ngeci mutsikamene.
12 Mwana wa munakazi wa ku Tile akaija na bwana.
Baka-kufuka manene bakashakezeka ngozi yobe.
13 Mukati ka lipela* muna mwene wa munakazi napu wamubwa manene.
Bizalo byendi binapu bya goldi.
14 Bamunena kuli mwene oku nazala bizalo bya kutonga mwamubwa.
Babusamba bendi ba bambanda baje kanda balilaleho laja na banalume, baje bali na kumukaba munima babanena ku mesho obe.
15 Bakabanena mu kulisamba na kubwahelela.
Bakakobela mu lipela lya mwene.
16 Bana bobe ba banalume bakainga mu mwela wa bakukulwila bobe.
Ukabangula kupwa bamyata ha lifuti-libu hoshe.
17 Njikalingisa lizina lyobe balizibuke ku bisemwa byoshe bije bija kulutwe.
Mukemwo miyati ya banu bakakushangazala myaka yoshe.