Samu
Kuli muka-kutwamenena. Samu ya Devidi. Mwaso.
68 Njambi akatuke, bitozi bendi balishandangane,
Co baje bamuzinda batewe ku mesho endi.
2 Ngwe bwisi mubukapekumuka, nabo bapekumune.
Ngwe sela muikasangunuka ku tuhya,
Banu bababi nabo banyonge ku mesho a Njambi.
3 Oloni banu ba kusungama babwahelele.
Babwahelele manene ku mesho a Njambi.
Balisambe mu kubwahelela.
4 Imbileni Njambi, imbeni myaso ya kushangazala lizina lyendi.
Imbileni uje aita mu byana bya mu mambo.*
Jah* likelyo lizina lyendi. Bwaheleleni ku mesho endi!
5 Njambi, uje wakala mu mwela wendi wa kujela
Ikeye ishe ya baje kubesi na baishabo na muka-kunyungilila* bifwile.
6 Njambi ana baje bali likalyabo limbo lya kukala.
Apatula mapanditi na kulingisa byuma bibendele bwino.
Oloni baje bakatindibala* banapande kukala mu lifuti lya kuma cau.
7 Obe Njambi, muwatwamenenene banu bobe,
Muwetile mu mambo, (Sela)
8 Lifuti-libu lyajajele,
Lilu lyanyokesele nyonzi yakama mwafwa ya Njambi,
Sinai yajajele mwafwa ya Njambi, Njambi ya Isalele.
9 Wanyokesele nyonzi yaingi, obe Njambi.
Wakanyamesele banu* bobe baje bajukile.
10 Bakele mu cilombo cobe ca bitenti.
Mwafwa ya bubwa bwobe, wanene tuhutu byuma bibatondele, obe Njambi.
11 Yehova nana lishiko.
Banakazi baje bali na kwambulula muzimbu waubwa banapu mbunga yakama.
12 Bimyene na maswalale babo batewa, batewa!
Munakazi uje nasala ha njibo nendi awanako mutamba ku byuma bibanapukula.
13 Nameme yeni banalume mwalalele mukati ka tuhya twa mu cilombo,*
Mukatambula liyembe wa mambaba a siuva
Na mambaba a goldi yaibwa.
14 Muka-nzili Yoshe mwashandanganene bimyene ba muje mu lifuti,
Mema a kukonda anyokele mu Zaumoni.*
15 Munkinda wa Bashani wapwa munkinda wa Njambi.*
Munkinda wa Bashani wapwa munkinda wa mitwe yaingi.
16 Eni minkinda ya mitwe yaingi, bika bimutalela na cipululu
Munkinda wanangula* Njambi ngwendi akaleho?
Cili bene Yehova akalaho myaka yoshe.
17 Matemba a Njambi a nzita anapu makulukazi a makulukazi.
Yehova naija mu mwela wa kujela kutunda ku Sinai.
18 Wakandukile.
Waile na bafunge.
Wambatele banalume kupwa bwana,
Eyo, nameme bene banu ba kutindibala mangana ukale mukati kabo, obe Jah, Njambi.
19 Yehova bamushangazale uje akambata citele cetu litangwa na litangwa,
Njambi wa busunga, mwobole wetu. (Sela)
20 Njambi wa busunga wapwa Njambi uje akatwobola
Co Yehova, Mwata Wahakamwa ya Byoshe akobola banu ku kutsa.
21 Eyo, Njambi atika mitwe ya bitozi bendi,
Atika cikola ca munu woshe uje atwalelelaho kukala* na mulonga.
22 Yehova nendeka ngwendi: “Njibatundisa ku Bashani.
Njibatundisa ku masima a kalunga-ndonga,
23 Mangana lindi lyobe licabwangele mu maninga a bitozi bobe
Na bindaka bya tutali bobe bikape maninga a bitozi.”
24 Bamona byendo bya banu bobe, obe Njambi,
Byendo bya banu ba Njambi yange, banu ba Mwene yange, baya mu mwela wa kujela.
25 Kulutwe kuli baka-kwimba myaso, co kunima kuli baka-kwimba bisanzi bya mikole,
Hakati hali bambanda baje bali na kwimba tungoma.
26 Shangazaleni Njambi mu mbunga ije inalikungulula.
Shangazaleni Yehova, yeni boshe mwatunda kuli Isalele.
27 Benjamini, uje wapwa mutinikila ali na kubayula,
Hamolika na bamyata ba Juda na mbunga yabo ije ili na kuliuya,
Na bamyata ba Zebuloni na bamyata ba Nafutali.
28 Njambi nashiki ngwendi ukala na nzili.
Mwesa nzili yobe, obe Njambi, yobe unatukwasa.
29 Bimyene bakanena bwana kuli yobe,
Mwafwa ya tempele yobe ili mu Jelusalema.
30 Tenukila bikashama ba mu mahongo,
Cibunga ca bingombe ba nkomba na bana babo,
Kweta noho miyati ya banu bakatsikama na kunena* bimbongo bya siuva.
Oloni ashandangana miyati ya banu baje bazema nzita.
31 Byuma bya kopa bakabinena* kutunda ku Ijipiti.
Kushi akalusuka kwana bwana kuli Njambi.
32 Bumwene bwa hasi bwimbile Njambi,
Imbileni Yehova myaso ya kumushangazala. (Sela)
33 Imbileni uje akendela ha lilu lya melu lya kusañulu.
Taleni! Aluma na lijwi lyendi, lijwi lyendi lya nzili.
34 Shangazaleni Njambi mwafwa ya nzili yendi.
Bukama bwendi buli helu lya Isalele,
Co nzili yendi ili mu bukambwila.*
35 Njambi wapwa wa kukomokesa mu mwela wendi wa kujela, wa kukomokesa wakama.
Ikeye Njambi ya Isalele,
Uje akakanyamesa banu bendi na kubana nzili.
Shangazaleni Njambi.