Samu
118 Kandeleleni Yehova mwafwa wapwa wamubwa.
Cizemo cendi cije kucesi kutenguluka cakalako myaka yoshe.
2 Isalele endeke ngwendi:
“Cizemo cendi cije kucesi kutenguluka cakalako myaka yoshe.”
3 Bakunjibo ya Aloni bendeke ngwabo:
“Cizemo cendi cije kucesi kutenguluka cakalako myaka yoshe.”
4 Baje bakazibila Yehova lyoba bendeke ngwabo:
“Cizemo cendi cije kucesi kutenguluka cakalako myaka yoshe.”
5 Njatambekele kuli Jah mu bukalu bwange,
Co Jah* wanjikumbulwile na kunjinena mu mwela wa kujeneka bushonde.
6 Yehova ali ku mutamba wange, kunjizibi lyoba.
Munu asa kunjilinga bikajo?
7 Yehova ali ku mutamba wange kupwa mukwasi wange.*
Njikatala baje banjizinda mubabafungulula.
8 Kwakubwa kutewela kuli Yehova
Kutubakana kukulahela banu.
9 Kwakubwa kutewela kuli Yehova
Kutubakana kukulahela bamyata.
10 Baka-mafuti boshe banjizengelekele,
Oloni mu lizina lya Yehova,
Njabanakwile.
11 Banjizengelekele, eyo banjishetwile,
Oloni mu lizina lya Yehova,
Njabanakwile.
12 Banjijemukilile ngwe bimuka,
Oloni bazimine bwasi-bwasi ngwe tuhya twa mu mingonga.
Mu lizina lya Yehova,
Njabanakwile.
13 Banjinakwile* manene mangana njiwe,
Oloni Yehova wanjikwasele.
14 Jah ikeye nzili yange na mwela wange wa kubanda,
Co napu kwoboka kwange.
15 Cilumo ca kubwahelela neci ca kwoboka*
Cili mu bitenti bya banu ba kusungama.
Liboko lya Yehova lya cilyo lili na kumwesa nzili yalyo.
16 Liboko lya Yehova lya cilyo lili na kulijundula likelyo babenya.
Liboko lya Yehova lya cilyo lili na kumwesa nzili yalyo.
17 Kunjitsi embwe, njitwalelelaho kuyoya,
Mangana njambulule bipangi bya Jah.
18 Jah wanjitenukilile manene,
Oloni kanjecelelele njitse.
19 Njishokolweleni bikolo bya kusungama,
Njikobelamo na kushangazala Jah.
20 Eci cikeco cikolo ca Yehova.
Munu wa kusungama akobelamo.
21 Njikushangazala mwafwa wanjikumbulwile
Na kupwa mwobole wange.
22 Limanya libabyanene baka-kutunga
Likelyo linapu limanya lya seho lya mu mbango.*
23 Yehova ikeye nalingi eci cuma.
Co cinapu ca kukomokesa mu mesho etu.
24 Eli likelyo litangwa lyanabwahesa Yehova.
Tubwahelela na kulisamba ha litangwa eli.
25 Obe Yehova, twobole, shukulu-kambu, tukulomba!
Obe Yehova, tukwase tuhyane, shukulu-kambu!
26 Nabezika uje aija mu lizina lya Yehova.
Tumilombela bibezikiso bya mu njibo ya Yehova.
27 Yehova ikeye Njambi.
Ikeye muka-kutwana ceke.
Kobeleni ha cendo ca baje bali na kuya ku cilika oku banakwata minango mu maboko abo,
Kuketa bene na ku mambinga a mutula.
28 Yobe Njambi, co njikushangazala.
Njambi yange, njikuzumbangeya.
29 Kandeleleni Yehova mwafwa wapwa wamubwa.
Cizemo cendi cije kucesi kutenguluka cakalako myaka yoshe.