Jelemiya
23 “Banabindama tunyungi baje bali na kunyongesa bimanga ba mu bulilo bwange na kubashandola,” mukemwo mwanendeka Yehova.
2 Ngeci, ebi bikebyo byali na kwendeka Yehova Njambi ya Isalele kuli tunyungi baje bali na kunyunga banu bendi, ngwendi: “Munashandola bimanga bange, munatwalelelaho kubashandangana, co kumwabakele mbunge.”
“Ngeci nange kunjimyaka mbunge mwafwa ya bilinga byeni byabibi,” mukemwo mwanendeka Yehova.
3 “Co bimanga bange baje banasalako njikabakungulula kutunda ku myela yoshe ije injabashandwelele na kubelwisa mu bulilo bwabo, co bakasemunwina na kutuma. 4 Co njikabangwila tunyungi baje bakabanyunga mwamubwa. Kubakazibi lalo lyoba nambe kutewa, co naumo wahi akazimbala,” mukemwo mwanendeka Yehova.
5 Yehova nendeka ngwendi: “Taleni! Matangwa ali na kwija omwo njikangula swana* wa kusungama, wa ku naanga ya Devidi. Akapwa mwene, co akayula. Akakala na mana, co akakula mwamubwa na kulinga byuma bya kusungama mu lifuti. 6 Mu matangwa endi, Juda bakamwobola, co Isalele akakala mu kwoloka. Co bakamutumbula ngwabo: Yehova Ikeye Kusungama Kwetu.”
7 “Oloni matangwa ali na kwija,” mukemwo mwanendeka Yehova, “omwo kubakendeka lalo ngwabo, ‘Njilisinga hali Yehova wa kuyoya uje watundisile banu ba Isalele mu lifuti lya Ijipiti,’ 8 oloni bakendeka ngwabo, ‘Njilisinga hali Yehova wa kuyoya uje watundisile batekulwila ba banu ba Isalele mu lifuti lya ku kunto* na mu mafuti oshe mwabashandwelele na kubelwisa mu lifuti lyabo,’ co bakakala mu lifuti lyabo.”
9 Kutalesa ku tupolofweto:
Mbunge yange inapokoka.
Bitsiya byange byoshe bili na kujaja.
Njinapu ngwe munu uje napende,
Njinapu ngwe munu uje napende binyu,
Mwafwa ya Yehova na majwi endi a kujela.
10 Mu lifuti munashulu baka-bukoi.
Mu lifuti muli busiwa, mwafwa banalisingi,
Co bulilo bwa mu mambo bunomu.
Yoyesi yabo inapu yaibi, co bali na kupangesa mwamubi nzili yabo.
11 “Tupolofweto na tupilistu boshe banajwale.
Nameme bene mu njibo yange njinawanamo bubi bwabo,” mukemwo mwanendeka Yehova.
12 “Ngeci bingila byabo bikaseneta na kukala na lisusulungu.
Bakabanakula, co bakawa.
Mwafwa njikabanenela bukalu
Mu mwaka unjikabana kashitiko,” mukemwo mwanendeka Yehova.
13 “Co njinamono byuma bije bizibisa bunyengwe ku tupolofweto ba mu Samaliya.
Bali na kupolofweta mu lizina lya Bale,
Co bali na kungumuna banu bange baIsalele.
14 Njili na kumona byuma byabibi manene ku tupolofweto ba mu Jelusalema.
Bali na kulinga bukoi, co lalo baka-makuli.
Bali na kukundwiya* baka-kulinga byuma byabibi,
Kubesi na kwecela bilinga byabo byabibi.
Kuli yange banapu lika ngwe Sodoma,
Co banu bakalamo banapu lika ngwe Gomola.”
15 Ngeci Yehova wa maswalale ali na kwendeka ku tupolofweto ngwendi:
“Njibalisa cimena ca kulula,
Co njibana mema a bushungu mangana banwe.
Mwafwa tupolofweto ba mu Jelusalema banajalakanesa kutengulukila mu lifuti lyoshe.”
16 Yehova wa maswalale nendeka ngwendi:
“Keti mutolilile ku majwi a tupolofweto baje bali na kupolofweta kuli yeni.
Bali na kumikwisa.
Bimona bibali na kumileka bya kulisinganyekela lika,
Kubitundu mu kanwa kange Yehova.
17 Bali na kwilukila-ilukila kuleka baje kubesi na kunjisingimika ngwabo,
‘Yehova nendeka ngwendi: “Mulikuwa kukala mu kwoloka.”’
Co lalo bali na kuleka baje banatindibala, baje bali na kukaba bimbunge byabo ngwabo,
‘Kukwesi bukalu bumizila.’
18 Mwafwa iya nemana mukati ka banu baje bakala muyehi na Yehova
Mangana amone na kuziba lijwi lyendi?
Iya naka mbunge ku lijwi lyendi mangana alizibe?
19 Taleni! Lihunzi lyakama lya Yehova likahuwa mu kutenuka,
Likahuwila ha mitwe ya baka-bubi ngwe kankumba kakama.
20 Butenu bwa Yehova kubukahu
Kubanga noho nalingi byuma byanayongola mu mbunge yendi na kubishulisilila.
Mukazibisisa mwamubwa eci cuma mu matangwa a mamaneselelo.
21 Kunjatumine tupolofweto, oloni bashatukile na kuya.
Kunjendekele nabo, oloni bapolofwetele.
22 Ngwe bemanene mukati ka banu baje bakala kuyehi nange,
Ngwe banalingisa banu bange bazibe majwi ange,
Co lalo ngwe banabalingisa batunde mu bingila byabo byabibi na kuseza bilinga byabo byabibi.”
23 Yehova nendeka ngwendi: “Kuma nji Njambi lika nga njili muyehi, oloni nga njili kulako, co keti nji Njambi ndi?
24 Kuma kuli mwela wasa kulishweka munu kuje kunjasa kumumona ndi?” mukemwo mwanendeka Yehova.
“Kuma kuli cuma cili mwilu nambe cili hano hasi cije kunjasa kumona ndi?” mukemwo mwanendeka Yehova.
25 “Njinazibi tupolofweto baje bali na kupolofweta biñanda bya makuli mu lizina lyange ngwabo, ‘Njinaloto. Njinaloto.’ 26 Aba tupolofweto bambata simbu ya kupwa hali oku bapolofweta biñanda bya makuli bya mu bimbunge byabo? Bakapolofweta biñanda bya makuli bya mu bimbunge byabo. 27 Bali na biyongola bya kulingisa banu bange bebale lizina lyange ha kulileka bilota, ngwe baishabo mubalemesele Bale na kwibala lizina lyange. 28 Kapolofweto uje naloto endeke cilota cendi, oloni uje ali na lijwi lyange, napande kwendeka lijwi lyange mu busunga.”
Yehova nendeka ngwendi: “Cishati califwila hali na nona?”
29 Yehova nendeka ngwendi: “Kuma lijwi lyange kulyafwile lika ngwe tuhya, nambe ngwe sando ije ibakatabwisa mamanya ndi?”
30 Yehova nendeka ngwendi: “Njana kashitiko ku tupolofweto baje bali na kwiba majwi ange ku bakwabo tupolofweto na kuwatengulula.”
31 Yehova nendeka ngwendi: “Njana kashitiko ku tupolofweto baje bali na kupangesa bindaka byabo mu kwendeka ngwabo, ‘Njambi nendeka ngwendi.’”
32 Yehova nendeka ngwendi: “Njana kashitiko ku tupolofweto baje bali na kwendeka bilota bya makuli na kungumuna banu bange mwafwa ya makuli abo na kulishasha kwabo.”
“Oloni yange kunjabatumine nambe kubashika. Ngeci, kubakwasa aba banu nambe kamandondo,” mukemwo mwanendeka Yehova.
33 “Co nga aba banu nambe kapolofweto nambe kapilistu bakwihula ngwabo, ‘Citele* ca Yehova capwa cika?’ unapande kubakumbulula ngwobe, ‘“Yeni banu yeni citele, co njikamyumbila kuti,” mukemwo mwanendeka Yehova.’ 34 Oloni nga kapolofweto nambe kapilistu nambe banu bendeka ngwabo, ‘Eci cikeco citele* ca Yehova,’ co njikana kashitiko owo munu na bakunjibo yendi. 35 Umo na umo weni ali na kwihula mukwabo na kwihula lalo ndolome yendi ngwendi, ‘Yehova nakumbulula bika? Yehova nendeka bika?’ 36 Oloni kumwapandele kwendeka lalo bya citele* ca Yehova, mwafwa eci citele* cinapu majwi a umo na umo weni, co munatengulula majwi a Njambi wa kuyoya, Yehova wa maswalale, Njambi yetu.
37 “Ya ukehule aba tupolofweto ngwobe, ‘Yehova namikumbulula ngwendi bati? Yehova nendeka ngwendi bati? 38 Oloni nga mutwalelelaho kwendeka ngweni, “Eci cikeco citele* ca Yehova,” Yehova nendeka ngwendi: “Mwafwa muli na kwendeka ngweni, ‘Awa majwi anapu citele* ca Yehova,’ munima ya kumileka ngwange, ‘Kumwapandele kwendeka ngweni: “Eci cikeco citele ca Yehova,”’ 39 taleni! Njikamijundula na kumyumbila kuti mangana mutunde ku mesho ange, njikamyumbilila kumo nei nganda injamyanene hamolika na bakukulwila beni. 40 Co njikamipayesa na kumizibisa shwamwa myaka yoshe ije kubakebala banu.”’”