Ezekiele
28 Yehova wanjilekele lalo ngwendi: 2 “Muna munu, leka ntwama ya Tile ngwobe, ‘Mwata Wahakamwa ya Byoshe Yehova nendeka ngwendi:
“Mbunge yobe muinashangumuka kulyalesa uli na kwendeka ngwobe, ‘Nji njambi.
Njakala ha litanda lya njambi hakati ka kalunga-ndonga.’
Oloni u munu lika, keti u njambi,
Nameme mu mbunge yobe uli na kuliziba ngwobe u njambi.
3 Tala! Uli na kusinganyeka ngwobe uli na mana kutubakana Daniele.
Co lalo uli na kusinganyeka ngwobe kukwesi mahungu abasa kukushwekela.
4 Unalikungulwila bufuko bwabwingi mwafwa ya mana obe na kunanguka kwobe,
Co uli na kulikungulwila goudi na siuva mu myela yobe ya kutulikila byuma bya seho.
5 Butongwe bwobe mu kulinga mingoso bwakunenelele bufuko bwabwingi,
Co mbunge yobe yalyalesele mwafwa ya bufuko bwobe.”’
6 “‘Ngeci, Mwata Wahakamwa ya Byoshe Yehova nendeka ngwendi:
“Omwo uli na kuliziba ngwobe u njambi mu mbunge yobe,
7 Njikunenela banu ba ku mafuti eka baje bwapwa ba kukenyuka manene mukati ka baka-mafuti mangana bakukulwise,
Bakashomona mikwale yabo na kubiisa byuma byabibwa biwawanene mwafwa ya mana obe.
Co bakajwalesa bumpau bwobe.
8 Bakakusikumwisa mu cihilo,
Co ukatsa mwamubi hakati ka kalunga-ndonga.
9 Kuma anga ukendeka ngwobe, ‘Nji njambi’ kuli uje akukutsiya ndi?
Kuukapu njambi, oloni ukapwa munu lika mu maboko a baje bali na kukujwalesa.”’
10 ‘Banu ba ku mafuti eka bakakutsiya ngwe munu wa kujeneka kuya ku mukanda,
Mwafwa yange babenya njinendeka,’ ngwendi Mwata Wahakamwa ya Byoshe Yehova.”
11 Yehova wanjilekele lalo ngwendi: 12 “Muna munu, imba mwaso wa busiwa kutalesa kuli mwene wa Tile, co muleke ngwobe, ‘Mwata Wahakamwa ya Byoshe Yehova nendeka ngwendi:
“Wapwile cakumwenako ca byuma bya kulumbunuka,
Co wakele na mana amangi, co lalo wapwile u wamubwa manene.
13 Wakele mu Edeni mu lihya lya Njambi.
Bakucakeyeye mamanya oshe a seho,
Bakucakeyeye mamanya a rubi na topazi na jasipa; na krisoliti na onikisi na jedi; na safaya na takoizi na emarodi.
Co bikwatelo byawo babipangele na goudi.
Babibwahesele ha litangwa libakutangele.
14 Njakwangwile kupwa kerubi wa kubwabesa, muka-kunyungilila.
Wakele ha munkinda wa kujela wa Njambi, co wakele na kwendangana mu mamanya a tuhya.
15 Kushwa ha litangwa libakutangele kuwakele na mulonga mu bingila byobe
Kubanga muwashangumukile kulinga byuma bya kujeneka kusungama.
16 Wakele na kulinga manene mingoso,
Mukemwo muli yobe mwashulile lwozi, co washangumukile kulinga bubi.
Ngeci njikakutundisa ha lilundu lya Njambi na kukunyongesa mwafwa unapu wa kujwala,
Kuukende lalo mukati ka mamanya a tuhya, obe kerubi muka-kunyungilila.
17 Washangumukile kulyalesa mwafwa ya bubwa bwobe.
Wabiisile mana obe mwafwa ya bumpau bwobe.
Njikakumbila hasi.
Njikakulingisa upwe cuma cibakayongola bimyene.
18 Unajwalesa myela yobe ya kujela mwafwa ya milonga yobe yakama na mingoso yobe ya linyanyamena.
Njikashwameka tuhya mukati kobe, co tukakwenyeka.
Co ukapwa lito ha lifuti-libu kulutwe lwa baje bali na kukutala.
19 Banu boshe ba ku mafuti eka baje bakuzibukile bakakutala oku banalikomokela.
Mamaneselelo obe akaija mu kukasumuna, co lalo akapwa amabi manene,
Co ukaziluka ku myaka yoshe.”’”
20 Co Yehova wanjilekele lalo ngwendi: 21 “Muna munu tala ku Sidoni, co polofweta byuma bikalingiwa kuli ikeye. 22 Unapande kwendeka ngwobe, ‘Mwata Wahakamwa ya Byoshe Yehova nendeka ngwendi:
“Hano njinapu citozi cobe obe Sidoni, co bakanjishangazala mukati kobe.
Co banu bakazibuka ngwabo yange Yehova munjikakusompa na kumwesa ngwange nji wa kujela.
23 Njikakutumina mushongo wa kulitambwisa, co maninga akangongomoka mu bitapalo byobe.
Mukwale muukaija kuli yobe kutunda ku mitambela yoshe, banu bakandumukila mukati kobe,
Co bakazibuka ngwabo yange Yehova.
24 “‘“Co bakunjibo ya Isalele kubakakala lalo mukati ka mambimbo na mingonga, kulumbununa banu baje baka-kubashendumuna, co banu bakazibuka ngwabo yange Mwata Wahakamwa ya Byoshe Yehova.”’
25 “‘Mwata Wahakamwa ya Byoshe Yehova nendeka ngwendi: “Munjikakungulula lalo bakunjibo ya Isalele kubatundisa mukati ka baka-mafuti muje mubashandokelele, njikalingisa baka-mafuti bazibuke ngwabo njapwa Njambi wa kujela. Co bakunjibo ya Isalele bakakala mu lifuti lyabo lije linjanene ngamba yange Jakobu. 26 Bakakala muje mu lifuti kwa kujeneka bushonde, co bakatunga binjibo na kukuna mahya a binyu, co bakakala mwamubwa kwa kujeneka bushonde munjikasompa boshe baje banabazengeleka, baje bali na kubashendumuna, co bakazibuka ngwabo yange Yehova Njambi yabo.”’”