Samu
106 Shangazaleni Jah!*
Kandeleleni Yehova mwafwa wapwa wamubwa,
Cizemo cendi cije kucesi kutenguluka cakalako myaka yoshe.
2 Iya asa kwambulula mu kushula bilinga bya Yehova bya nzili
Nambe kwambulula bilinga byendi byoshe bije bibanapande kushangazala?
3 Banabwahelela baje bakakula mwamubwa,
Baje bakalingi byuma bya kusungama simbu yoshe.
4 Njanuke, obe Yehova, muuzibila ngozi banu bobe.
Njinyunge na bilinga byobe bya kwobola
5 Mangana njilikuwe bubwa bwobe buumwesa baje baunangula,
Mangana njibwahelele hamo na banu bobe,
Njilishashe mwafwa yobe* hamo na buswana bwobe.
6 Tunalingi bubi ngwe mubalingile bakukulwila betu,
Tunabulumuna, tunalingi byuma byabibi.
7 Bakukulwila betu mubakele mu Ijipiti kubakandelelele ku* bipangi byobe bya kukomokesa.
Kubanukile cizemo cobe cakama cije kucesi kutenguluka.
Oloni bakutengulukilile ku kalunga-ndonga, ku Kalunga-ndonga wa Kubenga.
8 Nameme ngoco, wabobwele mwafwa ya lizina lyendi,
Mangana nzili yendi baizibuke.
9 Watenukilile Kalunga-ndonga wa Kubenga, co womine cau.
Wabetisile ha masima a kalunga-ndonga ngwe baje baita mu mambo.
10 Wabobwele mu liboko lya citozi cabo
Na kubapatula mu liboko lya citozi.
11 Mema angumbwile bitozi babo,
Naumo wahi wobokele.*
12 Ngeci, bakulahelele cikulaheso cendi,
Bashangumukile kwimba myaso ya kumushangazala.
13 Oloni bebalele bwasi byalingile,
Kubabandamenene cinangulo cendi.
14 Bakabangeyeye mashungu abo mu mambo,
Besekele Njambi mu mambo.
15 Wabanene bibalombele.
Oloni wabanene mushongo uje wabazeyesele na kubatsiya.
16 Mubakele mu cilombo, bazibilile Mosesa cipululu
Na Aloni, wakujela wa Yehova.
17 Lifuti-libu lyashamene na kulehula Dathani,
Co lyafwikile baje balikungulwile hamo na Abilamu.
18 Tuhya twepukile mukati ka cibunga cabo.
Mulangi wa tuhya watsiile banu bababi.
19 Bamungile muna ngombe mu Holebu
Na kutsikamena kamponya wa cikubo.
20 Banene bumpau bwange
Ku kamponya wa ngombe wa nkomba wa kulya mwila.
21 Bebalele Njambi, Mwobole wabo,
Uje walingile byuma byakama mu Ijipiti,
22 Uje wapangele bipangi bya kukomokesa mu lifuti lya Hamu
Na bilinga bije bizibisa lyoba ku Kalunga-ndonga wa Kubenga.
23 Washakele kubanyongesa,
Oloni Mosesa uje yangwile wamulambelelele
Mangana emike butenu bwendi buje bunyongesa.
24 Bombwanesele lifuti lyalibwa.
Kubakele na likulahelo mu cikulaheso cendi.
25 Batwaleleleleho kutatoka mu bitenti byabo,
Kubatolilile ku lijwi lya Yehova.
26 Ngeci, wemikile liboko lyendi na kulisinga hali bakebo
Ngwendi abanyongesela mu mambo.
27 Wakele na kulingisa batekulwila babo banyongele mukati ka baka-mafuti
Na kubashandwela mu mafuti eka.
29 Bamulubalesele na bilinga byabo,
Co wabanenelele mushongo wa kulitambwisa.
30 Oloni Finihasi mwakatukile na kulingako bimo,
Uje mushongo wemanene.
31 Ngeci, bamumwene ngwabo wa kusungama
Mu bisemwa byoshe, myaka yoshe.
32 Balubalesele Njambi ku mema a ku Meliba,*
Co byuma kubyendelele bwino Mosesa mwafwa yabo.
33 Bamulubalesele,
Co wendekele mu kulupwozoka.
34 Kubanyongesele miyati ya banu
Ngwe mwabashikilile Yehova.
35 Oloni balikumbasanene na baka-mafuti
Na kutembwinina bilinga byabo.
36 Batwaleleleleho kupangela tumponya babo,
Co ou wapwile muheto kuli bakebo.
37 Bakele na kwana bana babo ba banalume
Na bana babo ba banakazi ku badimona kupwa mulambu.
38 Batwaleleleleho kwitila maninga a kujeneka mulonga,
Maninga a bana babo ba banalume na ba banakazi
Baje babanene kupwa mulambu ku tumponya ba mu Kanana.
Co lifuti lyoshe lyajwalele mwafwa ya maninga abetilile.
39 Bajwalele mwafwa ya bipangi byabo.
Balingile buhule bwa ku sipilitu mwafwa ya bilinga byabo.
40 Ngeci, butenu bwa Yehova bwepukilile banu bendi,
Wazibilile bunyengwe buswana bwendi.
41 Welukilile-ilukilile kubana mu maboko a baka-mafuti,
Mangana baje babazinda babayule.
42 Bitozi babo babalyatelelele,
Co bakele na kubendesa.
43 Bisimbu byabingi wakele na kubamena,
Oloni bakele na kumutengulukila na kujeneka kumwononoka.
Co bakele na kubakehesa mwafwa ya milonga yabo.
44 Oloni wakele na kumona bukalu bwabo
Na kuziba kulila kwabo kwa kulomba bukwasi.
45 Wakele na kwanuka cikumiiyo cendi mwafwa yabo,
Co cizemo cendi cakama cije kucesi kutenguluka cakele na kumulingisa abazibile ngozi.*
46 Wakele na kulingisa boshe baje banabatwala mu bundungo
Babazibile ngozi.
47 Twobole, obe Yehova Njambi yetu,
Na kutukungulula kutunda ku mafuti eka
Mangana tushangazale lizina lyobe lya kujela
Na kukushangazala mu kulisamba.
48 Yehova Njambi ya Isalele bamushangazale
Myaka yoshe.*
Co banu boshe bendeke ngwabo: “Ameni!”*
Shangazaleni Jah!*